“Ayaw Pagsalig sa Kaugalingon Mong Pagsabot”

“Salig kang Jehova sa bug-os mong kasingkasing ug ayaw pagsalig sa kaugalingon mong pagsabot.”—PROV. 3:5.

1, 2. (a) Unsang mga kahimtang ang posible natong maatubang? (b) Dihang mag-atubag lisod nga kahimtang, mohimog bug-at nga desisyon, o makigbisog sa tentasyon, kang kinsa kita mosalig, ug ngano?

UBAY-UBAY nang trabahante ang gipanangtang sa gitrabahoan ni Cynthia. * Siya naghunahuna nga basig siya nay sunod. Unsay iyang himoon kon mawad-an siyag trabaho? Unsaon na lang ang iyang mga bayranan? Ang laing sister nga si Pamela gustong mobalhin sa dapit nga nanginahanglag dugang magsasangyaw, apan angay kaha siyang mobalhin? Lain usab ang problema ni Samuel. Sa bata pa, siya naladlad sa pornograpiya. Karon nga mga 20 anyos na siya, kusog ang tentasyon nga mobalik sa maong bisyo. Unsaon niya kini pagsukol?

² Kang kinsa ka mosalig dihang makaatubag lisod nga kahimtang, mohimog bug-at nga desisyon, o makigbisog sa tentasyon? Mosalig ka lang ba sa kaugalingon, o imong “itugyan ang imong palas-anon kang Jehova”? (Sal. 55:22) Ang Bibliya nag-ingon: “Ang mga mata ni Jehova gipunting sa mga matarong, ug ang iyang mga igdulungog gikiling sa ilang pagtuaw alang sa tabang.” (Sal. 34:15) Nan, hinungdanon nga kita mosalig kang Jehova sa bug-os kasingkasing ug dili sa kaugalingong pagsabot!—Prov. 3:5.

3. (a) Unsay nalangkit sa pagsalig kang Jehova? (b) Unsay nagtukmod sa uban nga mosalig sa kaugalingong pagsabot?

³ Ang pagsalig kang Jehova sa tibuok kasingkasing nalangkit sa pagbuhat sa mga butang sumala sa iyang paagi o kabubut-on. Makatabang gayod ang padayong pag-ampo kaniya ug ang kinasingkasing nga paghangyo sa iyang giya. Apan daghan ang nalisdan sa pagsalig kang Jehova sa bug-os. Pananglitan, usa ka sister nga si Lynn miingon, “Lisod para nako nga mosalig kang Jehova sa bug-os.” Ngano? Siya mipadayon, “Nagdako ko nga way amahan, ug ang akong inahan wala magtagad nako. Busa naanad ko nga mosalig ra sa kaugalingon.” Tungod niini, nalisdan si Lynn nga bug-os mosalig sa uban. Ang katakos ug kalamposan magtukmod usab sa usa nga mosalig lang sa kaugalingon. Tungod sa kasinatian, ang usa ka ansiyano mahimong mag-asikaso sa mga buluhaton sa kongregasyon nga dili una moampo sa Diyos.

4. Unsay hisgotan niini nga artikulo?

⁴ Gidahom ni Jehova nga molihok gayod kita sumala sa atong giampo ug sa iyang kabubut-on. Nan, unsaon nato pagtugyan kaniya ang atong mga kabalaka ug sa samang higayon maningkamot sa pagsulbad sa lisod nga mga problema? Dihang mohimog mga desisyon, unsay angay natong bantayan? Nganong hinungdanon ang pag-ampo sa dihang makigbisog sa mga tentasyon? Tubagon kining mga pangutanaha pinaagi sa paghisgot sa pipila ka panig-ingnan sa Bibliya.

Dihang Anaa sa Lisod nga Kahimtang

5, 6. Unsay gihimo ni Ezequias dihang gihulga sa hari sa Asirya?

⁵ Bahin kang Haring Ezequias sa Juda, ang  Bibliya nag-ingon: “Siya nagpadayon sa pag-unong kang Jehova. Siya wala motipas sa pagsunod kaniya, apan siya nagpadayon sa pagtuman sa iyang mga sugo nga gisugo ni Jehova kang Moises.” Oo, “kang Jehova nga Diyos sa Israel siya misalig.” (2 Hari 18:5, 6) Unsay gihimo ni Ezequias dihang si Haring Senakerib sa Asirya nagpadalag mga hawas—lakip kang Rabsake—ngadto sa Jerusalem uban ang daghan kaayong sundalo? Ang kasundalohan sa Asirya nakapildi nag daghang kinutaang siyudad sa Juda, ug ang Jerusalem mao nay puntirya ni Senakerib. Si Ezequias miadto sa balay ni Jehova ug miampo: “Oh Jehova nga among Diyos, luwasa kami, palihog, gikan sa iyang kamot, aron nga ang tanang gingharian sa yuta mahibalo nga ikaw, Oh Jehova, mao lamang ang Diyos.”—2 Hari 19:14-19.

⁶ Si Ezequias milihok sumala sa iyang giampo. Gani una siya miadto sa templo aron moampo, giingnan niya ang mga tawo nga dili tubagon ang pagbiaybiay ni Rabsake. Si Ezequias nagpadala usab ug mga tawo kang propeta Isaias aron magpakitambag. (2 Hari 18:36; 19:1, 2) Gibuhat ni Ezequias kon unsa lay angayng himoon. Wala siya mangitag solusyon nga supak sa kabubut-on ni Jehova pinaagi sa pagpangayog tabang sa Ehipto o sa silingang mga nasod. Inay mosalig sa kaugalingong pagsabot, siya misalig kang Jehova. Human patya sa manulonda ni Jehova ang 185,000 ka sundalo ni Senakerib, si Senakerib “mibiya” ug mibalik sa Nineve.—2 Hari 19:35, 36.

7. Nganong makapahupay kanato ang mga pag-ampo ni Ana ug Jonas?

⁷ Si Ana, nga asawa sa Levihanong si Elkana, naguol pag-ayo kay dili makaanak apan siya misalig usab kang Jehova. (1 Sam. 1:9-11, 18) Si propeta Jonas giluwas gikan sa tiyan sa dakong isda human siya miampo: “Tungod sa akong kasakit ako misangpit kang Jehova, ug siya mitubag kanako. Gikan sa tiyan sa Sheol ako nagpakitabang. Ikaw nagpatalinghog sa akong tingog.” (Jon. 2:1, 2, 10) Makapahupay gayod ang pagkahibalo nga bisan unsa pa ka lisod ang atong kahimtang, kita makaampo kang Jehova “alang sa pabor”!—Basaha ang Salmo 55:1, 16.

8, 9. Unsay hinungdanon kang Ezequias, Ana, ug Jonas dihang sila nag-ampo? Unsay atong makat-onan niini?

⁸ Ang panig-ingnan ni Ezequias, Ana, ug Jonas nagtudlo usab kanato kon unsay dili angayng kalimtan samtang kita mag-ampo dihang naa sa lisod nga kahimtang. Bisag nag-antos, ang ilang mga pag-ampo nagpakita nga wala lamang sila nabalaka sa kaugalingon ug sa ilang mga problema. Ang labing hinungdanon kanila mao ang ngalan sa Diyos, ang pagsimba kaniya, ug ang pagbuhat sa iyang kabubut-on. Si Ezequias nasakitan dihang gipasipalahan ang ngalan ni Jehova. Si Ana misaad nga itanyag ang iyang gipangandoy pag-ayong anak sa pag-alagad sa tabernakulo sa Shilo. Ug si Jonas miingon: “Kon unsa ang akong gipanaad, akong pagabayran.”—Jon. 2:9.

⁹ Dihang moampo alang sa tabang tungod sa usa ka lisod nga problema, maalamon nga atong susihon ang atong motibo. Naghunahuna lang ba kita sa solusyon niana, o naghunahuna usab kita kang Jehova ug sa iyang katuyoan? Tungod sa problema, kita mahimong maghunahuna na lang sa kaugalingon ug malimtan na ang espirituwal nga mga butang. Dihang mag-ampo alang sa tabang, dili nato kalimtan si Jehova, ang pagbalaan sa iyang ngalan, ug ang pagbindikar sa iyang pagkasoberano. Kon buhaton nato kana, kita magpabiling positibo bisan pag dili mahitabo ang solusyon nga atong gidahom. Ang tubag tingali sa atong mga pag-ampo mao ang kusog nga gikinahanglan sa paglahutay sa problema.—Basaha ang Isaias 40:29; Filipos 4:13.

 Dihang Mohimog Desisyon

10, 11. Unsay gihimo ni Jehosapat dihang nakaatubag lisod nga situwasyon?

¹⁰ Unsaon nimo paghimog bug-at nga desisyon? Ikaw ba modesisyon daan ayha moampo kang Jehova nga panalanginan kana? Tagda ang gibuhat ni Jehosapat nga hari sa Juda dihang misulong ang nagkahiusang kasundalohan sa Moab ug Ammon. Walay dag-anan ang Juda. Unsay gibuhat ni Jehosapat?

¹¹ Ang Bibliya nag-ingon: “Si Jehosapat nahadlok ug nagpunting sa iyang nawong sa pagpangita kang Jehova.” Iyang gisugo ang tanang tawo sa Juda nga magpuasa ug gitigom sila “sa pagpakisayod kang Jehova.” Dayon siya mitindog taliwala sa katawhan sa Juda ug sa Jerusalem ug miampo: “Oh among Diyos, dili ba ikaw magpahamtang ug paghukom nganha kanila? Kay dinhi kanamo walay gahom atubangan niining dakong panon sa katawhan nga mianhi batok kanamo; ug wala kami mahibalo kon unsay angay namong buhaton, apan ang among mga mata gipunting nganha kanimo.” Gidungog sa matuod nga Diyos ang pag-ampo ni Jehosapat ug giluwas sila. (2 Cron. 20:3-12, 17) Dihang mohimog desisyon, ilabina kon makaapektar sa atong espirituwalidad, dili ba angayng mosalig kita kang Jehova inay sa kaugalingong pagsabot?

12, 13. Unsay atong makat-onan kang Haring David bahin sa paghimog desisyon?

¹² Unsay atong himoon dihang makaatubag situwasyon nga daw sayon sulbaron? Tingali tungod sa atong kasinatian makahunahuna dayon kitag solusyon. Ang usa ka asoy bahin kang Haring David makatabang nato niining bahina. Dihang gisulong sa mga Amalekanhon ang siyudad sa Ziklag, ilang gibihag ang mga asawa ug anak ni David ingon man nianang sa iyang mga tawo. Siya mikonsulta kang Jehova: “Mogukod ba ako niining pundok sa mga bandido?” Si Jehova mitubag: “Gukod, kay maapsan mo gayod sila, ug ikaw sa walay pakyas makahimo sa pagluwas.” Si David misunod, ug iyang ‘nabawi ang tanan nga nakuha sa mga Amalekanhon.’—1 Sam. 30:7-9, 18-20.

¹³ Human sa pagsulong sa mga Amalekanhon, ang mga Filistehanon misulong sa Israel. Si David mikonsulta pag-usab kang Jehova ug nakadawat ug klarong tubag. Ang Diyos miingon: “Tungas, kay ako sa walay pakyas magtugyan sa mga Filistehanon sa imong kamot.” (2 Sam. 5:18, 19) Wala madugay, ang mga Filistehanon misulong na usab. Unsay himoon ni David? Pwede siyang moingon: ‘Kaduha na ko nakaagi ini. Mosulong ko sa mga kaaway sa Diyos sama sa akong gihimo sa una.’ O si David ba mokonsulta kang Jehova? Si David wala mosalig sa iyang kasinatian. Siya miampo pag-usab kang Jehova. Dako kaayo niyang pasalamat nga iya kanang gibuhat! Lahi ang instruksiyon nga iyang nadawat niining higayona. (2 Sam. 5:22, 23) Kon makaatubang kitag pamilyar nga situwasyon o problema, kinahanglang magbantay kita nga dili mosalig sa atong kasinatian lamang.—Basaha ang Jeremias 10:23.

14. Unsay atong makat-onan sa pagpakiglabot ni Josue ug sa mga ansiyano ngadto sa mga Gabaonhon?

¹⁴ Kay dili hingpit, kitang tanan—bisan ang dugay nang mga ansiyano—kinahanglang dili malimot nga magpagiya kang Jehova dihang mohimog desisyon. Tagda ang gihimo sa manununod ni Moises nga si Josue ug sa mga ansiyano sa Israel dihang miabot ang maalamong mga Gabaonhon nga nagpakaaron-ingnong gikan sa halayong dapit. Si Josue ug ang iyang mga kauban nakigdait dayon sa mga Gabaonhon ug mihimog pakigsaad kanila nga wala gani mokonsulta kang Jehova. Bisag gisuportahan ra ni Jehova ang maong pakigsaad, gitino niya nga kining pagkapakyas sa pagpangayog giya kaniya marekord sa Bibliya alang sa atong kaayohan.—Jos. 9:3-6, 14, 15.

 Dihang Makigbisog sa mga Tentasyon

15. Ipatin-aw kon nganong ang pag-ampo hinungdanon sa pagsukol sa tentasyon.

¹⁵ Sanglit ang “balaod sa sala” anaa man kanato, kinahanglang makigbugno kita sa makasasalang mga hilig. (Roma 7:21-25) Kita makadaog niini. Sa unsang paagi? Giingnan ni Jesus ang iyang mga sumusunod nga hinungdanon ang pag-ampo sa pagsukol sa tentasyon. (Basaha ang Lucas 22:40.) Bisag magpabilin ang sayop nga mga tinguha ug hunahuna human kita moampo sa Diyos, kita kinahanglang ‘magpadayon sa pagpangayo sa Diyos’ ug kaalam sa pagsukol niini. Makasalig kita nga ‘siya mohatag nga madagayaon ngadto sa tanan ug dili mamuyboy.’ (Sant. 1:5) Si Santiago misulat usab: “Aduna bay masakiton [sa espirituwal] kaninyo? Magpatawag siyag mga ansiyano sa kongregasyon, ug paampoa sila alang kaniya, nga maghaplas kaniya ug lana sa ngalan ni Jehova. Ug ang pag-ampo sa pagtuo mag-ayo sa usa nga naluya.”—Sant. 5:14, 15.

16, 17. Dihang mangayog tabang sa pagsukol sa tentasyon, kanus-a ang labing maayong panahon nga moampo?

¹⁶ Ang pag-ampo hinungdanon sa pagsukol sa tentasyon, apan kinahanglang mahibalo kita kon kanus-a angayng moampo. Tagda ang nahitabo sa batan-ong lalaki nga gihisgotan sa Proverbio 7:6-23. Sa kilumkilom na, siya naglakaw sa dalan diin nahibalo siya nga may nagpuyong pampam. Kay nadani sa gipanulti sa babaye, siya misunod kaniya sama sa usa ka torong baka nga nagpaingon sa ihawan. Nganong miagi man didto ang maong lalaki? Sanglit ang iyang “kasingkasing nakulangan,” sa ato pa kulag kasinatian, siya tingali nakigbisog sa sayop nga mga tinguha. (Prov. 7:7) Kanus-a unta nga labing makatabang kaniya ang pag-ampo? Tinuod mapuslanon ang pag-ampo sa panahon nga anaa na ang tentasyon. Apan ang labing maayong panahon unta nga siya mag-ampo maoy sa dihang iyang nahunahunaan ang pag-agi sa maong dalan.

¹⁷ Karon, ang usa ka tawo lagmit naningkamot sa paglikay sa pagtan-awg pornograpiya. Apan ibutang ta nga moabli siyag site sa Internet nga iyang nahibaloang may law-ayng mga hulagway o video. Dili ba kini sama sa batan-ong lalaki sa Proverbio kapitulo 7? Peligroso gayod kini! Aron masuklan ang tentasyon sa pagtan-awg pornograpiya, ang usa kinahanglang moampo alang sa tabang ni Jehova sa dili pa mosulod sa maong site sa Internet.

18, 19. (a) Nganong lisod ang pagsukol sa tentasyon, apan unsaon nimo kini pagbuntog? (b) Unsay imong determinasyon?

¹⁸ Lisod ang pagsukol sa tentasyon o pagbuntog sa dili maayong bisyo. Si apostol  Pablo misulat: “Ang unod batok sa tinguha sa espiritu, ug ang espiritu batok sa unod.” Busa “ang mga butang mismo nga buot [natong] buhaton wala [nato] buhata.” (Gal. 5:17) Aron mabuntog kini, kinahanglang tim-os kitang moampo sa dihang mosantop sa hunahuna ang sayop nga tinguha o tentasyon ug dayon molihok uyon sa atong pag-ampo. “Walay tentasyon nga midangat kaninyo gawas nianang sagad sa mga tawo,” ug sa tabang ni Jehova, kita makapabiling matinumanon.—1 Cor. 10:13.

¹⁹ Kita man nag-atubag lisod nga kahimtang, mohimog bug-at nga desisyon, o nakigbisog sa tentasyon, si Jehova naghatag kanatog talagsaong gasa—ang pag-ampo. Pinaagi niini, atong ikapakita ang atong pagsalig kaniya. Angay usab nga padayon kitang mohangyo sa Diyos alang sa iyang balaang espiritu sa paggiya ug paglig-on kanato. (Luc. 11:9-13) Busa mosalig gayod kita kang Jehova, dili sa atong kaugalingong pagsabot.

[Footnote]

Nahinumdom Ka Ba?

• Unsay imong nakat-onan kang Ezequias, Ana, ug Jonas bahin sa pagsalig kang Jehova?

• Sa panig-ingnan ni David ug Josue, nganong angayng magbantay dihang mohimog desisyon?

• Bahin sa tentasyon, kanus-a kita angayng moampo?

[Mga Pangutana sa Pagtuon]

[Hulagway sa panid 9]

Sa pagsukol sa tentasyon, kanus-a ang labing maayong panahon nga moampo?