“Amayá confiakuychu kikikipa entiendesqallaykipiqa”

“Diosllapiyá confiakuy tukuy sonqoykiwanqa.Amayá confiakuychu kikikipa entiendesqallaykipiqa” (PRO. 3:5).

1, 2. a) ¿Ima sasachakuykunapim tarikuchwan? b) Ancha sasachakuypi tarikuspa, imatapas tanteaspa otaq tentacionpi tarikuspapas, ¿pimanmi asuykuna hinaspa imanasqa?

CLAUDIAPA * patronninqa wakin tiendankunataqa wichqarunñam, hinaspam wakin llamkaqkunatapas qarqorunña. Chaymi payqa piensan paytapas huk kaqninpi qarqorunanmanta. ¿Imatam ruranqa llamkayninmanta horqoruptinkuqa? ¿Imaynatam kawsanqa? Pamela sutiyoq cristianam mana ancha predicaqkunapa kasqanman astakuyta munan. Ichaqa, ¿allinchu kanman chay rurasqan? 20 watayoq Samuel mozoñataqmi huk sasachakuypi tarikun. Warmacha kasqanmantapacham millakuypaq qalalla kaqkunata qawarqa, chaymi kaqmanta qawayta munaspan sasachakuchkan, ¿imaynatam chay sasachakuyta atipanman?

² ¿Pimantaq asuykunchik ancha sasachakuypi tarikuspa, imatapas tanteaspa otaq tentacionkunata atipaspapas? ¿Kikillanchikpichu confiakunchik, icha Jehová Diospichu? (Sal. 55:22.) Bibliam nin: ‘Diosqa cuidaykuchkanmi allin ruraq runataqa. Tayta Diosqa uyarintaqmi mañakusqankunatapas’, nispa (Sal. 34:15). Chaynaqa, yachasqallanchikpi confianamantaqa ancha allinmi tukuy sonqonchikwan Diospi confiakuyninchikqa (Pro. 3:5).

3. a) ¿Ima ninantaq Jehová Diospi tukuy sonqowan confiayqa? b) ¿Imanasqataq wakinkuqa kikinkupa piensasqankuman hinalla ruranmanku?

³ Jehová Diospi tukuy sonqowan confiaspaqa munasqanman hinam imatapas rurasun. Chaypaqqa yanapakuynintam haykapipas mañakunanchik. Wakinpiqa achka cristianokunam sasachakunku tukuy sonqonkuwan Diospi confiakuyta. Linda sutiyoq cristianamanta rimasun, paymi nin: “Ñoqaqa tukuy sonqowan Diospi confianaypaqmi sapakuti sasachakurqani”, nispa. ¿Imanasqa? Ninmi: “Manam taytayta reqsinichu, mamayñataqmi mana imapipas yanapawarqachu. Chaymi warmacha kasqaymantapacha sapallay karqani”, nispa. Chayna kawsasqanraykum Lindaqa hukkunapi confiananpaq sasachakun. Imapas ruray atisqanchikwan otaq yachasqanchikwanpas piensachwanmi manaña pipapas yanapakuyninta necesitasqanchikta. Ancianopas yachasqallanpi confiaspanmi Diospa yanapakuyninta manaña mañakuspan congregacionpi sasachakuykunata allichayta qallaykunman.

4. ¿Imamantam kay yachachikuypi yachasunchik?

⁴ Jehová Diosqa munanmi sapa kuti mañakunanchikta hinaspa chayman hina rurananchiktapas. ¿Imaynatam sasachakuyninchikta Diosman willakuspapas kallpanchakuchwan allichanapaq? ¿Imatam mana rurananchikchu imatapas tanteaspaqa? ¿Imanasqam ancha allin Diosta mañakuyninchik tentacionpi tarikuspanchikqa? Qatiqninpim kay tapukuykunamanta yachasun Bibliapa willakusqanman hina.

Hatun llakipi tarikuspa

5, 6. ¿Imaynam Ezequiasqa tarikurqa Asiria nacionpa kamachiqnin amenazaptin?

⁵ Rey Ezequiasmanta rimaspanmi Bibliaqa  nin: “Diosman confiakuykuspanmi paymanta mana rakikurqachu, payqa Moisesman Tayta Diospa qosqan kamachikuykunatam kasukurqa”, nispa. Arí, ‘Israelpa yupaychasqan Tayta Diospim Ezequiasqa confiakurqa’ (2 Rey. 18:5, 6). ¿Imaynataq Ezequiasqa tarikurqa Asiriapa reynin Senaquerib tropankunapa kamachiqninta hinaspa hukkunatapas achka tropakunawan Jerusalenman kachamuptin? Ezequiasqa Jehová Diospa wasinman rispanmi kaynata mañakurqa: “Dios Taytalláy, qamllatam ruegakullayki, qamlla Dios kasqaykita kay pachapi llapallan nacionkuna yachanankupaqyá Rey Senaqueribmanta salvaykullawayku”, nispa (2 Rey. 19:14-19).

⁶ Ezequiasqa mañakusqanman hinam rurarqa. Jehová Diosta mañakunanpaq temploman manaraq yaykuchkaspanmi, runankunata kamachirqa Asiria tropakunapa kamachiqnin amenazaptin mana imatapas ninankupaq. Chaymantapas wakin runankunatam kamachirqa Diosmanta willakuq Isaiaspa consejonta mañakunankupaq (2 Rey. 18:36; 19:1, 2). Ezequiasqa Diospa nisqantamá rurarqa. Payqa manam Egipto nacionpa chaynataq huk nacionkunapa yanapakuynintaqa maskarqachu nitaq kikillanpa yachasqallanpichu hapipakurqa, aswanmi Diospa munasqanman hina rurarqa. Payqa Diospim confiakurqa. Jehová Diospa angelnin 185.000 Asiria soldadokunata wañurachiptinmi, Senaqueribqa Ninive llaqtaman kutikurqa (2 Rey. 19:35, 36).

7. ¿Ima consuelotam tarinchik Anapa chaynataq Jonaspa mañakuyninkupi?

⁷ Elcanapa señoran Anapas mana wachakuq kasqanwan llumpay hukmanyasqa tarikuspanmi Jehová Diospi hapipakurqa (1 Sam. 1:9-11, 18). Diosmanta willakuq Jonaspas hatun challwapa ukunpi kaspanmi Diosta mañakurqa: “Dios Taytalláy, sasachakuypi kaspaymi qayakamurqayki hinaptinmi qamñataq contestaykuwarqanki”, nispa (Jon. 2:1, 2, 10). Ancha kusikuypaqmi maynaña sasachakuyninchik kaptinpas, ‘ruegakuspanchik’ Jehová Diosman asuykuyninchikqa (leey Salmo 55:1, 16).

8, 9. ¿Imapim Ezequiaspas, Anapas, Jonaspas mañakuyninkupi astawan repararqaku? ¿Imatam chaymanta yachachwan?

⁸ Chaymantapas Ezequiaspa, Anapa chaynataq Jonaspa ejemplonkunaqa yachachiwanchikmi sasachakuypi tarikuspa Dios mañakuyta mana qonqananchikmanta. Kimsankum llumpay sasachakuypi tarikurqaku, chayna kaptinpas sasachakuyninkumantawan kikillankupaq mañakunankumantaqa, mañakurqakum Diospa sutinwan yupaychaynin hatunchasqa kananpaq hinaspa munaynin cumplikunanpaqpas. Ezequiastaqa anchatam llakichirqa Diospa sutinta penqaypi churasqanku. Anapas prometekurqam kuyasqan wawan, Silo karpapi Diosta servinanpaq. Jonaspas nirqam: “Cumplisaqpunim prometekusqaytaqa”, nispa (Jon. 2:9).

⁹ Hatun sasachakuymanta librawananchikpaq Diosta mañakuspaqa, yachananchikmi imarayku mañakusqanchikta. ¿Yaqachu piensanchik Jehová Diospi hinaspa munayninpi, icha sasachakuyninchik allichayllapichu? Ñakarisqanchikrayku kikillanchikpiña piensayta qallarispam Dios serviyninchiktapas qepapiña churaruchwan. Diosta yanapawananchikpaq mañakuspaqa, manam qonqananchikchu sutin chuyanchasqa kananpaq nitaq kamachinanpaq derechon defiendesqa kananpaq mañakuytaqa. Kaykunam yanapawasun allin kaqkunapi piensanapaq mañakusqanchik munasqanchikman hina manaña rurakuptinpas. Wakinpiqa Jehová Diosmi uyariwanchik sasachakuykunata aguantanapaq kallpata qowaspanchik (leey Isaias 40:29; Filipenses 4:13).

 Imatapas tanteaspa

10, 11. ¿Imatam Josafat rurarqa sasachakuypi tarikuspan?

¹⁰ ¿Imaynatam qamqa imatapas tanteanki? ¿Tantearuspaykiñachu yanapasunaykipaq Diosta mañakunki? Juda llaqtapa reynin Josafat ima rurasqanmanta qawasun. Moab tropakunawan Amon tropakuna hukllawakuruspanku peleanankupaq niptinkum payqa manchakurqa. Hinaptinqa, ¿imatam Josafatqa rurarqa?

¹¹ Bibliam nin: “Josafat mancharikuspan Tayta Diosta mañakurqa yanapananpaq”, nispa. Kamachirqam Judapi lliw ayllukunawan ayunanankupaq hinaspa ‘Diospa yanapakuyninta mañakunankupaqpas’. Hinaspam Josafatqa Juda hinaspa Jerusalen runakunapa qayllanpi sayariruspan kaynata mañakurqa: “¡Diosnillayku! ¿Manachum paykunataqa castiganki? Manam ñoqaykupaqa kanchu kallpayku kay achka-achkallaña atacaqniyku runakunamanta defiendekunaykupaq, manataqmi ima ruraytapas atinikuchu chaymi qamllaman hapipakamuniku yanapaykuwanaykikupaq”, nispa. Diosqa uyariykurqam reypa mañakusqantaqa hinaspam libraykurqa (2 Cro. 20:3-12, 17). Imapas tanteasqanchik Dioswan amistadninchikta yanqacharunanpaq hina kaptinqa, manam yachasqallanchikpichu hapipakuna aswanmi Jehová Diospi.

12, 13. ¿Imatam rey Davidpa rurasqanmanta yachachwan?

¹² ¿Imatam rurananchik ñawpaqpi huk sasachakuyta allichasqanchikrayku kunanpas chaylla allichanapaq hina rikchakuwaptinchik? Chaypaqqa qawasunyá rey Davidta ima pasasqanmanta. Amalec runakuna Siclag llaqtaman yaykuruspankum, Davidpa chaynataq wakin runankunapa señorankutawan churinkunatapas aparurqaku. Davidmi Jehová Diosta kaynata mañakurqa: “¿Qatisaqchu icha manachu chay saqueaq runakunata?”, nispa. Diosñataqmi nirqa: “¡Qatiypuni, paykunataqa hayparunkim hinaspam presokunatapas libramunkitaq!”, nispa. Chaymi ‘Davidqa kutichimurqa Amalec casta runakunapa tukuy ima apasqanta’ (1 Sam. 30:7-9, 18-20).

¹³ Tiempopa risqanman hinam Filistea runakunapas Israel nacionman yaykurqaku. Davidqa kaqmantam Diosta mañakurqa, hinaptinmi Diosñataq nirqa: “Riypuniyá, Filistea runakunataqa makikimanmi churamusaq”, nispa (2 Sam. 5:18, 19). Ichaqa kaqmantam Filistea runakunaqa Davidwan peleanankupaq lloqsimurqaku. ¿Imatam Davidqa rurarqa? Payqa ninmanpaschá karqa: “Kayqa iskay kutikamañam pasaruwan. Chaynaqa rispayá peleamusaq”, nispan. Hinaptinqa, ¿yaqachu chaynata rurarqa icha Diospa yanapakuynintachu maskarqa? Davidqa manamá yachasqallanpichu hapipakurqa aswanmi kaqmanta Diosta mañakurqa. Chay rurasqanqa allinmi karqa, chay kutipiqa manam hina kaqllatachu Diosqa kamachirqa (2 Sam. 5:22, 23). Chaynaqa, imapas sasachakuyninchikta ñawpaqpi allicharuspaqa, manam chayraykuchu kikillanchikpiqa confiakunanchik (leey Jeremias 10:23).

14. ¿Imatam yachachiwanchik Josueywan Israelpi ancianokunapa rurasqanku?

¹⁴ Llapallanchikmi pantaq kanchik ancianoña kaspapas, chaymi imatapas tanteaspaqa Diospa yanapakuyninta maskananchik. Piensasun Gabaon runakuna Josueyman hinaspa Israelpi ancianokunaman hawkayayta maskaq tukuspanku yaykuruptinku imam rurasqankupi. Gabaon runakunam karu nacionmanta kasqankuta qawachinankupaq hukniraqta pachakururqaku. Jehová Diospa yanapakuyninta mana mañakuspankum, Josueywan runankunaqa hawka kawsanankupaq contratota rurarurqaku. Chay rurasqankupa contranpi Jehová Dios mana churakuspanpas, mana mañakuspa rurasqankutaqa Palabranpim allinninchikpaq qellqachirqa (Jos. 9:3-6, 14, 15).

 Tentacionkunapi tarikuspa

15. ¿Imanasqam ancha allin tentacionkunapi tarikuspa Diosta mañakuyqa?

¹⁵ Huchallikuq kasqanchikraykum, kallpanchakunanchik mana allin munaykunata atipanapaq (Rom. 7:21-25). Ichaqa, ¿imaynatam chayta rurachwan? Jesusmi qatiqninkunata nirqa tentacionkunata atipanankupaq sapa kuti Diosta mañakunamanta (leey Lucas 22:40). Mañakusqanchik qepata mana allin munaykunawan piensaykunapas hinalla kaptinqa, yachayta qowananchikpaqmi Diosta hinalla mañakunanchik. Santiagopa nisqanman hinaqa, Diosqa “lliw mañakuqninkunamanqa mana piñakuspam chaninninpi qoykun” (Sant. 1:5). Nintaqmi: “Mayqannikichikpas [iñiynikichikpi] onqosqa kaspaqa iñiqkuna ukupi ancianokunatayá qayaychik chaynapi Diosta mañapususpaykichik Señorpa sutinpi aceitewan untasunaykichikpaq. Confiakuspa mañakuptinkuqa Señormi onqoqta sanoyachispa sayarirachinqa”, nispa (Sant. 5:14, 15).

16, 17. ¿Haykapitaq Diospa yanapakuyninta maskananchik tentacionkunata atipanapaq?

¹⁶ Tentacionkunapi tarikunanchik kaptinqa Diostam mañakunanchik, ichaqa yachananchikmi haykapim chay rurayta. Reparasun Proverbios 7:6-23 nisqanpi huk mozomanta. Paymi yachastin chuchumika warmipa yachasqan esquinanta tutaykuqta pasachkarqa. Sumaqllaña rimayninwanmi imaynam bueyespas camalman yaykuchkaq hinaraq pasaykurqa. ¿Imanasqam chaynintaqa pasarqa? Yaqapaschá mana allin munayninkunawan atipachikuchkarqa, chaychá Bibliaqa niwanchik ‘pisi experienciayoq kasqanta’ (Prov. 7:7). ¿Haykapitaq allin kanman karqa Diosta mañakuynin? Allinmi kanman karqa chay warmi rimapayachkaptin, ichaqa aswan allinraqmi kanman karqa manaraq chay esquinanta pasachkaspan.

¹⁷ Kunanpas yaqapaschá pipas kallpanchakuchkanman millakuypaq qalalla kaqkunata mana qawananpaq. Ichaqa Internetman yaykuruspam mana allin fotokunatawan videokunata qawananpaqña kachkanman. ¿Manachu kayqa Proverbios qellqapa 7 capitulonpi nisqanwan tupachkanman? Yaykuruspanqa sasachakuypimá tarikunqa. Millakuypaq qalalla kaqkunata qawayta atipananpaqqa, manaraq Internetman yaykuchkaspanmi Diospa yanapakuyninta mañakunan.

18, 19. a) ¿Imanasqam tentacionkunata atipayqa sasa kanman, ichaqa imaynatam atipachwan? b) ¿Imata ruranapaqmi kallpanchasqa kachkanchik?

¹⁸ Sasamá tentacionkunata atipayqa. ¿Imanasqa? Pablom niwanchik: “Aychapa munasqanqa Chuya Espiritupa contranpim kachkan, Chuya Espiritupa munasqanñataqmi aychapa munasqankunapa contranpi  kachkan”, nispa. Chayraykum ‘munasqanchik ruraytaqa mana atinchikchu’ (Gal. 5:17). Tentacionkunata chaylla atipananpaqqa tukuy sonqowanmi Diosta mañakuna hinaspam mañakusqanchikman hina rurana. Bibliam kaynata yuyarichiwanchik: “Tentasqa kasqaykichikqa manam maschu wakinkunapa tentasqa kasqanmantaqa”, nispa. Chaynaqa, Jehová Diospa yanapakuyninwanqa kasukuytam atisun (1 Cor. 10:13).

¹⁹ Sasachakuypi tarikuspapas, imataña tanteaspapas otaq tentacionkunapiña kaptinchikpas, huk yanapakuymi kapuwanchik, chayqa Diosta mañakuyninchikmi. Yanapakuyninta maskaspaqa qawachichkanchikmi paypi confiakusqanchikta. Chaymantapas hinallam Diospa chuya espiritunta kallpanchawananchikpaq mañakunanchik (Luc. 11:9-13). Arí, yachasqallanchikpi confianamantaqa Jehová Diospi hinalla confiakusun.

[Willakuy]

¿Yuyachkankichu?

• ¿Imatam yachachwan Ezequiaspa, Anapa chaynataq Jonaspa Diospi confiasqankumanta?

• ¿Imatam yachachiwanchik manaraq imatapas tanteachkaspa Davidpa chaynataq Josueypa rurasqanku?

• ¿Haykapitaq Diosta mañakunanchik tentacionkunata atipanapaq?

[Kay yachachikuypa tapukuyninkuna]

[9 kaq paginapi dibujo]

¿Haykapim aswan allinqa tentacionkunata atipanapaq Diosta mañakuyqa?