‘Auraka e Irinaki ki Toou Uaorai Kite’

“E irinaki kia Iehova ma to ngakau katoa ra; auraka ra e irinaki ki toou uaorai kite.”​—MASE. 3:5.

1, 2. (a) Eaa tetai au turanga ka na roto tatou? (e) Me na roto i te turanga taitaia, me rave i tetai ikianga, me kore me patoi i te timataanga, koai ta tatou ka irinaki, e no teaa ra?

KUA tapiri takere te pu o Cynthia * i tetai au ngai o tana kamupani e kua akanooia mai tetai aronga mei te ngai angaanga. Kua manako mai a Cynthia e koia tetai ka akanooia mai mei te angaanga. Eaa tana ka rave me kare ana angaanga? Akapeea aia me tutaki i tana au pira? Kua inangaro tetai tuaine Kerititiano ko Pamela i te neke ki te ngai te anoano maataia ra te aronga tutu aere no te Patireia, inara ka aere ainei aia? E manamanata ke to tetai tangata mapu ko Samuel. Kua kite ana aia i te au tu ainga viivii i tona tamariki anga. Teianei e 20 tuma ona mataiti, e timata pakariia ana a Samuel kia rave akaou i te reira tu taito. Akapeea aia me patoi atu i taua timataanga ra?

² Ka irinaki koe kiaai me na roto koe i te au turanga taitaia, me rave i te au ikianga puapinga, me kore me patoi i te au timataanga? Te irinaki maata ra ainei koe kia koe uaorai, me ka “tuku koe i taau apainga kia Iehova”? (Sala. 55:22) “Tei te aronga tuatua-tika ra to Iehova mata,” i karanga ai te Pipiria, “e tei ta ratou kapiki tona taringa.” (Sala. 34:15) No reira e puapinga tikai kia irinaki tatou kia Iehova ma to tatou ngakau katoa e auraka e irinaki ki to tatou uaorai kite!​—Mase. 3:5.

3. (a) Eaa te o maira ki te irinaki anga kia Iehova? (e) Eaa tetai pae i irinaki ei ki to ratou uaorai kite?

³ Te o maira te irinaki ngakau katoa anga ia Iehova i te rave anga i te au mea na roto i te mataara tei tau ki tona anoano. E rauka ai i te rave i te reira ka pure ua rai tatou kiaia e te pati akatenga no tana aratakianga. Inara e ngata tikai no te manganui i te irinaki pu tikai kia Iehova. Ei akaraanga, kua akakite tetai tuaine Kerititiano ko Lynn e, “E ngata ua ana iaku i te irinaki pu tikai kia Iehova.” No teaa ra? “Kare oku pirianga ki toku metua tane,” i akakite ei aia, “e kare toku metua vaine e manako mai ana iaku. No reira kua apii au i te akono iaku uaorai.” No to Lynn turanga, kua ngata iaia i te irinaki tikai i tetai tangata. Ka akatupu katoa te tu kite karape e te puapinga o tetai tangata kia irinaki aia kiaia uaorai. Te irinaki anga ki tana uaorai i kite, ka akono tetai tangata pakari i te au manamanata o te putuputuanga ma te kore e pure ki te Atua.

4. Eaa te ka uriuriia i roto i teia atikara?

⁴ Te inangaro maira a Iehova ia tatou kia tauta ngakau tae i te taangaanga i ta tatou pure e kia aru rotai ki tona anoano. Akapeea tatou me manako tau i te tuku anga i to tatou manamanata kiaia e te tauta anga i te akatikatika i te au manamanata pakari? Me rave i te au ikianga, eaa ta tatou ka matakite? Eaa ra i puapinga ai te pure me te tauta ra tatou i te patoi atu i te au timataanga? Ka uriuri tatou i teia au uianga na te akamanako anga i te au akaraanga Tuatua Tapu.

Me Tupu te Taitaia

5, 6. Akapeea a Hezekia te ariu atu anga ki te tamatakutaku anga a te ariki o Asura?

⁵ No runga i te ariki o Iuda ko Hezekia, kua karanga te Pipiria e: “Kua piri tikai aia kia Iehova, kare aia i akapaki i te aru iaia, kua akono ra aia i tana au akauenga ta Iehova i akaue mai  ia Mose ra.” Ae, ‘kua irinaki aia i te Atua o Iseraela ko Iehova.’ (2 Ari. 18:5, 6) Eaa ta Hezekia i rave te tono anga te ariki o Asura ko Senakeriba i tona au komono​—e ia Rabasake—​ma te nuku maata ei tamaki ia Ierusalema? Kua opu ke ana te nuku vaeau ririnui o Asura i tetai au oire ketaketa o Iuda, e te inangaro ra a Senakeriba i te oire o Ierusalema. Kua aere atura a Hezekia ki te are o Iehova e kua pure e: “E to matou Atua, e Iehova, ko taku ïa tuatua kia koe, e akaora koe ia matou i tona rima, kia kite te au basileia katoa o te ao nei e, ko koe ra te Atua, e Iehova, ko koe anake.”​—2 Ari. 19:14-19.

⁶ Kua rave a Hezekia i tana i pure. I mua ake ka aere ei aia ki te iero i te pure, kua akaue aia i te iti tangata kia kore e ariu atu ki te tamatakutaku anga a Rabasake. Kua tono katoa a Hezekia i tetai au tangata ki ko ia Isaia i te kimi tauturu. (2 Ari. 18:36; 19:1, 2) Kua rave a Hezekia i te au takainga te tau ra kia rave aia. I teia atianga kare aia i kimi ana i tetai ravenga kare e rotai ana ki to Iehova anoano, na te kimi anga i te tauturu a Aiphiti me kore a te au patireia i te pae mai. Kare aia i irinaki ana ki tona uaorai kite, kua irinaki ra a Hezekia kia Iehova. Muri ake te tamate anga te angera a Iehova i te 185,000 tangata o Senakeriba, kua “aere atura” a Senakeriba ki Nineve.​—2 Ari. 19:35, 36.

7. Eaa te akapumaana anga ka rauka ia tatou mei te au pure a Hana raua ko Iona?

⁷ Kua irinaki katoa a Hana te vaine a te ngati Levi ko Elikana ia Iehova, te taitaia anga aia e kare aia e anau tamariki. (1 Samu. 1:9-11, 18) Kua akaoraia mai te peroveta ko Iona mei te kopu o te ika mamaata i muri ake tona pure anga e: “I kapiki atura au i toku tumatetenga kia Iehova, e kua akarongo mai aia iaku; i roto i te kopu o ade toku kapiki anga atu, e kua akarongo mai koe i toku reo.” (Iona 2:1, 2, 10) E mea pumaana tikai i te kite e noatu te kino o to tatou turanga, ka rauka ia tatou i te kapiki kia Iehova ma te “pati” i tana tauturu!​—E tatau ia Salamo 55:1, 16.

8, 9. Eaa te au mea puapinga ta Hezekia, Hana, e Iona i pure, e eaa ta tatou i kite mai mei teia?

⁸ Te apii katoa maira te au akaraanga o Hezekia, Hana, e Iona i te puapinga no te pure me taitaia tatou. Kua mamae ngakau teia toko toru i to ratou tumatetenga. Inara, kua akaari mai ta ratou au pure e kare ratou e manako ua ra ia ratou uaorai e kia rauka mai te tauturu no to ratou au manamanata. Te mea maata atu kia ratou ko te ingoa o te Atua, tana akamorianga, e te rave anga i tona anoano. Kua mamae tikai a Hezekia no te akakino anga tei tukuia ki runga i te ingoa o Iehova. Kua taputou a Hana e ka oronga aia i tana tamaiti akaperepere kia tavini i roto i te iero i Silo. E kua tuatua a Iona e: “Taku oki i tia ra, ko taku ïa e apai.”​—Iona 2:9.

⁹ Me pure tatou no te tauturu mei tetai turanga manamanata, e mea meitaki kia akara meitaki i to tatou au akakoroanga. Te manako ua ra ainei tatou i te tauturu no te manamanata, me te akamanako ra tatou ia Iehova e tona akakoroanga? Ka akatupu to tatou au manamanata ia tatou kia manako ua rai i to tatou uaorai turanga e kare e akamanako atu i te au mea pae vaerua. Me pure tatou no te tauturu a te Atua, e akamou i to tatou manako ki runga ia Iehova, te akatapu anga i tona ingoa, e te akatikaanga i tona turanga ngateitei. Na te reira e tauturu ia tatou kia akono tamou i te manako papu noatu e kare e tupu ta tatou e manakonako ra. Penei te akaari maira te pauanga ki ta tatou au pure e ka anoanoia tatou kia akakoromaki i te au turanga ma te tauturu a te Atua.​—E tatau ia Isaia 40:29; Philipi 4:13.

Me Rave i te Au Ikianga

10, 11. Eaa ta Iehosaphata i rave tona aro atu anga i tetai turanga kare aia i kite e ka akapeea aia?

¹⁰ Akapeea koe me rave i te au ikianga puapinga no te oraanga? Ka akamanako ainei koe i te reira na mua ka pure ei kia Iehova kia akameitaki mai i taau ikianga ka rave? Akamanako ana i ta Iehosaphata, te  ariki o Iuda i rave te aere mai anga te nuku o te ngati Moabi e te ngati Amona i te tamaki kiaia. Kare e rauka ia Iuda i te tamaki atu ia ratou. Eaa ta Iehosaphata i rave?

¹¹ “Kua mataku iorā Iehosaphata, e kua akonokono iora e kimi ia Iehova,” i karanga ai te Pipiria. Kua akaue aia i to Iuda katoa kia akakore i te kai e kua akaputuputu mai i te au tangata kia “kimi ia Iehova.” E oti kua tu aia ki rotopu i te putuputuanga o Iuda e Ierusalema i te pure. E kua pati akatenga aia e: “Kare ainei koe e akava ia ratou, e to matou Atua? kare oki o matou nei ririnui, kia tamaki atu i teianei aronga maata, e aere mai e tamaki ia matou nei; kare oki matou i kite i te ravenga kia rave: tei runga ia koe ra to matou mata.” Kua akarongo te Atua mou i te pure a Iehosaphata e kua akaora temeio mai ia ratou. (2 Para. 20:3-12, 17) Me rave i te au ikianga te ka takino i to tatou turanga pae vaerua, kare ainei tatou e irinaki kia Iehova i to te irinaki anga ki to tatou uaorai kite?

12, 13. Eaa te akaraanga ta te Ariki ko Davida i akanoo te rave anga i te au ikianga?

¹² Eaa ta tatou ka rave me aro atu tatou i te au turanga e akaraanga mama ua i te akatikatika​—penei kua manako viviki mai ana tatou i tetai ravenga tei tupu i te tuatau i topa? Ka marama tatou i teia turanga mei te akaraanga o te Ariki ko Davida. Te tamaki anga te ngati Amaleka i te oire o Zikelaga, kua apai ratou i te au vaine e te au tamariki a Davida e ta tona au tangata. Kua ui a Davida kia Iehova te na ko anga e: “E aru ainei au i teianei takanava?” Kua pau atu a Iehova e: “E aru: e rokoia atu rai ïa ratou e koe ra, e ka rauka rai kare e toe.” Kua akarongo a Davida, e “kua rauka [iaia] te au mea katoa ta to Amaleka i apai ke.”​—1 Samu. 30:7-9, 18-20.

¹³ Tetai tuatau i muri ake te tamakianga a te ngati Amaleka, kua aere mai to Philiseti i te tamaki atu i to Iseraela. Kua pati tauturu akaou a Davida kia Iehova e kua rauka mai tetai pauanga taka meitaki. Kua akakite mai te Atua e: “Ka aere ki runga: ka tuku tikai au i te Philiseti ki to rima na.” (2 Samu. 5:18, 19) I muri poto ua ake, kua aere akaou mai to Philiseti te tamaki ia Davida. Eaa tana ka rave i teianei? Ka rauka iaia te akamanako e: ‘Kua na roto ana au i teia turanga e rua taime. Ka aere au ka tamaki i te au enemi o te Atua, mei taku rai i rave ana.’ Me kore ka kimi ainei a Davida i ta Iehova aratakianga? Kare a Davida i irinaki ki tana i kite ana i mua ana. Kua pure akaou aia kia Iehova. Rekareka tikai aia e kua rave aia i te reira! E tuke rai te au ikuikuanga tei orongaia mai kiaia i teia taime. (2 Samu. 5:22, 23) Me aro atu tatou i tetai turanga me kore manamanata mei te reira rai, e matakite tatou kia kore e irinaki ki tei tupu ana i mua ana.​—E tatau ia Ieremia 10:23.

14. Eaa te apiianga ka rauka mai ia tatou mei te tu i akono ei a Iosua e te aronga pakari o Iseraela i te ngati Gibeona?

¹⁴ No to tatou tu apa, ka anoanoia tatou katoatoa​—e te aronga pakari tukatau​—kia matakite kia kore e ngaropoina i te akara ki ta Iehova aratakianga me rave i te au ikianga. Akamanako ana eaa ta Iosua te komono o Mose e ta te aronga pakari o Iseraela i rave te aere mai anga te aronga kikite o te ngati Gibeona, tei taui ia ratou e tei pikikaa e no tetai enua mamao mai ratou. Kare ratou i pati ana i te aratakianga a Iehova, mari ra kua akaau a Iosua e te aronga pakari ki te ngati Gibeona, te papau anga i te koreromotu kia ratou. Noatu e kua turuturu maata a Iehova i te koreromotu, kua akapapu ra aia e kia rekotiia ki roto i te au Tuatua Tapu teia tu, ei apiianga no tatou.​—Iosu. 9:3-6, 14, 15.

Me Ngata i te Patoi i te Au Timataanga

15. Akamarama mai akapeea te pure i puapinga ai me patoi atu i te timataanga.

¹⁵ No te “ture kino” o te ara i roto ia tatou,  kia patoi pakari tatou i te au anoano o to tatou tu ara. (Roma 7:21-25) Ka autu tatou i teia tamakianga. Akapeea ra? Kua akakite a Iesu ki tana au pipi e e puapinga tikai te pure ei patoi atu i te timataanga. (E tatau ia Luka 22:40.) Noatu ka tupu ua mai te au anoano e te au manako tarevake muri ake me pure tatou ki te Atua, e ‘pati ua rai ki te Atua’ no te pakari kia autu atu i te timataanga. Kua akapapuia mai kia tatou e ka ‘oronga ua mai rai aia i ta te tangata ravarai ma te patoi kore.’ (Iako. 1:5) Kua tata katoa a Iakobo e: “Te mate ra aina tetai o kotou i te maki [i te pae vaerua]? e tiki aia i te aronga pakari o te ekalesia ra; e na ratou e pure iaia ma te akatainu iaia i te manongi i te ingoa o [Iehova] ra: E e ora taua maki ra i te pure akarongo.”​—Iako. 5:14, 15.

16, 17. Me kimi i te tauturu kia patoi atu i te timataanga, eaa te taime meitaki no te pure?

¹⁶ E puapinga tikai te pure me patoi atu i te timataanga, inara ka anoanoia tatou kia pure i te tuatau tau tikai. Akamanako ana i te turanga o tetai tangata mapu tei taikuia i roto ia Maseli 7:6-23. E popoiri atura, te aere ra aia na runga i te mataara ki te ngai e noo ra tetai vaine akaturi. Kua vare aia i tana akavareanga e tana tuatua akarekareka anga, kua aru atura iaia mei te puakatoro e aere ra ki te ngai ta anga. Eaa ra teia tangata mapu i aere ei ki reira? No tona tu “manako kore,” me kore kite kore, ngata atura iaia i te patoi i tona au anoano tarevake. (Mase. 7:7) Eaa tikai te taime e puapinga ai tana pure? E tika, ka puapingaia me pure aia i tetai ua atu taime kia patoi i te timataanga ka aro atu aia. Inara, te taime meitaki atu nona kia pure, tona manako mua anga i te aere atu na taua mataara ra.

¹⁷ Teia tuatau, penei te tauta ra tetai tangata i te patoi i te akarakara i te au tu ainga viivii. Inara, akapeea me ka aere aia ki runga i te Initaneti kua kite aia e e au tutu me kore e au vitio tau kore tetai i reira. Kare ainei e te aiteite ra tona turanga ki taua tangata mapu ra tei taikuia i roto ia Maseli pene 7? E arataa kino tikai te reira i te aru! E patoi ei i te timataanga kia kore e akara i te au tu ainga viivii, ka anoanoia tetai tangata kia pure no ta Iehova tauturu i mua ake ka aere ei ki runga i te Initaneti.

18, 19. (a) Eaa ra i ngata ai i te patoi i te timataanga, e akapeea koe me autu atu i te reira? (e) Eaa taau ka tauta i te rave?

¹⁸ E ngata tikai i te patoi atu i te timataanga me kore kia autu atu i te au peu kino. ‘Te inangaro o te kopapa nei, kare ïa e tau i to te vaerua,’ i tata ei te apotetoro ko Paulo, ‘e to te vaerua, kare ïa e tau i to te kopapa nei.’ No reira, “i kore ei i tika ia [tatou] kia rave i ta [tatou] i anoano ra.” (Gala. 5:17) E autu ei i teia akaaoanga, ka anoanoia  tatou kia pure putuputu me tupu mai te au manako tarevake me kore te au timataanga, e kia aru rotai i ta tatou au pure. “Kare kotou i rokoia e te timataanga, mari ra mei ta te tangata nei rai,” e ka tauturu mai a Iehova ia tatou kia vai akarongo mou ua rai kiaia.​—1 Kori. 10:13.

¹⁹ Noatu e te na roto ra tatou i tetai turanga ngata, te rave ra i tetai ikianga pakari, me kore te tauta ra i te patoi i te timataanga, kua oronga mai a Iehova i tetai apinga aroa meitaki tikai​—te apinga akaperepere o te pure. Na roto i te reira, ka akaari tatou e te irinaki ra tatou kiaia. Ka tau katoa tatou kia pure ua rai ki te Atua no tona vaerua tapu, te arataki ra e te akaketaketa ra ia tatou. (Luka 11:9-13) Te mea maata, e irinaki ua rai tatou kia Iehova e auraka e irinaki ki to tatou uaorai kite.

[Tataanga Rikiriki i Raro]

Maara Ainei ia Koe?

• Eaa taau i kite mai mei to Hezekia, Hana, e to Iona irinaki anga kia Iehova?

• Akapeea te nga akaraanga o Davida e Iosua te akataka mai anga i te anoano kia matakite me rave i te au ikianga?

• Eaa tikai te taime tau me pure no runga i te timataanga?

[Au Uianga Apii]

[Tutu i te kapi 9]

Eaa tikai te taime e puapinga ai te pure, me patoi atu i te timataanga?