Eiaha e tiaturi i to oe iho ite
Eiaha e tiaturi i to oe iho ite
“E tiaturi ia Iehova ma to aau atoa ra; eiaha râ e tiaturi i to oe ihora haapao.”—MAS. 3:5.
1, 2. (a) Eaha te tahi mau fifi e û paha tatou? (b) I roto i te ati, i mua i te faaotiraa e te faahemaraa, ia tiaturi tatou ia vai? No te aha?
UA TIHATI ê na te paoti o Tamara * i te tahi mau rave ohipa, e o ˈna paha to muri iho. Ia ere oia i ta ˈna ohipa, e nafea oia e aufau ai i ta ˈna mau haamâuˈaraa? Te hinaaro ra te tahi atu tuahine o Roti te iˈoa e reva i te vahi e hinaaro-rahi-hia ˈi te feia poro i te Basileia. Ia na reira iho â anei oia? E fifi atoa to Vetea. I to ˈna apî-roa-raa i mataitai ai oia i te mau hohoˈa faufau. I teie nei e 20 tiahapa matahiti to ˈna, e hiaai iti rahi to ˈna e mataitai faahou. E nafea oia e haavî ai ia ˈna?
2 I roto i te ati, ia rave oe i te faaotiraa faufaa e ia patoi i te faahemaraa, o vai ta oe e tiaturi? Ia oe iho anei aore ra e ‘tuu anei oe i ta oe hopoia ia Iehova’? (Sal. 55:22) Te parau ra te Salamo 34:15: “Tei te feia parau-tia ra to Iehova mata; e tei ta ratou pure to ˈna tariˈa.” Mea faufaa roa ïa ia tiaturi ia Iehova ma to tatou aau atoa, eiaha râ i to tatou iho ite.—Mas. 3:5.
3. (a) Eaha te auraa e tiaturi ia Iehova? (b) No te aha vetahi e tiaturi ai ia ratou iho?
3 E tiaturi ia Iehova ma to tatou aau atoa, e rave ïa i te mau mea ia au i to ˈna hinaaro. E pure noa anaˈe ïa ia ˈna no te ani i ta ˈna tauturu e aratairaa. Mea fifi râ no te taata e rave rahi ia tiaturi roa ia Iehova, mai ia Lynn to tatou tuahine. E tautooraa na ˈna te haapiiraa i te na reira, e ere hoi oia i te mea piri i to ˈna papa. Aita atoa to ˈna mama i haapao ia ˈna. Na Lynn noa ïa i faaoti no ˈna iho. No reira oia i ore ai i tiaturi i te taata. E nehenehe atoa te hoê taata e tiaturi ia ˈna iho no to ˈna aravihi e manuïaraa. E turui paha te hoê matahiapo i nia i to ˈna iho ite no te haapao i te mau ohipa a te amuiraa, eita râ e pure na mua i te Atua.
4. Eaha ta teie tumu parau e faataa mai?
4 Ia pure tatou ia Iehova ia tauturu mai, e titau iho â oia ia tutava maite tatou i te pee i ta ˈna aratairaa. E nafea oe e ite ai eaha te taime e vaiiho ai e na Iehova e faaafaro i te hoê fifi e eaha te taime e na oe iho? Ia ara i te aha ia rave tatou i te mau faaotiraa? No te aha mea faufaa ˈi ia pure no te patoi i te faahemaraa? E pahonohia teie mau uiraa maoti te tahi mau hiˈoraa Bibilia.
I roto i te ati
5, 6. Ua aha Hezekia i to Senakeriba opuaraa e aro ia Ierusalema?
5 No nia ia Hezekia arii no Iuda, te na ô ra te Bibilia: “Ua ati maite oia i[a] Iehova, aore i faarue i te pee ia ˈna, ua haapao râ oia i ta ˈna parau, ta Iehova i parau mai ia Mose.” Ua tiaturi iho â oia ia Iehova te Atua o Iseraela. (Arii 2, 18:5, 6) I haru na Senakeriba arii no Asura e ta ˈna nuu rahi i te tahi mau oire auahia i Iuda e ua opua ˈtura e aro ia Ierusalema. Tono atura Senakeriba i ta ˈna nuu i Ierusalema e ia Rabasake e e piti vea e faaino e e haamǎtaˈu i to reira mau taata. Ua aha Hezekia? Ua haere oia i te hiero o Iehova e pure: “E to matou Atua, e Iehova, o ta ˈu ïa parau ia oe, e faaora oe ia matou i tana rima, ia ite te mau basileia atoa o te ao nei, e o oe anaˈe ra te Atua o Iehova.”—Arii 2, 19:14-19.
6 Hou râ Hezekia a haere ai e pure i te hiero, ua faaue oia i te nunaa eiaha e pahono i ta Rabasake tâhitohitoraa. Ua tono atoa oia i te tahi mau taata ia Isaia peropheta e ani i ta ˈna aratairaa. (Arii 2, 18:36; 19:1, 2) Aita te arii i ani i te tauturu a Aiphiti aore ra a te tahi atu mau nunaa tapiri, ua ohipa râ ia au i te hinaaro o Iehova ma te tiaturi ia ˈNa eiaha râ i to ˈna iho ite. Ua haapohe te melahi a Iehova 185 000 faehau Asura e hoˈi atura Senakeriba e ta ˈna nuu i Nineve.—Arii 2, 19:35, 36.
7. E nafea te pure a Hana e a Iona e tamahanahana mai ai?
7 Ua tiaturi atoa Hana, te vahine a Elikana ati Levi, ia Iehova i to ˈna ahoahoraa no te mea eita ta ˈna tamarii e noaa. (Sam. 1, 1:9-11, 18) Ua pure Iona peropheta, tei horomiihia e te hoê iˈa rahi: “I tiaoro atura vau i to ˈu nei ati, ia Iehova, e ua faaroo mai oia ia ˈu; i roto i te opu o hade to ˈu tiaoro-hua-raa ˈtu, e ua faaroo mai oe i tau reo.” Ua faaora Iehova ia ˈna. (Iona 2:1, 2, 10) E nehenehe e tiaoro ia Iehova no te ani i ta ˈna tauturu i roto i te ati. Mea mahanahana roa ïa!—A taio i te Salamo 55:1, 16.
8, 9. Eaha te mea faufaa no Hezekia, Hana, e Iona a pure ai ratou? Eaha te haapiiraa?
8 Te haapii maira Hezekia, Hana, e Iona i te hoê mea faufaa roa ia pure tatou no te hepohepo rahi. No to ratou ati, ua oto ratou tootoru. Te faaite ra râ ta ratou pure e aita ratou i manaˈo noa i to ratou fifi. Te mea faufaa roa no ratou, o te iˈoa ïa o te Atua, ta ˈna haamoriraa e te raveraa i to ˈna hinaaro. Ua peapea Hezekia no te mea te faainohia ra te iˈoa o Iehova. Ua parau Hana e e horoa oia i ta ˈna tamaiti here rahi ei tavini ia Iehova i te sekene i Silo. E ua na ô Iona: “Ta ˈu hoi i euhe ra, o ta ˈu ïa e hopoi.”—Iona 2:9.
9 Ia pure tatou, e feruri anaˈe no teihea tumu. No to tatou noa anei hinaaro ia matara to tatou fifi? Aore ra no Iehova anei e ta ˈna opuaraa? I roto i te mauiui, e haapeapea rahi roa paha tatou, a haamoe atu ai i ta Iehova opuaraa e haamoriraa. Ia pure tatou ia Iehova ia tauturu mai, e haamanaˈo anaˈe ia ˈna, te faaraaraa i to ˈna iˈoa e te haapapuraa i to ˈna tiaraa e faatere. Eita ïa tatou e toaruaru ia ore to tatou fifi e afaro mai ta tatou i manaˈo. I te tahi taime, e pahono Iehova i ta tatou mau pure ma te faaitoito mai ia faaoromai.—A taio i te Isaia 40:29; Philipi 4:6, 7.
Ia rave i te faaotiraa
10, 11. No te rave i te hoê faaotiraa fifi, ua aha Iehosaphata?
10 Ia rave oe i te faaotiraa faufaa, e nafea oe? E faaoti anei oe na mua a pure atu ai ia Iehova ia tupu ta oe faaotiraa? A hiˈo na i ta Iehosaphata, arii no Iuda, i rave i to te mau nuu no Moabi e no Amona tahoêraa no te tamaˈi ia ˈna. Eita râ e tia ia Iuda ia aro atu. Ua aha Iehosaphata?
11 Te na ô ra te Bibilia: “Ua mǎtaˈu ihora Iehosaphata, e ua faanahonaho ihora e imi ia Iehova.” Ua faaue oia i to Iuda atoa ia haapae i te maa e ua haaputuputu atura ia ratou no te ani i ta Iehova aratairaa. Ua tia maira oia i rotopu i te amuiraa o Iuda e o Ierusalema e ua pure: “Eita anei oe e faahapa ia ratou, e to matou Atua? aita hoi o matou nei e puai ia rave atu i teie nei feia rahi e tii mai e rave ia matou nei; aita hoi matou i ite i te ravea ia rave: tei ia oe râ to matou mata.” Ua faaroo te Atua mau i ta Iehosaphata pure ma te faaora semeio ia ratou. (Par. 2, 20:3-12, 17) E tiaturi anaˈe ïa ia Iehova, eiaha râ i to tatou iho ite, no te rave i te mau faaotiraa e ore ai to tatou taairaa e o ˈna e fifi.
12, 13. No te rave i te faaotiraa, eaha ta Davida e haapii maira?
12 E û paha tatou i te tahi fifi e au ra e e afaro noa ia tatou no te mea ua farerei ê na tatou i te reira. Eaha râ te rave? Te pahono maira te hiˈoraa o te arii Davida. I to te ati Amaleka aroraa i te oire o Zikelaga, ua haru ratou i ta ˈna na vahine e tamarii e ta to ˈna mau taata. Ua ui Davida ia Iehova e auau anei i tera nǎnǎ eiâ. Pahono maira Iehova: “A auau: e roohia ˈtu ïa ratou e oe ra, e e ore e toe te hoê aˈe mea iti.” Ua faaroo Davida e “ua noaa maira ta te ati Amaleka i hopoi ê.”—Sam. 1, 30:7-9, 18-20.
13 I muri aˈe i te ati Amaleka, o te Philiseti tei aro ia Iseraela. Ua ui â Davida ia Iehova tei pahono: “A tii; e tuu mau vau i te Philiseti i roto i to rima.” (Sam. 2, 5:18, 19) I muri iti aˈe, ua aro â te Philiseti ia Davida. E nehenehe Davida e na ô e ua ite oia e nafea no te mea teie te toruraa o to ˈna aroraahia. E nehenehe ïa oia e faaoti e auau i te mau enemi o te Atua mai ta ˈna i rave na. Aita râ Davida i turui i nia i ta ˈna i ite ê na. Ua imi â oia i ta Iehova aratairaa ma te pure ia ˈna. Auaˈe oia i na reira, mea ê roa hoi ta Iehova pahonoraa. (Sam. 2, 5:22, 23) I mua i te fifi, e ara anaˈe eiaha e turui i nia i ta tatou i ite ê na.—A taio i te Ieremia 10:23.
14. Te faataa maira ta Iosua i rave e to Gibeona i teihea faaararaa?
14 E taata hara anaˈe tatou, te mau matahiapo aravihi atoa. Eiaha ïa e haamoe i te ani i ta Iehova aratairaa ia rave tatou i te faaotiraa. Aita Iosua, tei mono ia Mose, e te hui matahiapo o Iseraela i ui ia Iehova. Ua faaau râ i te faufaa i to Gibeona tei haavare e na te fenua roa mai ratou e tei ani e faaora ia ratou. Aita Iehova i faaore i taua faufaa ra, ua haapapai râ oia i roto i te Bibilia i to ratou oreraa e ani i ta ˈna aratairaa ei faaararaa.—Ios. 9:3-6, 14, 15.
Ia patoi i te faahemaraa
15. No te aha mea faufaa ˈi ia pure no te patoi i te faahemaraa?
15 No te mea e taata hara anaˈe tatou, e tutava roa anaˈe i te haavî i to tatou mau hinaaro tia ore. (Roma 7:21-25) E nehenehe hoi. E nafea? Ua parau Iesu i ta ˈna mau pǐpǐ e mea faufaa roa ia pure no te patoi i te faahemaraa. (A taio i te Luka 22:40. *) Ia vai noa mai te mau hinaaro e manaˈo tia ore i muri aˈe i to tatou tiaororaa i te Atua, e ani â tatou ia ˈna i te paari. E horoa iho â oia i te reira i te taata atoa. (Iak. 1:5) E tauturu atoa mai te mau matahiapo o te amuiraa. Ia au i te Iakobo 5:14, 15, e nehenehe te hoê taata e maˈihia ra i te pae varua e tii ia ratou o te ‘pure no ˈna, ma te faatahinu ia ˈna i te monoˈi i te iˈoa o Iehova. E ora taua maˈi ra i te pure faaroo.’
16, 17. Eaha te taime tano aˈe no te pure ia ore ia hema?
16 Mea faufaa roa ia pure i te taime tano ia ore tatou ia hema. A hiˈo na i tei tupu i nia i te hoê taurearea i roto i te Maseli 7:6-23. I te ahiahi, te haere ra oia na te aroâ o te hoê vahine faaturi. No te rahi o te parau a taua faaturi ra e te taparu o to ˈna vaha, pee atura oia ia ˈna mai te puaatoro e putôhia ra e taparahi. No te aha teie taurearea i haere ai na taua aroâ ra? No to ˈna ‘haapao ore,’ aore ra ite ore i te oraraa. Te umeume ra to ˈna mau hinaaro tia ore. (Mas. 7:7) Eaha te taime e tano ai ia pure oia? Mea maitai iho â ïa i te taime a paraparau ai te vahine ia ˈna. Mea tano aˈe râ i te taime a puta mai ai te manaˈo e haere na taua aroâ ra.
17 I teie mahana, te tutava ra paha te hoê taata eiaha e mataitai i te mau hohoˈa faufau. Eaha râ te tupu ia hiˈo oia i te tahi mau reni Internet ua ite oia e e hohoˈa e e video o te faaara i te hinaaro e taati, to roto? E au ïa oia i te taurearea o te Maseli pene 7 tei haere na te hoê aroâ atâta. No te haavî i to ˈna hinaaro e mataitai i te mau hohoˈa faufau, mea faufaa ia pure oia ia Iehova ia tauturu ia ˈna hou a faaohipa ˈi i te Internet.
18, 19. (a) No te aha mea fifi ai ia patoi i te faahemaraa? Eaha te ravea? (b) Ia aha tatou?
18 E ere i te mea ohie ia patoi i te faahemaraa aore ra ia haapae i te mau peu ino. Ua papai te aposetolo Paulo e e ‘hinaaro ê to te tino i to te varua, e to te varua ra i to te tino; e ore hoi raua e au; i ore i tia ˈi ia tatou ia rave i ta tatou i hinaaro.’ (Gal. 5:17) I te putaraa mai iho â te mau manaˈo tia ore e pure uˈana ˈi tatou, a ohipa ˈtu ai ia au i ta tatou pure. A haamanaˈo e o te taata atoa, tae noa ˈtu tatou, te faahemahia. Maoti râ te tauturu a Iehova e taiva ore ai tatou ia ˈna.—Kor. 1, 10:13.
19 I roto i te ati, ia rave tatou i te faaotiraa faufaa e ia patoi i te faahemaraa, e tauturu mai te pure, te hoê ô faahiahia mau ta Iehova i horoa mai. Ia pure tatou ia ˈna, o ˈna ïa ta tatou e tiaturi ra. Mea maitai atoa ia ani noa i to ˈna varua moˈa, o te aratai e o te faaitoito mai. (Luka 11:9-13) E tiaturi noa anaˈe ia Iehova eiaha râ i to tatou iho ite.
[Nota i raro i te api]
^ Ua tauihia te mau iˈoa.
^ Luka 22:40: “E tae atura oia i reira, ua parau atura oia ia ratou, E pure ia ore outou ia roohia e te ati [“ia hema,” Traduction du monde nouveau].”
Te haamanaˈo ra anei outou?
• Eaha ta Hezekia, Hana e Iona e haapii maira no nia i te tiaturiraa ia Iehova?
• Te faataa maira ta Davida e ta Iosua i rave i teihea faaararaa ia rave tatou i te faaotiraa?
• Eaha te taime tano e pure ai ia faahemahia tatou?
[Uiraa haapiiraa]
[Hohoˈa i te api 13]
Eaha te taime tano e pure ai ia ore ia hema?
