Maan e uka yasua mun naan be si nanwlɛ’n naan be fa su
Maan e uka yasua mun naan be si nanwlɛ’n naan be fa su
“Kɛ ɔ fin ndɛ’n, sran yɛ á wá trɛ́ i kɛ a fa tra kpatra’n sa-a.”—LIK 5:10.
1, 2. (a) ?Kɛ Zezi boli jasin fɛ’n kleli yasua mun’n, wafa sɛ yɛ be sɔli nun ɔn? (b) ?Ngue ndɛ yɛ é yíyí nun like suanlɛ nga nun ɔn?
ZEZI nin i sɔnnzɔnfuɛ’m be ɔli jasin fɛ’n bolɛ Galile lɔ. Cɛn kun’n, be fuli alie mma kun nun be ɔli kɛ bé kó ló wunmiɛn lika koun kun nun. Sanngɛ sran kpanngban kpa be nanti suli be su. “Be ju bɔ akpi nnun kun, sanngɛ b’a ka-man bla nin ba kanngan mun b’a wla-man nun.” (Mat. 14:21) Cɛn kun ekun sran kpanngban kpa be ɔli Zezi i wun lɔ kɛ ɔ yo be juejue naan ɔ kan Ɲanmiɛn ndɛ’n kle be. “Be ti akpi nnan, sanngɛ b’a ka-man bla nin ba kanngan mun b’a wla-man nun.” (Mat. 15:38) Ndɛ sɔ’m be kle kɛ yasua kpanngban kpa be bali Zezi sin yɛ like ng’ɔ kleli’n, ɔ loli be. Zezi si kɛ sran kpanngban kpa bé wá sɔ́ nanwlɛ ndɛ’n nun klanman. Like ng’ɔ kle sɔ’n yɛle kɛ, kɛ ɔ yoli maan i sɔnnzɔnfuɛ’m be trali jue kpanngban’n, i sin’n ɔ seli i sɔnnzɔnfuɛ Simɔn kɛ: “Kɛ ɔ fin ndɛ’n, sran yɛ á wá trɛ́ i kɛ a fa tra kpatra’n sa-a.” (Lik 5:10) Zezi fali jasin fɛ’n bolɛ junman nga bé wá dí’n sunnzunnin jue tralɛ. I sɔ’n nun’n, ɔ́ úka be naan sɛ é kwlá sé’n b’a “tra” sran kpanngban. Yasua’m bé trán sran sɔ’m be nun wie.
2 Andɛ kusu’n, Biblu’n nun ndɛ’n nga e kan’n, ɔ lo yasua mun wie. Yɛ be klo kɛ e kle be like. (Mat. 5:3) Be bo i bo klanman cɛ, sanngɛ be nun sunman be kɔman be ɲrun. ?Wafa sɛ yɛ e kwla uka be ɔ? Zezi w’a boman jasin trele kun sa m’ɔ ti yasua’m be ngunmin be liɛ ɔ. Sanngɛ ndɛ wie mɔ be lo i blɛ su yasua mun’n, ɔ jrannin be su boli jasin fɛ’n kleli be. Like suanlɛ nga nun’n, é wá wún wafa nga Zezi ukali yasua mun’n ɔ nin wafa nga e kwla yo kɛ i sa’n. É wá kán sa nsan be ndɛ. Be nun klikli’n yɛle sika ndɛ’n. I nɲɔn su’n yɛle sran’m be wun srɛ’n. Yɛ i nsan su’n yɛle akunndan nga be bu i kɛ be kwlá yoman kɛ be nga’m be sa’n.
Sɛ yasua kun koko sika ti’n
3, 4. (a) ?Yasua’m be akunndan’n nun’n, ngue yɛ ɔ ti ninnge’m be nun cinnjin kpafuɛ’n niɔn? (b) ?Ngue ti yɛ yasua’m be bu i kɛ sika kunndɛlɛ’n nin junman dilɛ’n be ti kpa tra Ɲanmiɛn sulɛ’n niɔn?
3 Mmla klefuɛ kun seli Zezi kɛ: “Nja, lika kwlaa bɔ á kɔ́’n, min nin wɔ é kɔ́-ɔ.” Zezi tɛli i su kɛ: “M bɔ n kacili Sran’n, n lɛ-man lika bɔ n la nun n de wunmiɛn bɔ kan-an.” Kɛ bian’n tili i sɔ’n, i akunndan’n kacili. Atrɛkpa’n, lawlɛ nin aliɛ be ti kokolɛ’n ti ɔ.—Mat. 8:19, 20.
4 Yasua sunman be bu i kɛ sika ɲanlɛ nin junman dilɛ’n ti kpa tra Biblu’n nun like suanlɛ nin i nun ndɛ’n i su nantilɛ. Like ng’ɔ ti be cinnjin’n yɛle diplɔmu dandan ɲanlɛ nin junman dandan’m be dilɛ. Be se be wun kɛ sɛ be ɲan sika nin junman kpa kun be di’n, i sɔ’n yó be ye trá Biblu’n nun like suanlɛ’n nin Ɲanmiɛn i janvuɛ tralɛ’n. Like nga Biblu’n kle’n kwla yo be fɛ sɔ. Sanngɛ “mɛn’n nun ninnge’n i ngokoɛ’n, nin anyanbeun i klolɛ’n” be ti’n, be yaci Ɲanmiɛn ndɛ’n i suanlɛ nin i su falɛ. (Mar. 4:18, 19) Zezi ukɛli i sɔnnzɔnfuɛ mun naan b’a wun like nga ɔ fata kɛ ɔ yo be cinnjin kpafuɛ’n. Maan e fa e ɲin sie wafa nga ɔ yoli’n su.
5, 6. Akunndan nga i klikli nun’n Andre nin Piɛli nin Zaki ɔ nin Zan be bu i jasin fɛ’n bolɛ’n nin sika kunndɛlɛ’n su’n, ɔ kacili. ?Ngue ti ɔ?
5 Andre nin i niaan bian Simɔn Piɛli be ti jue trafuɛ. Zan nin i niaan bian Zaki nin be si Zebede be di junman kunngba’n wie likawlɛ. Zaki nin i niaan bian nin i si be junman’n ba nvlɛ kpa. I ti be kunndɛli junman difuɛ mun ukali be su. (Mar. 1:16-20) Kpalɛ klikli nga Zan batɛmu yofuɛ’n kannin Zezi i ndɛ kleli Andre nin Zan’n, be lafili su kpa kɛ Zezi yɛ ɔ ti Mɛsi’n niɔn. Kɛ Andre tili i sɔ’n, ɔ ko boli su kleli i niaan bian Simɔn Piɛli. Zan kusu’n, atrɛkpa’n i yɛ ɔ boli su kleli i niaan bian Zaki ɔ. (Zan 1:29, 35-41) Anglo nga be bɛli i sin’n be nun’n, kɛ Zezi ɔli jasin fɛ’n i bolɛ Galile nin Zide nin Samari’n, ɔ nin be sran nnan’n yɛ be ɔli ɔ. Sanngɛ kasiɛn su’n, be sali be sin be junman’n su ekun. Ɲanmiɛn ndɛ nga Zezi kleli be’n ɔ yoli be fɛ sɔ. Sanngɛ blɛ sɔ nun’n, nán jasin fɛ’n i bolɛ’n yɛ ɔ yoli be cinnjin ɔn.
6 Kɛ i osu cɛli kan’n, Zezi yiali Piɛli nin Andre kɛ be su i su naan be “kaci sran’m be trafuɛ kɛ jue trafuɛ sa.” ?Kɛ ɔ yoli sɔ’n, ngue yɛ be yoli ɔ? “Be yacili lala’m be lɛ, yɛ be suli i su-ɔ.” I kunngba’n yɛ Zan nin Zaki be yoli ɔ. Yɛle kɛ “be yacili be si nin alie’n lɛ, yɛ be suli i su-ɔ.” (Mat. 4:18-22) ?Ngue ti yɛ be fali be wun wlɛli i blɛ kwlaa nun Ɲanmiɛn junman dilɛ nun ɔn? ?Be tɔli i sɔ ajalɛ’n su sa yɛ be fali ɔ? Cɛcɛ! Afin i nun nga be ɔli Zezi sunmanlɛ’n, be tili ndɛ ng’ɔ kannin’n, be wunnin abonuan sa ng’ɔ yoli’n, be wunnin kɛ ɔ yoli sa kpa juejue su. Yɛ be wunnin ekun kɛ Ɲanmiɛn ndɛ nga ɔ kannin’n ɔ yoli sran’m be fɛ kpa. I kwlaa sɔ’n yoli maan wafa nga be lafili Zoova su’n, mɔ be fali be wla guɛli i su’n yoli dan trali laa’n.
7. ?Wafa sɛ yɛ e kwla uka Biblu’n nun like suanfuɛ mun naan b’a lafi su kɛ Zoova nian i sufuɛ’m be lika ɔ?
7 ?Kɛ Zezi sa’n, wafa sɛ yɛ e kwla uka sran nga e kle be Biblu’n nun like’n naan b’a fa be wla b’a gua Zoova su ɔ? (Nya. 3:5, 6) Wafa nga e kle be like’n kwla uka be. Yɛle kɛ, kɛ é klé be like’n, e kwla kle be kɛ Zoova waan sɛ e dun mmua fa e wun mɛn i naan e yo i klun sa’n, ɔ́ rá e su. (An kanngan Malasi 3:10 nin Matie 6:33 nun.) E kwla fa Biblu’n nun ndɛ wie mun e kle be kɛ Zoova nian i sufuɛ’m be lika. Sanngɛ nán maan e wla fi kɛ wafa nga e bɔbɔ e nanti Ɲanmiɛn i ndɛ’n su’n, ɔ kwla uka be wie. Kɛ sa wie’m be tɔli e su’n, wafa nga Zoova ukali e’n, sɛ e bo su e kle be’n, ɔ́ úka be naan b’a fa be wla b’a gua Zoova su. Asa ekun’n, sɛ e kanngannin aniaan wie’m be su ndɛ e fluwa’m be nun’n, e kwla fa e kle be. *
8. (a) ?Ngue ti yɛ ɔ fata kɛ Biblu’n nun like suanfuɛ’n, ɔ “wun kɛ Anannganman ti kpa dan” mɛn i ɔ? (b) ?Wafa sɛ yɛ e kwla uka like suanfuɛ’n naan i bɔbɔ w’a wun kɛ Zoova ti kpa dan mɛn i ɔ?
8 Wafa nga Zoova rali sran wie’m be su’n, i su ndɛ nga be kan’n i tielɛ’n nin i kannganlɛ’n kwla uka Biblu’n nun like suanfuɛ mun naan b’a lafi Ɲanmiɛn su. Sanngɛ nɛ́n i sɔ ngunmin yɛ ɔ́ yó naan be Ɲanmiɛn sulafilɛ’n i bo’n w’a wla ase kpa ɔ. Ɔ fata kɛ be wun i wie kɛ Zoova ti kpa man be bɔbɔ. Jue Mun 34:9 se kɛ: “Amun sie amun nyin ase be nian. Amún wá wún kɛ Anannganman ti kpa dan! Sran ng’ɔ fiɛ i nun’n, i liɛ su ti ye!” ?Wafa sɛ yɛ e kwla uka like suanfuɛ mun naan b’a wun kɛ Zoova ti kpa dan ɔn? Maan e se kɛ sran nga e kle i like’n, i sa mian sika wun. Asa kusu’n, ɔ su miɛn i ɲin naan w’a yaci nzuɛn tɛ wie. Ɔ kwla yo kɛ siklɛti nɔnlɛ sa annzɛ sika nun mma tolɛ sa annzɛ kusu nzan’n i ngboko nɔnlɛ sa. (Nya. 23:20, 21; 2 Kor. 7:1; 1 Tim. 6:10) I ukalɛ nun’n, e kwla kle i kɛ ɔ srɛ Ɲanmiɛn kɛ ɔ ukɛ i naan ɔ wla i nzuɛn tɛ’n i ase. Kɛ ɔ́ yáci nzuɛn sɔ’n m’ɔ́ wún i wun fɛ’n, ɔ́ wún i kɛ Zoova ti kpa dan. I sin’n, e kwla wlɛ i fanngan kɛ ɔ fa Zoova i sulɛ’n, ɔ sie i like kwlaa ɲrun. Yɛle kɛ e kwla se i kɛ ɔ ti cinnjin kɛ le mɔcuɛ kwlaa nun’n, ɔ suan Biblu’n nun like naan ɔ siesie i wun naan w’a ɔ aɲia’m be bo naan kusu ɔ fataman kɛ ɔ kpɛ aɲia’m be bo kɔlɛ’n nun cɛn. Kɛ like suanfuɛ’n wá wún kɛ Zoova su suɛn i bo’n, ɔ́ láfi i su trá laa’n. Yɛ ɔ́ yáci ninnge kɛ sika sa’n, be ti kokolɛ.
Sɛ sran wun srɛ kun be’n
9, 10. (a) ?Ngue ti yɛ Nikodɛmu nin Zozɛfu m’ɔ fin Arimate’n b’a yiman be wun nglo kɛ be ti Zezi i sɔnnzɔnfuɛ ɔ? (b) ?Ngue ti yɛ Klist i su sulɛ’n ti kekle man yasua wie mun ɔn?
9 Sran’m be wun srɛ ti’n, ɔ ti kekle man yasua wie’m be kɛ be su Klist su kɛ ɔ nin i fata’n sa. I wie yɛle Nikodɛmu ɔ nin Zozɛfu m’ɔ fin Arimate’n be liɛ’n. B’a yiman be wun nglo kɛ be ti Zezi i sɔnnzɔnfuɛ. Afin srɛ kun be Zuifu’m be wun. (Zan 3:1, 2; 19:38) Nán ngbɛn ti yɛ srɛ kunnin be ɔ. Yɛle kɛ Zuifu’m be Ɲanmiɛn sulɛ wafa’m be su kpɛnngbɛn’m be kpɔli Zezi dan. Ɔ maan sɛ sran kun yi i nglo kɛ ɔ lafi Zezi su’n, be su mɛnmɛn i atin kɛ ɔ wlu be Ɲanmiɛn ndɛ suanlɛ’n nin i srɛlɛ sua’m be nun kun.—Zan 9:22.
10 Lika wie’m be nun’n, yasua ng’ɔ kle kɛ Ɲanmiɛn i ndɛ annzɛ i sulɛ ti i cinnjin kpa’n annzɛ kusu ɔ klo Biblu’n nun ndɛ’n, i wiengu junman difuɛ mun annzɛ i janvuɛ mun annzɛ i osufuɛ’m be kwla kle i ɲrɛnnɛn. Lika uflɛ nun’n, sɛ yasua kun se kɛ ɔ́ tú Ɲanmiɛn sulɛ wafa kun nun naan ɔ́ kɔ́ uflɛ nun’n, i bo’n kwla gua tɛ kpa mɛn i. Sɛ yasua’n ti sonja annzɛ politikifuɛ annzɛ ɔ le ɲrun i akpasua’n su lɔ’n, naan ɔ kan Ɲanmiɛn sulɛ ndɛ’n, i liɛ nn w’a treke nun. Bian kun m’ɔ fin Alemaɲi’n ɔ dili i nanwlɛ kɛ: “Amun Zoova i Lalofuɛ mun’n, Biblu’n i su ndɛ nga amun kan’n ti nanwlɛ. Sanngɛ sɛ andɛ n kaci Zoova i Lalofuɛ’n, lele mɔ aliɛ’n fá cɛ́n’n sran ngba w’a ti. ?Yɛ sɛ be ti’n niɔn, sran nga e nin be e di junman’n, ɔ nin min mantanfuɛ mun, ɔ nin be nga be si min mɔ be si min awlofuɛ mun’n, bé sé sɛ? I sɔ trɔ liɛ’n, n su kwlɛmɛn i sua.”
11. ?Wafa sɛ yɛ Zezi ukɛli i sɔnnzɔnfuɛ mun naan b’a yoman srongble kun ɔn?
11 Kannzɛ Zezi i akoto’m be nun wie fi timan srɛfuɛ’n, sanngɛ ɔ juli wie’n, be yoli srongble. (Mar. 14:50, 66-72) ?Wafa sɛ yɛ Zezi ukali be naan kannzɛ sran’m be mianmian be kpa’n b’a kwla si nanwlɛ’n naan b’a fa su ɔ? Zezi ukali be naan yalɛ nga cɛn wie lele bé klé be’n, b’a kwla jrɛn i ɲrun kekle. Ɔ seli be kɛ: “Kɛ sran’m bé kpɔ́ amun, bɔ bé kán amun bo, bɔ bé kpɛ́ amun nzowa, bɔ bé sáci amun dunman m bɔ n kacili Sran’n min ti’n, amun liɛ su ti ye!” (Lik 6:22) Zezi seli i sɔnnzɔnfuɛ’m be kɛ maan be si kɛ saan sran’m bé klé be ɲrɛnnɛn. Sanngɛ ɔ seli be wie kɛ i ‘bɔ ɔ kacili Sran’n i ti’ yɛ bé yó be sɔ ɔ. Asa ekun’n, ɔ seli be kɛ sɛ be srɛ Ɲanmiɛn kɛ ɔ uka be naan ɔ wla be yakpa’n, ɔ́ súan be bo titi. (Lik 12:4-12) Asa kusu’n, ɔ seli be nga blɛ li yɛ be su su i su’n be kɛ be fa be wun mɛntɛn i sɔnnzɔnfuɛ mun naan be nin be tra janvuɛ.—Mar. 10:29, 30.
12. ?Wafa sɛ yɛ e kwla uka be nga e kle be Biblu’n nun like’n naan b’a yoman srongble kun ɔn?
12 E kusu’n, ɔ fata kɛ e uka be nga e kle be Biblu’n nun like’n, naan b’a yoman srongble kun. Wafa nga e kwla yo sɔ’n i kun yɛle kɛ e uka be naan sɛ sran’m be waan bé klé be yalɛ’n, b’a si wafa nga be kwla kpli be ti’n. (Zan 15:19) Wafa nga be kwla tɛ kosan wie’m be su’n, e kwla uka be naan b’a bu i akunndan b’a sie. I liɛ’n sɛ be wiengu junman difuɛ wie annzɛ sran uflɛ wie fa ndɛ wie mian be sa’n, bé wún wafa nga bé kwlá fá Biblu’n bé tɛ́ i su’n. Maan e kaci be janvuɛ kpɛkun e fa be e kle asɔnun’n nunfuɛ mun. I li be nga sa ng’ɔ o be su’n w’a ju be su le’n. Sanngɛ ng’ɔ ti cinnjin kpa’n yɛle kɛ e kle be wafa nga be kwla kan be klun ndɛ kle Ɲanmiɛn titi’n. I sɔ’n úka be naan be nin Ɲanmiɛn be afiɛn w’a mantan kpa. Zoova yó kɛ be Yɛbuɛ sa i sin yɛ bé fía ɔ.—An kanngan Jue Mun 94:21-23 nin Zak 4:8 nun.
Sɛ yasua kun bu i kɛ ɔ kwlá yoman kɛ be nga’m be sa’n
13. ?Ngue ti yɛ yasua wie’m be faman be wun be wlɛmɛn i Ɲanmiɛn sulɛ’n nun kpa ɔ?
13 Yasua wie’m be siman fluwa nun kanngan kpa annzɛ ijɔlɛ’n ti kekle man be annzɛ kusu be sa ɲan. I ti’n, kɛ ɔ yo naan be fa be wun be wlɛ i Ɲanmiɛn i sulɛ’n nun’n kpa’n, ɔ ti kekle. Wie’m be kusu’n, be kloman kɛ bé kán be Ɲanmiɛn sulafilɛ’n i ndɛ nzra nun. Kɛ be bu like suanlɛ’n nin kosan’m be su tɛlɛ aɲia’m be bo lɔ’n ɔ nin jasin fɛ’n i bolɛ’n be akunndan’n, be wunman be wun fɛ mlɔnmlɔn. Aniaan bian kun dili i wun nanwlɛ. I waan: “I nun mɔ n te yo gbanflɛn kan’n, kɛ e kɔ jasin fɛ’n i bolɛ’n, n nanti ndɛndɛ n kɔ anuan’m be ɲrun lɛ. N yo kɛ n su bobo sa. Kpɛkun blɛlɛlɛ m’an jaso lɛ m’an wɔ. Kɛ ń kɔ́’n n ra min nuan kɛ nán sran fi wun min annzɛ ɔ ti min ngan. [...] Kɛ awloawlo’m be nun jasin fɛ’n bolɛ’n i akunndan kpɛn n klun’n, n tɔ tukpacɛ.”
14. ?Ngue ti yɛ Zezi i sɔnnzɔnfuɛ’m b’a kwlá yoman bakan kun mɔ mmusu kle i ɲrɛnnɛn’n i juejue ɔ?
14 I nun nga Zezi i sɔnnzɔnfuɛ’m b’a kwlá yoman bakan kun mɔ mmusu kun kle i yalɛ’n i juejue’n, wafa nga be wun fa yoli be’n, maan e bu i akunndan e nian. Atrɛkpa’n be seli be wun kɛ be su kwlá yoman like nga Zezi waan be yo’n le. Ba sɔ’n i si’n w’a seli Zezi kɛ: “N wa yasua’n [...] ti ngbitiɛfuɛ, w’a fɛ kpa, ɔ ta sin nin nzue’n nun tɔ. N fɛ blɛli ɔ sɔnnzɔnfuɛ mun, sanngɛ b’a kwlá yo-mɛn i juejue.” Kɛ Zezi fuannin mmusu’n, ba’n yoli juejue. I sin’n, i sɔnnzɔnfuɛ’m be wunngeli i wun lɛ naan b’a usɛ i kɛ: “?Nguɛ ti yɛ y’a kwlá fuan-man asiɛ usu sɔ nin-ɔn?” Zezi tɛli be su kɛ: “Nyanmiɛn su bɔ an lafi-man’n ti-ɔ. Nanwlɛ, sɛ an lafi Nyanmiɛn su bɔ kaan b’ɔ ju kɛ mutard mma sa’n, an kwla se oka ng’ɔ o yɛ’n kɛ: ‘Tu ɔ bo wa kɔ le sa.’ Ɔ́ tú i bo, yɛ sa fi nun-man lɛ bɔ an su kwlɛ-mɛn i yo-ɔ.” (Mat. 17:14-20) Sɛ sran kun lafi Zoova su’n, ɔ kwla yo ninnge wie m’ɔ bu i kɛ ɔ su kwlaman be yo le’n. Sanngɛ sɛ ɔ yaci Ɲanmiɛn lɛ naan ɔ lafi i bɔbɔ wun su’n, ɔ su kwlá yoman ninnge sɔ mun. Kpɛkun i agualiɛ su’n, ɔ́ bú i kɛ ɔ su kwlá suman Zoova.
15, 16. ?Wafa sɛ yɛ e kwla uka Biblu’n nun like suanfuɛ’n naan w’a bumɛn i kun kɛ ɔ kwlá suman Zoova wie ɔ?
15 Like kpa kun mɔ e kwla yo e fa uka sran kun naan w’a wun i kɛ ɔ kwla su Zoova kɛ be nga’m be sa’n, yɛle kɛ e wlɛ i fanngan naan nán ɔ lafi i bɔbɔ i wun su, naan Zoova su yɛ ɔ lafi ɔ. Piɛli klɛli i kɛ: “An yo amun wun aenvuɛfuɛ’m Nyanmiɛn b’ɔ kwla sa kwlaa yo’n i nyrun naan sɛ cɛn ng’ɔ sieli’n ju’n w’a man amun su. An koko sa ng’ɔ o amun su’n i kwlaa kle i.” (1 Piɛ. 5:6, 7) Ɔ fata kɛ e uka sran nga e kle i Biblu’n nun like’n naan ɔ klo Zoova yɛ ɔ klo i atin’m be su falɛ. Yɛle kɛ ɔ fata kɛ ɔ klo like ng’ɔ suan’n naan ɔ yo “sa nga Nyanmiɛn Wawɛ’n maan sran yo’n.” (Gal. 5:22, 23) Ɔ fata kɛ Ɲanmiɛn srɛlɛ’n yo i cinnjin kpa. (Fil. 4:6, 7) Yɛ ɔ fata kɛ ɔ wun i wlɛ kɛ Ɲanmiɛn yɛ ɔ́ mɛ́n i awlɛn nin wunmiɛn naan w’a kwla yo like nga ɔ se i kɛ ɔ yo’n niɔn.—An kanngan 2 Timote 1:7, 8 nun.
16 Ɔ fata kɛ e uka Biblu’n nun like suanfuɛ wie mun naan b’a si fluwa nun kanngan annzɛ b’a si sran ɲrun ijɔ. Wie’m be liɛ’n, kwlaa naan b’a si Zoova’n, be yoli ninnge tɛtɛ wie mun. Ɔ maan be se be wun kɛ be nin Ɲanmiɛn sulɛ fataman. I kwlaa sɔ nun’n, like ng’ɔ kwla uka be’n yɛle kɛ e klo be naan e tra e awlɛn be wun. Zezi seli kɛ: “Nán sran ng’ɔ ti juejue’n yɛ ɔ kɔ ayrefuɛ sin-ɔn, sanngɛ tukpacɛfuɛ yɛ ɔ kɔ-ɔ.”—Mat. 9:12.
Maan e uka yasua kaka naan be si Zoova
17, 18. (a) ?Ngue yɛ e kwla yo naan y’a kan Ɲanmiɛn ndɛ’n y’a kle yasua kpanngban ɔn? (b) ?Like suanlɛ ng’ɔ́ bá lɛ nun’n, kosan benin yɛ é tɛ́ su ɔ?
17 Like nga e kunndɛ i kpa’n yɛle kɛ yasua kaka kpa ekun be sɔ Biblu’n nun ndɛ fɛfɛ’n nun. Afin i kunngba cɛ yɛ ɔ kwla man be aklunjuɛ kpafuɛ’n niɔn. (2 Tim. 3:16, 17) ?Ngue yɛ e kwla yo naan y’a kan Ɲanmiɛn ndɛ’n y’a kle yasua kpanngban ɔn? E kwla bo jasin fɛ’n nnɔsua nun annzɛ Fue nin Mɔnnɛn cɛn nnɔsua wia nun wie. Asa ekun’n, cɛn nga sran’m be kɔman junman’n, mɔ yasua’m be nun sunman be o awlo’n, e kwla bo jasin fɛ’n wie. Asa kusu’n, kɛ e ju awlo kun nun’n, e kwla se awlofuɛ’m be kɛ e klo kɛ e nin awlo kpɛn’n é íjɔ. I wie ekun yɛle kɛ e junman’n su lɔ’n, e kwla fa ngwlɛlɛ naan y’a kan Ɲanmiɛn ndɛ y’a kle yasua mun. Yɛ e kwla fa e ɲin e sie i aniaan bla nga be wun’m be timan Zoova i Lalofuɛ’n be su wie.
18 E klo kɛ sran kaka be si nanwlɛ’n. Be nga be kunndɛ nanwlɛ’n i sin atin’n, saan bé síe be su jasin nga e bo’n, i bo. I ti’n, sɛ sran kun kle kɛ ɔ klo Ɲanmiɛn ndɛ’n, maan e tra e awlɛn e ukɛ i. ?Yɛ be nga b’a yo be batɛmu’n be li? ?Wafa sɛ yɛ e kwla uka be naan b’a wɔ be ɲrun naan b’a man be junman Ɲanmiɛn i anuannzɛ’n nun ɔn? É tɛ́ kosan sɔ’m be su like suanlɛ ng’ɔ́ bá lɛ’n nun.
[Ja ngua lɛ ndɛ’n]
^ An nian fluwa Annuaire mun ɔ nin aniaan’m be su ndɛ nga be o Sasafuɛ Tranwlɛ’n nin Réveillez-vous ! nun’n be nun.
?Wafa sɛ yɛ amún tɛ́ su ɔ?
• ?Wafa sɛ yɛ e kwla uka yasua mun naan b’a fa Ɲanmiɛn sulɛ’n b’a dun mmua like kwlaa ɲrun ɔn?
• ?Wafa sɛ yɛ e kwla uka Biblu’n nun like suanfuɛ mun naan sran’m be wun srɛ w’a kunman be kun ɔn?
• ?Wafa sɛ yɛ e kwla uka sran kun naan w’a bumɛn i kɛ ɔ kwlá suman Zoova kɛ i wiengu’m be sa ɔ?
[Kosan mun]
[Foto, bue 25]
?Amun kunndɛ wafa nga amun kwla bo jasin fɛ’n kle yasua kpanngban’n?
[Foto, bue 26]
?Wafa sɛ yɛ amun kwla uka sran nga amun kle i Biblu’n nun like’n naan sɛ be kle i yalɛ’n i sa sin w’a bubumɛn i ɔ?
