Tulongan Dagiti Lallaki a Rumang-ay iti Naespirituan

“Manipud ita agkalapkan iti tattao a sibibiag.”​—LUC. 5:10.

1, 2. (a) Ania ti reaksion dagiti lallaki iti panangasaba ni Jesus? (b) Ania ti usigentayo iti daytoy nga artikulo?

 BAYAT ti panangasaba ni Jesus ken dagiti adalanna iti intero a Galilea, nagbarangayda a napan iti naiputputong a lugar. Ngem adu ti simmurot kadakuada a nangtaraigid iti baybay. Ti bilangda ket ‘agarup lima ribu a lallaki, malaksid kadagiti babbai ken ub-ubbing.’ (Mat. 14:21) Iti sabali pay a gundaway, immasideg ken Jesus ti maysa a bunggoy tapno agpaagas ken agimdeng kenkuana. Karaman iti dayta ti ‘uppat a ribu a lallaki, malaksid kadagiti babbai ken ub-ubbing.’ (Mat. 15:38) Agparang nga adu a lallaki ti immasideg ken Jesus ken naginteres iti pannursurona. Kinapudnona, namnamaenna nga adu pay ti mangipangag ta kalpasan ti namilagruan a panagkalapda, kinunana ken Simon: “Manipud ita agkalapkan iti tattao a sibibiag.” (Luc. 5:10) Inyarig ni Jesus ti panangasabada iti panagkalap. Matulonganna ida a mangbirok kadagiti tattao nga umawat iti kinapudno, a pakairamanan ti adu a lallaki.

² Aginteres met ita dagiti lallaki iti mensahe ti Biblia nga ikaskasabatayo. (Mat. 5:3) Ngem adu kadakuada ti saan nga agtultuloy ken saan a rumangrang-ay iti naespirituan. Kasanotayo a matulongan ida? Iti ministerio ni Jesus, saan a naiduma ti panangasabana kadagiti lallaki ngem inkabilanganna dagiti bambanag a pakaseknanda. Kas panangtulad iti ulidan ni Jesus, usigentayo no kasanotayo a matulongan dagiti lallaki a mangsango iti tallo a gagangay a pakaseknanda: (1) panagsapul iti pagbiag, (2) panagbuteng iti ibaga ti dadduma, ken (3) pannakarikna a saanda a kabaelan ti agserbi.

Panagsapul iti Pagbiag

3, 4. (a) Ania ti kangrunaan a pakaseknan dagiti lallaki? (b) Apay nga ipangpangruna ti dadduma a lallaki ti agsapul iti pagbiag imbes a dagiti naespirituan a bambanag?

³ Maysa nga eskriba ti nagkuna ken Jesus: “Mannursuro, surotenkanto sadinoman ti papanam.” Ngem idi imbaga ni Jesus: “Ti Anak ti tao awan pangisaadanna iti ulona,” nagbaliw ti panunot ti eskriba. Awan ti mabasa iti Biblia nga isu ket nagbalin a pasurot ni Jesus. Mabalin a madanagan no sadino ti pagyananna ken no anianto ti kanenna.​—Mat. 8:19, 20.

⁴ Masansan nga iyun-una dagiti lallaki ti material ngem iti naespirituan a bambanag. Prioridad ti kaaduan kadakuada ti nangato nga edukasion ken napintas a trabaho. Pampanunotenda a napatpateg ken mas praktikal ti kuarta tapno agbiag ngem iti panagadal iti Biblia ken panagbalin a nasinged iti Dios. Mabalin nga interesadoda kadagiti pannursuro ti Biblia, ngem mapukaw dayta nga interes gapu kadagiti “pakaringgoran daytoy a sistema ti bambanag ken ti makaallilaw a pannakabalin ti kinabaknang.” (Mar. 4:18, 19) Ammuentayo no kasano a tinulongan ni Jesus dagiti adalanna a mangbaliw kadagiti prioridadda.

5, 6. Ania ti nakatulong kada Andres, Pedro, Santiago, ken Juan a mangbaliw kadagiti prioridadda maipapan iti panangasaba ken panagsapul iti pagbiag?

⁵ Agsosio iti negosio a panagkalap ti agkabsat a da Andres ken Simon Pedro. Kaduada pay ti agkabsat a da Juan ken Santiago agraman ti amada a ni Zebedeo. Narang-ay ti negosioda ta  adda kakaduada a matangtangdanan a lallaki. (Mar. 1:16-20) Idi damo a mangngeg da Andres ken Juan ti maipapan ken Jesus manipud ken Juan a Mammautisar, kombinsidoda a nasarakandan ti Mesias. Impadamag dayta ni Andres ken ni Simon Pedro a kabsatna, ken nalabit impakaammo met dayta ni Juan ken ni Santiago a kabsatna. (Juan 1:29, 35-41) Kadagiti simmaganad a bulbulan, nakikaduada nga uppat ken ni Jesus iti panangasabana iti Galilea, Judea, ken Samaria. Kalpasanna, nagsubli iti negosio a panagkalap ti uppat nga adalan. Interesadoda iti naespirituan ngem saan a ti ministerio ti kangrunaan iti biagda.

⁶ Idi agangay, inawis ni Jesus da Pedro ken Andres a sumurot kenkuana tapno agbalin a “dumadaklis iti tattao.” Ania ti reaksionda? ‘Dagus a binaybay-anda dagiti iketda ket simmurotda kenkuana.’ Kasta met ti inaramid da Santiago ken Juan. ‘Dagus a pinanawanda ti barangay ken ti amada ket simmurotda kenkuana.’ (Mat. 4:18-22) Ania ti nakatulong kadagitoy a lallaki a mangasaba iti amin a tiempo? Gapu kadi iti emosion wenno nadarasudos a panagdesision? Saan! Kadagiti napalabas a bulbulan, dimngegda ken Jesus, naimatanganda dagiti inaramidna a milagro, nakitada ti kinaregtana agpaay iti kinalinteg, ken nasaksianda ti nakaskasdaaw nga epekto ti panangasabana. Kas resultana, timmibker ti pammati ken panagtalekda ken Jehova!

7. Kasanotayo a matulongan dagiti iyad-adalantayo iti Biblia nga agtalek a kabaelan ni Jehova nga ipaay ti kasapulan ti ilina?

⁷ Kas panangtulad ken Jesus, kasanotayo a matulongan dagiti iyad-adalantayo iti Biblia a mangpatanor iti panagtalekda ken Jehova? (Prov. 3:5, 6) Makatulong ti wagas a panangisurotayo kadakuada. No iyadalantayo ida, mabalintayo nga ipaganetget nga inkari ti Dios a sibabaknang a bendisionannatayo no iyun-unatayo ti Pagarian. (Basaen ti Malakias 3:10; Mateo 6:33.) Nupay mabalintayo nga usaren ti nagduduma a teksto a mangipaganetget no kasano nga ipaay ni Jehova ti kasapulan ti ilina, dakkel met ti maitulong ti ulidantayo. No iranudtayo kadakuada dagiti kapadasantayo matulongantayo ida a mangpatanor iti panagtalek ken Jehova. Mabalintayo met nga iyestoria dagiti makaparegta a kapadasan a nabasatayo kadagiti literaturatayo. a

8. (a) Apay a napateg a ‘mananam ken makita ti iyad-adalantayo a ni Jehova ket naimbag’? (b) Kasanotayo a matulongan ti iyad-adalantayo a makapadas iti kinaimbag ni Jehova?

⁸ Tapno maaddaan iti nabileg a pammati, saan nga umdas ti panagbasa ken panagimdeng iti kapadasan ti dadduma no kasanoda a nasagrap dagiti bendision ni Jehova. Masapul met a mapadasan a mismo ti iyad-adalantayo ti kinaimbag ni Jehova. Inkanta ti salmista: “O nanamenyo ken kitaenyo a ni Jehova naimbag; naragsak ti nabaneg a lalaki nga agkamang kenkuana.” (Sal. 34:8) Kasanotayo a matulongan ti iyad-adalantayo a mangpaneknek iti kinaimbag ni Jehova? Ipapantayo a ti iyad-adalantayo ket agprobproblema iti kuarta ken ikagkagumaanna pay a labanan ti bisiona kas iti panagsigarilio, panagsugal, wenno nalabes  a panaginum. (Prov. 23:20, 21; 2 Cor. 7:1; 1 Tim. 6:10) Saan ngata a makatulong no suruantayo nga ikararagna ti tulong ti Dios tapno maparmekna ti bisiona ken mapadasanna ti kinaimbag ni Jehova? Nasayaat met nga iparegtatayo nga ipangpangrunana dagiti naespirituan a bambanag babaen ti panangiwayana iti linawas a panagadal iti Biblia ken panagsagana ken itatabuno kadagiti gimong. Sigurado a bumileg ti pammatina bayat a makitkitana a bembendisionan ni Jehova dagiti panagreggetna!

Panagbuteng iti Ibaga ti Dadduma

9, 10. (a) Apay nga inlimed da Nicodemo ken Jose iti Arimatea nga adalan ida ni Jesus? (b) Apay a bumdeng ti dadduma a lallaki a sumurot ken Kristo?

⁹ Gapu iti impluensia ti kakadua, bumdeng ti dadduma a lallaki a sumurot a naan-anay ken Kristo. Kas pagarigan, inlimed da Nicodemo ken Jose iti Arimatea nga adalan ida ni Jesus gapu ta mabutengda iti mabalin nga ibaga wenno aramiden kadakuada dagiti Judio. (Juan 3:1, 2; 19:38) Adda rason no apay a mabutengda. Napalalo ti gura dagiti lider ti relihion ken Jesus nga uray la nga ilaksidda iti sinagoga ti siasinoman a mangipakita iti pammati kenkuana.​—Juan 9:22.

¹⁰ Iti dadduma a lugar, no ti maysa a lalaki ket aginteres iti Dios, iti Biblia, wenno iti relihion, mabalin nga umsien dagiti katrabahuan, gagayyem, wenno kabagianna. Adda pay dagiti lugar a mabalin a napeggad a pagsasaritaan ti panangbaliw iti relihion. Nangnangruna a narigat no ti maysa ket aktibo iti militar, politika, wenno komunidad ta adu ti mangumsi kenkuana. Kas pagarigan, kuna ti maysa a lalaki a taga-Germany: “Pudno ti ikaskasabayo a Saksi maipapan iti Biblia. Ngem no agbalinak a Saksi ita, maammuanton ti amin inton bigat. Anianto laengen ti ibaga dagiti katrabahuak, kaarrubak, ken dagiti makaam-ammo kadakami? Diak la ketdi kabaelan a sanguen dayta.”

11. Kasano a tinulongan ni Jesus dagiti adalanna a mangparmek iti panagbuteng iti tao?

¹¹ Nupay natured ti amin nga apostol ni Jesus, adda met gundaway a nagbutengda iti ibaga ti dadduma. (Mar. 14:50, 66-72) Kasano a tinulongan ida ni Jesus a rumang-ay iti kinapudno iti laksid ti nakaro nga ibubusor? Insagana ni Jesus dagiti adalanna a sumango iti dayta. Kinunana: “Naragsakkayo inton guraendakayo dagiti tattao, ken inton laksidendakayo ken umsiendakayo ken laksidenda ti naganyo a kas nadangkes maigapu iti Anak ti tao.” (Luc. 6:22) Impakpakauna ni Jesus kadagiti pasurotna a maumsida ngem “maigapu iti Anak ti tao.” Impasiguradona met a tulongan ida ti Dios no la ket ta agkiddawda kenkuana iti tulong ken bileg. (Luc. 12:4-12) Inawis pay ni Jesus dagiti kabbaro a makikadua ken makigayyem kadagiti adalanna.​—Mar. 10:29, 30.

12. Kadagiti ania a pamay-an a matulongantayo dagiti kabbaro a mangparmek iti panagbutengda iti tao?

¹² Masapul a tulongantayo ti iyad-adalantayo a mangparmek iti panagbuteng iti tao. Masansan a nalaklaka a sanguen dayta no  namnamaem a mapasamak. (Juan 15:19) Kas pagarigan, apay a dimo tulongan nga agsagana iti simple, praktikal, ken naibatay-Biblia a sungbat kadagiti saludsod ken argumento dagiti katrabahuanna ken ti sabsabali? Mabalintayo pay nga iyam-ammo kadagiti kakongregasiontayo, nangruna kadagidiay kapadana iti situasion wenno paginteresan tapno saan laeng a datayo ti gayyemna. Kangrunaanna, suruantayo a regular nga agkararag iti naimpusuan. Iti kasta, suminged iti Dios ken agbalin ni Jehova kas Kamang ken Batona.​—Basaen ti Salmo 94:21-23; Santiago 4:8.

Pannakarikna a Saan a Kabaelan ti Agserbi

13. Apay a bumdeng ti dadduma a makiraman kadagiti naespirituan a bambanag?

¹³ Bumdeng ti dadduma a makiraman kadagiti naespirituan nga aktibidad gapu ta mabainda, dida nalaing nga agbasa, wenno marigatanda a mangyebkas iti kapanunotanda. Marigatan ti dadduma a mangibaga iti opinion wenno rikriknada iti publiko. Narigat para kadakuada ti agadal, agkomento kadagiti gimong, wenno mangasaba. Kuna ti maysa a kabsat a lalaki: “Idi ubingak pay, dagus nga umasidegak iti ruangan, agintatalmegak iti doorbell, sa agin-inayadak a pumanaw, a mangnamnamaak nga awan ti nakangngeg wenno nakakita kaniak. . . . Kasla agsakitak no panunotek ti agbalaybalay.”

14. Apay a saan a napaimbag dagiti adalan ni Jesus ti ubing a naluganan iti demonio?

¹⁴ Naawanan iti kompiansa dagiti adalan ni Jesus idi saanda a napaimbag ti ubing a naluganan iti demonio. Ti ama ti ubing immasideg ken Jesus ket kinunana: “[Ti anakko a lalaki] adda kissiwna ken masakit, ta matnag a masansan iti apuy ken masansan iti danum; ket inyegko kadagiti adalam, ngem saanda a kabaelan nga agasan.” Pinaruar ni Jesus ti demonio ket immimbag ti ubing. Kalpasanna, insaludsod dagiti adalanna: “Apay a saanmi a kabaelan a paruaren dayta?” Insungbat ni Jesus: “Gapu iti bassit a pammatiyo. Ta pudno kunak kadakayo, no addaankayo iti pammati a kas iti kabassit ti bukel ti mustasa, kunaenyonto iti daytoy a bantay, ‘Umaliska manipud ditoy nga agturong sadiay,’ ket umalisto dayta, ket awanto ti di mabalin kadakayo.” (Mat. 17:14-20) Kasapulan ti pammati ken Jehova tapno mapagballigian dagiti arig bantay a lapped. Ania ti mapasamak no mapukaw ti maysa ti pammatina ken mangrugin nga agtalek iti bukodna nga abilidad? Saan nga agballigi ken maawanan iti kompiansa.

15, 16. Kasanotayo a matulongan ti iyad-adalantayo tapno mariknana a kabaelanna ti agserbi?

¹⁵ No marikna ti maysa a dina kabaelan ti agserbi, makatulong no paregtaentayo nga agtalek ken Jehova imbes nga iti bagina. Insurat ni Pedro: “Agpakumbabakayo . . . iti sidong ti mannakabalin nga ima ti Dios, tapno itan-oknakayo iti naikeddeng a tiempo; bayat nga iyallatiwyo kenkuana ti isuamin a pakaringgoranyo.” (1 Ped. 5:6, 7) Masapul a tulongantayo ti iyad-adalantayo a mangparang-ay iti espiritualidadna. Kaipapananna nga ipategna ti maad-adalna iti Biblia ken iparangarangna “ti bunga ti espiritu.” (Gal. 5:22, 23) Kanayon nga agkararag. (Fil. 4:6, 7) Ken agkiddaw iti Dios iti tured ken bileg a mangsango iti aniaman a situasion wenno mangitungpal a sibaballigi iti annongenna.​—Basaen ti 2 Timoteo 1:7, 8.

¹⁶ Dadduma nga iyad-adalan ti agkasapulan met iti praktikal a tulong tapno lumaingda nga agbasa, agsao, wenno makisarita. Adda dagidiay makarikna a dida maikari nga agserbi iti Dios gapu iti naaramidanda a basol sakbay a  naam-ammoda ni Jehova. Aniaman kadagita ti kasasaadda, makatulong ti panagayat ken kinaanustayo kadakuada. Kinuna ni Jesus: “Dagiti tattao a nasalun-at saanda a kasapulan ti mangngagas, no di ket dagiti masaksakit.”​—Mat. 9:12.

‘Agkalap’ iti Ad-adu a Lallaki

17, 18. (a) Kasanotayo a makasarita ti ad-adu a lallaki iti ministeriotayo? (b) Ania ti adalentayo iti sumaganad nga artikulo?

¹⁷ Kayattayo nga ad-adu pay a lallaki ti umawat iti makapnek a mensahe a masarakan laeng iti Biblia. (2 Tim. 3:16, 17) Kasanotayo a makasarita ti ad-adu pay a lallaki iti ministeriotayo? Babaen ti panangbusbostayo iti ad-adu a tiempo a mangasaba kadagiti rabii, malem dagiti ngudo ti lawas, wenno piesta opisial a sadiay ad-adu a lallaki ti adda iti pagtaenganda. No posible, kiddawentayo a kasarita ti ulo ti pamilia. Kasabaantayo iti di pormal dagiti lallaki a katrabahuantayo no maitutop ken dagiti di manamati nga assawa dagiti kakongregasiontayo.

¹⁸ Bayat nga ikagkagumaantayo a kasabaan ti amin, manamnamatayo a mangipangag dagidiay addaan manangapresiar a puso. Siaanus a tulongantayo dagidiay sipapasnek nga aginteres iti kinapudno. Ngem kasanotayo a matulongan dagiti bautisado a lallaki iti kongregasion a rumagpat ken agbalin a kualipikado kadagiti annongen iti organisasion ti Dios? Masungbatan dayta iti sumaganad nga artikulo.

[Footnote]

Ania ti Sungbatyo?

• Kasano a matulongan dagiti lallaki a mangyun-una kadagiti naespirituan a bambanag?

• Kasanotayo a matulongan dagiti kabbaro a mangsango iti impluensia ti sabsabali?

• Kasano a matulongan ti dadduma tapno maparmekda ti rikna a dida kabaelan ti agserbi?

[Salsaludsod]

[Ladawan iti panid 25]

Ar-aramidem kadi ti amin a pamay-an tapno makasabaam dagiti lallaki?

[Ladawan iti panid 26]

Kasanom a maisagana ti iyad-adalam iti Biblia a mangsango kadagiti pakasuotan?