Kwashenu Amayala Kulonda Apaminuku Kuspiritu

‘Kufumisha hanu mukwikala ayibinda awantu.’—LUKA 5:10.

1, 2. (a) Indi amayala elileña ñahi hakutiya nsañu yashimwinineñayi Yesu? (b) Yumanyi yitukuhanjeka muchinu chibaaba?

 HAMPINJI yashimwinineñayi muÑaliliya yejima, Yesu niatumbanji twindi akandamini watu nakuya kwakankawawu. Ilaña mazaza awantu ayilondeleli hamaseki. Antu ayilondeleli hadina ifuku adiñi “amayala kwiji neyi makombakaji atanu, kubombelaku niambanda nianyana.” (Mat. 14:21) Ifuku dikwawu, izaza dawantu damuwanini Yesu, nawu yayuuki nikutiya nsañu yahosheleñayi. Hakachi kawu hadiña “makombakaji awamayala awana, kubombelaku niambanda nianyana.” (Mat. 15:38) Chakadi nikujina, amayala amavulu adiña hakachi kawantu enjili kudi Yesu nawa akeñeleña kutiya nsañu yatañishileñayi. Wakeñeleña nindi amayala amavulu etiyi, muloña chelili nakoñi dehi chihayamisha chakukwata inshi, Yesu walejeli kambanji kindi Shimona nindi: “Kufumisha hanu wukwikala chibinda chawantu [hela amayala].” (Luka 5:10) Atumbanji twindi ateleleli kuta tuleñi mukaluñalwiji hela netu kushimwina kudi antu nawa adi kwikala ‘ayibinda’ awantu kushilahu niamayala amavulu.

² Makonu, amayala azañalalaña hakutiya nsañu yamuNsona yitwashimwinaña nawa etejaña. (Mat. 5:3) Ilaña, amayala amavulu ashintajalaña nawa hiyapamaña kuspirituku. Tunateli kuyikwasha ñahi? Hela chakwila Yesu hadiña nakushimwina munjila yacheñi kudi amayalaku, ilaña wahosheleña hansañu yakundamini kudi amayala hayina mpinji. Kuzatisha chakutalilahu chindi, tutalenu chitunateli kukwasha amayala chatela kumanishawu kukala kusatu kwamonañawu makonu: (1) kuwana mwakuhandila, (2) kuchina mwahoshañawu antu, (3) nikuchina nawu hiyakutweshaku.

Kuwana Mwakuhandila

3, 4. (a) Yumanyi yakamenañawu amayala amavulu? (b) Muloñadi amayala amakwawu chashilañawu maana hachihandilu kubadika hayuma yakuspiritu?

³ Nsoneki wumu wamwilili Yesu nindi: “Eyi Nkuluñaña, nukukulonda kwejima kuwukuya.” Ilaña, Yesu chamulejeliyi nindi “Mwana kamuntu hakweti nihakusachila mutu winduku,” iwu nsoneki wahimpili yitoñojoka yindi. Hadaha watachikili kwakamena nindi yakudya yikufuma kudihi, wukushakamaña kudihi nawa kwosi wunsahu wamwekeshaña nawu iwu nsoneki wekalili kambanji kaKristu.—Mat. 8:19, 20.

⁴ Amayala amavulu afwilaña maheta akumujimba bayi yuma yakuspirituku. Amavulu afwilaña kutaña shikola yahewulu nikuzata mudimu kulonda atambuleña mali amavulu. Kwesekeja nayitoñojoka yawu, kwikala namali amavulu hichuma chalemeshawu nankashi kubadika wuloku wafumaña mukwiluka Nsona nikufwila kwikala nawubwambu wawuwahi naNzambi. Anateli kukeña yuma yatañishaña Bayibolu, ilaña “kwakama kwamakonu, nikudimbana kwamaheta” dikwamanishaña mpwila yawu. (Maku 4:18, 19) Talenu Yesu chayikwashiliyi atumbanji twindi kwiluka yuma yatela kulemeshawu.

5, 6. Chumanyi chayikwashili aAnderi, Petulu, Yakoba niYowanu kuhimpa yuma yalemesheluwu hansañu yakushimwina nikuwana mwakuhandila?

⁵ Anderi nimana kwindi Shimona Petulu azatileña hamu mudimu wakukwata inshi. Yowanu nimana kwindi Yakoba nitata yawu Zebedewu niwena azatilileña hamu. Akwatileña inshi jajivulu chakwila eñijili niantu akuyikwashaku. (Maku 1:16-20) Chelili Anderi niYowanu ayileji kudi Yowanu Mpapatishu nsañu jaYesu, atiyili kuwaha nawu anamuwani Mesiya. Anderi wayili  nakuleja mana kwindi Shimona Petulu, hadaha Yowanu niyena wayili nakuleja mana kwindi Yakoba. (Yow. 1:29, 35-41) Chimwahitili tukweji, awa atumbanji awana adiña hamu naYesu nakushimwina muÑaliliya, muYudeya nimuSamariya. Kuhiñahu, awa atumbanji awana afuntili cheñi nakukwata inshi. Yuma yakuspiritu ayikeñeli, ilaña mudimu wakushimwina hiyawulemesheli nankashuku.

⁶ Nkumininaku, Yesu wamutambikili Petulu niAnderi nindi amulondeli kulonda ekali ‘ayibinda awantu.’ Awa akansi namukulumpi elili ñahi? “Hohenohu ashiya nimawandawu, hiyakumulonda.” Dicheliluwu aYakoba niYowanu. “Hohenohu ashiya niwatu nitata yawu, hiyakumulonda.” (Mat. 4:18-22) Chumanyi chayikwashili awa amayala kutachika mudimu wampinji yejima? Asuñumukili hohu tahindi? Inehi! Hadi tukweji twazatiliyi nawu, awa amayala atiyili chahosheleñayi Yesu, amumweni nakukoña yihayamisha, amweni nawu wadiña nampwila yakwila mwaloña nawa amweni antu amavulu chetejeleñawu nsañu yashimwinineñayi. Chafuminumu, amukuhweleleli Yehova niYesu chikupu!

7. Tunateli kukwasha ñahi atudizi aBayibolu kukuhwelela muñovu jaYehova jakukwasha antu jindi?

⁷ Tunateli kumwimbujola ñahi Yesu hakukwasha atudizi etu aBayibolu kulonda amukuhweleli Yehova? (Yish. 3:5, 6) Njila yitwatañishilañamu yinateli kuyikwasha. Neyi hitukuyidizisha, twatela kuyileja netu Nzambi watukana nindi neyi tutwamijaku Wanta windi wakatukiswila. (Tañenu Malaki 3:10; Matewu 6:33.) Hela chakwila tukutaña nsona jajivulu hakumuleja kadizi kulonda yeluki chakamenañayi Yehova antu jindi, twatela kwanuka netu chakutalilahu chetu chachiwahi chikumukwasha. Kuhanjeka nawu hayuma yitunamoni muchihandilu kunateli kukwasha atudizi etu kushindamena hadi Yehova. Tunateli cheñi kuyileja yakutalilahu yitwatañaña munyikanda yetu. *

8. (a) Muloñadi kadizi waBayibolu chatela ‘kutompelayi kulonda yatiyi chawahayi Yehova’? (b) Tunateli kukwasha ñahi kadizi wetu kulonda yadimweni chawahayi Yehova?

⁸ Kudi yuma yayivulu yatela kwilawu yinabadiki hakutaña nikutiya chatambwilañawu antu amakwawu nkisu jaYehova. Cheñi, kadizi waBayibolu watela kudimwena chikupu nindi Yehova wamuwahi. Ñimbi yamasamu wembili nindi: “Tompenu mutiyi chawahayi Yehova; muntu wabatamaña mudi yena nakooleki.” (Mas. 34:8) Tunateli kukwasha ñahi kadizi kulonda yeluki nindi Yehova wamuwahi? Toñojokenu hadi kadizi wunabuli mali ilaña nakufwila kuleka yaaku yatama yidi neyi kunwa makanya, kuhema yisela yalwisu hela kusheta. (Yish. 23:20, 21; 2 Kor. 7:1; 1 Tim. 6:10) Neyi mumudizisha kadizi nenu yalombeña kudi Nzambi kulonda yamukwashi kuleka yaaku yamuchidiwu hikukumukwasha kumona nindi Yehova wamuwahuku? Talenu cheñi chuma chinateli kumwekana neyi mumukwasha kadizi kutwamijaku yuma yakuspiritu kuhitila mukwikala nampinji yakudiza Bayibolu kwamulungu nimulungu nikuloñesha nsañu yakudiza hakupompa nikuya kukupompa kwetu kwawakwaKristu. Chikuhwelelu  chindi chikukolelaku neyi yadimwena nindi Yehova nakumukiswila.

Kuchina Mwahoshañawu Antu

9, 10. (a) Muloñadi Nikodemu niYosefu wakuAramateya chiyabulili kulejawu antu nawu amukeña Yesu? (b) Muloñadi amayala amakwawu makonu chashintajalilañawu kumulonda Kristu?

⁹ Hamuloña wekakeja dawakwawu, amayala amakwawu ashintajalaña hakwila nawu amulondeli Kristu chikupu. Nikodemu niYosefu wakuAramateya hiyalejeleña antu nawu amukeña Yesuku muloña achinineña nawu aYudeya chelukawu akuyihosha chatama. (Yow. 3:1, 2; 19:38) Kudi chuma chayiletesheli kuchina. Akulumpi jansakililu amuheleli Yesu nankashi chakwila antu ejima ahosheleña nawu namukuhwelela ayihañileña musinagogi.—Yow. 9:22.

¹⁰ Makonu, neyi muntu weyala yahosha nindi namukeña Nzambi hela Bayibolu indi kwiji nsakililu, akwawu akanyidimu, amabwambu jindi hela antaña akutachika kumuseha. Kumaluña amakwawu, wukudokwela makala akesi neyi wuhimpa nsakililu. Ikakeja dikuswejelaku neyi iyala himushidika hela wakundama kujamapolitiki indi kwiji wazataña nyidimu yakukwasha antu muchituñilu. Chakutalilahu, iyala wumu wakuGermany wahosheli nindi: “Nsañu yamuBayibolu yimwashimwinaña enu aYinsahu yalala. Chinekala Chinsahu dalelu, chikukucha antu ejima akushikena dakwiluka. Indi akwetu akanyidimu, muchituñilu nikuyisela kunayaña nachisaka chami akutoñojoka nawudi? Nukufwa mahosha.”

11. Indi Yesu wakwashili ñahi atumbanji twindi kubula kuchina antu?

¹¹ Hela chakwila apostolu aYesu ejima adiña ahamuka, atiyileña antu woma. (Maku 14:50, 66-72) Indi Yesu wayikwashili ñahi kulonda apaminuku hela chakwila akwawu ayitiyishileña woma? Komana Yesu wayilejeleli chadimu atumbanji twindi nindi akamona kukala? Wahosheli nindi: “Chakayihelawu kudi antu, nichakayikinjikawu, nichakayisawulawu, nichakayitenawu nawu mwatama kukoola Mwana kamuntu, munakooleki.” (Luka 6:22) Yesu wayilejeli atumbanji twindi nindi akayisawula. Akayisawula “kukoola Mwana kamuntu.” Yesu wayilejeli cheñi nindi Nzambi wakayikwasha neyi ashindamena hadi yena nihañovu jindi. (Luka 12:4-12) Cheñi, Yesu walejeli amaha kulonda adikundi nawatumbanji twindi nikukwata nawu wubwambu.—Maku 10:29, 30.

12. Munjilanyi mutunateli kukwashila amaha kulonda abuleña kuchina antu?

¹² Anetu nawa twatela kukwasha atudizi etu aBayibolu kulonda abuleña kuchina antu. Neyi yeluka nindi kukala kunateli kumumwekena, chikumukwashaku kuumika. (Yow. 15:19) Chakutalilahu, kwila mumukwasha kadizi wenu chatela kwakulayi malwihu akumupopawu kudi akwawu akanyidimu niantu amakwawu munjila yapela kushindamena haBayibolu nehi? Hela chakwila yetu ebwambu dindi, tunateli kumutwala kudi akwetu amuchipompelu kulonda amwiluki, sweje-e anahiti mukukala kunakumonayi hanoyu mpinji. Sweje-e dinu, twatela kumuleja netu yalombeña mpinji yejima nawa chakufuma hamuchima. Yumiyi yikumukwasha  kukundama kwakwihi naNzambi nikumwilisha Yehova kwikala Chiswamu niIlola dindi.—Tañenu Masamu 94:21-23; Yakoba 4:8.

Yitoñojoka Yakwila Nawu Nukutwesha Wanyi

13. Indi antu amakwawu afuntaña ñahi hanyima kuspiritu hamuloña wakutoñojoka nawu akutwesha wanyi?

¹³ Amayala amakwawu ashintajalaña kukalakala nyidimu yakuspiritu hamuloña wakubula kwiluka kutaña chiwahi hela kuhosha nakuhanuka indi kwiji akweti nsonyi. Amayala amakwawu atiyaña nsonyi yakuhosha yitoñojoka yawu kumesu awantu. Chayikalilaña hakwila nawu adizi, nikwakula hakupompa kwawakwaKristu hela tuhu kuya nakushimwina. Mana kwetu mukwaKristu wumu wahosheli nindi: “Henohu nichidi kansi, nanyakeleña kuya kuchisu, natwambileña neyi inakudondomwena, nifumaku wumweneni, nami kwosi muntu wunantiyi hela wunammoni. . . . Chinatoñojoka hansañu yakuya nakushimwina kwitala nikwitala nakatileña.”

14. Muloñadi atumbanji twaYesu chakañenyenyuwu kuuka kansi weyala wadiña nandemoni?

¹⁴ Toñojokenu atumbanji twaYesu chatiyiluwu chelili akañanyi kuuka kansi weyala wadiña nandemoni. Tata yanona mwana wenjili kudi Yesu nakumwila nindi: “[Mwanami] himukwachinkonya, wakabaña nankashi, wadimbukilaña kakavulu mukesi, kakavulu nawa mumenji. Namuleta kudi atumbanji tweyi, anakañanyi kumuuka.” Yesu wamufumishili ndemoni nakumuuka. Nkumininaku, atumbanji hiyakwinza nakumwihula Yesu nawu: ‘Etu twakañenyadi kumufumisha?’ Yesu hakuyila nindi: ‘Muloña kachikuhwelelu kenu kantesha. Muloña nukuyileja chalala nami, neyi mukweti kukuhwelela kwakweseka nakalubutu kamostadi, mwadi kuyila mpidi iyi nenu, Tutulukaku kunu wuyi kuna; yadi kututuluka. Kwosi chuma chimwadi kukañanyaku.’ (Mat. 17:14-20) Twatela kumukuhwelela Yehova hakwila tuumiki kukala kwasweja. Chumanyi chikumwekana neyi muntu yabula kwikala nachikuhwelelu nakutachika kushindamena hayuma yelukayi? Neyi yakañanya wukutoñojoka nindi hakutwesha kumukakela Nzambuku.

15, 16. Tunateli kukwasha ñahi kadizi waBayibolu kulonda yaleki kutoñojoka nindi washikilamu wanyi?

¹⁵ Njila yayiwahi yitwatela kukwashilamu muntu wunakutoñojoka nindi washikilamu wanyi yidi yakumukolesha kulonda yashindameni hadi Yehova bayi hadi yomwenuku. Petulu wasonekeli nindi: “Dizozenu mwishina dachikasa chaNzambi chañovu, kulonda yena akayitoheshi hamwaka wanafuukuliyi. Mutwikenu kwakama kwenu kwejima.” (1 Pet. 5:6, 7) Dichi twatela kukwasha kadizi wetu waBayibolu kulonda yapami kuspiritu. Muntu wapama kuspiritu walemeshaña nankashi yuma yakuspiritu. Wakeña Izu daNzambi nawa wamwekeshaña ‘mukabu waspiritu’ muchihandilu chindi. (Ŋal. 5:22, 23) Kulomba wakulemesha. (Fwi. 4:6, 7) Kubombelahu, walombaña kudi Nzambi kulonda yamwinki ñovu yakuumika kukala kukumonayi hela kukalakala mudimu windi chiwahi.—Tañenu 2 Timotewu 1:7, 8.

¹⁶ Atudizi amakwawu akeñaña wukwashu kulonda eluki kutaña, kuhanjeka nawantu nikuhosha chiwahi. Amakwawu atoñojokaña nawu hiyakutwesha kumukalakela Nzambuku muloña wayuma yatama yakosomwenuwu henohu kanda amwiluki Yehova. Hela chochu, tunateli kuyikwasha munjila yakukeña niyakudiwunjika. Yesu nindi: “Akola hiyakeñakeñaña chimbukuku, chiña akata.”—Mat. 9:12.

 Kwashenu Amayala Amavulu

17, 18. (a) Tunateli kuwana ñahi amayala mumudimu wetu wakushimwina? (b) Twakahanjekadi muchibaaba chinalondeluhu?

¹⁷ Tunakuhweleli netu amayala amavulu akwiteja chikupu nsañu yayiwahi yekala hohu muBayibolu. (2 Tim. 3:16, 17) Hanu dinu, tunateli kuwana ñahi amayala amavulu mumudimu wetu wakushimwina? Tunateli kuyiwana neyi tukushimwinaña namelela, kunsa yamulungu namwaana hela hamafuku akunooka hekalañawu hamatala. Neyi tunayi, tukuyileja netu tunakukeña kuhosha namwini itala. Tushimwineña wunsahu wakukoolekela kudi amayala itwazataña nawu neyi chinatwesheki nikuhanjeka nawamayala abula kwitiya enzaña muchipompelu.

¹⁸ Neyi tukushimwinaña antu ejima itukuwana, tunateli kukuhwelela netu antu akweti nyichima yayiwahi akutiya nsañu. Dichi tukwashenu antu ejima akweti mpwila yakudiza chalala. Hanu dinu, tunateli kukwasha ñahi amayala apapatishewa muchipompelu kulonda ashiki hakukalakala nyidimu yamukuloñesha kwaNzambi? Ilu lwihu analwakuli muchibaaba chinalondeluhu.

[Tumazu twaheshina]

Mukwakula Nenudi?

• Tunateli kukwasha ñahi amayala kulonda atwamijeñaku yuma yakuspiritu?

• Tunateli kukwasha ñahi amaha kulonda eluki chakuumika ikakeja dawakwawu?

• Yumanyi yinateli kukwasha amakwawu kumanisha yitoñojoka yakwila nawu akutwesha wanyi?

[Malwihu aKuzatisha haKudiza]

[Mwevulu wudi hefu 25]

Komana mwekalaña nampinji yakushimwina antu awamayala nsañu yayiwahi?

[Mwevulu wudi hefu 26]

Munateli kukwasha ñahi kadizi wenu waBayibolu kulonda yeluki nindi wakaholokela mukukala?