“Di awor padilanti lo bo piska hende.”—LUK. 5:10.

1, 2. (a) Kon hende hòmber a reakshoná riba e predikashon di Hesus? (b) Kiko nos lo trata den e artíkulo akí?

DURANTE un kampaña di predikashon den Galilea, Hesus i su disipelnan a drenta boto bai un lugá solitario pa nan sosegá. Pero un multitut di hende—un “5.000 hòmber, sin konta hende muhé ku mucha”—a sigui nan na pia. (Mat. 14:21) Na un otro okashon, un gran kantidat di hende a bini serka Hesus pa e kura nan i pa nan tend’é papia. Na e okashon ei, tabatin “4.000 hòmber, sin konta hende muhé ku mucha.” (Mat. 15:38) Ta opvio ku tabatin hopi hende hòmber ku a bini serka Hesus i a mustra interes den loke e tabata siña hende. De echo, Hesus tabata sa ku hopi hende mas lo a siguié, pasobra despues ku el a hasi milager pa su disipelnan kue un gran kantidat di piská, el a bisa Simon: “Di awor padilanti lo bo piska hende.” (Luk. 5:10) Sí, Hesus a kompará e trabou di prediká ku piskamentu. I su disipelnan por a spera ku lo el a yuda nan haña hopi hende ku lo a aseptá e bèrdat, inkluso hopi hende hòmber.

² Awe tambe tin hende hòmber ta mustra interes den e mensahe ku nos ta prediká i ta aseptá un estudio di Beibel. (Mat. 5:3) Pero hopi di nan no ta progresá spiritualmente. Kon nos por yuda nan? Wèl, nos por imitá e ehèmpel di Hesus. Aunke Hesus no a konsentrá riba hende hòmber so den e trabou di prediká, el a papia tokante algun asuntu ku a interesá hende hòmber. P’esei, laga nos ban wak kon Hesus a yuda hende hòmber di su tempu i kon nos por imit’é. Nos lo trata tres preokupashon komun ku nan tabatin: (1) kon pa gana nan pan di kada dia, (2) kon pa trata ku miedu di hende i (3) kon pa trata ku sintimentu di inkapasidat.

E Ta Preokupá ku Su Pan di Kada Dia?

3, 4. (a) Kiko ta un preokupashon grandi pa hopi hende hòmber? (b) Dikon algun hende hòmber ta haña ku gana nan pan di kada dia ta mas importante ku dediká tempu na asuntunan spiritual?

³ Un eksperto di Lei di Moises a bisa Hesus: “Maestro, lo mi sigui bo unda ku bo bai.” Pero ora Hesus a bis’é ku “e Yu di hende no tin kaminda pa pone su kabes,” el a kambia di idea. Kon nos por sa esei? Wèl, Beibel no ta duna ningun indikashon ku el a bira un siguidó di Kristu. Podisé e echo ku e no tabata sa di antemano kiko lo el a kome su manisé òf unda lo el a biba no a kai den bon tera serka dje.—Mat. 8:19, 20.

⁴ Hopi biaha, hende hòmber ta pone komodidat material promé ku metanan spiritual. Pa hopi di nan, sigui un estudio avansá i haña un trabou ku ta paga bon ta mas importante. Komo ku nan sa ku nan mester di plaka pa biba, nan ta pensa ku plaka i un bon trabou ta trese mas benefisio ku studia Beibel i kultivá un bon relashon ku Dios. Kisas nan ta gusta loke Beibel ta siña, pero e “inkietut di e era akí” i “e poder engañoso di rikesa” ta stroba nan di siña mas tokante Dios i obedes’é. (Mar. 4:18, 19) Ora Hesus tabata riba tera, el a yuda su disipelnan mira loke ta mas importante den bida i asina ahustá nan prioridatnan. Pues, nos por sigui su ehèmpel.

5, 6. Kiko a yuda Andres, Pedro, Santiago i Huan disidí ki trabou tabata mas importante?

 ⁵ Andres i su ruman hòmber Simon Pedro tabatin un negoshi di piskamentu huntu ku Huan i su ruman hòmber Santiago i nan tata Zebedeo. Nan negoshi tabata bai asina bon ku nan mester a buska mas trahadó pa yuda nan. (Mar. 1:16-20) For di e promé biaha ku Andres i Huan a tende Huan Boutista papia tokante Hesus, nan a keda konvensí ku Hesus tabata e Mesías. Mas despues, Andres a duna su ruman Simon Pedro e bon notisia i kisas ta Huan a konta su ruman hòmber Santiago tokante Hesus. (Huan 1:29, 35-41) Pa vários luna e kuater disipelnan akí a sigui Hesus segun ku e tabata prediká na Galilea, Hudea i Samaria. Pero despues, nan a bai bèk i a sigui ku nan negoshi di piskamentu. Pues, aunke nan tabatin interes den kosnan spiritual, e trabou di prediká no tabata e kos di mas importante pa nan.

⁶ Algun tempu despues, Hesus a invitá Pedro i Andres pa nan siguié i bira “piskadó di hende.” Kiko nan a hasi? “Mesora nan a laga nan redanan i a siguié.” Santiago i Huan a hasi meskos. Sí, “mesora nan a laga e boto i nan tata i a siguié.” (Mat. 4:18-22) Kiko a motivá e hòmbernan akí pa drenta sirbishi di tempu kompleto? Nan desishon tabata algu emoshonal òf djis un akto impulsivo? Klaru ku nò! Kòrda ku e hòmbernan akí a pasa lunanan huntu ku Hesus. Nan a mir’é prediká, hasi milager, nan a mira e amor ku e tabatin pa hustisia i tambe e reakshon di e hendenan ku e tabata prediká na dje. Sin duda, tur esei a hasi nan fe den Yehova mas fuerte i a duna nan mas konfiansa den Yehova!

7. Kon nos por yuda studiantenan di Beibel siña konfia den Yehova?

⁷ Awor kon nos por imitá Hesus i yuda nos studiantenan di Beibel pone nan konfiansa den Yehova? (Pro. 3:5, 6) Nos manera di siña hende ta hunga un ròl importante den esaki. Ora nos ta siña hende, ta bon pa enfatisá ku Dios a primintí ku lo e bendishoná nos rikamente si nos pone su Reino na promé lugá den nos bida. (Lesa Malakías 3:10; Mateo 6:33.) Maske nos ta usa Beibel pa mustra nos studiantenan kon Yehova ta perkurá pa su pueblo, nos no mester lubidá e efekto ku nos propio ehèmpel lo por tin. Nos eksperensianan personal por motivá nan pa nan tambe konfia den Yehova. Ademas, nos por konta nan e eksperensianan ku nos ta lesa den nos literatura. *

8. (a) Dikon ta importante pa un studiante di Beibel “purba i mira ku [Yehova] ta bon”? (b) Kon nos por yuda un studiante pa e mes por eksperensiá ku Yehova ta bon?

⁸ Pa un studiante di Beibel por kultivá un fe fuerte den Yehova, e mester hasi mas ku djis tende òf lesa kon Yehova ta bendishoná otro hende. E mes mester eksperensiá esei. Un salmista a kanta: “Purba i mira ku SEÑOR ta bon; bendishoná ta e hende ku ta tuma refugio den dje!” (Sal. 34:8) Kon nos por yuda un studiante mira ku Yehova ta bon? Suponé ku un studiante tin problema finansiero i a la bes ta hasiendo esfuerso pa stòp ku algun mal hábito,  manera por ehèmpel humamentu, wega di plaka òf bebementu di mas. (Pro. 23:20, 21; 2 Kor. 7:1; 1 Tim. 6:10) Bo por siñ’é hasi orashon i pidi Yehova yudansa pa stòp ku e mal hábito. Ora e studiante kuminsá mira kon su kalidat di bida ta mehorá, e mes ta eksperensiá ku Yehova ta bon. Nos por anim’é tambe pa pone kosnan spiritual na promé lugá den su bida, por ehèmpel, pa e studia tur siman, prepará pa e reunionnan kristian i asistí na nan regularmente. I segun ku e studiante ta mira kon Yehova ta bendishoná su esfuersonan, su fe lo bira mas fuerte i lo e preokupá ménos ku plaka.

E Tin Miedu di Loke Hende Ta Pensa di Dje?

9, 10. (a) Dikon Nikodemo i Hose di Arimatea no a bisa ningun hende ku nan tabata disipel di Hesus? (b) Dikon algun hende hòmber awe ta vasilá pa bira kristian?

⁹ Debí na preshon di pareunan, algun hende hòmber kisas ta vasilá pa sigui Kristu. Tuma por ehèmpel Nikodemo i Hose di Arimatea. Nan no a bisa niun hende ku nan tabata disipel di Hesus pasobra nan tabatin miedu di loke e otro hudiunan lo por a bisa òf hasi. (Huan 3:1, 2; 19:38) I no ta pòrnada nan tabatin miedu! E lidernan religioso tabata odia Hesus asina tantu ku ken ku a demostrá fe den dje no tabatin mag di drenta snoa mas.—Huan 9:22.

¹⁰ Awendia tambe hende hòmber sa haña nan ku persekushon den algun pais ora nan mustra interes den Dios, Beibel òf religion. Nan koleganan di trabou, amigu òf famia por kritiká nan i kousa problema pa nan. Den otro paisnan por ta asta peligroso pa bisa ku bo ke kambia di religion. I pa un hòmber ku ta den servisio militar, polítika òf ku tin un puesto importante den komunidat, preshon di pareunan por ta mas difísil pa trata kuné. Un hòmber na Alemania a atmití: “Loke boso, Testigunan, ta prediká tokante Beibel ta bèrdat. Pero si mi disidí di bira un Testigu awe, pa su mañan tur hende sa kaba. Anto kiko mi koleganan di trabou, mi bisiñanan i e otro hendenan ku konosé ami i mi famia lo pensa? Lo mi no por soportá esei.”

11. Kon Hesus a yuda su disipelnan trata ku miedu di hende?

¹¹ Maske niun di e apòstelnan di Hesus no tabata kobarde, tòg na algun okashon nan tabatin miedu di hende. (Mar. 14:50, 66-72) Awor, kon Hesus a yuda nan progresá den e bèrdat apesar di preshon di pareunan? Hesus a prepará nan di antemano pa enfrentá oposishon. El a bisa nan: “Felis boso ta ora hende ta odia boso, kore ku boso, insultá boso i desonrá boso nòmber pa motibu di e Yu di hende.” (Luk. 6:22) Pues, Hesus a spièrta su siguidónan ku nan lo por a haña nan ku oposishon i ku esei lo tabata “pa motibu di e Yu di hende.” Pero tambe el a garantisá nan ku si nan pidi Dios yudansa i forsa, Dios lo a sostené nan semper. (Luk. 12:4-12) Es mas, Hesus a animá personanan resien interesá pa asosiá ku su disipelnan i bira nan amigu.—Mar. 10:29, 30.

12. Kon nos por yuda un studiante di Beibel vense miedu di hende?

 ¹² Nos tambe mester yuda studiantenan di Beibel vense miedu di hende. Hopi biaha, ta mas fásil pa enfrentá un situashon difísil ora bo ta prepará. (Huan 15:19) P’esei, pakiko no yuda e studiante prepará pa e por duna kontesta simpel basá riba Beibel ora e hañ’é ku pregunta òf opheshon di su koleganan di trabou? Ademas, nos por bira su amigu i lag’é sera konosí ku otro rumannan den kongregashon, spesialmente ku rumannan ku kisas ta den un situashon similar kuné òf ku tin e mesun interesnan. Ta masha importante tambe pa siñ’é hasi orashon regularmente i di kurason. Esaki lo yud’é bira amigu di Yehova. I Yehova lo ta manera un Baranka i un Refugio p’e.—Lesa Salmo 94:21-23; Santiago 4:8.

E Ta Sintié Inkapas?

13. Dikon algun hende hòmber no ke partisipá den aktividatnan spiritual?

¹³ Algun hende hòmber no ke partisipá den aktividatnan spiritual pasobra nan no por lesa ni ekspresá nan mes bon. Kisas nan ta tímido i no ta gusta ekspresá nan pensamentu- i sintimentunan den presensia di hende. P’esei pa nan ta masha difísil pa studia Beibel ku otro hende, duna komentario na reunion i prediká. Un ruman hòmber a atmití: “Tempu mi tabata yòn, mi tabata kana bai lihé na un kas, hasi komo si fuera mi a primi e bèl i despues mi tabata kana bai mesora, sperando ku niun hende no a tende mi ni mira mi. . . . E idea so di bai di kas pa kas tabata hasi mi malu.”

14. Dikon e disipelnan di Hesus no por a kura un mucha hòmber poseí pa demoño?

¹⁴ Awor, bo por imaginá bo kon e disipelnan di Hesus lo a sinti nan ora nan no por a kura un mucha hòmber poseí pa demoño? Kisas nan lo a sinti nan inkapas. E tata di e mucha a bini serka Hesus i a bisa: “[Mi yu] ta sufri di epilepsia i ta malu; hopi biaha e ta kai den kandela i hopi biaha den awa. Mi a tres’é serka bo disipelnan, ma nan no por a kur’é.” E ora ei Hesus a saka e demoño i asina a kura e mucha. Mas despues, e disipelnan a aserká Hesus i a puntr’é: “Pakiko nos no por a sak’é?” Hesus a kontestá nan: “Pa motibu di boso poko fe. Pasobra di bèrdat mi ta bisa boso: Si boso fe ta djis e tamaño di un pipita di mòster, boso lo bisa e seru akí: ‘Kita for di aki, bai aya,’ i lo e kita, i nada lo no ta imposibel pa boso.” (Mat. 17:14-20) Sí, un hende ku tin fe den Yehova por surpasá opstákulonan grandi manera seru. Pero si e ta dependé riba su mes, lo e no tin éksito; i esei ta pon’é sinti ku e no ta kapas pa sirbi Yehova.

15, 16. Kon nos por yuda un studiante di Beibel surpasá e sintimentu di inkapasidat?

¹⁵ Si un studiante di Beibel ta kere ku e no ta kapas pa sirbi Yehova, nos por anim’é pa enfoká riba Yehova i no riba su mes. Pedro a skirbi: “Humiá boso mes . . . bou di e man poderoso di Dios, pa e por halsa boso na e debido tempu, miéntras ku boso ta tira tur boso inkietut riba dje.” (1 Ped. 5:6, 7) Esei ta nifiká ku nos mester siña nos studiante stima Yehova i yud’é kultivá e deseo pa laga Yehova gui’é den tur kos. Sí, nos mester yud’é progresá spiritualmente. I esei ta yud’é balorá kosnan spiritual; lo e stima e Palabra di Dios i desplegá e “fruta di spiritu” den su bida. (Gal. 5:22, 23) Ademas, lo e mira e balor di hasi orashon regularmente. (Flp. 4:6, 7) Es mas, lo e akudí na Dios pa haña e kurashi i fortalesa ku e tin mester pa kumpli ku kualke asignashon.—Lesa 2 Timoteo 1:7 i 8.

 ¹⁶ Algun studiante kisas mester di yudansa tambe pa mehorá nan lesamentu i pa bira mas ábil den komuniká ku hende. Otronan kisas ta sinti ku nan no ta digno di sirbi Yehova debí na e kosnan malu ku nan a hasi promé ku nan a konosé Yehova. Den ámbos kaso, nos pasenshi i yudansa amoroso kisas ta nèt loke e studiante tin mester. Hesus a bisa: “Hende bon di salú no tin mester di dòkter, ma hende malu sí.”—Mat. 9:12.

Trata di Alkansá Mas Hende Hòmber

17, 18. (a) Kon nos por alkansá mas hende hòmber den e trabou di prediká? (b) Kiko nos lo trata den e siguiente artíkulo?

¹⁷ Ta Beibel so ta kontené un mensahe ku por hasi hende berdaderamente felis, i nos ke yuda hopi hende hòmber mas aseptá e mensahe ei. (2 Tim. 3:16, 17) Pues, kon nos por alkansá mas hende hòmber ora nos ta prediká? Kisas nos mester prediká ora nos tin mas chèns di haña hende hòmber na kas, esta, anochi, atardi den wikènt òf riba dianan di fiesta. Ora ta posibel, nos por pidi pa papia ku e kabes di kas. Ademas, ora ta apropiá, nos por prediká tambe na koleganan di trabou maskulino. I no lubidá ku nos tin ruman muhénan ku nan esposo no ta Testigu. Nos por prediká na e hòmbernan akí tambe.

¹⁸ Segun ku nos ta prediká na tur hende, nos por tin konfiansa ku esnan di kurason sinsero lo skucha nos mensahe. P’esei, nos mester tin pasenshi i sigui yuda tur hende ku mustra interes sinsero den e bèrdat. Pero kon nos por yuda ruman hòmbernan batisá kultivá e deseo pa haña mas responsabilidat den kongregashon? E siguiente artíkulo lo kontestá e pregunta akí.

[Nota]

Kon Lo Bo Kontestá?

• Kon nos por yuda hende hòmber pone meta spiritual na promé lugá den nan bida?

• Kon nos por yuda personanan resien interesá trata ku preshon di pareunan?

• Kon nos por yuda un persona surpasá sintimentu di inkapasidat?

[Preguntanan di Estudio]

[Plachi na página 25]

Bo ta buska oportunidat pa prediká na hende hòmber?

[Plachi na página 26]

Kon bo por prepará e studiante di Beibel pa enfrentá oposishon?