Tauturu i te Au Tane Kia Tere ki Mua i te Pae Vaerua

“Mei teianei atu, e tangata taau e rauka.”​—LUKA 5:10.

1, 2. (a) Akapeea te au tane te ariu atu anga ki ta Iesu tutu anga? (e) Eaa te ka uriuriia i roto i teia atikara?

I TETAI tere tutu aere i Galilea, kua na runga a Iesu e tana au pipi i tetai poti te aere anga ki tetai ngai motutaa. Inara kua aru atu te tangata tini ia ratou. Te aronga tei aere mai i taua ra ra ‘e rima paa tausani tane, e te vaine ma te tamariki.’ (Mata. 14:21) Tetai atianga ke mai, kua aere mai tetai urupu tangata kia Iesu, kia akaoraia e kia akarongo kiaia e tuatua ra. ‘E a tausani tane, e te vaine ma te tamariki’ tei kapiti mai. (Mata. 15:38) E maata rai te au tane i rotopu i te au tangata tei aere mai kia Iesu e kua inangaro i tana e apii ra. Kua manako aia e ka maata atu te ka ariu mai, no te mea te rauka temeio mai anga te ika e manganui, kua akakite a Iesu ki tana pipi ko Simona e: ‘Mei teianei atu, e tangata ta kotou ka rauka.’ (Luka 5:10) Ka tutu aere tana au pipi ki te tangata ravarai, e e manganui te au tane ka “rauka” mai.

² Teia tuatau, te inangaro maira te au tane i te karere Tuatua Tapu ta tatou e tutu aere ra e te ariki maira i te reira. (Mata. 5:3) Inara, e maata te au tane e apii ra kare ra e tere ana ki mua i te pae vaerua. Akapeea tatou me tauturu ia ratou? Noatu kare a Iesu i akatupu ana i tetai angaanga orometua takake i te kimi i te au tane, kua tuatua aia no runga i te au manamanata ta te au tane e na roto ra i tona tuatau. Te aru anga i tona akaraanga, ka akara meitaki tatou akapeea me tauturu i te au tane kia akono atu e toru au manamanata matauia i teia tuatau: (1) kimianga puapinga no te oraanga, (2) mataku i te tangata, e te (3) manako tukatau kore.

Kimianga Puapinga no te Oraanga

3, 4. (a) Eaa te mea puapinga tikai ki te maataanga o te au tane? (e) Eaa ra tetai au tane i tuku ei i te kimianga puapinga no te oraanga i mua ake i te au mea pae vaerua?

³ Kua karanga tetai tata tuatua kia Iesu e: “E te Orometua, e aru atu au ia koe i toou au aerenga katoa.” Inara, te akakite anga a Iesu kiaia e ‘kare e urunga upoko o te Tamaiti a te tangata,’ kua manako ekoko te tata tuatua. Kare te tata tuatua i papu e ka akapeea e rauka akaou mai ei tana kai me kore, ka noo aia kiea, e kare e akakiteanga e kua riro mai aia ei pipi na Karaiti.​—Mata. 8:19, 20.

⁴ E tuku ana te au tane i te turanga tinamou i te pae materia i mua ake i te au mea pae vaerua. Te mea puapinga ki te maataanga ia ratou, te rauka anga tetai apii teitei e tetai angaanga ka maata te moni. Kia ratou, e puapinga atu kia angaanga kia maata te moni i tetai ua atu au puapinga ka rauka mai mei te apiianga i te au Tuatua Tapu e tetai pirianga vaitata ki te Atua. Penei ka mareka ratou i ta te Pipiria e apii maira, inara no te au apiapi ‘o teianei ao, e te pikikaa o te au apinganui,’ kua pokiaia to ratou inangaro. (Mare. 4:18, 19) Akamanako ana te tauturu anga a Iesu i tana au pipi kia akatanotano i te au mea e puapinga ra kia ratou.

5, 6. Eaa tei tauturu ia Anederea, Petero, Iakobo, e Ioane kia akatanotano i te au mea e puapinga ra kia ratou no te piri anga ki te angaanga tutu aere e te kimianga puapinga no te oraanga?

⁵ E pitiniti tautai ta Anederea e tona tuakana ko Simona Petero. Pera katoa a Ioane, tona teina ko Iakobo, e to raua metua tane, ko Zebedaio. No te meitaki tikai o te pitiniti kua anoanoia te tauturu a tetai au tane angaanga. (Mare. 1:16-20) Te akarongo mua anga a Anederea  e Ioane no runga ia Iesu mei ia Ioane Papetito, kua papu ia raua e kua kiteaia e raua te Mesia. Kua akakite a Anederea i te nuti ki tona tuakana ko Simona Petero, e penei kua akakite atu a Ioane ki tona teina kia Iakobo. (Ioa. 1:29, 35-41) Te au marama i aru mai, kua aru atu teia tokoa ia Iesu iaia e tutu aere ra i Galilea, Iudea, e Samaria. E kua oki atu teia au pipi tokoa ki ta ratou pitiniti tautai. E inangaro to ratou i te au mea pae vaerua, kare ra te angaanga orometua i te mea puapinga roa atu kia ratou.

⁶ Muri mai, kua pati a Iesu ia Petero e Anederea kia aru iaia “ei ravakai tangata.” Eaa ta teia nga tokorua i rave? “Akaruke iora raua i ta raua puke kupenga i reira, e kua aru maira iaia.” Mei te reira katoa a Iakobo e Ioane. “Akaruke iora raua i te boti i reira, e to raua metua, aru atura iaia.” (Mata. 4:18-22) Eaa tei tauturu i teia au tane kia rave i te angaanga orometua tamou? E ikianga ainei te reira tei akakeuia i te reira taime rai? Kare! No tetai au marama i mua atu ana, kua akarongo ana teia au tangata kia Iesu, kua kite ana i tana au angaanga temeio i rave, e tona maroiroi no te tuatua tika, e te ariu umere mai anga te tangata ki tana angaanga tutu anga. Tei tupu mai, kua ketaketa atu to ratou akarongo e to ratou irinaki ia Iehova!

7. Akapeea tatou me tauturu i te aronga apii Pipiria kia akaketaketa i to ratou irinaki e ka akono a Iehova i tona iti tangata?

⁷ Akapeea tatou me aru ia Iesu te tauturu anga i ta tatou aronga apii Pipiria kia akaketaketa i to ratou irinaki ki roto ia Iehova? (Mase. 3:5, 6) Tei runga teia i te tu e apii ana tatou. Me apii tatou ia ratou, e akaari atu tatou e te taputou maira te Atua e ka akameitaki maata aia ia tatou me tuku tatou i te au angaanga o te Patireia na mua. (E tatau ia Malaki 3:10; Mataio 6:33.) Noatu e ka rauka ia tatou i te taangaanga i te au irava tukeke i te akaari akapeea a Iehova te akono anga i tona iti tangata, eiaa e ngaropoina i to tatou uaorai akaraanga. Na te akakiteanga i te au mea tei tupu i roto i to tatou uaorai oraanga ka riro ei tauturu i ta tatou aronga apii kia irinaki kia Iehova. Ka rauka katoa ia tatou i te akakite i te au mea akamaroiroi anga ta tatou i tatau i roto i ta tatou au puka. *

8. (a) Eaa i puapinga ai no te tangata apii Pipiria kia ‘tongi e kia kite i te meitaki o Iehova’? (e) Akapeea tatou me tauturu i ta tatou tangata apii kia kite aia i te meitaki o Iehova?

⁸ Kia ketaketa te akarongo, kare e rava ua i te tatau e te akarongo anga e akapeea tetai ke te kite anga i ta Iehova akameitakianga. Ka anoano katoaia te tangata apii Pipiria kia kite tikai aia i to Iehova tu meitaki. Kua imene te tata taramo e: “Ka tongi ana kia kite i te meitaki o Iehova! e ao to te tangata i irinaki iaia ra.” (Sala. 34:8) Akapeea tatou me tauturu i te tangata apii kia kite i te meitaki o Iehova? Penei te tauta ra tetai tangata apii, e au manamanata tona i te pae moni, e te akakore katoa ra i tetai peu kino, mei te kai avaava, pere moni, me kore te inu maata i te kava. (Mase. 23:20, 21; 2 Kori. 7:1; 1 Timo. 6:10) Kare ainei e me apii tatou i te tangata apii kia pure no te tauturu a te Atua kia autu i tetai peu kino, e tauturu ei iaia kia kite i te meitaki o Iehova? Akamanako katoa i te ka  tupu me akamaroiroi tatou i te tangata apii kia tuku i te au mea pae vaerua na mua, na te akanoo anga i te taime no te apiianga Pipiria i te au epetoma, te akapapa anga e te aere anga ki te au uipaanga Kerititiano. Kare kore, e me kite aia i ta Iehova akameitakianga no tana au tautaanga, ka ketaketa atu tona akarongo!

Mataku i te Tangata

9, 10. (a) Eaa ra a Nikodemo e Iosepha no Arimatea i uuna ai i to raua inangaro ia Iesu? (e) Eaa ra tetai au tane i teia tuatau i emiemi ei i te aru ia Karaiti?

⁹ Penei ka emiemi tetai au tane i te aru ia Karaiti no te taomianga a te au oa. Kua uuna a Nikodemo e Iosepha no Arimatea i to raua inangaro ia Iesu no to raua mataku i ta te au ngati Iuda ka tuatua me kore ka rave me kite ratou. (Ioa. 3:1, 2; 19:38) Kare teia mataku i te mea tamanako ua. Kua kino rava te riri o te au arataki akonoanga ia Iesu, e ko tetai ua atu tangata tei irinaki iaia kua akaateaia mei roto i te tunako.​—Ioa. 9:22.

¹⁰ Tetai au ngai i teia tuatau, me akaari tetai tane i te inangaro maata i te Atua, i te Pipiria, me kore i te akonoanga, ka tamanamanataia aia e tona au oa angaanga, au taeake me kore te kopu tangata. Tetai au ngai ke, e mea kino i te tuatua no runga i te tauianga i taau akonoanga. Ka kino atu te taomianga a te au oa me te angaanga ra te tane na te vaeau, poritiki, me kore i roto i te oire. Ei akaraanga, kua akakite mai tetai tangata i Tiamani e: “Te tika ua ra ta kotou te Au Kite e tuatua ra no runga i te Pipiria. Inara, me ka riro mai au ei Kite i teia ra, apopo ka kite te katoatoa. Eaa ta ratou ka manako mai i te ngai angaanga, te ngai e noo ana au, e te ngai e aere ana matou e toku pamiri? Kare e rauka iaku te akakoromaki i te reira.”

11. Akapeea a Iesu te tauturu anga i tana au pipi kia kore e mataku i te tangata?

¹¹ Noatu e tu maroiroi to te au apotetoro a Iesu, kua mataku rai ratou i te tangata. (Mare. 14:50, 66-72) Akapeea a Iesu te tauturu anga ia ratou kia tere ki mua noatu te taomianga pakari a to ratou au oa? Kua rave a Iesu i te au takainga ei akapapa i tana au pipi no te patoianga ta ratou ka aro atu a muri mai. Kua karanga aia e: “E ao to kotou, kia makitakita mai te tangata ia kotou, e kia akataka ke mai ratou ia kotou, kia akakino mai, e kia akaruke akakinoia to kotou ingoa, no te Tamaiti a te tangata nei.” (Luka 6:22) Kua akamatakite a Iesu i tana au pipi e ka makitakitaia ratou. Tetai ua atu makitakita anga, “no te Tamaiti a te tangata nei.” Kua akapapu katoa atu a Iesu kia ratou e ka tauturu te Atua ia ratou me irinaki ratou Kiaia no te tauturu e te maroiroi. (Luka 12:4-12) E kua pati a Iesu i te aronga ou kia kapiti atu ki tana au pipi e kia akaoaoa atu kia ratou.​—Mare. 10:29, 30.

12. Na roto i teea au mataara ka rauka ia tatou i te tauturu i te aronga ou kia kore e mataku i te tangata?

¹² Ka anoano katoaia tatou kia tauturu i te aronga apii Pipiria kia kore e mataku i te tangata. Me akamanakoia atu te akaaoanga, ka mama atu i te aro atu i te reira. (Ioa. 15:19) Ei akatauanga, eaa ka kore ei e tauturu atu i te tangata apii kia akapapa i tetai pauanga mama ua  e te tau, akatumuia ki runga i te Pipiria, no te au uianga e te au patoianga a tona au oa angaanga e ta tetai ke ka ui mai? Kapiti mai ki to tatou pirianga kiaia ei oa, e akaaravei atu iaia ki te au mema o te putuputuanga, te aronga tikai e turanga to ratou mei tona rai. Tei maata atu, e apii tatou iaia kia pure putuputu mei roto mai i tona ngakau. Na teia e tauturu iaia kia akavaitata atu ki te Atua e kia akariro ia Iehova ei Punanga e ei Mato nona.​—E tatau ia Salamo 94:21-23; Iakobo 4:8.

Manako Tukatau Kore

13. Akapeea te manako tukatau kore te arai anga i tetai pae kia kore e o atu ki roto i te au angaanga pae vaerua?

¹³ Kare tetai au tane e piri ana ki te au angaanga pae vaerua no te mea kare ratou e tukatau roa ana me tatau e me akakite i to ratou manako, me kore no te tu akama. E ngata ana i tetai au tane i te akakite eaa to roto i to ratou manako e to ratou ngakau i te ngai tangata. E ngata ia ratou te apii, paupau i te au uipaanga Kerititiano, me kore te tutu aere ki tetai ke. “Toku mapuanga,” i karanga ai tetai taeake Kerititiano, “ka aere viviki au ki ko i te ngutupa, ka ringi pikikaa i te oe, e ka akaruke maru ua, te irinakianga e kare e tangata i akarongo mai me kore i kite mai iaku. . . . E ru ana au me akamanako au e ka aere au mei tetai are ki tetai.”

14. Eaa ra i kore ei i rauka i te au pipi a Iesu i te akaora i te tamaiti tei uruia e te temoni?

¹⁴ Akamanako ana i te irinaki papu kore o te au pipi a Iesu te kore anga i rauka ia ratou te akaora i te tamaiti tei uruia e te temoni. Kua aere mai te metua tane o te tamaiti kia Iesu e kua karanga e: “E neneva oki [taku tamaiti], e maki maata tona; e manganui tona inga anga ki roto i te ai, e ki raro oki i te vai. I apai naia e au ki te au pipi naau nei, e kare aia i ora ia ratou.” Tuaru atura Iesu i te temoni e kua ora mai te tamaiti. Muri iora, kua aere mai te au pipi kia Iesu e kua ui e: “Eaa i kore ei i tika ia matou nei kia tuaru atu iaia ki vao?” Kua pau atu a Iesu e: “No to kotou akarongo kore; tikai taku e karanga atu kia kotou nei, Angairi e akarongo to kotou mei tetai ua sinapi nei, ka tika ia kotou kia karanga atu ki teianei maunga, Ka aere i ko atu; e nana e aere ua; e kare rava e mea e kore e tika ia kotou.” (Mata. 17:14-20) Ka anoanoia te irinaki anga kia Iehova kia autu atu i te au arairaianga mamaata mei te maunga rai. Akapeea me kare tetai tangata e irinaki i teia e ka akamou i tona manako ki runga i tona uaorai kite? Kare aia e puapingaia me kare aia e irinaki.

15, 16. Akapeea tatou me tauturu i tetai tangata apii Pipiria kia autu atu i te manako tukatau kore?

¹⁵ Tetai mataara meitaki i te tauturu i tetai e manako tukatau kore ra, e akamaroiroi iaia kia akamou i tona manako ki runga ia Iehova, eiaa ki runga iaia uaorai. Kua tata a Petero e: “Ka akamoraro ia kotou uaorai i raro ake i te rima mana o te Atua, kia akateitei aia ia kotou i te tuatau tikai. E uri i to kotou tumatetenga katoa ki runga iaia.” (1 Pete. 5:6, 7) Ka anoanoia tatou kia tauturu i ta tatou tangata apii Pipiria kia akameitaki atu i tona turanga pae vaerua. No te mea, ka akaperepere te tangata manako pae vaerua i te au mea pae vaerua. No tona inangaro i te Tuatua a te Atua ka akaari aia i te “au ua o te vaerua” i roto i tona oraanga. (Gala. 5:22, 23, NW) E puapinga tikai te pure kiaia. (Phili. 4:6, 7) Tei maata atu, ka irinaki aia ki te Atua no te tu mataku kore e te maroiroi kia rauka i te aro atu i tetai ua atu turanga me kore kia akatupu meitaki i tana angaanga.​—E tatau ia 2 Timoteo 1:7, 8.

¹⁶ Penei ka anoano tetai aronga apii i te tauturu kia kite i te tatau, pukapuka me kore tuatua. E ka manako tetai e kare ratou e tau ana i te  tavini i te Atua no ta ratou au angaanga kino i rave ana i mua ake ka apii ei ratou no runga ia Iehova. Noatu eaa te turanga, ka inangaro ratou i ta tatou tauturu aroa, e te akakoromaki. Kua akakite a Iesu e: “Kare no te aronga ora te taunga, no te aronga maki ra.”​—Mata. 9:12.

Kia Maata te Tane ka “Rauka” Mai

17, 18. (a) Akapeea tatou me itae atu i te maata o te tane i roto i ta tatou angaanga orometua? (e) Eaa ta tatou ka apii i roto i te atikara ka aru mai?

¹⁷ Te inangaro nei tatou kia maata te tane kia ariu mai ki te karere mareka tikai i roto anake i te Pipiria. (2 Timo. 3:16, 17) No reira, ka akapeea tatou me itae atu i te maata o te tane i roto i ta tatou angaanga orometua? Na te tutu aere anga i te au aiai, te au avatea i te au openga epetoma, me kore te tuatau orote tei te kainga te maataanga o te au tane. Me ka tau, e pati tatou kia tuatua atu ki te tane o te ngutuare. E tuatua atu tatou ki te au tane i te ngai angaanga me ka tau e te au tane a te au tuaine i roto i te putuputuanga kare i te Kite no Iehova.

¹⁸ Ia tatou e tutu aere ra ki te katoatoa ta tatou ka aravei, kia irinaki papu tatou e ka ariki rekareka mai te aronga ngakau tae. Ka akakoromaki tatou me tauturu i te katoatoa ka akaari mai i te inangaro tikai no te tuatua mou. Akapeea tatou me tauturu i te au tane i roto i te putuputuanga kua papetitoia kia itae atu e kia tau no te au apainga i roto i ta te Atua akaaerenga? Na te atikara e aru maira e pau i teia uianga.

[Tataanga Rikiriki i Raro]

Akapeea Koe me Pau?

• Akapeea me tauturu i te au tane kia tuku i te au mea pae vaerua na mua?

• Akapeea tatou me tauturu i te aronga ou kia autu i te au taomianga a te au oa?

• Eaa te ka tauturu i tetai pae kia autu atu i te manako tukatau kore?

[Au Uianga Apii]

[Tutu i te kapi 25]

Te kimi ra ainei koe te au atianga kia itae atu i te au tane ma te tuatua meitaki?

[Tutu i te kapi 26]

Akapeea koe me akapapa i taau tangata apii Pipiria kia aro atu i te au timataanga?