Wase Nomso Ve Za Hemen Ken Jijingi
Wase Nomso Ve Za Hemen Ken Jijingi
“Hii nyian je zan zan ken hemen kpaa [ne] mase kôron ior.”—LUKA 5:10.
1, 2. (a) Nomso yange ve ungwa kwaghpasen u Yesu nahan ve er nena? (b) Ka nyi se time sha mi ken ngeren nee?
ZUM u Yesu lu pasen kwagh vea mbahenen nav hen haregh u Galilia yô, ve nyôr tso sha u vea yem hen ijiir i ior lu her ga yô. Kpa ikpelaior dondo ve ijime sha angahar. Mba ve za la, “nomso lu er dubu utaan nahan, i wa kasev kua mbayev ker ga.” (Mat. 14:21) Sha shighe ugen la, ikpelaior za hen Yesu, sar ve u ma a wanger ve shi ma ve ongo kwaghôron na. Ken ikpelaior la, “nomso lu dubu unyiin, i wa kasev man mbayev ker ga.” (Mat. 15:38) Ikyav tese ér nomso kpishi lu ken ior mba yange ve zaan hen Yesu, shi ve tese ér ityesen na doo ve yô. Jighilii yô, Yesu yange ver ishima ér mbagenev kpishi vea kegh ato a ityesen na, sha ci u zum a wase mbahenen nav u kôron ishu sha ivande la, a kaa a Shimon ér: “Hii nyian je zan zan ken hemen kpaa [ne] mase kôron ior.” (Luka 5:10) Yesu lu kaan ér tom ve u pasen kwagh la ua lu er tom ve u kôron ishu la nahan. Lu u una wase ve u zuan a ior kpishi mba vea ngohol mimi yô. Nomso kpishi vea lu ken ior mban.
2 Nyian kpa, kape nomso ve lu tesen isharen sha loho u Ruamabera shi ve lu ngohol u je la. (Mat. 5:3) Nahan kpa, nomso kpishi ve hii u henen mimi, kpa ve kera za hemen a mi ga. Se wase ve nena? Shin er Yesu lu a gbenda ugen kposo u pasen nomso kwagh ga nahan kpa, yange nengen sha akaa a a zaan nomso mba sha ayange a na la iyol yô. De se dondo ikyav na la, nahan se nenge er se wase nomso u nôngon a akaa atar a a ze ve iyol nyian yô: (1) U keren ime-mnger eren, man (2) mcie u cian mnenge u ikpelaior, man (3) U nengen ayol a ve ér ve yina sha mbagenev la.
U Keren Ime-mnger
3, 4. (a) Ka nyi i hembe gban nomso kpishi ishima nyiana? (b) Er nan ve nomso kpishi ve hembe veren ishima sha u keren ime-mnger a akaa a ken jijingii?
3 Orngeren ugen yange va hen Yesu va kaa a na ér: “Ortesen, Wea za han han kpaa, me zaan a We heregh je.” Kpa Yesu kaa a na ér “Wan u or yô, ngu ape suur ityough ga,” nahan orngeren la hide hen a ishima. Tom u una eren ve una fa ape una zuan a kwaghyan ga shin pe una tsaan ga la, yange doo un ga je ka u henen a hen ga, sha ci u ikyav tese ér yange hingir or u dondon Kristu ga.—Mat. 8:19, 20.
4 Ashighe kpishi kwagh ka a hemba gban nomso sha akaa a iyolough a nan ve mkpeyol, a akaa a ken jijingi. Ka i hemba gban nomso kpishi ishima u zan makeranta u vesen shi zuan a tom u a kimbin ve inyaregh kpishi yô. Ka ve nenge ér mtsera u inyaregh ki a na ve la una hemba van fele shi una hemba wasen ve ayange ayange a nyityô mtsera i vea hen Bibilo shi vea ya ikyar a Yehova kôôsôô ve vea zua a mi la. Alaghga kwagh u Bibilo i tese la una doo ve, kpa “anzughul a tar ne a nyian ishima kua icugh i inyar” ia imbishi ma isharen i ve lu a mi cii. (Mar. 4:18, 19) Nenge ase er Yesu yange wase mbahenen nav u tsuan akaa a a lu a injaa ken uma ve la yô.
5, 6. Lu nyi i wase Anderia man Peteru man Yakobu man Yohane u geman mhen ve sha kwagh u tom u pasen kwagh la man u keren ime-mngere?
5 Anderia man anngô na Shimon Peteru yange ve eren tom u kôron ishu imôngo. Shi Yohane man anngô na Yakobu kua ter ve Sebedeu kpa eren tom ne. Kpenga ve ne za ikyura kpishi, je ve tôô ior mbagenev tom. (Mar. 1:16-20) Shighe u Anderia man Yohane hii ungwan kwagh u Yesu hen Yohane u eren Batisema la je, ve na jighjigh ér ve zua a Mesiya. Fese je, maa Anderia za kaa anngô na, Shimon Peteru loho ne, man alaghga Yohane kpa yange za kaa anngô na Yakobu loho ne. (Yoh. 1:29, 35-41) Ken iwer i inyiin i i dondo la, ve mba unyiin mbara cii ve lu a Yesu imôngo, er lu pasen kwagh ken Galilia man Yudia man Samaria la. Maa mbahenen mba unyiin mbara hide lu za eren kpenga ve u ishu la. Akaa a ken jijingi yange doo ve, kpa tom u pasen kwagh la lu kwagh u hiihii ken uma ve ga.
6 Shighe kar yô, Yesu lôhô Peteru man Anderia ér ve dondo un ve hingir “mbakôronior.” Tsô ve er nena? “ve undu ukper vev fese, ve dondo sha a Na.” Lu kwagh u Yakobu man Yohane kpa ve er je la. “Ve undu tso kua ter ve fese, ve dondo sha a Na.” (Mat. 4:18-22) Lu nyi i wase nomso mban u tsuan ér vea er tom u pasen kwagh hanma shighe laa? Lu kwagh u ishima kende ve ker kpoo maa ve tsua u eren yô shinii? Ei! Ken iwer i í kar ken ijime la, nomsombaiorov mban kegh ato a Yesu shi ve nenge uivande mba lu eren la shi ve nenge a ishimatseen na sha ci u kwagh u perapera shi ve nenge er ikpelaior lu ngohol loho na yô. Akaa ne na yô, ve hemba nan Yehova jighjigh shi suur sha a na kpaa!
7. Se er nena ve se wase mba se henen Bibilo a ve la, vea suur sha tahav mbu Yehova a lu a mi mbu nengen sha ior nav laa?
7 Se kav Yesu sha u wasen mba se henen Bibilo a ve la u nan Yehova jighjigh nena? (Anz. 3:5, 6) Gbenda u se tesen ior la ua wase se kpishi u eren kwagh ne. Shighe u se lu tesen ior yô, se fatyô u pasen ve kwagh u ityendezwa i Aôndo a er ér aluer se vande keren Tartor na yô, una na se iveren mgbeghaa la. (Ôr Malaki 3:10; Mateu 6:33.) Shin er se fatyô u ôron avur a Ruamabera kposo kposo a tesen er Yehova a nengen sha ior nav nahan kpa, doo u se umbur ser ikyav i se ayol a ase se ver la ngi a tahav kpishi je. Aluer se mba ôron mba se tesen ve Bibilo la uvande-eren mba uma wase yô, kwagh la una wase ve kpishi u suur sha Yehova. Shi se fatyô u ôron ve uvande-eren mba taver ve ishima mba se er ken ityakerada yase yô. *
8. (a) Er nan ve i lu a inja u or u henen Bibilo nana ‘bende nana nenge er Yehova a doo’? (b) Se wase or u se tesen nan Bibilo u nengen a mdoom ma Yehova ken uma u nan nena?
8 Cii ve or u i henen Bibilo a nan nana lu a jighjigh u nan taveraa yô, a gba u nana ôr uvande-eren mba tesen er Yehova a ver mbagenev shin nana ungwa di a ungwa uvande-eren mban tsô ga. A gba u or u henen Bibilo nana nenge a iveren i Yehova sha uma u nan iyol i nan. Orpasalmi nger ér: “Bende, nenge nen, TER ka u doon je; saan or u nan suur sha a Na la, iyol.” (Ps. 34:8) Se er nan ve se wase or u henen Bibilo u nengen er Yehova a doo? Aluer or u henen Bibilo nan ngu a mbamzeyol mba sha kwagh u inyar, shi nan ngu nôngon ér nana de inja i bo, er taav u man shin do u haan shin msôrom ma man kpishi nahan di ye? (Anz. 23:20, 21; 2 Kor. 7:1; 1 Tim. 6:10) Aluer se tese or u henen Bibilo la u eren msen ér Aôndo a wase nan u den inja i bo nahan, kwagh la una wase nan u nengen a iveren i Yehova ga he? Shi hen ase kwagh u una er, aluer se taver or u henen Bibilo ishima ér nana hemba veren ishima sha akaa a ken jijingi, sha u nan shighe u henen Bibilo ken hanma kasua shi wan iyol sha mbamkombo shin zan ve la yô. Er nan lu nengen er Yehova a lu veren iniôngon i nan la, jighjigh u nan u nan una lu hemban taver!
Mcie u Cian Mnenge u Ikpelaior
9, 10. (a) Er nan ve Nikodemu man Yosev u Arematia yange ve soo Yesu kpa ve lu yerene? (b) Ka i taver nomso mbagenev nyian u dondon Yesu sha ci u nyi?
9 Alaghga nomso mbagenev vea soo u dondon Kristu a ishima ve cii ga, sha ci u mkighir u mbakov. Nikodemu man Yosev u Arematia yange ve soo Yesu, kpa ve tese ken igbar ga, sha ci u ve lu cian kwagh u Mbayuda mbagenev vea va fa ve vea ôr shin vea er la. (Yoh. 3:1, 2; 19:38) Mciem man lu sha ityôkyaa je. Mbahemenev mba kwaghaôndo yange ve kôr Yesu ihyom je yô, hanma or u nan ne un jighjigh cii yô, ve dugh nan ken shinagoge kera.—Yoh. 9:22.
10 Sha ajiir agen nyian ne, aluer nomsoor soo kwaghaôndo shin kwagh u Bibilo shin nan soo Aôndo kpishi yô, anmgbianev mba nan shin azende a nan shin mba ve eren tom a nan imôngo vea fatyô u eren nan ayôôso. Sha ajiir agen yô, u ôron a ôr kwagh u musan kwaghaôndo wou kpa, a lu kwaghbo. Mkighir u mbakov ka a hemba taver sha ajiir a nomsoor nan lu ken shoja shin ken pati shin nan lu eren akaa hen ityô taveraa yô. U tesen ikyav yô, orgen ken tar u Jamani kaa wener: “Kwagh u ne Mbashiada mba Yehova ne pasen sha kwagh u Bibilo la ka mimi. Kpa aluer m hingir Orshiada nyian yô, kper nahan hanma or cii nana ungwa. Ior a hen ér nyi sha ijiirtom yam man hen anteregh wam la man mzough u mo man tsombor wam se lu ker laa? Me fatyô u wan ishima a imba kwagh la ga.”
11. Yesu yange wase mbahenen nav u nôngon a mcie u cian or nena?
11 Shin er orhenen u Yesu môm kpa nan lu or u cian kwagh ga nahan kpa, ve cii yange ve nôngo a mcie u cian or la. (Mar. 14:50, 66-72) Shin er ve lu tagher a mkighir u mbakov nahan kpa, Yesu wase ve u zan hemen ken mimi nena? Yesu yange wa mbahenen nav ago iyol u va tagher a ahendan ken hemen. A kaa ér: “Saan ne iyol zum u ior ka vea kôr ne ihyom, man vea dughun ne kera, vea hee ne kpaa, man shi vea teren iti yen dang, sha ci u Wan u or yô.” (Luka 6:22) Yesu vande kaan a mba dondon un ér ka keng ior a hee ve. Nyityô iheen i ve tagher a mi cii, a lu “sha ci u Wan u or.” Shi Yesu bum a ve ér Aôndo una sue ve aluer ve suur sha a na sha u a na ve agee yô. (Luka 12:4-12) Heela tseegh ga, Yesu lôhô mbagenev ér ve nyôr nôngo a mbahenen nav gbar gbar shi ve kôr ijende a ve kpaa.—Mar. 10:29, 30.
12. Ka sha igbenda i nyi nahan se wase mba hev vea hemba mcie u cian oro?
12 Se kpa gba u se wasen mba se henen Bibilo a ve sha u ve hemba mcie u cian or la. Or ka nana vande veren ishima ér nan ngu va tagher a mtaver ken hemen yô, ka nana va tagher a mi kpa i kera lu nan ican u nôngon a mi ga. (Yoh. 15:19) U tesen ikyav yô, er nan u wase or u henen Bibilo a nan la u wan iyol sha mbamlumun mba haren sha Bibilo mba ve taver ga, mba or a ungwa a kuma nan shighe u mba ve eren tom hen ijiir i môm a nan ve pin nan la, shin ve lu nyiman kwagh a nan ga? Dugh mlu u se lu ijende i nan la kera kpa, se fatyô u pasen mba ken tiônnongo kwagh u nan kpaa, hemban je yô, mba mbamlu vev ve ze kwaghmôm la. Kwagh u hemban cii je yô, doo u se tese nan u eren msen hanma shighe man a ishima i môm kpaa. Kwagh ne una wase nan u kporom ikyua a Aôndo shi Yehova una hingir nan Vande man Ijiir i Yeren kpaa.—Ôr Pasalmi 94:21-23; Yakobu 4:8.
U Nengen Ayol a Ve Ér Ve Yina sha Mbagenev La
13. Mnenge u or nomso nengen ayol a ve ér ve yina sha mbagenev la una na mbagenev vea soo u nyôron iyol ken akaa a ken jijingi ga nena?
13 Nomso mbagenev ka ve soo u nyôron iyol ken akaa a ken jijingi ga sha ci u ve fa u ôron takerada tsembelee ga shin ve fa kwaghôron tsembelee ga shin mba cie ashe. Nomso mbagenev ka i hagher ve u pasen mbamnenge vev sha ishigh ki mbagenev. Vea hen er i gbe u vea pasen mbagenev kwagh u jighjigh ve u nan shi vea henen kwagh shi vea naan mbamlumun ken mbamkombo mba Mbakristu nahan, alaghga vea nenge ér kwagh la taver. Anmgbian ugen kaa ér: “Shighe u m lu wanye la, yange m kaa fele m za tile sha hunda u or, m senge mer m gbidye imemegh ki sha hunda la, maa m kar kera ving, m henen ken ishima mer ma or a ungwam iov shin nana nenge a mo ga. . . . Yange mea hen er i gbe u me pasen kwagh sha uya uya nahan, m gba angev.”
14. Er nan ve Mbahenen mba Yesu fatyô u wanger wanye ugen u lu a jijingi u bo la ga?
14 Hen ase er mbahenen mba Yesu yange vea ban a vangertiôr shighe u ve kanshio u dughun jijingi u bo ken wanyekwaor ugen la. Ter u wan la yange va hen Yesu va kaa ér: “[Wan wam] gbe ikyungu, ngu dedoo ga tsung je, sha ci u ka a gba shin usu acin imôngo je kua shin mnger kpaa. Man m va a na hen mbahenen Ou kpa ve fatyô u been un ga.” Yesu yange dugh jijingi u bo la ken wan la kera, nahan a wanger un. Shighe kar yô, mbahenen va pine Yesu ér: “Ka nyi man se se fetyô u dughun un kera ga?” Yesu gema kaa ér: “Yesu kaa a ve er: Ka sha ci u myina u jighjigh wen u nan; gadia ka mimi je M kaan ne ne, aluer nea lu a jighjigh u nan sha inja i ishange i masetadi yô, ma ne kaa a uwo ne ner: Mough heen, hire kaara, kpa ma u mough; man ma kwagh u ne fatyô u eren un ga yô, una kera lu ga.” (Mat. 17:14-20) Saa or a na Yehova jighjigh ve nana hemba mbamzeyol mba ve lu inja er nana fatyô ga la ye. Kpa aluer or kera nenge a kwagh ne ga nan hide nan ngu suur sha mfe u nan ye. Nana kanshio, maa alaghga nana nenge ér nan kuma u civir Yehova ga.
15, 16. Ka sha igbenda i nyi nahan alaghga se wase or u se henen Bibilo a nan, nana de u nengen ér nan yina sha mbageneve?
15 Gbenda u dedoo u se wase or u nan lu nôngon a zayol u nan lu a mi ken ishima ér nan yina sha mbagenev la yô, ka u taver nan ishima ser nana de suur sha iyol i nan ga, kpa nana suur sha Yehova. Peteru nger ér: “Hide nen a ayol a en ijime er uwegh ku Aôndo ku ageegh ku lu sha a ven nahan, sha er shighe á va kuma vough yô Una kende ne sha. Gema nen ishima i nyian yen la cii, haa nen sha a Na, gadia ka Un A lu koson ne ye.” (1 Pet. 5:6, 7) Sha nahan yô, gba u se wase mba se henen Bibilo a ve la sha er Yehova una doo ve ishima shi vea soo ér a hemen ve yô. Or u nan soo ér Yehova a hemen nan yô, akaa a ken jijingi ka a gba nan ishima tsung. Ka nan soo Mkaanem ma Aôndo shi nan ume “ityamegh ki Jijingi” ken uma u nan. (Gal. 5:22, 23) Ka nan eren msen sha gbashima. (Fil. 4:6, 7) Heela tseegh ga, ka nan suur sha Aôndo sha u a na nan ishimataver man agee, a nana fatyô u nôngon a nyityô zayol u nan tagher a mi, shin eren nyityô tom i Aôndo a ne nan cii, kuren u vough yô.—Ôr 2 Timoteu 1:7, 8.
16 Alaghga a gba u se wase mbagenev mba se henen Bibilo a ve la sha u tesen ve takerada u ôron man u lamen a or shin u ôron kwagh. Alaghga mbagenev vea nenge ér ve kuma u civir Yehova ga sha ci u akaabo a yange ve er cii ve va hingir u fan Yehova yô. Er i lu cii kpa, iwasen i se lu nan ve sha dooshima man a ishimawan la ia fatyô u kuren mbamgbe vev. Yesu kaa ér: “Ka mbadedoo kwagh a gbe ve a ortwer ga, saa mba angev mbu ker ve la tseegh.”—Mat. 9:12.
‘Kôr’ Nomso Mbagenev Seer
17, 18. (a) Se er nan ve se seer zuan a nomso ken tom wase u pasen kwagh laa? (b) Ka nyi se lu timen sha mi ken ngeren u a dondo nee?
17 Se soo ser nomso mbagenev kpishi ma ve ongo loho u nan mkom tsung, u i lu ken Bibilo tseegh, i zuan a u ne. (2 Tim. 3:16, 17) Nahan se er nan ve se seer zuan a nomso ken tom wase u pasen kwagh laa? Ka sha u seer shighe wase, nahan duen kwaghpasen aikighe man sha iyange i Sati man Lahadi atetan, shin shighe u memyol, u nomso kpishi ka ve lu hen uya vev la. Se fatyô u kaan a orya ser se soo u lamen a nan, zum i gbe sha mi yô. Hanma shighe u ian i dugh cii yô, se pasen nen nomso mba ve yaren hen ijiir i tom i môm a vese la kwagh, shi se lamen a noov mba nan jighjigh ga, mba kasev vev ve lu ken tiônnongo la kpaa.
18 Aluer se mba lamen a hanma or u se zough a nan cii yô, se lu a vangertiôr ser mba ve lu a ishima i wuese kwagh yô, vea lumun loho wase. De se kundu nen ishima, se wase hanma or u nan tese sha mimi ér sar nan u fan mimi la. Nahan kpa, se wase nomso mba ken tiônnongo mba ve er batisema nena ve vea ar sha aan a tom ken nongo u Aôndo. Ngeren u dondo ne una time sha mpin ne.
[Ngeren u shin kpe]
^ Nenge Yearbook of Jehovah’s Witnesses kua kwaghôron u anmgbianev u ka i gber ken Iyoukura man Awake! la.
Ú Na Mlumun Wer Nyi?
• A wase nomso nena ve vea ver akaa a ken jijingi hiihii ken uuma veve?
• Se wase mba hev nena ve vea nôngo a mkighir u mbakovo?
• Ka nyi ia wase mbagenev vea de u nengen ér ve yina sha mbagenenve?
[Mbampin mba ngeren u henen]
[Foto u sha peeji 25 la]
U keren aan a u pase nomso loho u dedoo kpa?
[Foto u sha peeji 26 la]
U wa mba u henen Bibilo a ve la ago iyol u va tagher a atsan a karen jighjigh ve u nan nena?
