Tu Kuatisi Vamanji Alume Oku Kula Kespiritu
Tu Kuatisi Vamanji Alume Oku Kula Kespiritu
“Tunde opo o linga enyanga liomanu.”—LUKA 5:10.
1, 2. (a) Nye alume valua va linga eci va yeva esapulo lia Yesu? (b) Nye tu konomuisa vocipama cilo?
ONJANJA yimue eci Yesu a kala lolondonge viaye oku kundila ko Galilea, omo okuti, va kavele calua va endele lowato kocitumãlo cimue oco va puyuke. Pole, owiñi wa va kuama toke kocitumãlo caco. Omanu veyile keteke liaco, va tẽla “olohũlũkãi vitãlo vialume, [pole] akãi lomãla ka va tendiwile.” (Mat. 14:21) Kepuluvi likuavo, owiñi umue womanu weyile ku Yesu oku sakuiwa loku yevelela ovina a kala oku popia. Omanu vaco va kala “olohũlũkãi vikuãla vialume, [okuti,] akãi lomãla ka va tendiwile.” (Mat. 15:38) Omanu valua veyile ku Yesu, momo va yonguile oku yevelela ovina a kala oku longisa. Yesu wa kũlĩhĩle okuti omanu valua va ka tava oku longisiwa. Noke yoku linga ocikomo coku kuata ombisi yalua, wa sapuila ondonge yaye Simono hati: ‘Tunde opo vu linga anyanga vomanu.’ (Luka 5:10) Olondonge viaye, via sukilile oku litumbika kupange woku kunda oco vi ‘sange’ omanu valua oku kongelamo alume.
2 Koloneke vilo, alume valua va siata oku tava kesapulo Liovisonehua tu kasi oku va kundila. (Mat. 5:3) Omo okuti alume vamue va liwekapo oku lilongisa Embimbiliya, ka va kuli kespiritu. Tu va kuatisa ndati? Yesu ka tiamisilile lika upange waye woku kunda kalume. Pole, wa vangula ovina vialua viatiamẽla kovitangi via enda oku sakalaisa alume kotembo yaco. Tu sukila oku kuama ongangu yaye, poku kũlĩhĩsa ndomo tu pondola oku kuatisa alume kolonepa vitatu via siata oku va sakalaisa ndeci: (1) oku sandiliya eteku, (2) oku kuatela usumba omanu, kuenda (3) ohele yoku sima okuti ka va loñolohele.
Oku Sanda Eteku
3, 4. (a) Ovina vipi alume valua va siata oku sakalalo lavio? (b) Momo lie alume vamue va pitisila kovaso asakalalo omuenyo okuti ovina viespiritu ci sule?
3 Ulume umue ukuavisonehua, wa sapuila Yesu hati: “Olongisi, hu kuama kuosi wenda.” Eci Yesu o sapuila hati, “Mõlomanu ka kuete apa a kunamisila utue waye,” ulume waco wa litiukamo. Embimbiliya ka li lombolola nda ulume waco weya oku linga ondonge ya Yesu, ale sio. Citava okuti ulume waco, wa sakalalele calua poku sokolola ndomo a ponduile oku sanga eteku locitumãlo coku kala.—Mat. 8:19, 20.
4 Alume vamue va siata oku pitisa lika kovaso asakalalo omuenyo okuti, ovina viespiritu ci sule. Oku kuata elilongiso lia velapo, lupange weca olombongo vialua, oco ca velapo kokuavo. Ovo va sima okuti, oku kuata olombongo oco ocina ca velapo okuti, oku lilongisa Embimbiliya loku kuata ukamba la Suku, ci sule. Citava okuti, va sole ovina vi sangiwa Vembimbiliya, pole, ‘oku sakalala lovina violuali leliaño liukuasi,’ ci totomisa onjongole yavo. (Mar. 4:18, 19) Kũlĩhĩsa ndomo Yesu a kuatisa olondonge viaye oku limbuka ovina va sukilile oku pitisa kovaso.
5, 6. Nye ca kuatisa Andereu, la Petulu, la Tiago, kuenda Yoano oku siapo upange woku sanda eteku oco va litumbike lika kupange woku kunda?
5 Andereu la manjaye Simono Petulu, va kala vakuakupipa ombisi. Yoano la manjaye Tiago, kuenda isiavo Sebedeo va kalavo vakuakupipa. Upange waco, wa sukilile ekuatiso lialume. (Mar. 1:16-20) Eci Yoano Upapatisi a sapuila Andereu la Yoano ulandu watiamẽla ku Yesu, va limbuka okuti, va sanga Mesiya. Andereu wa sapuila manjaye Simono Petulu, kuenda citava okuti Yoano wa sapuilakovo manjaye Tiago. (Yoa. 1:29, 35-41) Volosãi via kuamamo, kakuãla kavo, va kundila kumosi la Yesu ko Galilea, ko Yudea, kuenda ko Samaria. Noke olondonge viaco vikuãla, via tiukilile kupange wavo woku tamba ombisi. Olondonge via solele calua ovina viespiritu, pole, ka via kũlĩhĩle okuti, upange woku kunda u kuete esilivilo lia velapo.
6 Noke yotembo yimue, Yesu wa laleka Petulu la Andereu oco vo kuame okuti va linga “anyanga vomanu.” Va tambulula ndati kelaleko liaco? “Va sia awanda avo kuenje vo kuama.” Tiago la Yoano va siavo ‘owato wavo la isiavo kuenje vo kuama.’ (Mat. 4:18-22) Nye ca va vetiya oku litumbika kupange wotembo yosi? Anga hẽ va ci lingila lika esanju va kuata okuti ka va sokoluile vali? Sio, tete va sokolola! Momo vokuenda kuolosãi vimue, va kuatele epuluvi lioku yevelela Yesu, va mola ovikomo a linga, ombili yaye koku linga esunga, kuenda va molavo omanu va tava kesapulo liaye. Ovina viaco, via pamisa ekolelo liavo ku Yehova!
7. Tu kuatisa ndati omanu tu longisa Embimbiliya oku kolela okuti Yehova wa siata oku tata afendeli vaye?
7 Tu kuama ndati ongangu ya Yesu poku kuatisa olondonge vietu oco vi pamise ekolelo liavo ku Yehova? (Olosap. 3:5, 6) Tu sukila oku kũlĩhĩsa oku longisa kuetu. Poku longisa omanu, tu sukila oku va lomboluila ovina Suku a tu likuminya, kuenda asumũlũho tu pondola oku tambula, nda tua sandiliya tete Usoma. (Tanga Malakiya 3:10; Mateo 6:33.) Ndaño okuti, tu tukula Ovisonehua vi lekisa ndomo Yehova a siata oku tata afendeli vaye, ka tu ka ivaliko oku lekisa ongangu yiwa kokuavo. Oku va sapuila ulandu womuenyo wetu, ci va kuatisa oku kolela Yehova. Tu pondolavo oku va kolisa lovolandu tua tanga valivulu a sandekiwa lukuenje wa lunguka. a
8. (a) Momo lie omunu una tu longisa Embimbiliya a sukilila oku ‘seteka oco a limbuke okuti Yehova ukuahenda’? (b) Tu kuatisa ndati omunu tu longisa Embimbiliya oku limbuka ohenda ya Yehova?
8 Oco tu pamise ekolelo lietu, tu sukila tanga ovolandu a lekisa ndomo Yehova a siata oku sumũlũisa vamanji. Omunu tu longisa Embimbiliya o sukilavo oku limbuka okuti, Yehova ukuacisola. Ukualosamo wa imba ocisungo hati: “Seteki oco vu limbuke okuti Yehova ukuahenda. Omunu wosi o wunda kokuaye o sumũlũha.” (Osa. 34:8) Tu kuatisa ndati omunu tu longisa Embimbiliya oku limbuka okuti, Yehova ukuahenda? Citava okuti omunu waco wa sakalala lolombongo pole, o likolisilako oku siapo ovituwa vĩvi ndeci: Oku sipa, ocituwa coku imba olombongo, kuenda uholua. (Olosap. 23:20, 21; 2 Va Kor. 7:1; 1 Tim. 6:10) Ka tu sukila hẽ oku longisa omunu waco oku likutilila ku Yehova Suku, okuti u kuatisa oku yula ovituwa viaco vĩvi, oco a taviwe laye? Tu sukilavo oku u sapuila esilivilo lioku lilongisa Embimbiliya osemana losemana kuenda oku pongiya ovipama violohongele loku endaenda kolohongele viosi. Eci a fetika oku tambula asumũlũho a Yehova, ekolelo liaye li pamisiwa!
Oku Kuatela Usumba Omanu
9, 10. (a) Momo lie Nikodemo la Yosefe u Arimateya, va lekisila ocisola ku Yesu vuyombeki? (b) Momo lie alume vamue koloneke vilo va kuetele ohele yoku kuama Yesu?
9 Alumue vamue va liwekapo oku kuama Kristu, omo liusumba woku yoliwa epembe lakamba. Ndaño okuti Nikodemo la Yosefe u Arimateya va solele Yesu, pole, ka va ci lekisile komanu omo liusumba va kuatela va Yudea, kuenda oku sima okuti, va ka yoliwa epembe. (Yoa. 3:1, 2; 19:38) Va kuata esunga lioku yeva usumba waco. Momo asongui vetavo va suvukile Yesu kuenda va enda oku popia hati, wosi o kolela kokuaye, o tundisiwa vosunangonga.—Yoa. 9:22.
10 Kolonepa vimue violuali, nda ulume o popia hati, wa kolela Suku, o tava kalongiso Embimbiliya, ale o yongola oku tiamẽla ketavo, citava okuti akamba vo kupange la vangandiaye, vo yola epembe. Kolofeka vimue, nda omunu o sapuila vakuavo hati, o yongola oku tiamẽla ketavo likuavo, o kuata ovitangi. Nda omunu umue esualali, ale o kasi vocitundo cimue copulitika, kuenda o kuete ocikele ca kemãla, pole, o yongola oku tiamẽla ketavo, o kuata ovitangi vialua. Ulume umue kofeka yo Alemanya wa popia hati: “Ene Vulombangi Via Yehova ovina wa siati oku kunda viocili, momo vi sangiwa Vembimbiliya. Nda nda linga Ombangi ya Yehova, noke omanu vosi va ci kũlĩha. Kuenje, akamba vo kupange wange, lomanu va kasi posongo yetu, la vangandiange, va ka ndi tenda ndati? Si pondola oku ci linga.”
11. Yesu wa kuatisa ndati olondonge viaye oku yula usumba womanu?
11 Lomue pokati kovapostolo va Yesu wa kuatele usumba, pole, vosi yavo va kuatele ohele lomanu. (Mar. 14:50, 66-72) Yesu wa va kuatisa ndati oco va amameko locikundi cavo, ndaño loku yoliwa epembe lomanu? Yesu wa kuatisa olondonge viaye oco vi tẽle oku yula elambalalo va kala oku lavoka. Eye wa popia hati: “Eci omanu vo suvukili Mõlomanu, leci vo tundisi, loku vu sepula, leci va lavisa onduko yene loluhimo lũvi, oco wa sumũlũhi.” (Luka 6:22) Yesu wa lungula olondonge viaye hati, vi ka suvukiwa. Esuvu liaco lieya kokuavo ‘omo lia Mõlomanu.’ Pole, wa likuminya kolondonge viaye hati, nda va pinga ku Suku ekuatiso volohutililo, eye o vi pamisa. (Luka 12:4-12) Omo liaco, Yesu wa laleka omanu va fetika oku lilongisa Embimbiliya oco va likongele kolondonge viaye okuti va linga akamba vavo.—Mar. 10:29, 30.
12. Tu kuatisa ndati vana tu longisa Embimbiliya oco ka va ka kuate usumba lomanu?
12 Tu sukilavo oku kuatisa omanu tua siata oku longisa Embimbiliya oco ka va ka kuate usumba lomanu. Omunu o pondola lika oku yula ocitangi cimue nda vo ci sapuila osimbu ka ceyile handi. (Yoa. 15:19) Momo lie ku kuatisila omunu o longisa Embimbiliya oco a tẽle oku tambulula eci omanu vo posongo yaye, kuenda akamba vo kupange waye vo pulisa ondaka yimue? Tu sukila oku kuata ukamba lomunu tu longisa Embimbiliya loku u lekisa ku vamanji, ca piãla enene vana va kuete ekalo ndeli liaye. Tu sukilavo oku u longisa oco a kuate ocituwa coku likutilila lutima wosi. Ovina viaco, vi pondola oku u kuatisa oku kuata ukamba la Yehova Suku, loku u tenda okuti eye Ewe, haeye Ocivundilo caye.—Tanga Osamo 94:21-23; Tiago 4:8.
Ohele Yoku Sima Okuti ka Loñolohele
13. Ocisimĩlo cokuti omunu ka loñolohele ca siata oku tateka ndati vamue oku tepulula ombili yavo kovina viespiritu?
13 Omo okuti alume vamue ka va tẽla oku tanga ciwa, va tepulula ombili yavo kovina viespiritu, kuenda va kuete osõi loku sima okuti, ka va tẽla oku vangula ciwa. Vamue va kuete usumba woku vanguila pokati kowiñi. Ovo va sima okuti, ka va pondola oku lilongisa Embimbiliya, oku eca atambululo kolohongele, kuenda ka va tẽla oku kundila omanu. Manji umue ulume wa popia hati: “Eci nda kala umalẽhe, nda kuata ocituwa cokuti, poku enda kupange woku kunda, ndi totola lonjanga kepito kuenje, ndi tunda lolupesi oco ka va ka ndi mole. . . . Ocisimĩlo coku kundila konjo lanjo, ca enda oku ndi kokela oku vela.”
14. Momo lie olondonge via Yesu ka via kuatelele unene woku sakula umalẽhe umue wa kuatiwile lolondele?
14 Sokolola ndomo olondonge via Yesu via kala okuti, omo liekambo liekolelo, ka via tẽlele oku sakula ukuenje umue wa kuatiwile lolondele. Eci isia yukuenje waco a endele ku Yesu, wa popia hati: “[Omõlange ukuenje] o kuete ocinonya, cu talisa calua ohali, o kupokaila ño vondalu ndaño vovava. Ndo nena kolondonge viove puãi ka via ci tẽlele oku u sakula.” Noke, Yesu wa tundisa ondele, kuenje, wa sakula umalẽhe waco. Omo liaco, olondonge vieya ku Yesu noke vio pula ndoco: ‘Momo lie ka tua kuatelele unene woku tundisa ondele yaco?’ Yesu wa vi tambulula hati: “Ka wa ci tẽleli omo ekolelo liene litito. Momo mopia lene siti, Nda vu kasi lekolelo ndolumema lusalata, nda vu popia lomunda eyi hoti, Kulo tundako, sondolokela oko, kuenje yi sondoloka. Ka kuli eci ka vu tẽla.” (Mat. 17:14-20) Oco tu yule ovitangi via soka ndolomunda, tu sukila oku kolela ku Yehova. Nda omunu o kolela lika koku loñoloha kuaye, nye ci pondola oku pita laye? Nda upange womunu ka weci onima yiwa, o pua ekolelo.
15, 16. Tu kuatisa ndati omanu tu longisa Embimbiliya oco ka ka kuate ovisimĩlo viokuti ka loñolohele?
15 Tu sukila oku kuatisa omunu o kuete ovisimĩlo viokuti, ka loñolohele, poku u vetiya oku kolela ku Yehova. Petulu wa soneha ndoco: “[Liketisi] vemehi lieka lia pama lia Suku, okuti kotembo yaye o wamisi kunene. Ohele yene yosi yi yeki kokuaye.” (1 Pet. 5:6, 7) Omo liaco, tu sukila oku kuatisa omunu tu longisa Embimbiliya oco a kule kespiritu. Omunu ukuespiritu, wa tiamisila utima waye kovina viespiritu. Eye o sole Ondaka ya Suku kuenda o lekisa “epako liespiritu” komuenyo waye. (Va Gal. 5:22, 23) Omunu waco, o kuete ocituwa coku likutilila. (Va Fil. 4:6, 7) Kuenda wa kolela okuti, Suku u wĩha utõi woku pandikisa kovitangi oco a tẽlise ovikele viaye.—Tanga 2 Timoteo 1:7, 8.
16 Omanu vamue va lilongisa Embimbiliya va sukila ekuatiso oco va tẽle oku tanga ciwa, loku kuata uloño woku sapela lomanu. Vakuavo pamue va sima okuti ka va pondola oku vumba Suku omo liovina vĩvĩ va enda oku linga kosimbu. Omo liaco, tu sukila oku lekisa ocisola lepandi oco tu kuatise omanu vaco. Yesu wa popia hati: “Omanu va kuete uhayele, ka va sukila ondotolo, te vana va vela.”—Mat. 9:12, NW.
“Enyanga” Lialume Valua
17, 18. (a) Tu pondola oku sanga ndati alume valua kupange woku kunda? (b) Nye tu ka lilongisa vocipama ci kuãimo?
17 Omo okuti, Vembimbiliya omo lika mu sangiwa esapulo li nena esanju liocili, tu yongola oku kuatisa alume valua oco va tave kesapulo liaco. (2 Tim. 3:16, 17) Tu sanga ndati alume valua kupange woku kunda? Tu ci linga poku pita otembo yalua kupange woku kunda koñolosi, kesulilo liosemana, koloneke viepuyuko ale vapuluvi ana okuti, alume valua va sangiwa kolonjo viavo. Eci tu enda konjo yimue, tu sukila oku pulisa nda citava oku sapela lulume waco. Omo liaco, tu likolisiliko oku eca uvangi ka wa sokiyiwile komanu tu talavaya lavo kupange, kuenda oku kundila alume va vamanji akãi okuti Halombangiko Via Yehova.
18 Osimbu tu likolisilako oku kundila omanu vosi, tu koleli okuti, vakuavitima via sunguluka va ka tava kesapulo liwa. Tu amamiko oku kuatisa omanu va lekisa onjongole yoku lilongisa Embimbiliya. Tu kuatisa ndati alume va papatisiwa oco va tambule ovikele vekongelo? Ocipama ci kuãimo ci ka tambulula epulilo eli.
[Atosi pombuelo yamẽla]
a Tanga vo Anuáriu das Testemunhas de Jeová, ovolandu a sandekiwa Vutala Wondavululi kuenda vo Despertai!
O Tambulula Ndati?
• Tu kuatisa ndati alume oco va pitise kovaso ovina viespiritu?
• Tu kuatisa ndati omanu vana va lilongisa Embimbiliya letu oco ka va ka kuate usumba lomanu?
• Nye ci kuatisa vamue oku yuvula ovisimĩlo viokuti ka va loñolohele?
[Apulilo Elilongiso]
[Elitalatu kemẽla 25]
Ove hẽ wa siata oku sandiliya epuluvi lioku kundila alume valua?
[Elitalatu kemẽla 26]
O kuatisa ndati omunu o longisa Embimbiliya oco a yule ovitangi?
