Attumaasay Ayyaanaaban Diccanaadan Maaddite
Attumaasay Ayyaanaaban Diccanaadan Maaddite
“Hagaappe sinttan neeni asa oiqqiyaagaa gidana.”—LUQ. 5:10.
1, 2. (a) Yesuusi sabbakidobaa siyidi daro asay ay oottidee? (b) Ha huuphe yohuwan ay beˈanee?
YESUUSINNE i erissiyo ashkkarati Galiilaa biittaa ubban yuuyidi sabbakido issi wode, eti wolwoluwan asi baynnasaa biidosona. SHin daro asay tohuwan eta kaalliis. He gallassi he sohuwaa biida asaa qooday “maccaasaanne naata paidennan, ichchashu sha7aa gidiyaagaa keena.” (Maa. 14:21) Hara wode, Yesuusi yootiyoobaa siyanaunne i banttana pattanaadan koyidi daro asay akko yiis. He daro asaa giddon “maccaasaanne naata paidennan, oiddu sha7u” attumaasay deˈees. (Maa. 15:38) Yesuusakko yiidi i tamaarissiyoobaa siyanau koyidaageetuppe dariya baggay attumaasaa gidiyoogee qoncce. Yesuusi hara daro asay i yootiyoobaa siyana giidi qoppiis; ayssi giikko, maalaalissiya hanotan moliyaa oyqqanaadan maaddi simmidi erissiyo ashkkaraa, Simoonayyo, ‘Hagaappe sinttan intte asa oyqqiyaageeta gidana’ yaagiis. (Luq. 5:10) Yesuusi erissiyo ashkkarati abban leemisettida asaa naatu alamiyan gitiyaa yeggana koshshees; eti daro attumaasaa ‘oyqqana’ giidi qoppana danddayoosona.
2 Ha wodiyankka, attumaasay hegaadan nuuni sabbakiyo Geeshsha Maxaafaa kiitaa ufayssan siyees. (Maa. 5:3) SHin daroti tamaariyaaba gidikkonne, ayyaanaaban diccokkona. Eta ayba ogiyan maaddana danddayiyoo? Yesuusi attumaasaa demmanau dumma ogiyan haggaazana xayikkonne, i ba wode deˈiya attumaasaa qofissiyaabaa yootiis. A leemisuwaa kaalliyoogan, ha wodiyan attumaasay banttana qofissiya, meeze gidida heezzubaa giigissanaadan nuuni waatidi maaddana danddayiyaakko ane pilggoos: (1) aqossi koshshiyaabaa kunttiyoogaa, (2) asay woyganee giidi yayyiyoogaanne (3) danddayikke giyoogaa.
Aqossi Koshshiyaabaa Kunttiyoogaa
3, 4. (a) Daro attumaasaa qofissiya waannabay aybee? (b) Issi issi attumaageeti aqossi koshshiyaabaa kunttiyoogaa ayyaanaabaa kaalliyoogaappe kaseyiyoy aybissee?
3 Higgiyaa tamaarissiya issoy Yesuusa, “Tamaarissiyaagoo, neeni biyoosaa ubbaa taani nena kaallana” yaagiis. SHin Yesuusi ayyo, “Taani Asa Na7ai, zin77ada shemppa ekkiyoosikka tau baawa” yaagido wode, higgiyaa tamaarissiyaagee siriis. He bitanee Kiristtoosa kaallidoogaa bessiyaabi baynna gishshau, maanabaunne deˈana sohuwau hirggennan aggenna.—Maa. 8:19, 20.
4 Attumaasay ayyaanaabaa kaalliyoogaappe, darotoo aquwaaban hirggennan deˈiyoogaa kaseyees. Etappe daroti xoqqa timirttiyaa tamaariyoogaanne daro miishshaa demmiyo oosuwaa kaseyoosona. Eti qoppiyoogaadan, miishshaa demmiyoogaa goˈˈay Geeshsha Maxaafaa xannaˈiyoogaaninne Xoossau mata dabbo gidanau koyiyoogan demmiyo ay anjjuwaappekka keehi koshshiyaabanne maaddiyaaba. Geeshsha Maxaafay tamaarissiyooban eti ufayttennan aggokkona, shin ‘ha saˈaa deˈuwau hirggiyoogeenne duretettaa siiqiyoogee’ eti Geeshsha Maxaafaa tamaarennaadan diggana danddayees. (Mar. 4:18, 19) Yesuusi ba erissiyo ashkkarati bantta deˈuwan kaseyiyoobaa laammanaadan waatidi maaddidaakko akeekite.
5, 6. Inddiraasi, PHeexiroosi, Yaaqoobinne Yohaannisi sabbakiyoogaanne aqossi koshshiyaabaa kunttiyoogaa xeelliyaagan kaseyiyoobaa laammanaadan maaddiday aybee?
5 Inddiraasinne a ishaa Simoon PHeexiroosi issippe moliyaa oyqqoosona. Yohaannisi, a ishaa Yaaqoobinne eta aawaa Zabddiyoosikka he oosuwaa etaara issippe oottoosona. Moliyaa oyqqiyo oosoy aakkido gishshau, eti hara asaa qaxaridosona. (Mar. 1:16-20) Yohaannisinne Inddiraasi, Xammaqiya Yohaannisappe Yesuusabaa koyro siyido wode, Masiyaa demmidoogaa akeekidosona. Inddiraasi siyidobaa ba ishaa Simoon PHeexiroosau yootiis; Yohaannisikka ba ishaa Yaaqoobau sohuwaara yootennan aggenna. (Yoh. 1:29, 35-41) Hegaappe kaalliya aginatun, eti oyddaykka Yesuusi Galiilan, Yihudaaninne Samaariyan sabbakiyo wode aara issippe deˈoosona. Hegaappe simmidi, erissiyo ashkkarati oyddaykka moliyaa oyqqanau guyye simmidosona. Etau ayyaanaabau koshshay deˈiyaaba gidikkonne, eta qofissiya waannabay haggaazuwaabaa gidenna.
6 Amarida wodee aadhi simmin, Yesuusi bana kaallidi ‘asaa oyqqiyaageeta’ gidanaadan PHeexiroosanne Inddiraasa shoobbiis. Eti ay oottidonaa? “Eti sohuwaarakka bantta gitiyaa yeggi bayidi, Yesuusa kaallidosona.” Yaaqoobinne Yohaannisikka hegaadan oottidosona. “Sohuwaarakka eti wolwoluwaanne bantta aawaa yeggi bayidi, Yesuusa kaallidosona.” (Maa. 4:18-22) Ha asati kumetta wodiyaa haggaazuwaa doommanaadan maaddiday aybee? Hegee eti dirbbidi kuuyidobee? Akkay. Hegaappe kase aginatun, eti Yesuusi tamaarissiyoobaa siyidosona; qassi i maalaaliyaaba oottiyoogaa, xillotettau mishettiyoogaanne i tamaarissiyooban asay keehippe ufayttidoogaa beˈidosona. Hegaappe denddidaagan, eti kaseegaappe aaruwan Yihoowa ammanidosonanne an ammanettidosona.
7. Yihooway ba asau koshshiyaabaa kunttiyoogaa nuuni Geeshsha Maxaafaa xannaˈissiyoogeeti ammanettanaadan waatidi maaddana danddayiyoo?
7 Nuuni Geeshsha Maxaafaa xannaˈissiyoogeeti Yihoowan minttidi ammanettanaadan maaddiyoogan, Yesuusa leemisuwaa kaallana danddayiyoy ayba ogiyaanee? (Lee. 3:5, 6) Nuuni tamaarissiyo ogee hegau keehippe maaddees. Kawotettaabaa kaseyiyaaba gidikko, Xoossay nuna palahissidi anjjanau qaalaa gelidoogaa, tamaarissiyo wode minttidi yootana danddayoos. (Milkkiyaasa 3:10; Maatiyoosa 6:33 nabbaba.) Yihooway ba asau koshshiyaabaa waatidi kunttiyaakko qonccissanau dumma dumma xiqiseta goˈettana danddayiyaaba gidikkonne, hegaara gayttidaagan nuunikka leemiso gidiyoogaa goˈˈaa xaasayidi xeellana koshshenna. Nu deˈuwan beˈidobaa yootiyoogee, nuuni xannaˈissiyo uri Yihoowan ammanettanaadan keehippe maaddana danddayees. Nu xuufetun nabbabido minttettiya temokruwaakka yootana danddayoos. *
8. (a) Geeshsha Maxaafaa tamaaree “[Yihooway] keha gidiyoogaa xeelli” beˈiyoogee keehippe koshshiyoy aybissee? (b) Tamaaree Yihooway keha gidiyoogaa ba deˈuwan beˈanaadan nuuni waatidi maaddana danddayiyoo?
8 Ammanuwan minnanau Yihooway harata anjjidoogaa yootiya temokruwaa nabbabiyoogaanne siyiyoogaa xallay gidenna. Geeshsha Maxaafaa tamaaree Yihoowa loˈˈotettaa ba huuphe beˈiyoogeekka koshshiyaaba. Mazamuraawee, “[Yihooway] keha gidiyoogaa xeelli be7ite. Akko baqatiya asi anjjettidaagaa” yaagidi yexxiis. (Maz. 34:8) Yihooway keha gidiyoogaa tamaaree akeekanaadan nuuni waatidi maaddana danddayiyoo? Leemisuwau, miishshaabay hirggissiyo tamaaree sijaaraa uyiyoogaa, ceeriyaa kaaˈiyoogaa, woy mattottiyoogaa mala iita amaliyaa xoonanaukka baaxetees giidi qoppoos. (Lee. 23:20, 21; 2 Qor. 7:1; 1 Xim. 6:10) Tamaaree he iita amaliyaa xoonanau maaddanaadan Xoossaakko woossana mala tamaarissiyoogee i Yihoowa loˈˈotettaa beˈanaadan maaddennee? Tamaaree saaminttan saaminttan Geeshsha Maxaafaa xannaˈanau, Kiristtaane shiiqotuyyo giigettanaunne shiiqotun beettanau wodiyaa bazziyoogan, ayyaanaabaa kaseyana mala nuuni minttettiyo wode hanana danddayiyaabaakka qoppite. I ba baaxiyaa Yihooway anjjiyoogaa beˈiyo wode, a ammanoy kaseegaappe minnees.
Asay Woyganee Giidi Yayyiyoogaa
9, 10. (a) Niqoodimoosinne Armmaatiyaasa katamaa asa gidida Yooseefi Yesuusa timirttiyan ufayttiyoogaa erissibeennay aybissee? (b) Ha wodiyan issi issi attumaasay Kiristtoosa kaallanau mammottiyoy aybissee?
9 Laggeti sugettaa gattiyo gishshau, issi issi attumaageeti Kiristtoosa kaallanau mammottana danddayoosona. Niqoodimoosinne Armmaatiyaasa katamaa asa gidida Yooseefi, hara Ayhudati banttana beˈikko waatanaakko woy woyganaakko giidi yayyido gishshau, Yesuusa timirttiyan ufayttiyoogaa erissibookkona. (Yoh. 3:1, 2; 19:38) Eti yayyido gaasoy deˈees. Haymaanootiyaa kaalettiyaageeti Yesuusa keehippe ixxiyo gishshau, an ammaniya oonanne Ayhuda woosa keettaappe kessoosona.—Yoh. 9:22.
10 Ha wodiyankka issi issi heeran, issi uri Xoossaa, Geeshsha Maxaafaa woy haymaanootiyaa keehippe dosiyaaba gidikko, aara issippe oottiyaageeti, laggeti woy dabboti a ixxana danddayoosona. Hara heeran, issi uri ba haymaanootiyaa laammiyoogaabaa haasayiyoogee ubba daafan yeggiyaaba gidana danddayees. Issi uri wotaaddara gididi woy polotikan woy ba heeran erettida ooso oottiyaaba gidikko, laggetu sugettay keehippe wolqqaama gidana danddayees. Leemisuwau, Jarmane biittan deˈiya issi bitanee hagaadan giis: “Intte Yihoowa Markkati Geeshsha Maxaafaabaa sabbakiyoobay tuma. SHin taani hachi Yihoowa Markka gidiyaakko, wontto ubba asay hegaa erana. Ooso sohuwan, shooron, qassi ta soo asaynne taani yame gidido maabaran deˈiyaageeti woyganee? Taani hegaa eqettana danddayikke.”
11. Yesuusi ba erissiyo ashkkarati asaa yayyiyoogaa agganaadan waatidi maaddidee?
11 Yesuusi kiittidoogeeti baqibaqiyaageeta gidana xayikkonne, eti ubbaykka asaa yayyiyoogaa agganau baaxetidosona. (Mar. 14:50, 66-72) Eta laggetuppe wolqqaama sugettay gakkishinkka, eti ayyaanaaban diccanaadan Yesuusi waatidi maaddidee? Yesuusi sinttappe gakkana yedetau giigettanaadan ba erissiyo ashkkarata maaddiis. Yesuusi, “Intte tana Asa Na7aa kaalliyo gishshau, asi inttena ixxiyo wode, asappe shaakkiyo wode, boriyo wode, inttena iita sunttan xeegiyo wodekka intte anjjettidaageeta” yaagiis. (Luq. 6:22) Yesuusi bana kaalliyaageeti asay banttana ixxana giidi naagana bessiyoogaa yootiis. “Asa Na7aa kaalliyo gishshau” asay eta ixxees. Eti maaduwaanne wolqqaa demmanau Xoossan ammanettiyo wode, Xoossay eta maaddanaagaa Yesuusi yootiis. (Luq. 12:4-12) Hegaa bollikka, oorattati yayyennan ba erissiyo ashkkaratuura issippetettaa medhidi, etaara lagge gidanaadan Yesuusi shoobbiis.—Mar. 10:29, 30.
12. Oorattati asaa yayyiyoogaa agganaadan nuuni eta maaddana danddayiyoy ayba ogiyaanee?
12 Geeshsha Maxaafaa tamaareti asaa yayyiyoogaa agganaadan nuunikka maaddana koshshees. Naagin gakkiya paacee darotoo deexxenna. (Yoh. 15:19) Leemisuwau, he tamaaree banaara oottiyaageeti woy harati denttana danddayiyo oyshaunne phalqqettiya qofau bessiya zaaruwaa Geeshsha Maxaafaappe giigettanaadan aybissi maaddekketii? Nuuni ayyo lagge gidiyoogaa bolli, gubaaˈiyaa yame gidida haratuura, ubba qassi aagaa mala hanotaynne koshshay deˈiyoogeetuura a eretissana danddayoos. Ubbaappekka aaruwan, i ubbatoo wozanappe woossanaadan nuuni tamaarissana koshshees. Hegee i Xoossaakko shiiqanaadan, qassi Yihoowa baayyo baqati attiyoosanne wogga zaalla oottanaadan maaddana danddayees.—Mazamure 94:21-23; Yaaqooba 4:8 nabbaba.
Danddayikke Giyoogaa
13. Danddayikke giyoogee issoti issoti ayyaanaabaa eranau guyye gaanaadan oottana danddayiyoy ayba ogiyaanee?
13 Issi issi attumaasati loyttidi nabbabana danddayenna gishshau woy bantta qofaa loyttidi yootenna gishshau woy dungguuxa gidiyo gishshau, ayyaanaabaa eranau guyye goosona. Amarida attumaasati bantta qofaa asa sinttan yootanau yayyoosona. Xannaˈiyoogee, shiiquwan bantta qofaa yootiyoogee, woy bantta ammanuwaa haratussi yootiyoogee, etayyo keehi deexxiyaaba milatana danddayees. Issi ishay hagaadan giis: “Taani yelagatettan deˈiyo wode, eesotada penggiyaakko baada, penggiyaa dawaliyaa bochiyaaba malatissada, ooninne siyenna woy tana beˈenna ga qoppada, loddan aggada bays. . . . Sooppe soo baada haggaaziyoogaa qoppiyo wode tana sakkees.”
14. Yesuusi erissiyo ashkkarati danydanttay oyqqido naˈaa pattana danddayibeennay aybissee?
14 Yesuusi erissiyo ashkkarati daydanttay oyqqido naˈaa pattanau etau ixettido wode, eti danddayennabadan qoppanaagaa hassaya. He naˈaa aaway Yesuusakko yiidi, “Ta na7aa kaarettai oiqqin, i daro wode taman, qassi daro wode haattan kunddiyo gishshau, i keehi sahettees; a pattarkkii. Ne erissiyo ashkkaratukkokka a ehaas; shin pattanau danddayibookkona” yaagiis. Yesuusi daydanttaa kessidi naˈaa pattiis. Guyyeppe, erissiyo ashkkarati akko yiidi, “Nuuni xalahiyaa kessanau aissi danddayibookkonii?” yaagidi oychidosona. Yesuusi etau hagaadan zaariis: “Hegee intte ammanoi guuxxido gishshataassa; taani intteyyo tumaa odais; intteyyo sanaafici giyo qii mittee aifee keena ammanoi de7iyaakko, intte ha deriyaa, ‘Hagaappe yaa shiiqa’ yaagiyaakko i shiiqana; intte ai oottanaukka danddayana.” (Maa. 17:14-20) Dere keena metuwaa xoonanau Yihoowan ammaniyoogee koshshees. Issi uri Yihoowan ammanettiyoogaa aggidi, ba abbiyaabaa qoppiyoogaa doommikko aybi hananee? Ushachennan ixxiyoogee danddayikke gaanaadan oottees.
15, 16. Geeshsha Maxaafaa tamaaree danddayikke giyoogaa agganaadan waatidi maaddana danddayiyoo?
15 Danddayikke giya uraa maaddiyo keehi loˈˈo ogee i ba huuphen gidennan, Yihoowan xeelaa wottanaadan minttettiyoogaa. PHeexiroosi, “Xoossai ba lo77o wodiyan inttena xoqqu oottana mala, wolqqaama Xoossaa kushiyaappe garssaara inttena toochchite. . . . Inttena hirggissiya ubbabaa a bolli olite” yaagidi xaafiis. (1 PHe. 5:6, 7) Nuuni Geeshsha Maxaafaa tamaareti Yihoowa siiqanaadaaninne a kaaletuwaa kaallanau koyanaadan maaddana koshshees. Ayyaanaabaa dosiya uri ayyaanaabaa keehippe xoqqu oottidi xeellees. I Xoossaa Qaalaa siiqees; qassi ‘geeshsha ayyaanaa ayfiyaa’ ba deˈuwan ayfees. (Gal. 5:22, 23) I ubbatoo woossees. (Pili. 4:6, 7) Hegaa bollikka, ayba hanotaanne genccanau woy imettida oosuwaa polanau koshshiya wolqqaanne xalatettaa immanaadan Xoossaakko xeellees.— 2 Ximootiyoosa 1:7, 8 nabbaba.
16 Nabbabiyo eraara woy haasayiyo hiillaara gayttidaagankka issi issi tamaaretussi maadoy koshshana danddayees. Issoti issoti Yihoowa eranaappe kase oottido iitabaappe denddidaagan, Xoossau oottiyoogee etayyo bessennabadan qoppana danddayoosona. Eta hanotay ayba gidikkonne, etau koshshiyaabay nuuni siiquwaaninne danddayan maaddiyoogaa gidana danddayees. Yesuusi, “Hargganchchatussippe attin, payyatuyyo aakime koshshenna” yaagiis.—Maa. 9:12.
Daro Asaa ‘Oyqqite’
17, 18. (a) Nuuni haggaazuwan daro attuma asatuyyo yootana danddayiyoy ayba ogiyaanee? (b) Nuuni hagaappe kaallidi xannaˈanay aybee?
17 Geeshsha Maxaafaa xallan deˈiya, keehi ufayssiya kiitaa daro attumaasati siyanaadan koyoos. (2 Xim. 3:16, 17) Yaatiyo gishshau, nuuni haggaaziyo wode daro attumaasau waatidi yootana danddayiyoo? Daro attumaasay son deˈiyo wodiyan, giishin omarssan, Qeeraa gallassinne Woggaa gallassi saateppe guyyiyan, woy baala gallassi daro saatiyau haggaaziyoogaana. Danddayettiyaaba gidikko, keettaawaa haasayissanau oychana danddayoos. Nunaara issippe oottiyaageetussi haggaazuwaa kiyennan markkattiyaageeta gidoos. Gubaaˈiyan deˈiya amarida michotu azinati Yihoowa Markka gidokkona; yaatiyo gishshau, he attumaageeti tumaa dosanaadan maaddana danddayoos.
18 Nunaara gayttiya ubbau sabbakiyo wode, ufayttidi siyiyaageeti deˈiyoogaa ammanettana danddayoos. Tumaa wozanappe koyiya ubbata danddayan maaddiyaageeta gidoos. SHin, gubaaˈiyan deˈiya, xammaqettida attuma asati Xoossaa dirijjitiyan aawatettaa ekkanau baaxetanaadan waatidi maaddana danddayiyoo? Kaalliya huuphe yohoy ha oyshaa zaarees.
[Tohossa qofaa]
^ MENT. 7 Yihoowa Markkatu Laytta Maxaafatun, qassi Wochiyo Keelaaninne Beegottite! maxeetiyan kiyiya temokruwaa xeella.
Woygada Zaaruutii?
• Attumaageeti ayyaanaabaa kaseyanaadan waatidi maaddana danddayettii?
• Oorattati laggetu sugettaa xoonanaadan waatidi maaddana danddayiyoo?
• Danddayikke giyoogaa issoti issoti agganaadan aybi maaddana danddayii?
[Oyshata]
[Sinttaa 25n deʼiya misiliyaa qonccissuwaa]
Attumaageetuyyo mishiraachuwaa yootanau hanotay injjetanaadan ootta eray?
[Sinttaa 26n deʼiya misiliyaa qonccissuwaa]
Geeshsha Maxaafaa intte tamaarissiyo uri bana gakkiya paaciyaa xoonanau giigettanaadan waatidi maaddana danddayeetii?
