¿Diosan castigopäpachati?

Marzo 2011 maran mä jachʼa oraq khathati (magnitud 9) ukat lamar qotat umajj llumstanisin Japón marka tukjkäna ukhajja, akham sasaw uka markankir wali uñtʼat mä politicojj arsüna: “Tʼaqhesirinakat sinteqtʼastwa ukampis tembatsu [Diosan castigopawa]” sasa.

Enero 2010 maran oraq khathatejj Haití markan 220.000 jaqenakar jiwarayäna ukhajja, televisionat yatiyiri mä evangelistajj akham sänwa: “Supayamp mä pacto lurapjjatapatwa ukajj pasi” ukat “Diosar kuttʼapjjañapaw wakisi” sasa.

Kunapachatï 79 jaqenakajj escaptʼasin Manila (Filipinas) markan jiwarapkäna ukhajja, mä tatakurajj akham sänwa: “Diosajj jan sinttʼasiri qalarat chuymas sumaptayañ munistu” sasa. Ukat “jilïr jaqenakatjja sapa patakat pä tunka mayaniw akham sapjje, oraqenak alleqtayasa, lamar qotat huracananak sartayasa ukat yaqha ukham jan waltʼäwinakampiw Diosajj colerasiñap uñachtʼayistu” sasaw mä periodicojj yatiyaraki. Ukham jan waltʼäwinakajj sapa kutiw uka markan utji.

JAN waltʼäwinakampiw Diosajj jan wali jaqenakar castigui sañajj janiw jichhakïkiti. Khaya 1755 maranjja, Lisboa (Portugal) markanjj mä jachʼa oraq khathati, nina phichantasïwi ukat lamar qotat umaw llumstanïna ukanakajj 60.000 jaqenak jiwarayäna, uka qhepatjja Voltaire sat filósofo chachajj akham säna: “Londres ukat París markanakan jakasir jaqenakat sipansa, ¿Lisboa markankirinakajj sinti qʼañu luräwinakti lurapjjpachäna?” sasa. Ukatjja, ukham jan walinakampejj Diosajj jaqenakar castigaskakpachati sasinwa millón millón jaqenakajj jisktʼasipjje. Ukanak “Diosaw luri” sasaw walja markanakan sapjje.

Ukatwa akham jisktʼasiñasa: “¿Oraqen jan waltʼäwinakapampit Diosajj jaqenakar castigpacha? Jichhürunakan jaqenakajj jan waltʼäwinakan tʼaqhesipki ukajja, ¿Diosan castigopaw sisnati?”

Yaqhepanakajj mäkiw Diosarojj kunats juchañchapjje. Ukatakejja, kunanakampitï nayra tiempon Diosajj jan wali jaqenakar tukjkäna ukanakwa amtapjje (Génesis 7:17-22; 18:20; 19:24, 25; Números 16:31-35). Ukampisa, Biblian uka jiskʼa tʼaqanakapat sum yatjjatasajja, Diosajj lurkatayna ukanakat aka kimsaw qhansti: 1) Janïr kun lurkasajja yatiyirïnwa. 2) Jichhürunakan utjki uka jan waltʼäwinakajja, suma jaqenakarus ukat jan wali jaqenakarus tukjiwa. Ukampis Diosajj arsutapar jan istʼasiri ukat jan wali jaqenakarukiw tukjäna. 3) Jan juchani jaqenakarojj Diosajj kunjamats qhespiyänwa (Génesis 7:1, 23; 19:15-17; Números 16:23-27).

Jichhürunakan millón millón jaqenakaruw kunayman jan walinakajj tukji, ukampis uka jan waltʼäwinakajj Diosat janiw jutkiti. Ukhamasti, ¿kunatsa Oraqen jan waltʼäwinakapajj jiljjattaskakpacha? Ukham jan waltʼäwinakajj utjaspa ukhajja, ¿kunsa lursna? Ukat ukanakajja, ¿kunapachas tukusjjani? Uka jisktʼanakarojja jutïr yatichäwinakanwa qhanañchasini.