Keti Nzambi Kepesaka Beto Ndola?

Na nima ya kisumbula ya kunikana ya ngolo ya ntoto (magnitude 9) mpi kisumbula ya lugangu yina bo kebingaka tsunami yina kusalamaka na nsi Japon na Marsi 2011, ntwadisi ya kimvuka mosi ya politiki tubaka nde: “Ata mono waka mawa sambu na bantu yina kufwaka, mono keyindula nde yo kele ndola ya Nzambi.”

Ntangu bantu kuluta 220 000 kufwaka na kunikana ya ngolo ya ntoto yina kusalamaka na nsi Haïti na Yanuari 2010, muntu mosi ya mezabanaka mingi mpi yina kelongaka malongi ya Nzambi na televizio kutubaka nde: “Dyambu yina salamaka sambu bantu wakanaka ti dyabulu mpi bo kele ti mpusa ya kuvutukila Nzambi.”

Ntangu bantu 79 kufwaka na banza Manila na nsi Philippines, nganga-Nzambi mosi ya Katolika kutubaka nde: “Nzambi kezola kutedimisa kansansa na beto ya kufwa mpi ya kesalaka ve.” Zulunalu mosi ya nsi yina kutubaka nde: “Bambuta makumi zole na mosi na kati ya nkama kendimaka nde Nzambi kemonisilaka bantu makasi na yandi na nzila ya mupepe ya ngolo mpi ya bampasi yankaka” yina kesalama mbala na mbala na nsi yai.

KUKWIKILA nde Nzambi kesadilaka bisumbula sambu na kupesa bantu ndola kele ve dyambu ya mpa. Na mvu 1755, ntangu bantu 60 000 kufwaka na kunikana ya ntoto, na tiya, mpi na tsunami yina kusalamaka na mbanza Lisbonne na nsi Portugal, Voltaire filozofe yina mezabanaka mingi kuyulaka nde: “Keti mambi kele mingi na Lisbonne kuluta na Paris, mbanza yina kindumba kesalamaka mingi?” Ya kyeleka, bamilio ya bantu kekudiyulaka kana Nzambi kesadilaka bisumbula ya lugangu sambu na kupesa bantu ndola. Na ba nsi mingi, bantu ketubaka nde bisumbula ya mutindu yina kele bisalu ya Nzambi.

Na kutadila mambu yai yonso, beto fwete kudiyula nde: Keti Nzambi kesadilaka mpenza bisumbula ya lugangu sambu na kupesa bantu ndola? Keti bisumbula mingi yina mesalama ntama mingi ve kele ndola ya Nzambi?

Sambu na kumonisa nde Nzambi kele na kisina ya mambu yina, bantu yankaka ketubilaka masolo ya Biblia yina Nzambi kusadilaka bima yina yandi gangaka sambu na kufwa bantu. (Kuyantika 7:17-22; 18:20; 19:24, 25; Kutanga 16:31-35) Kansi, kutadila masolo yai ya Biblia kemonisaka nde kele ti mambu tatu ya kuswaswana. Ya ntete, na ntwala ya kusala konso dyambu yina Nzambi vandaka kukebisa bantu. Ya zole, na kuswaswana ti bisumbula ya lugangu yina kesalama bubu yai mpi ya kefwaka bantu ya mbote mpi ya mbi kumosi, Nzambi kufwaka ve bantu ya mbote. Kaka bantu ya mbi to bayina kubuyaka kuwidikila balukebisu na yandi kufwaka. Ya tatu, Nzambi kubakaka ngidika sambu na kugulusa bantu ya mbote.​—Kuyantika 7:1, 23; 19:15-17; Kutanga 16:23-27.

Bisumbula yina menatilaka bamilio ya bantu mpasi bubu yai, kemonisa ve nde Nzambi muntu vandaka na kisina na yo. Kansi, nki kesala nde bisumbula ya mutindu yai kukuma mingi? Inki mutindu beto lenda nwana ti yo? Mpi keti kele ti ntangu yina bisumbula tavanda dyaka ve? Masolo yina kelanda tapesa bamvutu.