¿Diospa castigonchu kanman?

‘Llakikunim runakunamanta ichaqa piensasqayman hinaqa Diospa castigonchusmi.’ Chaynatam nirqa Japonpi ancha reqsisqa politico 2011 marzo killapi terremoto pasayta sinchi wayrawan lamar qochamanta yaku lloqsiruptin.

Haití nacionpi 220.000 masnin runakuna 2010 enero killapi terremotowan wañuruptinkum televisionnintakama religionmanta rimaq runa nirqa “Diablowan contrato rurasqankuraykum kay pasarun, chaymi Diosman kutirinanku”, nispa.

Manila llaqtapi (Filipinas) achka runakuna peligromanta lluptiptinkum 79 runakuna wañurqa, chaymi huk cura nirqa “Rumi sonqo kasqanchikmanta cambianatam Diosqa munan”, nispa. Chay llaqtapi huk periodicopas nirqam ‘yuyayniyoq achka runakunam ninku, Diosmi piñakuyninta qawachin lloqllantakama, sinchi wayrantakama hinaspa huk desgraciakunawanpas’ nispa. Chaykunam chay nacionta yaqa sapa kuti ñakarichin.

RUNAKUNATA desgraciakunawan Dios castigasqanmanta creesqankuqa manam kay tiempollapichu. Lisboa llaqtapi (Portugal) 1755 watapi terremoto, ninawan desgracia hinaspa sinchi wayrawan lamar qochamanta yaku lloqsiruptinmi yaqa 60.000 runakuna wañururqaku, chaymi yachayniyoq reqsisqa Voltaire sutiyoq runa nirqa: “¿Lisboapi kaqkunachu Londrespi hinaspa Parispi kaqkunanmanta astawan huchayoq kanku?”, nispa. Waranqantin runakunam tapukunku ‘¿Dioschu hatun desgraciakunawan runakunata castigachkanman?’, nispa. Achka nacionkunapim Diospa castigon kasqanpaq piensanku.

Chayna piensasqankuraykum allin kanman tapukuyninchik: “¿Dioschu castigachkan hatun desgraciakunawan? ¿Dios castigaptinchu kay watakunapi runakuna ñakarichkanku?”.

Wakinmi chaylla Diosman tumpanku. Chaypaqmi Bibliapi willakuykunata servichikunku ñawpa tiempopi runakunata Dios parawan otaq terremotowan wañuchisqanta (Genesis 7:17-22; 18:20; 19:24, 25; Numeros 16:31-35). Dios imanasqa chaykuna servichikusqanmanta yachanapaqmi kimsa asuntomanta allinta entiendena. Punta kaq, Diosqa manaraq castigachkaspanmi willachiq. Iskay kaq, hatun desgraciakunaqa allin runatapas chaynataq mana allin runatapas wañuchinmi, Diospa castigonqa manam chaynachu karqa. Diospa willachisqanta qalaypaq mana kasukuqkunallam wañurqaku. Kimsa kaq, Diosqa salvaqpunim kasukuqkunataqa (Genesis 7:1, 23; 19:15-17; Numeros 16:23-27).

Kay tiemponchikpi hatun desgraciakunawan millonnintin runakunapa wañusqanqa manam Diospa castigonchu. Hinaptinqa, ¿imanasqataq hatun desgraciakuna astawan yapakuchkan? ¿Imatam rurachwan chay desgraciakuna pasaptinqa? ¿Haykapipas tukunqachu chaykuna? Kay tapukuykunamantam qatiqnin yachachikuykunapi yachanki.