KARE i te mea ou te irinakianga e te akatupu maira te Atua i te tumatetenga ei akautunga i te aronga kino. I te mataiti 1755, muri ake i te pou anga mei tetai 60,000 tangata i roto i te ngaruerue enua, te ai, e te tunami tei tupu i Lisbon, Potukara, kua ui tetai tangata kite karape ko Voltaire e: “I maata atu ainei te angaanga kino tei kiteaia i Lisbon, i to Paris, te ngai kino roa atu te au peu mataora?” E tika, mirioni ua atu tei umere e me te akariro ra te Atua i te au tumatetenga natura ei akautunga i te tangata. I te au enua e manganui, e karangaia ana taua au tumatetenga ra e na te Atua.

No runga i teia, ka anoanoia tatou kia ui e: E tika ainei e i akariro ana te Atua i te au tumatetenga natura ei akautunga i te tangata? E akautungaanga ainei te au tupuanga kino i oti ua akenei no ko i te Atua?

No to ratou rapurapu i te akaapa i te Atua, kua tou tetai aronga ki te au papaanga Pipiria, i akatupu ei te Atua i te takoreanga na roto i te au mea natura. (Genese 7:17-22; 18:20; 19:24, 25; Numero 16:31-35) Inara me akara matatio i teia au papaanga Pipiria, te akaari maira i roto i te tuanga tataki tai, e toru au tumu tukeke. Mea mua, e akamatakiteanga tetai i mua ake. Te rua, kare mei te au tumatetenga natura o teia tuatau, tei tamate i te aronga meitaki e te aronga kino, te au takoreanga a te Atua e mea iri meitakiia te reira. Ko te aronga kino anake ua me kare, ko te aronga tei kore i akarongo i te au akamatakiteanga, tei mate. Te toru, kua akatuera mai te Atua i tetai mataara no te aronga tei akarongo kia ora.​—Genese 7:1, 23; 19:15-17; Numero 16:23-27.

I roto i te au tumatetenga e manganui tei tupu ki te au mirioni ua atu tangata i teia tuatau, kare e akapapuanga e na te Atua i akatupu i te reira. Eaa i reira te tumu i maata atu ei taua au tumatetenga ra? Akapeea tatou me akakoromaki i te reira? E e tuatau ainei tetai kare e tumatetenga akaou? Ka kite koe i te pauanga i roto i te atikara e aru maira.