Te faautua maira anei te Atua?
“No ˈu, e tembatsu (faautuaraa a te Atua) teie, te aroha nei râ vau i tei atihia,” ta te hoê tia poritita Tapone ïa i parau i muri aˈe i te aueueraa fenua faito 9 e te miti faaî tei tairi i to ˈna fenua i Mati 2011.
E 220 000 tiahapa taata tei pohe i te aueueraa te fenua i Haïti i Tenuare 2010. No te hoê taata poro evanelia tuiroo i roto i te afata teata, ua tupu te reira no te mea ua hoo ratou i to ratou ora no te Diabolo e e titauhia ia fariu ratou i te atua ra.
“Te hinaaro nei te Atua ia hauti to tatou manaˈo haava,” ta te hoê perepitero Katolika ïa i parau a pohe ai e 79 taata i roto i te hoê faahuehueraa i Manille, i Philipino. Ia au i te hoê vea no ǒ, no e 21 % feia paari, te faaite ra te Atua i to ˈna riri na roto i te mau heeraa fenua, mataˈi rorofai e te tahi atu mau ati ta teie fenua e ite pinepine ra.
I TE matahiti 1755, ua aueue te fenua i Lisbonne, i Potiti. I muri iho, faaî mai nei te miti e ua ura te oire i te auahi. Fatata e 60 000 taata tei pohe. Ui atura te hoê philosopho tuiroo: “Mea rahi aˈe anei te peu iino i Lisbonne i tei itehia i Paris, tei reira hoi te rahiraa o te faanavenaveraa pae tino?” I teie â mahana, te manaˈo nei e mirioni taata no e rave rahi fenua e e faautuaraa te mau ati natura no ǒ mai i te Atua ra.
Ia uiui ïa tatou: Te faaohipa ra iho â anei te Atua i te mau ati natura no te faautua i te taata? Tera anei te tumu o teie rahiraa ati e itehia nei?
Te faahapa ra vetahi i te Atua no te mea, ia au i te Bibilia, i faaohipa na Oia i te mau puai natura no te haamou i te taata. (Genese 7:17-22; 18:20; 19:24, 25; Numera 16:31-35) Mea taa ê râ teie mau faatiaraa Bibilia i roto e toru tuhaa taa maitai. A tahi, ua faaara te Atua i te taata hou a haamou ai ia ratou. Te piti, ua haamou noa te Atua i te feia iino tei ore i taui e tei ore i faaroo i ta ˈna mau faaararaa. E ere mai te mau ati natura e itehia nei, e pohe atoa hoi te feia maitatai. Te toru, ua faaora te Atua i te feia hapa ore.—Genese 7:1, 23; 19:15-17; Numera 16:23-27.
Aita e haapapuraa e o te Atua te tumu o te ati e rave rahi e haamauiui nei e mirioni taata. E ite anei tatou i te hoê tau aita e ati faahou? E nafea ia faaruru i te reira? Ta to muri nei ïa mau tumu parau e pahono.
