Be Gechignagdad Got, Fa?

Tomuren fare durru’ ni 9.0 gelngin nge tsunami ni yib nga Sapan ko March 2011, me yog reb i girdien e am ni gaar: “Yugu aram rogon ni ke kireban’ug ko piin ni kar gafgowgad, machane gu be lemnag ni ireray e tembatsu (gechig rok Got).”

Nap’an ni yim’ boor ko 220,000 e girdi’ u tomuren fare durru’ ni aw nga Haiti ko January 2010, me yog reb e pumoon ni ma machib u TV nre n’em e ke buch ni bochan e kar “fal’eged e m’ag u thilrad moonyan’” mab t’uf ni ngar “sapgad ku got.”

Nap’an ni yim’ 79 e girdi’ u reb e wagey nni tay u Manila, Philippines, me yog reb e padrey ko Katolik ni gaar: “Baadag Got ni nge maruwel e nangan’ rodad nib meewar mab kireb.” Ki yog reb e shimbung u rom ni “reliw’ nge taareb e pasent ko girdi’ e ke mich u wan’rad ni be dag Got e damumuw rok u daken e but’ ni be muchubu’, nge yoko’, nge ku boch ban’en ni yibe gafgow riy.”

GATHI fin chiney e ma lemnag e girdi’ ni ma k’aring Got e yoko’, nge durru’, nge ku boch ban’en ya nge gechignag e girdi’ nib kireb. Tomuren ni yim’ 60,000 e girdi’ u reb e durru’, nge nifiy, nge tsunami ni yib nga Lisbon, Portugal, ko duw ni 1755 me fith be’ nib llowan’ ni ka nog Voltaire ngak ni gaar: “Ere gur, boor e ngongol nib kireb ni yima rin’ u Lisbon nga Paris ni aram e gin nib gel e felfelan’ ni yima tay riy ko tin nib kireb?” Boor e girdi’ ni kar lemnaged ko ma gechignag Got e girdi’ u daken e yoko’, nge durru’, nge boch ban’en ni yima gafgow riy, fa. Boor e nam ni yima yog riy ni pi n’ey e ngongol rok Got.

Bochan e pi n’ey, mab t’uf ni ngad fithed e gal deer ni baaray ni gaar: Riyul’ ni ma fanay Got e yoko’, nge durru’, nge boch ban’en ni yima gafgow riy ni nge gechignag e girdi’ riy, fa? Fapi yoko’, nge durru’, nge ku boch ban’en ni yima gafgow riy ni ka fini buch ndawori n’uw nap’an e aram e gechig rok Got, fa?

Boch e girdi’ ni yad ma yin’ e kireb nga daken Got ko pi n’ey e yad ma taareb rogonnag nga rogon ni i thang Got boch e girdi’ kakrom ni i fanay e ran, nge nifiy ni be mul u lan e lang, nge ku boch ban’en. (Genesis 7:17-22; 18:20; 19:24, 25; Numbers 16:31-35) Machane, gad ra fal’eg i yaliy e pi thin nu Bible ney ma bay dalip ban’en nib thil riy. Som’on e, u m’on ni nge pi’ Got e gechig ma ma ginangey. Bin migid e, magothgoth ni i pag Got ni nge yib e ba mudugil e piin ni i li’rad, nib thil ko yoko’, nge durru’, nge boch ban’en ni yima gafgow riy ni ma buch e ngiyal’ ney ndemtrug e girdi’ ni ma yim’ riy. Kemus ni goo girdi’ nib kireb nda ur thilyeged e ngongol rorad ara ra motoyilgad ko ginang ni un pi’ ngorad e aram e piin ni un thangrad. Bin dalip e, i bing Got e kanawo’ ngak e piin nib fel’ ni ngar thaygad ko gechig.​—Genesis 7:1, 23; 19:15-17; Numbers 16:23-27.

Ere pi n’en ni ma buch e ngiyal’ ney nib gel e gafgow ni ke tay nga bokum milyon e girdi’ e dariy e mich riy ni Got e ma k’aring. Ere mang e be k’aring e pi gafgow ney ni ka gad be guy ni be mun daken? Uw rogon ni ngad athamgilgad u fithik’? Ma gur, ra taw nga ba ngiyal’ ma dab ki i yib e yoko’, nge durru’, nge ku boch ban’en ni yima gafgow riy? Ga ra pirieg e fulweg ko pi deer ney ko bin migid e article.