Yuvu Y’Atangi eto . . .

Nga o Ntoto mu mvu wa 2012 Ufwaswa?

▪ Ndonga bekwikilanga muna lufwasu lwa nza bayenda ku vata dimosi kuna França . . . Edi beyindulanga vo e nza kina kia 21 kia ngonde ya Desemba, 2012 ifwaswa, kuna mfoko a kolo kia mvu 5.125 muna manaka mankulu ma Maya.”​—Zulunalu ya BBC News.

E nza ikala kaka yakwele mvu kana una vo mfumu za mabundu, awana bekuyibadikilanga vo akwa ngangu y’awana besakulanga mana mesinga bwa kuna sentu, bevovanga vo e nza ifwaswa ke kolo ko. Kieleka, o ntoto ke ufwaswa mu mvu wa 2012 ko. Vena ye ziku isonganga vo ntoto ke ufwaswa mu mvu wau ko, kansi ukala kaka yakwele mvu.

Muna Nkand’a Nzambi tutanganga vo: “Mbandu ikwenda, mbandu ikwiza, vo i nza (yovo ntoto) zinga kaka yakwele mvu.” (Kimpovi 1:4) Badika mpe dina diasonama muna Yesaya 45:18: “Kadi i wau wuwu kavovele o Yave . . . ona wasema nza yo vanga yo; kasikidisa yo; kasema yo nkatu ko, yakala kak’o wantu: omono i Yave; ke vena wakaka ko.”

Nga se dianzodi olenda fwasa ntangw’andi mu vangila mwan’andi lekwa kia sakanena, i bosi vava kekumvana kio, ofwasidi kio diaka? Diansoki kikilu kele vo ovangidi wo. Diau adimosi, Nzambi wasema o ntoto muna wete dia wantu. Nzambi wavovesa yakala yo nkento antete, Adami yo Eva vo: “Nuwutana, nuwokela, nulungila nza, nukulula yo.” I bosi, “o Nzambi omwene yawonso kavangidi, yambote kikilu.” (Etuku 1:​27, 28, 31) Nzambi kasoba ekani diandi ko mu kuma kia ntoto, ke yambula ko vo wafwaswa. Muna kuma kia nsilu miandi miawonso, Yave wavova vo: “I una diambu diame divaika mu nu’ame: ke dikumputukila nkatu ko, divanga kaka edi nzolele, disikila mun’edi ntwikidi dio.”​—Yesaya 55:11.

Kansi, Yave osinga ‘fwasa awana befwasang’e ntoto.’ (Lusengomono 11:​18) Muna Diambu diandi, okutusianga nsilu vo: “Asongi bekal’omu nsi, alungi besala mo. Yimpumbulu ikendonwa muna nsi, akwa maleko, vuzuka.”​—Ngana 2:​21, 22.

Nkia ntangwa divangama? Ke vena muntu ko ozeye e lumbu. Yesu wavova vo: “Owu wa lumbu kiakina ye ola, ke ven’onozeye wo ko, kana mbasi kun’ezulu, yovo Mwana, nangu Se.” (Maku 13:​32) Mbangi za Yave ke besamunanga lumbu ko kina Nzambi kesinga fwasa yimpumbulu. Kana una vo bebakulanga e “sinsu” kia mbaninu yo kwikila vo wantu mu “lumbu yambaninu” bezingilanga, ke balendi zaya ko e ntangwa ikwiza e “mbaninu.” (Maku 13:​4-8, 33; 2 Timoteo 3:1) Bazeye wo vo S’au ezulu yo Mwan’andi, yau kaka bazeye e ntangwa divangama.

Ekolo bevingilanga e lumbu kiaki, Mbangi za Yave bekuyivananga muna salu kia samuna nsangu zambote za Kintinu kia Nzambi, kina vo i luyalu lw’ezulu lusinga yala e nza yo kitula ntoto se paradiso, una ‘asongi bevwa yo sikila vo yakwele mvu.’​—Nkunga 37:29.

 [Avwe a Foto zina muna lukaya lwa 12]

Image Science and Analysis Laboratory, NASA-Johnson Space Center