Nkonko ya babadi

Buloba ebu nebubutuke mu 2012 anyi?

▪ Tudiomba tua mu Grande-Bretagne tua BBC tuakamanyisha ne: ‘Bantu ba bungi bavua balue mu umue musoko wa mu France bamba ne: buloba bukadi pa kubutuka. Badi bamba ne: buloba nebubutuke mu dia 21/12/2012, dîba diajika bidimu 5 125 bivua bena Maya bamanyishe kale mu kalandriye kabu.’

Nansha mudi bamfumu ba bitendelelu, bena malu a sianse ne bantu bakuabu ba mu tshikondo tshietu etshi bamba ne: buloba nebubutuke, buloba bobu nebuikale anu koku bua bidimu ne bidimu. Bushuwa, buloba kabuakubutuka mu 2012 to. Mu bulelela, buloba nebuikalaku ki nganu mu 2012 to, kadi bua kashidi ne tshiendelele.

Bible udi wamba ne: ‘Tshikondo tshimue tshidi tshiya kumpala, tshikuabu tshidi tshilonda kunyima; kadi buloba budi muomumue tshiendelele.’ (Muambi 1:4) Mona kabidi tshidi Yeshaya 45:18 wamba bua buloba: ‘Edi ndîyi didi Yehowa wamba: Nzambi mene wakafuka buloba ne wakabuenza, wakabujadika, kakabufuka bu tshintu tshia patupu, wakabufuka bua bantu bashikamepu; yeye mene udi wamba ne: Meme ndi Yehowa, ne kakuena mukuabu nansha.’

Tatu yeye munange muanende, udiku mua kumuenzela tshintu tshia kunaya natshi tshidi tshimuangate mêba a bungi bua kutshienza bu mudi mashinyi, kadi kuluaye kutshinyanga katupa kakese yeye mumane kumupeshatshi anyi? Yeye muenze nanku mbibi be! Bia muomumue, Nzambi wakafuka buloba bua bantu kusombapu ne disanka. Wakambila Adama ne Eva ne: ‘Nulelangane, nukumbane ba bungi, nuuje buloba tente; nubukokeshe.’ Pashishe, “Nzambi wakamona bintu bionso biakenzeye ne biakadi bimpe be!” (Genese 1:27, 28, 31) Nzambi ki mmulekele dijinga diende bua buloba to, ne kakuitaba bua bubutuke to. Yehowa udi wamba ushindika bua malu onso adiye mulaye ne: dîyi dianyi ‘kadiena dipingana kundi patupu, kadiyi dianji kuenza muanda undi musue dienze, kadiyi dianji kushikija muanda ungakaditumina.’​—Yeshaya 55:11.

Nanku, Yehowa udi ne dijinga dia “kubutula badi babutula buloba.” (Buakabuluibua 11:18) Udi ulaya mu Dîyi diende ne: ‘Badi ne mitshima miakane nebashikame mu buloba, badi ne mutshima umue mutoke nebajalame. Kadi nebajimije bantu babi pa buloba, nebumushepu bena tshitungu.’​—Nsumuinu 2:21, 22.

Mmalu aa neenzeke dîba kayi? Kakuena muntu udi mumanye to. Yezu wakamba ne: ‘Kadi bua dituku adi ne pa dîba adi kakuena muntu udi mumanye, banjelu mene mene ba mu diulu kabena bamanye, Muana kena mumanye, anu Tatu udi mumanye.’ (Mâko 13:32) Bantemu ba Yehowa kabatu bakeba bua kuamba dîba anyi dituku diabutula Nzambi bantu babi to. Nansha mudibu batabalela ‘bimanyinu’ bia mu matuku a ku nshikidilu ne bitaba ne: tudi mu tshikondo tshidi Bible ubikila ne: ‘matuku a ku nshikidilu,’ ki mbamanye menemene dîba dialua “nshikidilu” to. (Mâko 13:4-8, 33; 2 Timote 3:1) Mbamanye ne: anu Yehowa ne Muanende ke badi bamanye dituku adi.

Bua mpindieu, Bantemu ba Yehowa mbaditue mu diyisha lumu luimpe lua Bukalenge bua Nzambi, budi buikale mbulamatadi wa mu diulu wakokesha ne wakudimuna buloba Mparadizu muikale ditalala ne muikale ‘bantu bakane mua kupiane buloba ne kushikamemu tshiendelele.’​—Musambu 37:29.

[Mêyi a dianyisha bua tshimfuanyi mu dibeji 12]

Image Science and Analysis Laboratory, NASA-Johnson Space Center