Okubuzwa Bafundi Bakamagazini Lo . . .

Iphasi lizokuphuluka na ngo-2012?

▪ I-BBC News ithi: “Abantu abanengi bafudukela edorobheni leFrance, bakholelwa bona ukutjhatjalaliswa kwephasi kuyeza . . . Bakholelwa bona iphasi lizokuphela ngoDisemba 21 2012, ukuphela komzombe omude weemnyaka ezi-5 125 ekhalendeni yamaMaya wekadeni.”

Naphezu kweembikezelo zehlekelele ezivela kubadosiphambili bekolo, abantu abazibiza bona bososayensi, nabanye ababikezeli bekusasa bekhulu lama-21 leemnyaka, iphasi lona lizokuhlala ngokungapheliko. Kwamambala, iphasi lizokuphuluka ngo-2012. Eqinisweni, iplanethi eyiPhasi ngekhe iphuluke ngomnyaka loyo kwaphela kodwana neemnyakeni elandelako ngemva kwalokho.

IBhayibhili isitjela bona: “Isizukulwana siyeza, isizukulwana siyadlula, kodwana iphasi lihlala ngokungapheliko.” (UMtjhumayeli 1:4, The New English Bible) Godu cabanga ngalokho okutjhiwo ku-Isaya 45:18: “Ngilokhu uJehova uZimu akutjhwileko, . . . uMbumbi wephasi noMenzi walo, Yena owalijamisa laqina, ongakhange alibumbele ilize, owalibumba bona kuhlalwe kilo: ‘NginguJehova, akekho omunye.’”

Ubaba onethando angasebenza ama-awara amanengi enza isikepe sokudlala esithabisa indodanakhe nofana indlwana yakanompopana ethandwa yindodakazakhe, bese uyazibhidla ngemva kokubanikela zona isikhatjhana? Uzabe anelunya! Ngendlela efanako, uZimu wabumba iphasi ngokuyihloko bona athabise iimbunjwa zakhe ezibabantu. Ebantwini bokuthoma ababili, u-Adamu no-Efa, uZimu wathi: “Belethani nande nizalise iphasi nilihlule.” Ngemva kwalokho, “uZimu wabona koke akwenzileko, qala! bekukuhle khulu.” (Genesisi 1:27, 28, 31) UZimu azange awunghale umnqophwakhe ngephasi; angekhe avumele iphasi bona lipheliswe. Malungana nakho koke akuthembisileko, uJehova ugandelela uthi: “Angekhe libuyele kimi lingakabi neemphumela, kodwana ngokuqinisekileko lizokwenza lokho engikuthabelako, begodu ngokuqinisekileko lizokuphumelela kilokho engilithumele khona.”—Isaya 55:11.

Nokho, kuyintando kaJehova ‘ukubhubhisa labo ababhubhisa iphasi.’ (ISambulo 11:18) ELizwini lakhe, wenza isithembiso nasi: “Abalungileko bazokuhlala ephasini, nabangasolekiko bazokusala kilo. Kodwana abambi bazokususwa ephasini; abangakathembeki, bazokusitjhulwa kilo.”—Iziyema 2:21, 22.

Kuzokwenzeka nini lokhu? Akekho umuntu owaziko. “Akakho owaziko bona ilanga nesikhathi kuzofika nini, ngitjho nazo iingilozi ezulwini neNdodana; kodwana nguBaba osezulwini owaziko.” (Markosi 13:32) AboFakazi BakaJehova abalingi ukuraya bona uZimu uzobaqeda nini abantu abambi. Nanyana basibona “isitjengiso” sokuphela begodu bakholelwa bona isintu siphila ‘emihleni yokuphela’ yeBhayibhili, angekhe bazi ngokunqophileko bona ‘ukuphela’ kuzokufika nini. (Markosi 13:4-8, 33; 2 KuThimothi 3:1) Batjhiyela koke ezandleni zakaBababo osezulwini neNdodanakhe.

Okwanje, aboFakazi BakaJehova bayatinazela ngokutjhumayela iindaba ezimnandi zoMbuso kaZimu, urhulumende wezulwini ozokubusa begodu utjhugululele iplanethi eliPhasi eparadeyisini elinokuthula, lelo ‘abalungileko abazolidla njengelifa bahlale kilo ngokungapheliko.’—IRhalani 37:29.

[Umthombo wesithombe ekhasini 12]

Image Science and Analysis Laboratory, NASA-Johnson Space Center