Leisiman e aksi . . .

Grontapu o de ete baka 2012?

▪ „Bigi grupu sma di e bribi taki a kaba e kon e hari go na wan Fransi dorpu . . . Den e bribi taki grontapu o kisi pori tapu 21 december 2012. Dati na a kaba fu wan pisi ten fu 5125 yari soleki fa na owruten Maya kalender e sori.”​—BBC Nyunsu.

Kerki fesiman e taigi sma taki grontapu o kon na wan kaba. Ma sma di e kari densrefi sabiman èn sma di e taki san o pasa na ini a ten di e kon, e du dati tu. Aladi den e taki den sani disi, toku grontapu o de fu ala ten. Iya, grontapu o de ete baka 2012. Fu taki en leti, grontapu o de ete baka a yari dati èn sosrefi ibri yari baka dati.

Bijbel e taki: „Libisma e dede èn tra libisma e kon, ma grontapu e tan fu ala ten” (Preikiman 1:4). Luku sosrefi san skrifi na Yesaya 45:18: „Yehovah na . . . a Mekiman fu grontapu, a sma di seti en leki fa a de èn a sma di poti en steifi na en presi. A no meki en fu soso, ma a seti en fu sma libi na tapu. A taki: ’Mi na Yehovah, èn nowan trawan no de.’”

Kon meki wi taki dati wan lobi-ati papa e teki omeni yuru langa fu meki wan pikin boto gi en boi fu prei, noso a e meki wan pikin oso gi den popki fu en umapikin. Fa yu ben o feni en te a papa e naki a sani dati broko, syatu baka di a gi a pikin a sani? Dati ben o de wan ogri-ati sani fu du! Na so a de tu taki Gado meki grontapu spesrutu gi libisma so taki den kan libi switi na tapu. Gado ben taigi a fosi trowpaar, Adam nanga Eva: „Meki pikin èn kon furu, teleki unu kon lai na grontapu èn basi ala sani na grontapu.” Baka dati, „Gado si taki ala den sani di a meki, ben de heri bun” (Genesis 1:27, 28, 31). Gado o du den sani ete di a abi na prakseri gi grontapu. A no o gi pasi taki grontapu kisi pori. Yehovah e taki krin fu den sani di a pramisi: „Den no o drai kon baka na mi solanga sani no pasa soleki fa mi taki. Sani musu pasa soleki fa mi wani èn den wortu fu mi musu fu abi bun bakapisi.”​—Yesaya 55:11.

Ma Yehovah o „pori den wan di e pori grontapu” (Openbaring 11:18). Na ini a Wortu fu en a e pramisi: „Den reti-ati sma o libi na grontapu. Na soso den wan di e du bun, o tan abra. Ma Gado o figi den ogri sma puru na grontapu. Den bedrigiman a o rutu puru.”​—Odo 2:21, 22.

O ten a sani disi o pasa? Nowan libisma no sabi. Yesus ben taki: „Nowan sma sabi a dei, noso a yuru dati. Iya, srefi den engel fu hemel nanga a Manpikin no sabi, ma soso a Tata sabi” (Markus 13:32). Yehovah Kotoigi no e suku fu taki na fesi o ten Gado o pori den ogri sma. Aladi den de na ai fu si san na „a marki” fu a kaba èn den e bribi taki libisma e libi na ini a pisi ten di Bijbel e kari den „lasti dei”, toku den no kan sabi soifri o ten „a kaba” o kon (Markus 13:4-8, 33; 2 Timoteyus 3:1). Den libi dati gi a hemel Tata fu den nanga en Manpikin.

Fosi a ten dati doro, Yehovah Kotoigi e du furu muiti fu preiki a bun nyunsu fu Gado Kownukondre, a tirimakti na hemel di o tiri grontapu èn di o kenki en kon tron wan paradijs pe freide o de. Iya, na a grontapu dati ’den reti-ati sma o kisi èn fu têgo den o tan libi drape’.​—Psalm 37:29.

[Sma di abi a reti fu a prenki na tapu bladzijde 10]

Image Science and Analysis Laboratory, NASA-Johnson Space Center