Basikubala Balabuzya . . .

Sena nyika iyoonyonyoonwa mu 2012?

▪ “Bantu banji bakaboola mumunzi umwi waku France, kabayeeya kuti mamanino aanyika alasika. Basyoma kuti nyika iyoomana mu 21 December 2012, noiyoomana myaka iili 5,125 kweelana akkalenda yakaindi yaku Maya.”—BBC News.

Nokuba kuti basololi bazikombelo, basayaansi, alimwi abasyaazibwene mumakani aazyintu ziyoocitika kumbele bamumwaanda wamyaka wa 21 baambila bantu kuti nyika iyoomana, masimpe ngakuti nyika inooliko lyoonse, tiikanyonyoonwi mu 2012. Alimwi nyika eeyi tiikafwutuki buyo mumwaka ooyu pele amumyaka yoonse iili kumbele.

Ibbaibbele litwaambila kuti: “Musela umwi ulamana, kulasika umbi, pele nyika inookede lyoonse.” (Mukambausi 1:4) Alimwi, amubone ncaamba majwi aali mulugwalo lwa Isaya 45:18: “Mbuboobu mbwaamba Jehova, . . . iwakabumba nyika akwiipanga akwiimika. Teewakailenga kuti ibe yalupilingano pe, wakaibumba kuti ikalwe bantu. ‘Ndime Jehova. Taakwe umbi.’”

Sena inga usyi siluyando watola mawoola manji kupangila mwanaakwe cintu cakusobanya cimukkomanisya, mpoonya akucinyonyoona kwainda buyo kaindi kasyoonto? Oolu inga lwaba lunya! Mbubwenya buyo, Leza wakalengela bantu nyika kutegwa kabakkala mulinjiyo akukkomana. Kuli banabukwetene bakusaanguna, ba Adamu a Eva, Leza wakaamba kuti: “Amuzyalisye, muvule, muzuzye nyika akwiibombya.” Mpoonya, “Leza naakabona zintu zyoonse nzyaakacita, wakabona kuti zyoonse zyabota loko.” (Matalikilo 1:27, 28, 31) Leza ucaajisi makanze aakwe aakusaanguna kujatikizya nyika; kunyina nayoolekela nyika kuti inyonyoonwe pe. Kujatikizya zyintu zyoonse nzyaakasyomezya, cakusinizya Jehova wakaamba kuti: “Talikooyooboola kulindime cabuyo pe, liyoozuzikizya makanze aangu akucita kabotu makani ngendalitumina.”—Isaya 55:11.

Nokuba boobo, nkuyanda kwa Jehova ‘kunyonyoona baabo banyonyoona nyika.’ (Ciyubunuzyo 11:18) Mu Jwi lyakwe, wakapa cisyomezyo eeci cakuti: “Baluleme bayookala munyika; baololokede mbebayoosyaala mulinjiyo; pele basizibi bayoonyonyoonwa munyika, abasilweeno bayoogwisigwa.”—Tusimpi 2:21, 22.

Ino eeci ciyoocitika lili? Kunyina muntu uuzyi. Jesu wakaamba kuti: “Kujatikizya buzuba oobo naa ciindi, kunyina uuzizyi pe, nobaba bangelo kujulu naba Mwana, ccita buyo Taata.” (Maako 13:32) Bakamboni ba Jehova tabasoli kulibikkila buzuba naa ciindi Leza nayakunyonyoona basizibi. Nokuba kuti balicizyi “citondezyo” cakumamanino alimwi balasyoma kuti bantu bapona “kumazuba aamamanino” aambidwe mu Bbaibbele, pele tabakonzyi kuzyiba buzuba naa ciindi “mamanino” naayakusika. (Maako 13:4-8, 33; 2 Timoteyo 3:1) Balizyi kuti Usyi wabo wakujulu alimwi amwanaakwe mbabeelede kuzyiba ciindi mamanino naayakusika.

Kwaciindi cino, Bakamboni ba Jehova bajisi bubi kukambauka makani mabotu aa Bwami bwa Leza, imfwulumende yakujulu iiyakweendelezya akucinca nyika eeyi kuba paradaiso yaluumuno, yalo ‘balulami njobayookona akukkala alinjiyo lyoonse.’—Intembauzyo 37:29.

[Nkotwakajana cifwanikiso icili 12]

Image Science and Analysis Laboratory, NASA-Johnson Space Center