Yaan máaxoʼobeʼ taak u yojéeltikoʼob

¿Yaan wa u xuʼulul le yóokʼol kaab tu jaʼabil 2012?

▪ «Le máaxoʼob jach ku creertikoʼob le apocalipsisoʼ láaj binoʼob tiʼ junpʼéel kaaj yaan Francia [...]. Ku creertikoʼobeʼ le yóokʼol kaabaʼ yaan u xuʼulul teʼ 21 tiʼ diciembre tiʼ 2012, teʼ kʼiinaʼ ku tsʼoʼokol le 5,125 jaʼaboʼob ku taasik le úuchben calendario mayaoʼ.» (BBC News.)

Kex yaʼab máaxoʼob jeʼex le cientificoʼob wa uláakʼ máaxoʼob teʼ siglo 21 ku yaʼalikoʼob yaan u xuʼulul le Luʼumaʼ, u jaajileʼ maʼ beyiʼ. Le yóokʼol kaab tuʼux kajaʼanoʼonaʼ maʼ kun xuʼulsbil tu jaʼabil 2012. Maʼ kun xuʼulsbil teʼ jaʼab ku yaʼalaʼalaʼ yéetel mix bikʼin bíin úuchul leloʼ.

Le Bibliaoʼ ku yaʼalik: «Tsʼeʼetsʼekeʼ ku síijloʼob, tsʼeʼetsʼekeʼ ku kíimloʼob baʼaleʼ le luʼumaʼ maʼatech u kʼexpajal» (Eclesiastés 1:4). Tsʼoʼoleʼ tuukulnen xan tiʼ baʼax ku yaʼalik Isaías 45:18 tu yoʼolal Dios le Máax beet kaʼanoʼoboʼ: «Letiʼ máax beet luʼum, letiʼ etsʼkúunt[e]; maʼ chéen tu beetajiʼ, baʼaleʼ utiaʼal ka yanak u kajnáaliloʼob letiʼeʼ ku yaʼalik: Teen Yuumtsil, minaʼan in jeel».

Tukulteʼ juntúul utsul taatatsileʼ, utiaʼal u beetik u kiʼimaktal u yóol u paalaleʼ ku jóoʼsik yaʼab tiempo utiaʼal u beetik junpʼéel chan báaxal de barco wa junpʼéel chan naj tuʼux ku tsʼaʼabal muñecaʼobiʼ. ¿Máasaʼ maʼ ken u paʼaʼ ken tsʼoʼokok u kʼubik tiʼ u paalal? Wa ka u beet lelaʼ jeʼel u yeʼesik jach kʼasaʼaneʼ. Jeʼex le taatatsilaʼ, Dioseʼ tu beetaj le Luʼum utiaʼal u kajtal wíinik ich kiʼimak óolal. Letiʼeʼ tu yaʼalaj tiʼ Adán yéetel Eva: «Ka yaʼabchajak a paalaleʼex; chupeʼex le yóokʼol kaaboʼ, méekʼtáanteʼex xan». Tsʼoʼoleʼ le Bibliaoʼ ku yaʼalik xan: «[Dioseʼ] tu yilaj tuláakal baʼax tu beetajoʼ sen maʼalob» (Génesis 1:27, 28, 31). Dioseʼ yaan u béeykuntik le baʼax u tukultmaj u beetik yéetel le Luʼumaʼ, le oʼolal maʼ ken u chaʼ u xuʼulsaʼaltiʼiʼ. Tu yoʼolal le baʼaxoʼob u yaʼalmaj u beetkoʼ, Jéeobaeʼ ku yaʼalik: «Le tʼaan ku jóokʼol tin chiʼoʼ, maʼ bíin kaʼa suunak tin wiknal wa maʼ u beet u meyajiʼ, baʼaleʼ bíin u beet baʼax in kʼáateʼ, bíin xan u tsʼoʼokbes baʼax kin waʼalikeʼ» (Isaías 55:11).

Jéeobaeʼ tsʼoʼok u chʼaʼtuklik u «xuʼulsik le máaxoʼob loobiltik le luʼum[aʼ]» (Apocalipsis 11:18). Teʼ Bibliaoʼ letiʼeʼ ku yaʼalik: «Le máaxoʼob noʼojaʼan u kuxtaloʼob yéetel maʼ siʼipileʼ bíin [kuxlakoʼob] junpuliʼ teʼ luʼumaʼ baʼaleʼ le loolob máakoʼob yéetel le kaʼapʼéel ichoʼoboʼ bíin jóokʼesaʼakoʼob, bíin tojolchʼintaʼakoʼob xan tiʼ» (Proverbios 2:21, 22).

¿Baʼax kʼiin ken béeychajak lelaʼ? Mix juntúul wíinik u yojel. Jesuseʼ tu yaʼalaj: «U kʼiinil wa u yoraileʼ mix máak u yojel, mix u angeliloʼob kaʼan, mix u Paal Jajal Dios. Chéen le Taata u yojeloʼ» (Marcos 13:32). U j-jaajkunajoʼob Jéeobaeʼ (testigos de Jehová) maʼatech u yilik u naʼatkoʼob baʼax kʼiin ken xuʼulsaʼak tiʼ le máaxoʼob kʼasaʼanoʼoboʼ. Kex táan u yilkoʼob le chíikulaloʼob eʼesik taʼaytak u taal u xuul yéetel u yojloʼob kuxaʼanoʼon tu tsʼook kʼiinoʼob jeʼex u yaʼalik le Bibliaoʼ, maʼ u yojloʼob jach baʼax kʼiin ken taalak le xuʼulsajiloʼ (Marcos 13:4-8, 33; 2 Timoteo 3:1). Lelaʼ ku pʼatkoʼob tu kʼab Dios yéetel u Hijo.

Le maʼ kʼuchuk le kʼiinaʼ, ku yilik u kʼaʼaytikoʼob u maʼalob péektsilil u Reino Dios, le gobierno ken u nuʼukt le luʼumaʼ yéetel ken u sut paraísoil le luʼumaʼ. Teʼ kʼiinoʼobaʼ «le utsil máakoʼoboʼ bíin u tiaʼalintoʼob le luʼumaʼ; tiʼ [xan] bíin kajlakoʼob utiaʼal jaʼaboʼob minaʼan u xuul» (Salmo 37:29).

[Máax tsʼáaik le foto yaan teʼ táan juʼun 13]

Tsʼaʼan tumen Image Science and Analysis Laboratory, NASA-Johnson Space Center