Komana Mweluka?

Indi antu akushankulu atuñileña ñahi “wanda wuchinana nge” watenawu kakavulu mumukanda waKwidika?

▪ Kwesekeja nansañu yamuBayibolu, mahina etenti atuñililuwu kumbañu nikuchinsu chatabanaka, yamusumba waIsarela yakushankulu mwadifukwilileñawu antu, ayituñili ‘nawanda wakushinta, niwawuzeeli, niwawusombu, niwuchinana nge.’ (Kwidika 26:1; 38:18) “Yakuvwala yajila” yawatupristu niyena ayichimineña “nawanda wuchinana nge.”—Kwidika 28:1-6.

Wulombu weniwu, watenañawu cheñi nawu kermes, wadiña wusuñwa walombeleñawu muwulombu wuchinana. Wulombu weniwu aweñunwineña kunyijimba yatububu twawambanda twatenañawu nawu Coccidae. Itu tububu twabula mpuula twashakamaña kunyitondu yatenañawu nawu kermes oak (Quercus coccifera), yekala kuMiddle East niKuchikumu chakaluñalwiji kaMediterranean. Iwu wulombu wuchinana wekala mumateta ekala munitu tububu twawambanda. Neyi aka kabubu kadi namateta, kadifwanaña nansombu, katohaña neyi ikundi, kalamataña kumafu ninyitela yamutondu wakermes oak. Neyi anatukwati nakutuchika, twakelukaña wulombu wuchinana wukudibomba namenji nawa wulombu weniwu wawuwahi kulombamu mahina. Mukwakusoneka nsañu yanyaka wakuRoma Pliny Elder washimwini nindi wanda wuchinana nge awulemesheli nankashi kudi antu neyi chalemesheluwu mawanda amakwawu mumafuku indi.

Ansonekinyi aNyikanda yawakwaKristu yachiGriki Adiñuku haPentekosta 33 C.E.?

▪ Chidi neyi hakachi kawamayala atanu nasatu asonekeli ichi chibalu chaNyikanda, amayala atanu nawumu diwu adiñaku.

Kwesekeja nansañu yekala mumukanda waYililu, Yesu walejeli atumbanji twindi nindi: “Bayi mufuma kuYerusalemaku, chiña muchiñilila kukana kwakaniniyi Tata.” (Yililu 1:4) Nsañu yoyimu yashimuna nawu ansoneki aBayibolu aMatewu, Yowanu niPetulu ovwahilili ilu lushimbi nawa apompeli ‘heluña dimu,’ nawatumbanji amakwawu. Ana kwaYesu akuwanamu niwena adiña kwoku. (Yililu 1:12-14; 2:1-4) Chimwahitili mafuku ana kwindi ayedi, aYakoba niYuda (Yudasi), asonekeli nyikanda yiyedi yamuBayibolu yikweti majina awu.—Matewu 13:55; Yakoba 1:1; Yuda 1.

Munsañu yindi Yayiwahi, Maku wahosha hadi mukwenzi weyala watemukili hefuku damukwatiluwu Yesu nawufuku. Chakadi nikujina wadiña nakuditena yomweni muloña haniyi mpinji atumbanji ejima adiña amutemuka dehi Yesu. (Maku 14:50-52) Dichi chinakumwekana neyi Maku wekalili kambanji wamukulu, nawa watela wadiñaku haPentekosta.

Ansoneki ayedi aNyikanda yonenewa yawakwaKristu yachiGriki abulili kwikalaku haPentekosta adiña aPawulu niLuka. HaPentekosta 33 C.E., Pawulu wadiña kanda yekali kambanji kaKristu. (Aŋalija 1:17, 18) Hekwawu Luka wadiñaku wanyi chineli wadifumishiluhu yomweni hadi “ayinsahu amweni namesu” mudimu waYesu.—Luka 1:1-3.

[Mwevulu wudi hefu 20]

Tububu Kweñunwineñawu Wulombu

[Mazu aKusakilila]

Courtesy of SDC Colour Iyi nsañu yinafumi mu (www.sdc.org.uk)

[Mwevulu wudi hefu 20]

Petulu Nakuhosha Hapentekosta 33 C.E.