“Balaan, Balaan, Balaan si Jehova”
Pakigsuod sa Diyos
“Balaan, Balaan, Balaan si Jehova”
KON papilion kag usa ka pulong sa paghubit kang Jehova nga Diyos—sa iyang kinaiyahan—unsay imong pilion? Sa ika-8ng siglo B.C.E., si propetang Isaias gihatagag panan-awon diin iyang nadungog ang espiritung mga linalang nga nagdayeg kang Jehova, gamit ang pulong nga naghubit sa pangunang bahin sa Iyang kinaiyahan—ang pagkabalaan. Ang nakita ug nadungog ni Isaias angayng magpahingangha ug magpasuod pa nato kang Jehova. Samtang atong tagdon ang giingon sa Isaias 6:1-3, handurawang tua ka didto.
Unsay nakita ni Isaias? “Ako . . . nakakita kang Jehova, nga naglingkod sa usa ka trono nga hataas ug tinuboy,” miingon si Isaias. (Bersikulo 1) Wala niya makita sa aktuwal ang Soberanong Ginoong Jehova. Dili makita sa pisikal nga mata ang espiritung mga persona. Ang Bibliya tin-awng nag-ingon: “Walay tawo nga nakakita sa Diyos sa bisan unsang panahon.” (Juan 1:18) Ang nakita ni Isaias maoy panan-awon. * Bisan pa niana, kini tin-aw kaayo, nga siya nahingangha gayod, nga daw nakakita siya kang Jehova mismo.
Sunod, dihay nakita si Isaias nga lagmit wala pa makita ni bisan kinsa diha sa panan-awon. Siya misulat: “Ang mga serapin nagbarog ibabaw kaniya [Jehova]. Ang matag usa may unom ka pako. Ang duha iyang gigamit sa pagtabon sa iyang nawong, ug ang duha sa pagtabon sa iyang mga tiil, ug ang duha sa paglupad.” (Bersikulo 2) Ang mga serapin maoy espiritung mga linalang nga taas kaayog ranggo. Si Isaias lang ang magsusulat sa Bibliya nga naghisgot nila. Ang mga serapin kanunayng andam sa pagtuman sa sugo ni Jehova. Ilang gitabonan ang ilang nawong ug tiil, nga nagpakitag kataha ug pagtahod sa Usa nga ilang gialagaran.
Si Isaias nahingangha dili lang sa iyang nakita kondili sa iyang nadungog usab. Isip mag-aawit sa langit, ang mga serapin mipatugbaw sa ilang tingog diha sa awit. Si Isaias misulat: “Kini siya misinggit ngadto sa usa ug miingon: ‘Balaan, balaan, balaan si Jehova sa mga panon.’” (Bersikulo 3) Ang Hebreohanong pulong nga gihubad ug “balaan” may ideya sa kahinlo ug kaputli. Naglakip usab kana “sa ideya nga bug-os nga nahigawas ug nahimulag sa sala.” Sa lagmit usa ka tubagtubag nga pag-awit, ang mga serapin katulo militok sa pulong nga “balaan,” nga nagpasiugdang si Jehova maoy balaan sa kinatas-ang sukod. (Pinadayag 4:8) Nan, ang pagkabalaan maoy nakapalahi sa iyang kinaiyahan. Si Jehova putli, hinlo, ug walay ikasaway sa bug-os nga paagi.
Ang pagkahibalo nga si Jehova balaan angayng magpalihok nato nga makigsuod pa kaniya. Ngano? Dili sama sa tawhanong mga magmamando nga mahimong korap ug abusado, si Jehova bug-os nga nahimulag sa sala. Busa, ang iyang pagkabalaan naggarantiya kanato nga siya gayod ang kinamaayohang Amahan, matarong nga Magmamando, ug dili mapihigong Maghuhukom. Makasalig kita nga ang Diyos kansang pangunang hiyas mao ang pagkabalaan dili gayod magpakyas kanato.
Sugyot nga Pagbasa sa Bibliya sa Disyembre:
[Footnote]
^ par. 2 Sumala sa Pagtugkad sa Kasulatan: ‘Kon nagmata ang usa nga nakadawat ug panan-awon gikan sa Diyos, mopatim-awng kini gihulma diha sa iyang nakaamgo nga hunahuna. Ang panan-awon mahimong mahinumdoman ug mahubit o matala sa ulahi sa nakadawat niini pinaagi sa iyang kaugalingong pulong.’—Gipatik sa mga Saksi ni Jehova.
[Blurb sa panid 26]
Ang pagkahibalo nga si Jehova balaan angayng magpalihok nato nga makigsuod pa kaniya
