“Balaan, Balaan, Balaan” si Jehova
Mangin Suod sa Dios
“Balaan, Balaan, Balaan” si Jehova
PAANO mo ilaragway si Jehova? Sang ikawalo nga siglo B.C.E., si propeta Isaias may isa ka palanan-awon diin nabatian niya ang espiritu nga mga tinuga nga nagadayaw kay Jehova. Ginsambit nila ang isa ka tinaga nga nagalaragway sa talalupangdon nga kinaiya sang Dios—pagkabalaan. Ang nakita kag nabatian ni Isaias makabulig sa aton nga mangin suod kay Jehova kag dayawon sia. Samtang ginabinagbinag naton ang Isaias 6:1-3, imadyina nga didto ka.
Ano ang nakita ni Isaias? “Nakita ko ang Ginoo nga nagalingkod sa isa ka trono, mataas kag nabayaw,” siling ni Isaias. (Bersikulo 1) Indi aktual nga nakita ni Isaias ang Soberanong Ginuo nga si Jehova. Indi makita sang mga tawo ang mga espiritu. Ang Biblia maathag nga nagasiling: “Wala gid sing tawo nga nakakita sa Dios sa bisan ano nga tion.” (Juan 1:18) Ang nakita ni Isaias isa ka palanan-awon. * Pero kaathag sini, amo nga nagdayaw gid sia kay daw nakita niya mismo si Jehova.
May nakita pa si Isaias sa iya palanan-awon. Nagsulat sia: “Sa ibabaw niya [Jehova] nagtindug ang mga serafin; ang tagsatagsa may anum ka pakpak: sa duha gintabonan niya ang iya nawung, kag sa duha gintabonan niya ang iya mga tiil, kag sa duha naglupad sia.” (Bersikulo 2) Ang mga serafin mga espiritu nga tinuga nga mataas katama sing posisyon. Si Isaias lamang ang manunulat sang Biblia nga nagsambit sa ila. Ang mga serafin handa pirme magtuman sang kabubut-on ni Jehova. Ginatabunan nila ang ila nawong kag mga tiil, nga tanda sang ila daku nga pagrespeto kay Jehova kag sa pribilehiyo nga maalagad nila sia sa iya presensia.
Nagdayaw si Isaias indi lamang sa iya nakita kundi sa iya man nabatian. Ang mga serafin nagkanta sing mabaskog sa langit. Si Isaias nagsulat: “Ang isa nagsinggit sa isa kag nagsiling: ‘Balaan, balaan, balaan ang GINOO sang mga kasoldadosan.’” (Bersikulo 3) Ang Hebreo nga tinaga nga ginbadbad “balaan” nagakahulugan sing katinlo. Nagapahangop man ini sang “bug-os nga kahilwayan sa sala.” Mahimo nga sa ila nagasabtanay nga pagkanta, ginsambit sang mga serafin ang tinaga nga “balaan” sing tatlo ka beses, nga nagapakita nga si Jehova ang pinakabalaan. (Bugna 4:8) Gani, pinasahi si Jehova bangod sini nga kinaiya. Matinlo gid sia kag wala sing kasawayan.
Bangod balaan si Jehova, dapat lang nga mangin suod kita sa iya. Ngaa? Indi pareho sa mga manuggahom nga tawo nga mahimo mangin garuk kag mapintas, si Jehova indi gid makahimo sing sala. Ang iya pagkabalaan isa ka garantiya nga mangin maayo sia nga Amay, matarong nga Manuggahom, kag makatarunganon nga Hukom. Bangod balaan ang Dios, makasalig kita nga indi niya kita pagpaslawon.
Bahin sang Biblia nga mahimo basahon sa Disiembre:
[Nota]
^ par. 2 Ang Insight on the Scriptures nagpaathag: “Kon ang isa ka tawo nakabaton sing palanan-awon halin sa Dios samtang nagabugtaw sia, daw pareho lang nga ginbutang ini sa iya nagabugtaw nga hunahuna. Dayon, mahimo niya ini dumdumon, ilaragway, ukon isulat sa iya kaugalingon nga mga tinaga.”—Ginhimo sang mga Saksi ni Jehova.
[Blurb sa pahina 26]
Bangod balaan si Jehova, dapat lang nga mangin suod kita sa iya
