“Wa Kwetsima, Wa Kwetsima, Wa Kwetsima Yehovha”
Tshinela Eka Xikwembu
“Wa Kwetsima, Wa Kwetsima, Wa Kwetsima Yehovha”
HI RIHI rito leri u nga ri hlawulaka leswaku u hlamusela vumunhu bya Yehovha Xikwembu? Hi lembe-xidzana ra vunhungu B.C.E., muprofeta Esaya u vone xivono lexi eka xona a tweke swivumbiwa swa moya swi dzunisa Yehovha, swi tirhisa rito leri hlamuselaka vumunhu Byakwe, ku nga ku kwetsima. Leswi Esaya a swi voneke ni ku swi twa swi fanele swi hi susumetela ku xixima Yehovha ni ku tshinela eka yena. Loko hi ri karhi hi kambisisa marito lama nga eka Esaya 6:1-3, tivone hi mahlo ya mianakanyo u ri kwalaho.
I yini leswi Esaya a swi voneke? U te: “Ndzi vone Yehovha a tshame exiluvelweni xo tlakuka ni lexi nga ehenhla.” (Ndzimana 1) Esaya a nga vonanga Yehovha, Hosi leyi Lawulaka. Mahlo ya nyama a ma nge swi koti ku vona swivumbiwa swa moya. Bibele yi vula hi ku kongoma yi ku: “A ku na munhu la tshameke a vona Xikwembu.” (Yohane 1:18) Leswi Esaya a swi voneke a ku ri xivono. * Nilokoswiritano, xivono xexo a xi vonaka kahle lerova xi n’wi siye a hlamale ngopfu onge hiloko a vone Yehovha hi byakwe.
Esaya u tlhele a vona nchumu lowu kumbexana a wu nga si tshama wu voniwa hi munhu un’wana exivonweni. U te: “Ehenhla ka yena [Yehovha] a ku yime tiserafi. Yin’wana ni yin’wana a yi ri ni timpapa ta tsevu. Timbirhi a yi tifunengeta xikandza ha tona, timbirhi a yi tifunengeta milenge ha tona, kutani timbirhi a yi haha ha tona.” (Ndzimana 2) Tiserafi i swivumbiwa swa moya leswi nga ni xikhundlha lexi tlakukeke. Eka vatsari hinkwavo va Bibele, Esaya hi yena ntsena loyi a vulavuleke ha tona. Tiserafi ti tshama ti lunghekele ku endla xin’wana ni xin’wana lexi Yehovha a lavaka leswaku ti xi endla. Ti tifunengeta swikandza ni milenge ya tona leswaku ti xixima Yehovha, loyi ti nga ni lunghelo ro yima emahlweni ka yena.
Esaya a nga hlamarisiwanga hileswi a swi voneke ntsena kambe ni leswi a swi tweke. Tiserafi leti a ti yime ku fana ni khwayere ya le tilweni, a ti yimbelela hi rito leri tlakukeke. Esaya u tsale a ku: “Yin’wana yi huwelela yin’wanyana yi ku: ‘Wa kwetsima, wa kwetsima, wa kwetsima Yehovha wa mavuthu.’” (Ndzimana 3) Rito ra Xiheveru leri hundzuluxeriweke ri va “kwetsima” ri vula ku basa ni ku tenga. Rito rero ri tlhela ri vula “ku tihambanisa hi ku helela ni swilo leswi hombolokeke.” Loko tiserafi ti ri karhi ti yimbelela risimu leri nga heriki leri kumbexana ri yimbeleriwaka hi ndlela yo nyiketana, ti phindha-phindha xiga lexi nge “wa kwetsima” kanharhu ku kandziyisa leswaku Yehovha wa kwetsima hilaha ku heleleke. (Nhlavutelo 4:8) Hikwalaho, ku kwetsima i mfanelo yo hlawuleka ya Yehovha. Yehovha u tengile, u basile naswona u pfumala xisandzu hilaha ku heleleke.
Ku tiva leswaku Yehovha wa kwetsima swi fanele swi hi susumetela ku tshinela eka yena. Ha yini? Hikuva ku hambana ni tihosi leti nga ha vaka ni vukanganyisi ni nsele, Yehovha a nge pfuki a endle swilo leswi hombolokeke. Xisweswo, ku kwetsima kakwe ka hi tiyisekisa leswaku u ta tshama a ri Tatana lonene, Mufumi wo lulama ni Muavanyisi la nga riki na xihlawuhlawu. Ha khorwiseka hi ku helela leswaku Xikwembu, lexi mfanelo ya xona yo hlawuleka ku nga ku kwetsima, a xi nge pfuki xi hi khomise tingana.
Tindzimana ta Bibele leti u nga ti hlayaka hi December:
[Nhlamuselo ya le hansi]
^ par. 4 Buku leyi nge Insight on the Scriptures yi ri: “Loko munhu a vona xivono lexi humaka eka Xikwembu a nga khomiwanga hi vurhongo, swi tikomba onge xi dzika ngopfu emianakanyweni hikuva yi va yi xalamukile. Endzhaku ka nkarhi a nga xi tsundzuka kutani a xi hlamusela kumbe a xi tsala hi marito yakwe.”—Yi kandziyisiwe hi Timbhoni ta Yehovha.
[Marito lama tshahiweke exihlokweni lama nga eka tluka 26]
Ku tiva leswaku Yehovha wa kwetsima swi fanele swi hi susumetela ku tshinela eka yena
