Gusto Nakong Mahisama sa Anak nga Babaye ni Jepte

Sumala sa giasoy ni Joanna Soans

Sa tin-edyer pa ko, gusto nakong mahisama sa anak nga babaye ni Jepte. Pasaysaya ko kon unsay akong gihunahuna ug kon sa unsang paagi ako nahisama gayod kaniya.

SA 1956, ako mitambong sa akong unang asembliya sa mga Saksi ni Jehova sa Bombay (karon Mumbai), India, ug kana nakapausab sa akong kinabuhi. Natandog kaayo ko sa pakigpulong bahin sa anak ni Jepte.

Sa imo tingaling nabasa sa Bibliya, ang anak ni Jepte, dihang tin-edyer pa, misugot nga dili magminyo. Tungod niini, natuman sa iyang amahan ang gipanaad niini. Busa siya nag-alagad ingong tagsaanon sa balay, o tabernakulo ni Jehova sa tibuok niyang kinabuhi.—Maghuhukom 11:28-40.

Gusto gyod nakong mahisama niya! Apan, diha koy dakong problema—ang pagpabiling tagsaanon supak sa among kultura sa India niadtong panahona.

Ang Among Pamilya

Ako ang ika-5 sa 6 ka anak ni Benjamin ug Marcelina Soans sa Udipi, usa ka siyudad sa kasadpang baybayon sa India. Tulu ang among pinulongan, nga gisulti sa halos 2 ka milyong tawo. Apan, sama sa kadaghanan sa Udipi, kami giedukar sa pinulongang Kannada.

Ang mga tawo niining dapita nag-isip nga importante kaayong maminyo ug manganak. Samtang ako nagdako, wala gyod ko mahinumdom nga ang mga taga-Tulu miingon nga sila dili malipayon kay wala maminyo, o nga sila nag-inusara o gimingaw. Mora bag walay ingon niini nga kahimtang. Pananglitan, kauban namo sa balay ang among mga apohan, uyoan, iyaan, ug mga ig-agaw!

Sa among kultura, ang mga anak giisip nga bahin sa pamilya sa inahan. Ang kaliwat subayon pinaagi niya, ug ang mga anak nga babaye mas dakog panulondon. Sa pipila ka Tulu nga komunidad, ang babaye magpuyo uban sa iyang inahan human sa kaminyoon, ug ang iyang bana moipon niya.

Sanglit ang among pamilya nahimong Kristiyano, dihay diyutayng kalainan. Kada gabii, si Lolo maoy manguna sa pamilya sa pagsimba, nga mag-ampo ug magbasag kusog sa Bibliya sa pinulongang Tulu. Matag higayon nga iyang buksan ang iyang gisiong kopya sa Bibliya aron basahan mi, sama rag nag-abli siyag kahon sa mga bahandi. Makalilipay kaayo kadto! Nainteres ko sa Salmo 23:1: “Si Jehova mao ang akong Magbalantay. Walay makulang kanako.” Naghunahuna ko, ‘Kinsa ni si Jehova, ug nganong gitawag siyag magbalantay?’

Mga “Himbis” nga Nangatagak Gikan sa Akong Mata

Tungod sa krisis sa ekonomiya human sa Gubat sa Kalibotan II, namalhin mi sa Bombay, nga kapig 900 kilometros ang gilay-on. Didto, sa 1945, duha ka Saksi ni Jehova ang miduaw kang Papa ug gihatagan siyag basahon nga binase sa Bibliya. Mahinamon niya kining gibasa ug gidawat ang mensahe niini. Dayon, gipaambit niya kini sa mga tawong nagsultig Kannada. Sa sayong bahin sa katuigan sa 1950, usa ka gamayng grupo sa pagtuon ang nahimong unang nagsultig-Kannada nga kongregasyon sa Bombay.

 Kaming mga anak gitudloan ni Papa ug Mama nga mahimong makugihong estudyante sa Bibliya ug maayong magtutudlo. Matag adlaw, mangita silag higayon nga mag-ampo ug magtuon uban namo. (Deuteronomio 6:6, 7; 2 Timoteo 3:14-16) Usa ka adlaw niana, samtang nagbasa kog Bibliya, morag may mga himbis nga nangatagak gikan sa akong mata. (Buhat 9:18) Akong nakat-onang si Jehova gipakasama sa usa ka magbalantay kay siya nagagiya, nagapakaon, ug nanalipod sa iyang mga magsisimba.—Salmo 23:1-6; 83:18.

Gigiyahan Ako ni Jehova

Ako nabawtismohan wala madugay human sa halandomong kombensiyon sa Bombay niadtong 1956. Unom ka bulan sa ulahi, akong gisundog ang akong magulang nga lalaki, si Prabhakar, ug nahimong bug-os-panahong magwawali. Bisag naghinamhinam ko sa pagpaambit sa kamatuoran sa Bibliya ngadto sa uban, makulbaan ko. Mokanga ko ug mokurog ang akong tingog. Akong sultian ang akong kaugalingon, ‘Molampos lang ko niini sa tabang ni Jehova!’

Gitabangan ko ni Jehova pinaagi sa mga misyonaryo nga si Homer ug Ruth McKay nga taga-Canada, kinsa mitambong sa tunghaan sa misyonaryo sa mga Saksi ni Jehova sa New York, U.S.A., niadtong 1947. Ilang gikuptan ang akong kamot, ingnon ta, samtang ako nagsugod pa lang sa akong ministeryo. Kanunay kong bansayon ni Ruth sa pagsangyaw sa balaybalay. Nahibalo gyod siya kon unsaon ko pagpakalma. Iyang kuptan ang akong nangurog nga kamot, ug moingon: “Ayawg kabalaka, ‘Day. Sulayan nato sa sunod balay.” Tungod sa iyang pagdasig nako, nakabaton kog kaisog.

Usa ka adlaw niana, giingnan ko nga ang mahimo nakong partner sa pagsangyaw mao si Elizabeth Chakranarayan, usa ka tigulang, eksperyensiyadong magtutudlo sa Bibliya. Sa sinugdan nakaingon ko: ‘Magkasinabot kaha mi ining igsoona? Magulang ra ba kaayo siya nako!’ Apan sa ulahi nakatabang gyod siya nako.

“Wala Gyod Ta Mag-inusara”

Ang among unang asaynment mao ang makasaysayanhong siyudad sa Aurangabad, mga 400 kilometros sidlakan sa Bombay. Nakaamgo dayon mi nga kami ra diayng duha ang Saksi nianang siyudara nga may duolag 1 ka milyong molupyo. Gawas pa niana, kinahanglan kong makakat-og Marathi, ang pinulongan nga gigamit sa kadaghanan.

Usahay, mobati kog grabeng kamingaw, ug magbakho ko samag bata nga way inahan. Apan ang inahanong tambag ni Elizabeth nakadasig nako. “Usahay mobati tag kamingaw, apan wala gyod ta mag-inusara,” siya moingon. “Bisag layo ka sa imong mga higala ug pamilya, si Jehova haduol kanimo. Himoa siya nga imong higala, ug mawala ra ang imong kamingaw.” Hangtod karon gipabilhan nako ang iyang tambag.

Kon wala na mi ikaplete, magbaktas mig 20 kilometros kada adlaw agi sa abogon ug lapokong dalan, sa init ug bugnaw nga klima. Sa ting-init, ang temperatura sagad moabot ug 40 degrees Celsius. Sa ting-ulan, may mga bahin sa among teritoryo nga magpabiling lapokon sulod sa daghang bulan. Bisan pa niana, sagad mas lisod pang sagubangon ang kultura sa mga tawo kay sa klima.

Ang mga babaye dili makig-estorya sa mga lalaki sa publiko gawas lang kon paryente sila, ug ang mga babaye talagsa rang manudlo sa mga lalaki. Busa, ila ming bugalbugalan ug tamayon. Sa unang 6 ka bulan, kami rang duha ang magtigom alang sa senemanang pagtuon sa Bibliya. Sa ngadtongadto, diha nay mga interesado nga miduyog  namo. Sa wala madugay naporma ang usa ka gamayng grupo. Miduyog pa gani ang uban sa ministeryo.

“Padayong Pauswaga ang Imong Katakos”

Human sa mga duha ka tuig ug tunga, giasayn mig balik sa Bombay. Samtang nagpadayon si Elizabeth sa pagsangyaw, gihangyo ko sa pagtabang kang Papa, nga niadtong panahona mao ray maghuhubad sa literatura sa Bibliya ngadto sa Kannada. Nalipay siya niana, kay daghan siyag responsabilidad sa kongregasyon.

Sa 1966, nakadesisyon ang akong ginikanan sa pagbalik sa Udipi, ang among gipuy-an kaniadto. Sa dihang mobiya na siya sa Bombay, si Papa miingon: “Anak, padayong pauswaga ang imong katakos. Himoang simple ug tin-aw ang imong paghubad. Likayi ang sobrang pagsalig sa kaugalingon, ug magmapaubsanon. Salig kang Jehova.” Mao kadtoy iyang kataposang tambag nako, kay namatay siya wala madugay human makabalik sa Udipi. Hangtod karon naningkamot ko sa pagsunod sa iyang tambag labot sa akong trabaho sa paghubad.

“Dili Ka ba Gustong Magminyo?”

Sa India, ang mga ginikanan maoy sagad mohikay sa kaminyoon sa ilang anak samtang bata pa kini, ug dasigon kini sa pagbatog mga anak. Busa pirme kong pangutan-on: “Dili ka ba gustong magminyo? Kinsa may moatiman nimo inigkatigulang na nimo? Dili ka ba mingawon?”

Usahay, maluya ko sa ilang mga komento. Iluom lang nako ang akong gibati, apan kon mag-inusara na ko, ako kining ipadayag kang Jehova. Nahupayan ko sa pagkahibalo nga wala niya isipa nga dunay kulang nako tungod lang kay tagsaanon ko. Aron molig-on ang akong desisyon nga moalagad kaniya nga walay kabaldahan, akong gihinumdoman ang anak ni Jepte ingon man si Jesus—nga parehong nagpabiling tagsaanon ug puliki sa pagbuhat sa kabubut-on sa Diyos.—Juan 4:34.

Gasa Gikan Kang Jehova

Kami ni Elizabeth nagpabiling suod nga managhigala sulod sa mga 50 ka tuig. Namatay siya sa 2005, sa edad nga 98. Kay dili na makabasa sa Bibliya sa ulahing katuigan tungod sa kahalap, halos tibuok adlaw siyang mag-ampo sa Diyos. Usahay, maghunahuna kong duna siyay kaestorya sa kuwarto bahin sa Bibliya, apan nakigsulti lang diay siya kang Jehova. Alang niya si Jehova maoy tinuod nga Persona, ug siya nagkinabuhi nga daw si Jehova anaa kanunay sa iyang atubangan. Akong nakat-onan nga mao ni ang sekreto sa pagpabiling matinumanon sa pag-alagad sa Diyos, sama sa gibuhat sa anak ni Jepte. Mapasalamaton kaayo ko kang Jehova sa pagtagana niya nako ug mas magulang, hamtong nga sister nga nagbansay nako sa akong pagkabatan-on ug latas sa tanan nakong pakigbisog.

Daghan gayod ang panalangin nga akong natagamtam sa pag-alagad kang Jehova sama sa anak ni Jepte! Sa pagpabiling tagsaanon ug pagsunod sa tambag sa Bibliya, ang akong kinabuhi nahimong tugob ug malipayon, samtang ‘makanunayong nag-alagad sa Ginoo nga walay pagkalinga.’—1 Corinto 7:35.

[Hulagway sa panid 28]

Si Papa nga nagpakigpulong sa Bombay sa katuigan sa 1950

[Hulagway sa panid 28]

Kauban ni Elizabeth sa wala pa siya mamatay

[Hulagway sa panid 29]

Pag-anunsiyo sa usa ka pakigpulong sa Bibliya sa Bombay niadtong 1960

[Hulagway sa panid 29]

Uban sa akong mga kauban sa trabaho sa translation office