Ke be ke Nyaka go Swana le Morwedi wa Jefeta

Ka ge go anega Joanna Soans

Ge ke be ke sa le mahlalagading, ke be ke tloga ke nyaka go swana le morwedi wa Jefeta. E re ke hlalose seo ke bego ke se naganne le kamoo ke ilego ka feleletša ke swana le yena kutšwanyana.

KA 1956, ke ile ka ya kopanong ya ka ya pele ya Dihlatse tša Jehofa kua Bombay (yeo ga bjale e lego Mumbai), India, gomme seo se ile sa fetoša bophelo bja ka. Ke ile ka kgongwa kudu ke polelo yeo ke e kwelego moo yeo e bego e bolela ka morwedi wa Jefeta.

Ka ge o ka ba o badile ka Beibeleng, morwedi wa Jefeta, yo go bonagalago a be a le mahlalagading, o ile a dumela go se nyalwe. Se se ile sa dira gore tatagwe a kgone go phetha keno yeo a bego a e dirile. Ka gona o ile a hlankela bophelo bja gagwe ka moka e le mosadi yo a sa nyalwago ntlong ya Jehofa, goba taberenakeleng.—Baahlodi 11:28-40.

Ruri ke be ke nyaka go swana le yena! Eupša ke be ke lebeletšane le bothata bjo bogolo—go se nyalwe go be go thulana le setšo sa rena mo India ka nako yeo.

Lapa Lešo

Ke be ke le ngwana wa bohlano go bana ba tshela ba Benjamin le Marcelina Soans kua Udipi, motse wa lebopong la ka bodikela bja India. Re bolela Setulu, e lego leleme leo le bolelwago ke batho ba ka bago dimilione tše pedi. Lega go le bjalo, go swana le batho ba bantši kua Udipi, re be re rutwa ka Sekannada.

Lenyalo le go ba le bana e be e dutše e le dilo tšeo di tlago pele bophelong tikologong ye. Ge ke gola, ga ke gopole le ka mohla ke ithuta mantšu a Setulu a “go se be lenyalong,” “bodutu” goba “go hlologela gae.” Go be go le bjalo ka ge eka maemo a ga a gona. Ka mohlala, lapeng lešo re be re dula le bomakgolo le borakgolo, bomalome le borakgadi, mmamogolo, mmane gotee le bomotswala le bana ba mmamogolo le ba mmane!

Go ya ka setšo, re be re le karolo ya tshepedišo yeo go yona bana ba tšewago e le karolo ya lapa la gabo mmago bona. Lešika le be le latišišwa ka mma gomme barwedi ba be ba hwetša karolo e kgolo ya bohwa. Metseng e mengwe ya Matulu, ngwanenyana o be a no dula le mmagwe le ge a nyetšwe gomme monna wa gagwe o be a eya go dula le yena.

Ka ge lapa lešo le be le fetogile ba bangwe bao ba ipitšago Bakriste, le be le dira dilo tše dingwe ka tsela e fapanego. Mantšiboeng a mangwe le a mangwe, rakgolo o be a etelela lapa pele borapeding, a rapela e bile a bala ka go hlaboša go tšwa Beibeleng ya Setulu. Nako le nako ge a be a bula kopi ya Beibele ya gagwe ya mankgeretla gore a re balele, go be go le bjalo ka ge eka o bula lepokisi la magakabje. Go be go thabiša e le ruri! Ke be ke kgahlwa ke Psalme 23:1 ge e re: “Jehofa ke Modiši wa ka. Nka se hloke selo.” Ke be ke ipotšiša gore, ‘Jehofa yo ke mang, le gona ke ka baka la’ng a bitšwa modiši?’

Mahlong a ka go Ile gwa wa tše go ka Thwego ke Makgapetla

Ka baka la maemo a thata a tša boiphedišo ka morago ga Ntwa ya II ya Lefase, re ile ra hudugela Bombay, yeo e bego e le bokgole bja ka godimo ga dikhilomithara tše 900. Ka 1945, Dihlatse tše pedi tša Jehofa di ile tša etela tate moo gomme tša mo nea pukwana e theilwego Beibeleng. Tate o ile a monya molaetša wa yona go etša kamoo mobu o omilego o monyago meetse a pula ka gona, gomme a thoma go botša batho ba bangwe bao ba bolelago Sekannada molaetša wa yona.  Nywageng ya pele ya bo-1950, ke ge sehlopha se senyenyane sa thuto se gotše e le phuthego ya mathomo ya Sekannada kua Bombay.

Tate le Mma ba be ba rutile rena bana gore re be diithuti tše mafolofolo tša Beibele le barutiši ba babotse. Letšatši le letšatši, ba be ba hwetša dibaka tša go rapela le go ithuta le rena. (Doiteronomio 6:6, 7; 2 Timotheo 3:14-16) Ka letšatši le lengwe ge ke be ke bala Beibele, mahlong a ka go ile gwa wa tše go ka thwego ke makgapetla. Ke ile ka ithuta gore Jehofa o swantšhwa le modiši ka gobane o hlahla barapedi ba gagwe, o a ba fepa le go ba šireletša.—Psalme 23:1-6; 83:18.

Jehofa o be a Dutše a Ntshwere ka Seatla

Ke kolobeditšwe ka moragonyana ga kopano e gopolegago ya Bombay ka 1956. Ka morago ga dikgwedi tše tshela, ke ile ka latela mohlala wa kgaetšedi ya ka yo mogolo Prabhakar gomme ka moebangedi wa nako e tletšego. Gaešita le ge ke be ke fišegela go botša ba bangwe ka ditherešo tša Beibele, ke be ke tšhoga kudu gateetee ge ke re ke leka go bolela ka seo ke se dumelago. Ke be ke kgamakgametša gomme lentšu la ka le thothomela. Ke ile ka lla ke nnoši ka re: ‘Nka dira mošomo wo ka thušo ya Jehofa feela!’

Jehofa o ile a nthuša ka baromiwa e lego Homer le Ruth McKay ba tšwago Canada, bao ba tsenego sekolo sa baromiwa sa Dihlatse tša Jehofa kua New York, United States of America ka 1947. Nka re ba ile ba ntshwara ka seatla ke dutše ke gata dikgato tša ka tša pele bošaedi ge ke be ke sa thoma bodireding. Ruth o be a itlwaetša le nna ka mehla dithero tša go ya ka ntlo le ntlo. O be a tloga a tseba tsela ya go mpea pelo. O be a mpotša a ntshwere diatla tše di thothomelago, a re: “O se ke wa tshwenyega moratiwa. A re leke ntlong e latelago.” Segalo sa gagwe se se kgodišago se be se mpea pelo.

Ka letšatši le lengwe, ke ile ka botšwa gore Elizabeth Chakranarayan, morutiši wa Beibele yo a gotšego le yo a nago le phihlelo, o be a tla šoma le nna bodireding. Mathomong ke ile ka arabela ka gore: ‘Ke tla kgona bjang go phela le kgaetšedi yo? O tloga a mpheta kudu!’ Eupša go ile gwa bonagala gore e be e tloga e le yena modirišani yo ke bego ke mo nyaka.

“Re Tloga re se Noši le ka Mohla”

Kabelo ya rena ya pele e bile motseng o tumilego wa Aurangabad, wo o lego bokgole bja dikhilomithara tše e nyakilego go ba tše 400 ka bohlabela bja Bombay. Kapejana re ile ra lemoga gore e be e le rena Dihlatse tše pedi feela motseng wa batho ba dimilione tše e nyakilego goba tše pedi. Ka ntle le moo, ke ile ka swanelwa ke go ithuta Semarathi, leleme leo le bolelwago kudu motseng woo.

Ka dinako tše dingwe, ke be ke aparelwa ke mafula a bodutu, gomme ke lla kudu go swana le tšhiwana. Eupša segalo sa Elizabeth sa bomma se be se nkgothatša. O be a fela a re: “Ka dinako tše dingwe re ka ikwa re lewa ke bodutu, eupša re tloga re se noši le ka mohla. Gaešita le ge o le kgole le bagwera ba gago le ba lapa leno, Jehofa o dula a na le wena. Mo dire mogwera wa gago gomme go se go ye kae o ka se sa lewa ke bodutu.” Ke sa dutše ke tšeela keletšo ya gagwe godimo go fihla le lehono.

Ge re be re se na tšhelete e lekanego ya go lefelela senamelwa, re be re sepela ka maoto monabo wa dikhilomithara tše 20 letšatši le letšatši, re sepela leroleng le lerageng gotee le phišong le phefong. Selemo, gantši phišo e be e fihla go di-digree Celsius tše 40. Sehleng sa pula e ntši, dikarolo tše itšego tša tšhemo ya rena di be di tšea dikgwedi e le leraga. Lega go le bjalo, gantši re be re hwetša gore dipono tša batho tša setšo di be di hlohla go feta boemo bja leratadima.

Basadi ba be ba sa boledišane le banna phatlalatša ntle le ge e ba ba be ba tswalana gomme ke ka sewelo basadi ba bego ba ruta banna. Ka gona re be re lebeletšana le go kwerwa le go swarwa gampe. Dikgweding tše tshela tša pele, e be e le rena  ba babedi feela bao ba bego ba kopanela dibokeng tša Beibele tša beke le beke. Ge nako e dutše e eya, batho bao ba thabelago ba ile ba re tlatša. Go se go ye kae go ile gwa ba le sehlopha se senyenyane. Ba bangwe ba ile ba ba ba ya le rena bodireding.

“Tšwela Pele o Loutša Bokgoni bja Gago”

Ka morago ga nywaga e ka bago e mebedi le seripa, re ile ra abelwa go boela Bombay. Ge Elizabeth a be a tšwela pele modirong wa boboledi, nna ke ile ka kgopelwa gore ke thuše tate, yoo ka nako yeo e bego e le yena mofetoledi a nnoši wa dikgatišo tša rena tša Beibele tša Sekannada. O ile a thabela thušo ya ka, ka ge a be a na le boikarabelo bjo bogolo ka phuthegong.

Ka 1966, batswadi ba ka ba ile ba dira phetho ya go boela Udipi, legae la rena la kgale. Ge a tloga Bombay, Tate o itše: “Ngwanenyan’aka, tšwela pele o loutša bokgoni bja gago. Fetolela ka tsela e bonolo le e kwagalago. Phema go ipota kudu gomme o dule o ikokobeditše. Ithekge ka Jehofa.” Ye e bile keletšo ya mafelelo yeo ke e hweditšego go yena ka gobane o ile a hlokofala ka moragonyana ga ge a boetše Udipi. Ke ile ka katanela go dira sona seo modirong wa ka wa bofetoledi go ba go fihla le lehono.

“Na ga o Nyake go ba le Lapa?”

Go ya ka setšo, batswadi ba Maindia ba rulaganyetša bana ba bona go tsena lenyalong nakong ya ge barwa le barwedi ba bona e sa le ba banyenyane kudu, gomme ba ba kgothaletša go ba le bana. Ka gona, ke be ke fela ke botšišwa gore: “Na ga o nyake go ba le lapa? O tlo hlokomelwa ke mang ge o tšofetše? Na o ka se lewe ke bodutu?”

Ka dinako tše dingwe dipolelo tše bjalo di be di nkimela maikwelong. Gaešita le ge ke be ke uta maikwelo a ka bathong, ke be ke tšhollela Jehofa pelo ya ka ge ke nnoši. Ke be ke homotšwa ke go tseba gore o be a sa mpone ke hlaelelwa ka baka la gore ke se ka nyalwa. E le gore ke matlafatše boikemišetšo bja ka bja gore ke mo hlankele ntle le tšhitišo, ke ile ka nagana ka morwedi wa Jefeta le Jesu—bao ba ilego ba se tsene lenyalong gomme ba nwelela go direng thato ya Modimo.—Johane 4:34.

Mpho e Tšwago go Jehofa

Nna le Elizabeth re ile ra dula re le bagwera ba paala nywaga e ka bago e 50. O hlokofetše ka 2005 a ena le nywaga e 98. Ka ge nywageng ya morago a be a se sa kgona go bala Beibele ka baka la go se bone gabotse, letšatšing le lengwe le le lengwe o be a fetša nako e ntši a rapela Modimo ka mo go tseneletšego le ka mo go nabilego. Ka dinako tše dingwe ke be ke nagana gore o be a boledišana le motho yo mongwe ka mangwalo ka phapošing ya gagwe eupša ke hwetša gore o be a boledišana le Jehofa. E be e le Motho wa kgonthe go yena, gomme o be a phela tše nkego o na le yena. Ke ithutile gore ye ke tsela ya motheo ya gore motho a dule a tiile go hlankeleng Modimo, go etša ge morwedi wa Jefeta a dirile. Ke leboga Jehofa kudu ge a mphile kgaetšedi yo a mphetago le yo a gotšego ka tsebo gore a nkeletše bofseng bja ka le mathateng a ka ka moka.—Mmoledi 4:9, 10.

Ruri ke hweditše ditšhegofatšo go hlankeleng Jehofa go etša morwedi wa Jefeta! Go se nyalwe le go latela keletšo ya Beibele go dirile gore ke phele bophelo bjo bo humilego le bjo bo putsago ke dutše ke “ineela go Morena ka mehla ka ntle le tšhitišo.”—1 Bakorinthe 7:35.

[Seswantšho go letlakala 28]

Tate a nea polelo ya phatlalatša kua Bombay nywageng ya bo-1950

[Seswantšho go letlakala 28]

Ke ena le Elizabeth pejana ga lehu la gagwe

[Seswantšho go letlakala 29]

Ge ke be ke tsebatša polelo ya Beibele kua Bombay ka 1960

[Seswantšho go letlakala 29]

Ke ena le bašomigotee le nna ofising ya rena ya bofetoledi