Haʼu hakarak atu sai hanesan Jefté nia oan-feto

Esperiénsia husi Joanna Soans

Kuandu haʼu sei joven, haʼu hakarak tebes atu sai hanesan Jefté nia oan-feto. Agora haʼu hakarak konta kona-ba neʼe no oinsá ikusmai haʼu sai hanesan nia.

IHA tinan 1956, haʼu tuir reuniaun boot ba dala primeiru husi Testemuña ba Jeová iha Bombaín (agora bolu Mumbai) iha rai-Índia. Reuniaun neʼe troka haʼu-nia moris. Diskursu ida neʼebé haʼu rona kona-ba Jefté nia oan-feto book duni haʼu-nia laran.

Karik Ita lee tiha ona iha Bíblia kona-ba Jefté nia oan-feto. Kuandu nia sei joven hela nia apoia ninia aman nia desizaun atu la kaben. Ida-neʼe ajuda nia aman atu kumpre ninia promesa. Tan neʼe, nia serbí nuʼudar feto-klosan iha Maromak Jeová nia uma, ka tabernákulu iha ninia moris tomak.—Juízes (Hakim-Hakim) 11:28-40.

Haʼu hakarak tebes atu sai hanesan nia! Maibé ida-neʼe hamosu problema boot. Iha tempu neʼebá, tuir ami-nia kultura iha rai-Índia, ema neʼebé hakarak moris klosan deʼit, neʼe la hanesan baibain.

Haʼu-nia moris família nian

Haʼu-nia inan-aman naran Benjamin no Marcelina Soans. Sira iha oan naʼin-neen no haʼu mak oan númeru lima. Ami hela iha sidade naran Udipi, iha rai-Índia nia parte oeste. Ami-nia língua rasik mak lia-tulu, maizumenus ema naʼin-2.000.000 koʼalia língua neʼe. Maibé, hanesan ema barak iha Udipi, iha eskola ami uza lia-kannada.

Ema iha área neʼe hanoin katak importante tebes atu kaben no iha oan. Tuir loloos, husi tempu neʼebé haʼu sei kiʼik, haʼu nunka rona liafuan hanesan “klosan”, “sente mesak” no “hanoin família” iha lia-tulu tanba besik ema hotu kaben no iha oan. Porezemplu, iha ami-nia família, ami hela hamutuk ho haʼu-nia avó sira, tiu-tia, no primu-prima sira!

Tuir kultura iha ami-nia área, oan sira sai parte ba família feto nian. Ema sura jerasaun husi feto no oan-feto sira mak simu liman-rohan neʼebé boot liu fali oan-mane sira. Iha família balu, maski feto ida kaben, nia nafatin hela ho ninia inan, no nia laʼen mak muda atu hela hamutuk ho nia.

Tanba ami-nia família tuir relijiaun kristaun, ami halo buat ruma neʼebé la hanesan ho família seluk. Kalan-kalan, haʼu-nia avó-mane halaʼo adorasaun iha ami-nia família hodi halo orasaun no lee Bíblia ho lian makaʼas iha lia-tulu. Maski Bíblia neʼebé nia uza mak tuan ona, maibé kuandu nia loke no lee ba ami, neʼe hanesan nia loke kaixa neʼebé nakonu ho osan-mean. Ami sente kontente la halimar! Haʼu hakarak atu hatene liután kona-ba eskritura iha Salmo (Mazmur) 23:1 neʼebé dehan: “Jeová mak haʼu-nia bibi-atan. Haʼu sei la kuran buat ida.” Haʼu hanoin: ‘Sé mak Jeová neʼe? No tanbasá mak bolu nia nuʼudar bibi-atan?’

Haʼu-nia matan nakloke

Tanba Funu Mundiál Segundu, ida-neʼe hamosu problema ekonomia, tan neʼe ami muda ba sidade Bombaín, dook maizumenus kilómetru 900. Iha neʼebá, iha tinan 1945, ema naʼin-rua husi Testemuña ba Jeová vizita haʼu-nia aman no fó ba nia livru ida kona-ba Bíblia. Haʼu-nia aman simu mensajen neʼe hanesan rai-maran neʼebé xupa bee. Nia komesa atu fahe mensajen neʼe ho ema seluk neʼebé koʼalia lia-kannada. Lakleur  depois tinan 1950, ami-nia grupu kiʼik neʼebé estuda hamutuk aumenta toʼo sai kongregasaun primeiru iha sidade Bombaín neʼebé koʼalia lia-kannada.

Haʼu-nia inan no aman hanorin ami atu sai ema neʼebé hatene didiʼak Bíblia no atu hanorin ho diʼak. Loroloron sira buka oportunidade atu halo orasaun no estuda hamutuk ho ami. (Deuteronômio [Ulangan] 6:6, 7; 2 Timoteo 3:14-16) Loron ida, kuandu haʼu lee Bíblia, buat ida akontese neʼebé halo haʼu-nia matan nakloke. Haʼu aprende katak Jeová hanesan bibi-atan tanba nia dirije, fó-han no proteje ema neʼebé adora nia.—Salmo 23:1-6; 83:18.

Jeová sempre ajuda haʼu

Haʼu hetan batizmu lakleur depois reuniaun boot iha Bombaín iha tinan 1956. Fulan neen liu tiha, haʼu komesa serbí Maromak ba tempu tomak hodi tuir haʼu-nia maun Prabhakar nia ezemplu. Maski haʼu hakarak tebes atu fahe lia-loos kona-ba Bíblia ba ema seluk, maibé kuandu haʼu koʼalia kona-ba haʼu-nia fiar, haʼu-nia ibun sai toos no lian mós nakdedar. Haʼu tanis hodi dehan: ‘Haʼu bele halo serbisu neʼe só deʼit ho Jeová nia ajuda!’

Maromak Jeová ajuda haʼu liuhusi misionáriu naʼin-rua naran Homer no Ruth Mckay, husi rai-Kanadá. Sira tuir eskola ba misionáriu sira iha Novaiorke iha rai-Estadus Unidus iha tinan 1947. Sira ajuda tebes haʼu kuandu ami halaʼo serbisu haklaken. Ruth fó treinu beibeik ba haʼu oinsá atu koʼalia ba ema. Nia hatene didiʼak oinsá atu halo haʼu sente kalma. Nia kaer haʼu-nia liman neʼebé nakdedar hodi hatete: “Keta hanoin barak, doben. Mai ita bá uma seluk tan.” Ninia lian neʼebé mamar fó laran-manas ba haʼu hodi la sente taʼuk.

Loron ida, haʼu rona katak irmán naran Elizabeth Chakranarayan atu sai haʼu-nia pár iha serbisu haklaken. Nia idade ona no iha esperiénsia barak atu hanorin Bíblia. Foufoun haʼu hanoin: ‘Oinsá mak haʼu bele hela hamutuk ho irmán neʼe? Nia idade boot liu fali haʼu!’ Maibé afinál, nia mak pár neʼebé haʼu presiza duni.

“Tuir loloos ita nunka mesak”

Ami-nia knaar primeiru mak atu haklaken iha sidade Aurangabad, neʼebé dook maizumenus kilómetru 400 iha parte leste husi sidade Bombaín. Ami hakfodak uitoan atu hatene katak ami naʼin-rua deʼit mak ema Testemuña iha sidade neʼe, neʼebé iha ema maizumenus naʼin-1.000.000. No mós, haʼu presiza aprende lia-marathi, neʼebé ema barak iha sidade neʼe koʼalia.

Dala ruma, haʼu sente mesak no tanis hanesan oan neʼebé la iha inan. Maibé Elizabeth fó laran-manas mai haʼu no koʼalia ho lian mamar hanesan inan ida no dehan: “Dala ruma ita sente mesak maibé tuir loloos ita nunka mesak. Maski Ita dook husi Ita-nia família no kolega sira, maibé Jeová sempre hamutuk ho Ita. Se Ita habelun ho nia, Ita sei nunka sente mesak.” Haʼu hafolin duni ninia liafuan neʼe toʼo ohin loron.

Kuandu ami-nia osan la toʼo atu selu transporte, loroloron ami laʼo deʼit maizumenus kilómetru 20 iha dalan neʼebé iha tahu barak no rai-rahun no maski rai-manas ka malirin. Iha tempu bailoro, temperatura sai manas toʼo grau 40°. Durante tempu udan, área balun iha ami-nia haklaken-fatin iha tahu ba fulan barak. Maibé buat neʼebé susar liu ba ami mak ema sira-neʼe nia kultura.

Feto sira la koʼalia ho mane iha fatin públiku, só deʼit se mane neʼe mak sira-nia família. No feto sira baibain la hanorin mane sira. Tan neʼe, ema goza no koʼalia aat ami. Durante fulan neen nia laran, ami naʼin-rua deʼit mak halaʼo reuniaun sira. Nuʼudar tempu liu daudaun, ema neʼebé hatudu interese komesa atu halibur hamutuk ho ami. Lakleur,  ema aumenta no sai grupu kiʼik. Sira balu sai haklaken-naʼin no komesa haklaken hamutuk ho ami.

“Kontinua nafatin aumenta Ita-nia matenek”

Depois tinan rua ho balun ami hetan knaar foun atu muda fali ba Bombaín. Elizabeth kontinua halo serbisu haklaken no haʼu simu knaar atu ajuda haʼu-nia aman. Iha tempu neʼebá, nia mesak deʼit mak tradús livru sira kona-ba Bíblia iha lia-kannada. Nia mós iha responsabilidade barak iha kongregasaun, tan neʼe nia hafolin haʼu-nia ajuda.

Iha tinan 1966, haʼu-nia inan-aman deside atu husik Bombaín no fila fali ba Udipi, ami-nia hela-fatin uluk nian. Antes haʼu-nia aman bá, nia hatete: “Oan, kontinua nafatin aumenta Ita-nia matenek. Halo tradusaun iha dalan neʼebé simples no moos. Labele fiar-an demais, haraik an nafatin no sadere ba Jeová.” Ida-neʼe mak ninia lia-menon ikus ba haʼu, tanba lakleur depois nia fila ba Udipi, nia mate. Haʼu hakaʼas an atu halo tuir ninia lia-menon neʼe nuʼudar haʼu halo haʼu-nia serbisu iha tradusaun toʼo ohin loron.

“Ita lakohi atu kaben ka?”

Baibain inan-aman husi rai-Índia arranja sira-nia oan atu kaben ho ema seluk kuandu sira sei joven no fó laran-manas ba sira atu iha oan. Tan neʼe ema barak sempre husu ba haʼu: “Ita lakohi atu kaben ka? Sé mak sei tau matan ba Ita kuandu Ita sai ferik? Aban-bainrua Ita sei sente mesak deʼit ka lae?”

Dala ruma pergunta hanesan neʼe halo haʼu sente baruk atu rona. Maski haʼu la hatudu sai haʼu-nia sentimentu iha ema nia oin, maibé kuandu haʼu mesak, haʼu fakar sai buat hotu iha haʼu-nia laran ba Maromak Jeová. Haʼu sente kmaan hodi hatene katak nia la haree haʼu nuʼudar ema neʼebé falta buat ruma tanba haʼu klosan hela. Atu hametin liután haʼu-nia desizaun atu serbí nia hodi la husik buat ruma atrapalla haʼu, haʼu hanoin fali kona-ba Jefté nia oan-feto no mós kona-ba Jesus. Sira naʼin-rua la kaben no hanoin deʼit atu uza sira-nia moris tomak hodi halo Maromak nia hakarak.—Joao 4:34.

Prezente husi Jeová

Haʼu no Elizabeth sai belun diʼak besik tinan 50. Nia mate iha tinan 2005 kuandu nia tinan 98. Tanba ninia matan komesa malahuk, susar ba nia atu lee Bíblia. Tan neʼe, loroloron nia gasta tempu barak atu koʼalia ho Maromak liuhusi orasaun. Dala ruma haʼu hanoin katak nia koʼalia eskritura ho ema seluk iha ninia kuartu. Maibé tuir loloos nia mesak deʼit no koʼalia ba Jeová. Nia sente Jeová iha duni no nia halaʼo ninia moris hanesan Jeová sempre iha ninia sorin. Haʼu aprende katak ida-neʼe mak xave atu nafatin serbí Maromak ho laran-metin, hanesan Jefté nia oan-feto halo. Haʼu agradese tebes ba Aman Jeová hodi fó irmán neʼebé idade ona no iha esperiénsia barak atu fó treinu ba haʼu kuandu haʼu sei joven no kuandu haʼu hasoru susar naran deʼit.—Eclesiastes (Pengkhotbah) 4:9, 10.

Haʼu hetan bensaun barak hodi serbí Jeová hanesan Jefté nia oan-feto! Tanba haʼu la kaben no moris tuir Bíblia nia matadalan, ida-neʼe ajuda haʼu atu iha moris kontente liu, no iha tempu hanesan ‘bele serbí Naʼi hodi la fahe haʼu-nia neon’.—1 Korinto 7:35.

[Dezeñu iha pájina 14]

Haʼu-nia aman hatoʼo diskursu iha Bombaín maizumenus iha tinan 1950

[Dezeñu iha pájina 14]

Hamutuk ho Elizabeth lakleur antes nia mate

[Dezeñu iha pájina 15]

Hatudu konvite kona-ba diskursu Bíblia nian iha Bombaín iha tinan 1960

[Dezeñu iha pájina 15]

Hamutuk ho maluk sira iha tradusaun