Ndakali Kuyanda Kuba Mbuli Mwana Musimbi wa Jefita

Akaluulwa aba Joanna Soans

Ciindi nindakacili mukubusi, ndakatalika kuyanda kuba mbuli mwana musimbi wa Jefita. Andipandulule ncindakali kuyeeya alimwi ambondakazooba mbulinguwe.

MUMWAKA wa 1956, ndakajanika ciindi cakusaanguna kumuswaangano wa Bakamboni ba Jehova mudolopo lyakali kwiitwa kuti Bombay (lino liitwa kuti Mumbai), mucisi ca India, alimwi eeci cakacinca buumi bwangu. Ndakakulwaizyigwa kapati amakani ngendakamvwa kujatikizya mwana musimbi wa Jefita.

Kweelana ambomwakabala mu Bbaibbele, ciindi mwana musimbi wa Jefita naakacili mukubusi, wakazumina kuti atakakwatwi. Eeci cakapa kuti bausyi bacikonzye kuzuzikizya cikonke ncobakacita. Aboobo, wakabeleka kuŋanda ya Jehova naa tempele kali mukaintu uutakwetwe buumi bwakwe boonse.—Babetesi 11:28-40.

Eelo kaka ndakali kuyandisya kuba mbulinguwe! Pele ndakajisi penzi lipati—kutakwatwa tiikwakali kweendelana azilengwa zyesu zyamucisi ca India kuciindi eeco.

Makani Aajatikizya Mukwasyi Wangu

Ndakali mwana wasanu mubana ibali cisambomwe baba Benjamin alimwi aba Marcelina Soans mudolopo lya Udipi cisi ca India nkocili kumbo. Mwaambo wesu wiitwa kuti Tulu, mwaambo iwaambaulwa abantu babalilwa ku 2 milyoni. Nokuba boobo, mbubwenya mbuli bantu banji ibakkala mu Udipi, kucikolo twakali kuyiisyigwa mumwaambo wa Cikannada.

Bantu ibakkala mubusena oobu balimvwa kuti kukwata naa kukwatwa alimwi akuzyala bana ncintu ciyandika kapati. Nindakali kukomena, tandiyeeyi kwiiya majwi aamu Chitulu aamba “kutakwata, kutakwatwa,” “kulendelelwa,” naa “kuyeeya kumunzi.” Cakali mbuli kuti bukkale oobu tiibwakaliko. Mucikozyanyo, mukwasyi wesu wakali kukkala muŋanda yomwe a bamakaapa, baaisya, bacizyi babataata ababamaama, alimwi abeenima banji!

Kweelana acilengwa cesu, bana bakali kubalilwa kumukwasyi wabanyina. Lunyungu lwakali kukonzya kuzyibwa kwiinda muli banyina alimwi bana basimbi bakali kukona zyintu zinji. Muminzi imwi ya Chitulu, mwana musimbi wakali kuzumanana kukkala abanyina amana kukwatwa alimwi mulumi wakwe awalo wakali kukkala anguwe.

Akaambo kakuti mukwasyi wesu wakaba wacikombelo ca Bunakristo, zyintu zimwi zyakaliindene. Ciindi camangolezya lyoonse, basyaanene bakali kweendelezya mukwasyi mukukomba, kupaila alimwi akubala cakupozya kuzwa mu Bbaibbele lyamu Chitulu. Kufwumbwa ciindi nobakali kujula Bbaibbele lyabo lizapukide kutegwa batubalile, cakali mbuli kuti bajalula kabbokesi kangale. Eelo kaka cakali kukkomanisya! Lugwalo lwa Intembauzyo 23:1 lwakandikkomanisya kapati, ilwaamba kuti: “Jehova ngumweembeli wangu, nsikabuli cintu.” Ndakalibuzya kuti, ‘Ino Jehova ooyu nguni, alimwi nkaambo nzi ncaambwa kuti mweembezi?’

Ndakatalika Kuzyiba Jehova Ncali Mbuli Mweembezi

Akaambo kabuyumuyumu bwakujana mali noyakamana Nkondo Yanyika Yabili, twakalongela ku Bombay, ikulampa makilomita aainda ku 900. Mu 1945, Bakamboni ba Jehova bobilo bakabaswaya bataata akubapa kabbuku kaamba zyamu Bbaibbele. Bataata bakakabala kabbuku akuuzumina mulumbe iwakali mulinkako, alimwi bakatalika kwaambila bantu bakali kukanana mwaambo wa Chikannada. Kumatalikilo aakuma 1950,  kabunga kasyoonto kakwiiya kakakomena akuba mbungano yakusaanguna yamwaambo wa Chikannada mu Bombay.

Bataata abamaama bakatuyiisya swebo tobana kuyandisisya kubala Bbaibbele akuba bamayi bayiisya kabotu. Buzuba abuzuba bakali kujana ciindi cakupaila alimwi akwiiya andiswe. (Deuteronomo 6:6, 7; 2 Timoteyo 3:14-16) Bumwi buzuba nindakali kubala Bbaibbele ndakazyiba ikaambo Jehova ncaambwa kuti mweembezi. Ndakayiya kuti Jehova ukozyanisyigwa amweembezi nkaambo ulasololela, ulasanina, alimwi ulakwabilila bakombi bakwe.—Intembauzyo 23:1-6; 83:18.

Jehova Wandisololela Kabotu-kabotu

Ndakabbapatizyigwa mbowakamanina buyo muswaangano utakalubwi iwakacitika mu Bombay mu 1956. Nikwakainda myezi iili cisambomwe, ndakatobela cikozyanyo camupati wangu musankwa Prabhakar akuba mukambausi waciindi coonse. Nokuba kuti ndakaliyandide kwaambila bantu kasimpe kamu Bbaibbele, ndakali kuyoowa kapati kufwumbwa ciindi nindakali kuyanda kwaambaula abantu kujatikizya nzyondakali kusyoma. Ndakali kubbabbalika kwaambaula, alimwi ijwi lyangu lyakali kudedema. Ndakalila akwaamba kuti: Ndilakonzya kuucita mulimo ooyu kwiinda buyo mukugwasyigwa a Jehova!

Jehova wakandigwasya kwiinda mubamisyinali ba Homer alimwi aba Ruth McKay ibakazwa kucisi ca Canada, balo ibakanjila cikolo cabamisyinali ca Bakamboni ba Jehova mu New York, U.S.A., mu 1947. Bakandigwasya mumbazu zyoonse zyabukambausi nindakatalika mulimo wakukambauka. Twakali kulibambila aba Ruth mbotwakali kukonzya kucita bukambausi bwakuŋanda aŋanda. Bakalizyi kabotu-kabotu bwakundikkazyika moyo. Kabandijisi mumaanza aangu aakali kubimba, bakali kwaamba kuti: “Utalibiliki musa. Atusoleke aŋanda iimbi.” Ijwi lyabo libombe lyakandikkazyika moyo.

Bumwi buzuba, ndakaambilwa kuti ba Elizabeth Chakranarayan, ibakali bapati alimwi ibakacibwene kuyiisya Bbaibbele, bakali kuyooba babelesima mumulimo wakukambauka. Kusaanguna ndakayeeya kuti: ‘Ino ndiyoocikonzya buti kukkala amucizyi ooyu? Mupati kapati kwiinda ndime!’ Pele bakazikuba muntu ngondakali kuyanda kubeleka limwi.

“Tatuli Tolikke Pe”

Mulimo wesu wakusaanguna wakali kudolopo litakalubwi lya Aurangabad, makkilomita aatandila 400 kujwe lya Bombay. Tiilyakalampa, twakazyiba kuti twakali buyo tobilo Tobakamboni mudolopo lyabantu batandila ku 1 miliyoni. Kunze lyaboobo, ndakeelede kwiiya mwaambo wa Cimarathi, mwaambo iwakali kubelesyegwa kapati mudolopo eeli.

Zimwi ziindi, ndakali kulimvwa kulendelelwa alimwi ndakali kulila mbuli mwana uutajisi banyina. Pele jwi lyaba Elizabeth libombe, lyakali kundikulwaizya. Bakali kwaamba kuti: “Zimwi ziindi tulakonzya kulimvwa kulendelelwa, pele tatuli tolikke pe. “Nokuba kuti uli kule ankobabede beenzinyoko alimwi amukwasyi wako, Jehova ulaanduwe lyoonse. Umupange kuba mulongwe wako, mpoonya kulendelelwa kwako kulamana.” Lulayo lwabo ndilalubikkila maano kusikila mazuba aano.

Ciindi nitwakajisi mali masyoonto aakukkwezya, twakali kweenda makkilomita aali 20 buzuba abuzuba katwiinda mukasuko amumankandya, muzuba amumpeyo. Ciindi cacilimo, kupya kwakali kusika ku 40°C. Ciindi camainza, masena amwi aamucilawo akali kuba amankandya myezi minji. Nokuba boobo, kanji-kanji twakali kujana kuti nzyobakali kuyeeya bantu kujatikizya zilengwa ncecintu cakali kukatazya kapati kwiinda mbokwakali kuca.

Bamakaintu taakwe nobakali kubandika abamaalumi mubuleya ccita kuti kabali basazinyina, alimwi kanji-kanji bamakaintu tiibakali kuyiisya bamaalumi. Aboobo twakali kusampaulwa akupenzyegwa. Mumyezi iili cisambomwe yakusaanguna,  twakali kuswaangana buyo tobilo kumiswaangano ya Bbaibbele yansondo ansondo. Mukuya kwaciindi, bantu bakajisi luyandisisyo bakatusangana. Tiikwakainda ciindi cilamfwu kabunga kasyoonto kakatalika. Bamwi bakatalika kutusangana mumulimo wakukambauka.

“Kozumanana Kuyungizya Luzyibo Lwako”

Nikwakainda myaka yobilo acisela, twakaambilwa kuyoobelekela ku Bombay. Ciindi ba Elizabeth nibakazumanana mumulimo wakukambauka, mebo ndakaambilwa kuyoogwasya bataata, balo bakali basanduluzi balikke bamabbuku aamba zyamu Bbaibbele aamumwaambo wa Chikannada. Bakalukkomanina lugwasyo lwangu akaambo kakuti bakali amikuli minji mumbungano.

Mu 1966, bazyali bangu bakayanda kupiluka ku Udipi, nkotwakali kukkala kaindi. Nibakali kuzwa mu Bombay, bataata bakaamba kuti: “Kozumanana kuyungizya luzyibo lwako mwanaangu. Kosandulula kabotu alimwi zilimvwisya. Koba muntu ulicesya lyoonse alimwi utanoolisyomi. Kosyoma Jehova.” Oolu ndolwakali lulayo lwabo lwamamanino nkaambo nobakajokela buyo ku Udipi bakaakufwa. Ndasoleka kucita mbubwenya oobo mumulimo wangu wakusandulula kusikila mazuba aano.

“Sena Toyandi Kuba Amukwasyi?”

Kweelana acilengwa, bazyali bakucisi ca India babambila bana babo zikwati ciindi nibacili baniini alimwi babakulwaizya kuti bakabe amukwasyi. Aboobo, kanji-kanji ndakali kubuzyigwa kuti: “Sena toyandi kuba amukwasyi? Ino nguni uyookubamba waakucembaala? Sena tonakulendelelwi?”

Zimwi ziindi ndilimvwa kulibilika akaambo kazyintu eezyi nzyobakali kwiinduluka kwaamba. Nokuba kuti tiindakali kulitondezya kubantu mbondakali kulimvwa, ndakali kupaila kuli Jehova nendili ndelikke. Ndakaumbulizyigwa kuzyiba kuti Jehova taakwe naakali kundibona kuti ndilibulide akaambo kakutakwatwa. Kutegwa ndibukulusye makanze aangu aakumubelekela kakunyina kunyonganizyigwa, ndakayeeya mwana musimbi wa Jefita watakakwatwa alimwi a Jesu watakakwata, ibakalyaabide kucita kuyanda kwa Leza.—Johane 4:34.

Cipego Kuzwa Kuli Leza

Mebo aba Elizabeth twakazumanana kuba balongwe kwamyaka iitandila ku 50. Bakafwa mumwaka wa 2005, kabajisi myaka yakuzyalwa iili 98. Akaambo kakuti tiibakacili kukonzya kubala Bbaibbele akaambo kakutabona kabotu, ziindi zinji bakali kupaila kuli Leza kuzwa ansi amoyo kwaciindi cilamfwu. Zimwi ziindi ndakali kuyeeya kuti ambweni bakali kubandika lugwalo amuntu umwi muŋanda yabo, pele kujana buyo kuti bakali kubandika a Jehova. Bakali kumubona kuti nkwali ncobeni, alimwi bakali kupona mbuli kuti bakali limwi. Ndakayiya kuti eeyi njenzila iigwasya mukubelekela Jehova cakutazungaana mbuli mwana musimbi wa Jefita mbwaakacita. Ndilamulumba kapati Jehova akaambo kakundipa mucizyi mupati uusimide wakali kundiyiisya akundikulwaizya ciindi nendakacili mwana alimwi amumapenzi aangu oonse.—Mukambausi 4:9, 10.

Eelo kaka ndalongezyegwa akaambo kakubelekela Jehova mbubwenya mbuli mwana musimbi wa Jefita mbwaakalongezyegwa! Kutakwatwa alimwi akutobela lulayo lwamu Bbaibbele kwandigwasya kuti ndipone buumi bulaampindu, akuzumanana “kubelekela Mwami lyoonse kakunyina kunyonganizyigwa.”—1 Bakolinto 7:35.

[Cifwanikiso icili apeeji 22]

Bataata kabapa makani aabuleya ku Bombay muma 1950

[Cifwanikiso icili apeeji 22]

Kandili aba Elizabeth kabatanafwa

[Cifwanikiso icili apeeji 23]

Kwaambilizya makani aa Bbaibbele ku Bombay mu 1960

[Cifwanikiso icili apeeji 23]

Kandili antoomwe ababelesima muofesi yakusandulwida