Balebeta Ukuti “Abana Abakalipa Kwati Kubulukuta kwa Mfula”
Fundeni Abana Benu
Balebeta Ukuti “Abana Abakalipa Kwati Kubulukuta kwa Mfula”
NGA ca kuti kuli imfula iikalamba iya cimwela, limo ilabulukuta sana no kupanta. Bushe ukubulukuta no kupanta kwa mfula kwalikutiinyapo?— * Yesu ainike abasambi bakwe babili ukuti “Abana abakalipa kwati kubulukuta kwa mfula.” Leka tumone umulandu abenikile ili shina.
Aba abasambi ba kwa Yesu babili ni Yakobo na Yohane. Bali ni bamunyina, shibo ali ni Sebede kabili nyinabo ali ni Salome. Nalimo Salome ali ni nkashi nankwe wa kwa Maria, nyina wa kwa Yesu. Kanshi Yesu, Yakobo na Yohane nalimo bali pali bumunyina kabili ilyo balekula bafwile bali ifibusa sana.
Sebede ali mulondo we sabi, Yakobo na Yohane na bo bene bali balondo. Yakobo na Yohane bali pa basambi abo Yesu abalilepo ukusala. Ilyo Yesu abetile, ilyo line fye balishile ubukwebo bwabo ubwe sabi no kukonka Yesu. Pa numa, Yesu asalile abasambi 12 ukuba abatumwa bakwe. Yakobo na Yohane bali pali aba 12.
Ilyo kwashele imyeshi iinono ninshi Yesu tabalamwipaya, aile na batumwa bakwe ku ncende ya mpili iya Samaria. Bwaile buleila, kabili bonse balinakile. Lelo abena Samaria balikeene ukuti Yesu na basambi basendame mu musumba wabo. Bushe nawishiba umulandu bakaanine?—Leka tumone.
Yesu na batumwa bakwe bali baYuda, kabili abaYuda abengi balipatile abena Samaria. Nomba ifi te fyo Yesu aali. Alibatemenwe, kabili e fyo Yakobo na Yohane nabo balingile ukubatemwa. Lelo aba basambi balifuliilwe abena Samaria abakeene ukubapokelela, kabili baipwishe Yesu ukuti: “Bushe mulefwaya twebe umulilo wike ukufuma ku muulu no kuboca?” Bushe uletontonkanya ukuti finshi Yesu abaswike?— Abebele ukuti balilufyenye pa kulanda ifi! Yakobo na Yohane balingile ukusambilila na fimbi pa kuba no luse.
Ubwafya bumbi ubukalamba ubo Yakobo na Yohane bakwete bwa kuti balefwaya ukuba aba ntanshi, ukuba abacindama sana. Ilyo kwashele fye panono ukuti Yesu afwe, batumine nyinabo kuli Yesu ku kumweba ukuti: “Soseni ukuti aba bana bandi babili bakekale, umo ku kulyo kwenu na umbi ku kuso kwenu, mu bufumu bwenu.” Ilyo abatumwa bambi 10 baumfwile ifyacitile Yakobo na Yohane, balikalipe nga nshi. Bushe na iwe nga walikalipe?—
Nalimo nga walikalipe. Tatutemwa nga ca kuti bambi balefwaya ukuba aba ntanshi no kufwaya ukuba abacindama ukucila abanabo. Lelo pa numa, Yakobo na Yohane balishileishiba ukuti balilufyenye no kuti tabali no luse, kabili balyalwike. Baishileba abatumwa abali no kutemwa, ne cikuuku. Finshi twingasambililako kuli ili lyashi?—
Ico twasambililako kuli Yesu ca kutila na ifwe tufwile ukuba ne cikuuku ku banensu. Yesu ali ne cikuuku ku bantu bonse, abaume, abanakashi na bana. Bushe lyonse ukalaibukisha ifyo Yesu aali no kulaesha na maka yobe yonse ukulamupashanya?—
Belenga muli Baibolo yobe
Mateo 27:55, 56; Marko 15:40, 41
Yohane 4:4-15, 21-26; Luka 9:51-55
Mateo 20:20-24; Marko 10:35-37, 41
[Futunoti]
^ para. 3 Nga ca kuti mulebelengela capamo na bana, apo mulesanga bashilile fye ninshi mufwile mwalolelako pa kuti abana balandepo.
