DALA ruma kuandu tempu udan, ita bele rona rai-tarutu makaʼas. Ó sente taʼuk kuandu rona rai-tarutu ka lae?— * Jesus bolu ninia dixípulu naʼin-rua nuʼudar “rai-tarutu nia oan”. Entaun, mai ita haree tanbasá nia bolu sira hanesan neʼe.

Jesus nia dixípulu naʼin-rua neʼe mak Tiago no João. Sira mak Zebedeu no Salomé nia oan-mane sira. Karik Salomé mak Maria, Jesus nia inan nia alin. Entaun Jesus, Tiago, no João karik primu no ita bele fiar katak sira sai belun diʼak husi tempu neʼebé sira kiʼik.

Tiago no João mak peskadór hanesan ho sira-nia aman Zebedeu. Jesus hili sira naʼin-rua atu sai ninia eskolante primeiru. Kuandu Jesus konvida sira, sira husik kedas sira-nia serbisu nuʼudar peskadór hodi tuir nia. Kuandu Jesus hili ema naʼin-12 husi ninia eskolante atu sai nuʼudar ninia apóstolu sira, nia mós hili Tiago no João.

Fulan balu antes ema oho Jesus, nia ho ninia apóstolu sira laʼo liuhusi Samaria, rai neʼebé iha foho barak. Kuandu besik rai-nakaras ona, sira hotu sente kole tebes. Maibé ema samaritanu sira dehan katak sira lakohi Jesus no ninia apóstolu sira atu toba iha sira-nia sidade. Ó hatene tanbasá?— Mai ita haree.

Jesus no ninia apóstolu sira mak ema judeu, no ema judeu barak la gosta ema samaritanu. Klaru katak Jesus la hanesan neʼe. Nia hatudu laran-diʼak ba sira. Tiago no João mós presiza halo nuneʼe. Maibé sira naʼin-rua sai hirus ba  ema samaritanu sira neʼebé lakohi simu sira, no sira husu Jesus: ‘Ita hakarak ami hamulak atu ahi tun hodi han sira?’ Tuir ó-nia hanoin, Jesus hatán oinsá?— Nia hatete katak sira labele koʼalia aat hanesan neʼe! Sin, Tiago no João presiza atu aprende tan kona-ba oinsá atu hatudu laran-sadiʼa.

Problema ida tan neʼebé Tiago no João iha mak sira hakarak sai ema neʼebé importante liu. Lakleur antes Jesus mate, sira haruka sira-nia inan atu husu ba Jesus hodi fó fatin ba sira naʼin-rua atu tuur besik Jesus nia kadunan iha ninia ukun, ida iha ninia sorin loos no ida seluk iha ninia sorin karuk. Kuandu apóstolu naʼin-sanulu rona kona-ba buat neʼebé Tiago no João halo, sira sai hirus. Ó mós sei sai hirus se ema halo hanesan neʼe ba ó ka lae?—

Sin, karik ó mós sei sai hirus. Ita hotu la gosta kuandu ema seluk hakarak sai importante liu. Ikusmai, Tiago no João rekoñese katak sira halo sala no la hatudu laran-diʼak. Sira komesa troka sira-nia hahalok no sai ema neʼebé hatudu domin no laran-diʼak. Ita bele aprende saida husi istória neʼe?—

Buat neʼebé ita bele aprende husi Jesus mak ita mós tenke hatudu laran-diʼak ba malu. Jesus hatudu laran-diʼak ba ema hotu, inklui mane, feto no labarik sira. Ó mós hakarak atu halo tuir ninia ezemplu?—