Ohejavaʼekue espíritu sánto oisãmbyhy chupekuéra
Ohejavaʼekue espíritu sánto oisãmbyhy chupekuéra
‘Jehová, opa mbaʼe Jára chemondo ha omeʼẽ chéve ijespíritu’ (ISA. 48:16, NM)
1, 2. Mbaʼépa ikatu jajapo jajerovia hag̃ua, ha mbaʼéichapa ñanepytyvõta umi tapicha ojeroviaitéva rembiasakue?
ABEL tiémpo guive oĩ heta kuimbaʼe ha kuña ojerovia mbaretéva Ñandejárare, péro upéicha avei oĩ heta tapicha ndojeroviaivaʼekue. Upévare la Biblia heʼi: ‘Ndaopavavéi ningo ojerovia’ (2 Tes. 3:2, BNP). Mbaʼéichapa ikatu jajerovia Jehováre ha ñaneñeʼẽrendu chupe ñande pyʼaite guive? “Jajerovia niko ñahendu rire ae pe marandu.” Upévare iñimportánte ñahesaʼỹijo Ñandejára Ñeʼẽ (Rom. 10:17). Avei pe jerovia ou espíritu sántogui (Gál. 5:22, 23). Upéicha rupi ñaikotevẽ pe espíritu jajerovia mbarete hag̃ua.
2 Oĩ oimoʼãva umi tapicha iñeʼẽrendu ha ojeroviaitevaʼekue onaséma hague voi upéicha. Péro haʼekuéra ‘ñandeichaguánte’ avei (Sant. 5:17). Opavave yvypóraicha sapyʼánte ipyʼamokõi, okyhyje ha ikangy. Péro Ñandejára espíritu ‘omombarete jey’ koʼã tapichápe ha upéicha rupi ombohovái porã opa mbaʼe ojopy ha omyangekóiva chupekuéra (Heb. 11:34). Ñahesaʼỹijomína umi tapicha rembiasakue ha jahecha mbaʼéichapa oipytyvõ chupekuéra Jehová puʼaka. Koʼã ehémplo ñanemokyreʼỹta jagueropuʼaka hag̃ua ko tiémpo ijetuʼuetéva ha ñambohovái hag̃ua umi mbaʼe ikatúva omokangy ñande jerovia.
Espíritu sánto omombarete Moiséspe
3-5. a) Mbaʼéichapa jaikuaa Moisés ojapo hague hembiapo espíritu sánto rupive? b) Mbaʼépa ñaaprende jahechávo Jehová oiporu hague ijespíritu oipytyvõ hag̃ua Moiséspe?
3 Áño 1513-pe, Jesús ou mboyve, ojeʼevaʼekue Moisés rehe: “Haʼeichagua ipyʼaporãva ndaipóri ko yvy ape ári” (Núm. 12:3). Jehová oiporavo ko kuimbaʼe imarangatuetévape omotenonde hag̃ua umi Israelguápe. Okumpli porãtapa upe tembiapo tuichaitéva? Espíritu sánto rupive haʼe oservi proféta ha huésramo. Avei ohai Ñandejára kuatiañeʼẽ, omoakã hetãyguakuérape ha ojapo milágro (elee Isaías 63:11-14). Péro peteĩ jey Moisés heʼi ndaikatuveimaha ogueropuʼaka hembiapokuéra (Núm. 11:14, 15). Upémarõ Jehová ‘oipeʼa chugui michĩmi espíritu sánto’ ha omeʼẽ 70 kuimbaʼépe oipytyvõ hag̃ua chupe (Núm. 11:16, 17). Mbaʼépa ohechauka ñandéve upéva? Ipohýiramo jepe Moisés rembiapo, jahechakuaa haʼe nombaʼapói hague haʼeño, oipytyvõ chupe Ñandejára espíritu, ha upe espíritu oipytyvõ avei umi 70 kuimbaʼépe.
4 Ñandejára omeʼẽkuri Moiséspe ijespíritu sánto ojapopaite hag̃uáicha umi tembiapo omandavaʼekue chupe. Ha oipeʼáramo jepe chugui michĩmi, Moisés oreko gueteri oikotevẽva ojapo hag̃ua hembiapo. Ndofaltái chupe espíritu sánto ni nahembýi umi 70 ansiánope. Jehová katuete omeʼẽ ijespíritu hembiguaikuérape oikotevẽhaichaite. La Biblia heʼi voi Ñandejára ‘omeʼẽha ñandéve hetaiterei mbaʼe porã’ ha ‘ipojeraha omeʼẽvo espíritu sánto’ (Juan 1:16; 3:34, NM).
5 Rehasapareína umi mbaʼe ijetuʼúva? Haʼetépa koʼẽ koʼẽre nerembiapo hetaveha ha nanetiempovéi mbaʼeverã? Ipohýipa ndéve remantene ne família ha reñangareko ijeroviáre nderasy térã nemboriahúgui? Hetaitereípa ne rembiapo kongregasiónpe? Aníke nderesarái reikotevẽrõ, Jehová katuete nemombaretetaha ijespíritu rupive (Rom. 15:13).
Espíritu sánto ombokatupyry Bezalélpe
6-8. a) Mbaʼépa ojapo Bezalel ha Oholiab espíritu sánto rupive? b) Mbaʼépa ohechauka avei Ñandejára espíritu oisãmbyhy hague Bezalel ha Oholiábpe? c) Mbaʼérepa ñanemokyreʼỹ Bezalel rembiasakue?
6 Ñandejára espíritu ikatu avei ñanepytyvõ ambue hendáicha. Jahechamína mbaʼéichapa oipytyvõrakaʼe Bezalélpe, oikovaʼekue Moisés tiémpope (elee Éxodo 35:30-35). Ko kuimbaʼépe oñemanda ojapo hag̃ua opaite mbaʼe ojeporútava tavernákulope. Ikatupyrýpa haʼe ojapo hag̃ua ko tembiapo tuichaitéva? Ndajaikuaái. Amalisia Bezalel ladríllo apohánte vaʼekue Egíptope (Éxo. 1:13, 14). Mbaʼéichapa upéicharõ okumpli umi mbaʼe ojejeruréva chupe? Ñandejára “omyenyhẽ chupe ijespíritugui, omoarandu ha ombokatupyry hag̃ua chupe opaichagua mbaʼe apópe. [...] Ojapo hag̃ua opaichagua tembiapo katupyrýpe oñekotevẽva guive”. Oiméramo jepe haʼe ojapokuaa voi heta mbaʼe, Ñandejára ombokatupyryve chupe ijespíritu rupive ha omovakeáno avei iñirũ Oholiábpe. Katuete mokõivéva ivaletereíneraʼe. Hiʼarive Jehová ‘ombokatupyry chupekuéra oporomboʼe hag̃ua’, upéicha rupi ombosakoʼi heta tapichápe oipytyvõ hag̃ua chupekuéra.
7 Mbaʼépa ohechauka avei espíritu sánto oisãmbyhy hague Bezalel ha Oholiábpe? Umi mbaʼe ojapovaʼekue hikuái ndaijojahái, iporãiterei ha are oiko; 500 año rire ojeporúnte gueteri (2 Cró. 1:2-6). Koʼã kuimbaʼe ndojoguái umi artísta famóso koʼag̃aguápe, ndoikói omoĩ ifírma umi hembiapokuére ojekuaa hag̃ua chupekuéra. Haʼekuéra oipotaiteve oñemombaʼeguasu Jehovápe (Éxo. 36:1, 2).
8 Koʼág̃a rupi oĩ avei heta ojapóva umi tembiapo hasýva oipytyvõ hag̃ua ermanokuérape. Pór ehémplo, oĩ heta omopuʼãva Salón térã sukursál, oimprimi ñane puvlikasionkuéra, ombaʼapo ojejapo hag̃ua aty guasu ha oipytyvõ ermanokuérape opytáva ogaʼỹre oiko rire torménta, ama guasu térã yvyryrýi. Avei oĩ omyesakãva doktorkuérape mbaʼérepa testígo de Jehová nomoĩukái tuguy. Koʼã ermáno sapyʼánte ndahaʼéi profesionál, síno oñembokatupyrýnte chupekuéra ojapo hag̃ua umi tembiapo. Opa koʼã mbaʼe osẽ porãmba Ñandejára espíritu rupive. Ha ñande, jakyhyjépa sapyʼánte jajapo hag̃ua peteĩ tembiapo oñemeʼẽséva ñandéve Jehová servísiope ha jaʼe oñemeʼẽnte hag̃ua ambue ikatupyryvévape? Oiméramo upéicha, ani ñanderesarái ijespíritu rupive Jehová ikatuha ñanemoarandu ha ñanembokatupyry ñambaʼapo hag̃ua chupe g̃uarã.
Jehová espíritu oisãmbyhy Josuépe osẽ porã hag̃ua chupe opa mbaʼe
9. Mbaʼe situasiónpepa ojecha umi isrraelíta osẽ riremi Egíptogui, ha mbaʼépa oikotevẽkuri hikuái?
9 Jahechamína mbaʼéichapa Ñandejára espíritu oisãmbyhy avei ambue kuimbaʼépe oikovaʼekue Moisés ha Bezalel tiémpope. Umi isrraelíta osẽ riremi Egíptogui, umi Amaleqgua opuʼã hesekuéra. Upérõ Ñandejára puévlo noñorairõi gueteri ni peteĩ gérra ha ndaikatupyrýi upearã, péro koʼág̃a oñorairõmantevaʼerã hikuái oñedefende hag̃ua (Éxo. 13:17; 17:8). Mávapa omoakãta pe ehérsito?
10. Mbaʼéicha rupípa Josué ha ijehérsito ogana pe gérra?
10 Josuépe ojeporavovaʼekue omoakã hag̃ua pe ehérsito. Haʼépa ojapómava voi upéva ajeve ojeporavo chupe? Nahániri. Jaikuaa haʼe ombaʼapo pohýi hague, ojapo ladríllo ha ombyaty mana. Péro ijavuélo Elisamá katu ikatupyry omoakã hag̃ua peteĩ ehérsito. Mbaʼérepa? Haʼe omotenondemavaʼekue Efraín trívu, ha amalisia orekókuri ipoguýpe peteĩ rrehimiénto tuicháva Israélpe, oĩháme 108.100 kuimbaʼe (Núm. 2:18, 24; 1 Cró. 7:26, 27). Péro Ñandejára ndoiporavói Elisamá ni itaʼýra Núnpe. Upéva rangue heʼi Moiséspe oiporavo hag̃ua Josuépe. Haʼe omoakãta pe ehérsito ohundítava iñenemigokuérape. Upérõ oñorairõ hikuái un día pukukue. Josué iñeʼẽrendu ha oheja Ñandejára espíritu oisãmbyhy chupe, ha upéicha rupi Israel ogana upe gérra (Éxo. 17:9-13).
11. Mbaʼépa jajapovaʼerã osẽ porã hag̃ua ñandéve opa mbaʼe Ñandejára servísiope?
11 Espíritu sánto rupive Josué “henyhẽ arandúgui”, ha Moisés omano rire haʼe omoakã Israel (Deu. 34:9). Pe espíritu nombokatupyrýi chupe oprofetisa ha ojapo hag̃ua milágro Moisés ojapo haguéicha. Péro oipytyvõ chupe ikatu hag̃uáicha omotenonde Israel ojagarra hag̃ua Canaán. Ko ehémplo tuicha ñanemokyreʼỹta sapyʼánte ñapensáramo nañandekatupyryiha jajapo hag̃ua peteĩ tembiapo Ñandejára servísiope. Josué ojapo haguéicha, jajapóramo opa mbaʼe Jehová heʼihaichaite katuete osẽ porãta ñandéve (Jos. 1:7-9).
Ñandejára “puʼaka omyenyhẽ Gedeónpe”
12-14. a) Mbaʼépa ñanemboʼe umi 300 isrraelíta oganavaʼekue umi madianítape? b) Mbaʼéichapa Jehová omombarete Gedeón jerovia? c) Mbaʼéichapa Jehová ñanemombarete koʼág̃a?
12 Josué omano rire, Jehová osegi oiporu ijespíritu omombarete hag̃ua hembiguaikuéra iñeʼẽrendúvape. Juécespe oñemombeʼu heta kuimbaʼe rembiasakue, “ikangýramo jepe imbarete jey” vaʼekue (Heb. 11:34). Umíva apytépe oĩ Gedeón. Ijespíritu rupive, Jehová omomýi chupe oñorairõ hag̃ua Israel rehehápe (Jue. 6:34). Gedeón ombyaty heta soldádo oñorairõ hag̃ua, upéicharõ jepe Madián ehérsito cuatro vése tuichave chuguikuéra. Péro Jehová heʼi Gedeónpe hetamaha umi soldádo ombyatýva, ha dos vése ojerure chupe omomichĩve hag̃ua ijehérsito. Amo ipahápe opyta 300 isrraelíta oñorairõ hag̃ua 135.000 madianíta kóntrape (Jue. 7:2-8; 8:10). Mbaʼépa opensa Jehová ajeve ojapouka chupe upéicha? Haʼe ndoipotái umi isrraelíta oñemombotuicha térã heʼi iñarandu ha ikatupyrýgui ogana hague.
13 Epensamína nde reimeha Gedeón soldadokuéra apytépe ha oñepyrũ potaitemaha pe gérra. Mbaʼéichapa reñeñandúta? Ndepyʼaguasútapa reikuaágui umi soldádo oĩva nendive ndaipyʼajúi ha oñorairokuaaha? Térãpa nderyʼairoʼỹsãmbáta ndereikuaáigui mbaʼépa oikóta? Gedeón ni michĩmi ndokyhyjéi ha ojapo opa mbaʼe Jehová heʼihaichaite (elee Jueces 7:9-14). Haʼe ojerurékuri Ñandejárape peteĩ señál oikuaa hag̃ua oĩha hendive (Jue. 6:36-40). Péro Jehová ndaipochýi upévare, ohechauka katu chupe pe señál ikatu hag̃uáicha omombarete ijerovia.
14 Jehová ikatu ojapo oimeraẽ mbaʼe oporosalva hag̃ua. Ijetuʼuvéramo jepe hembiguaikuéra ohasáva, ikatu oiporu oimeraẽvape oipytyvõ hag̃ua chupekuéra, umi ikangyvévare jepe haʼe ojevalekuaa. Sapyʼánte jahecha umi ndaijaʼéiva ñanderehe hetaitereiveha ñandehegui, térã ojoʼapa ñane provléma ha ñañeñandu vaieterei. Mbaʼépa jajapóta upéicha jave? Ndaikatúiramo jepe ñahaʼarõ peteĩ milágro, Gedeónpe ojehechauka haguéicha, jaikuaa Jehová ñanepytyvõ ha ñanekonsolaha Iñeʼẽ ha iñorganisasión rupive (Rom. 8:31, 32). Umi mbaʼe porã haʼe oprometéva omombarete ñande jerovia ha ohechauka ñanepytyvõtaha ñaikotevẽ jave.
Jehová “espíritu ou Jefté ári”
15, 16. Mbaʼépa oipytyvõ Jefté rajýpe oñemeʼẽmbaite hag̃ua Jehová servísiope, ha mbaʼépa omboʼe upéva tuvakuérape?
15 Jahechavemína ambue ehémplo. Tiémpo rire, umi Israelgua oñorairõtarõ guare umi ammoníta ndive, Jehová “espíritu ou Jefté ári”. Haʼe oganaseterei upe ñorairõ oñemombaʼeguasu hag̃ua Jehová réra. Upévare opromete oganáramo omeʼẽtaha Jehovápe pe osẽ raẽvéva orresivi chupe og̃uahẽ rire ñorairõhágui. Mbaʼépa oiko upe rire? Og̃uahẽvo hógape, itajýra raẽvete osẽ hendápe (Jue. 11:29-31, 34, ÑÑB). Mbaʼépa ojapo Jefté? Amalisia haʼe ohaʼarõma voi oiko upéva peteĩnte ifamília rupi. Upéicharõ jepe okumpli iñeʼẽ ha ogueraha itajýra Silópe oservi hag̃ua Jehová tavernákulope. Avei itajýra iñeʼẽrendu Jehovápe ha oikuaa porã itúva okumplimantevaʼerãha oprometevaʼekue (elee Jueces 11:36). Ha Ñandejára espíritu omombarete mokõivévape ojapo hag̃ua upéva.
16 Mbaʼépa oipytyvõ Jefté rajýpe ojerovia mbarete ha oservi hag̃ua Jehovápe ipyʼaite guive? Oiméne ohecha mbaʼéichapa itúva omombaʼe ha odefende Jehová réra. Tuvakuéra, mbaʼépa penemboʼe upéva? Tekotevẽha pemoĩ ehémplo porã pene famíliape. Ohechakuaavaʼerã hikuái pegueroviaha umi mbaʼe pemboʼéva chupekuéra. Avei pemboʼe lájare, pene ñemboʼére ha iñimportanteveha katu, pende rekovére ojekuaavaʼerã pehayhuha Jehovápe pende pyʼaite guive. Haʼekuéra ohechávo upéva katuete oserviséta avei Jehovápe. Ajépa penembovyʼaiténe upéva!
‘Jehová puʼaka omombarete Sansónpe’
17. Mbaʼépa ojapo Sansón Jehová espíritu rupive?
17 Koʼág̃a jahecháta mbaʼéichapa Ñandejára puʼaka oipytyvõ Sansónpe. Upe tiémpope isrraelitakuéra hoʼa umi filistéo poguýpe, ha ‘Ñandejára espíritu’ oñepyrũ oipytyvõ Sansónpe omosãso hag̃ua chupekuéra (Jue. 13:24, 25, ÑÑB). Jehová omombareteterei chupe ojapo hag̃ua heta mbaʼeguasu. Peteĩ jey umi filistéo ojerure heta isrraelítape ontrega hag̃ua chupekuéra Sansón, ha ojapo hikuái upéva. Péro ‘Ñandejára puʼaka omombarete Sansónpe ha inimbo okairamoguáicha omboyku umi ipyapy jokuaha’ (Jue. 15:14). Upéi haʼe ou ojavy noñatendéi rupi; upéicharõ jepe Jehová omombarete jey chupe ohechakuaágui ojeroviaha hese (Heb. 11:32-34; Jue. 16:18-21, 28-30). Upérõ Jehová omeʼẽ chupe ijespíritu ojapo jey hag̃ua peteĩ mbaʼe tuicháva. Ñane tiémpope ñande nañahaʼarõi pe espíritu ñanemombarete upeichaite, péro ñahesaʼỹijóramo hembiasakue ñanepytyvõta ñamombarete hag̃ua ñande jerovia.
18, 19. a) Mbaʼéichapa omombarete ñande jerovia Sansón rembiasakue? b) Mbaʼéichapa nepytyvõ rehesaʼỹijo rire umi ehémplo jahechavaʼekue?
18 Pe espíritu sánto oipytyvõ haguéicha Sansónpe, koʼág̃a avei ñanepytyvõ heta hendáicha. Upéicha rupi ikatu jajapo Jesús omandavaʼekue: ‘ñamombeʼu opaite tetãyguakuérape’ pe marandu porã (Hech. 10:42, ÑÑB). Ko tembiapópe oike heta mbaʼe ha hetápe ijetuʼu okumpli porã hag̃ua oimoʼãgui ndaikatupyryiha, péro pe espíritu sánto ñanepytyvõ. Ajépa tuichaite mbaʼe upéva! Ñañeñandu Isaías oñeñandu haguéicha. Haʼe heʼi: ‘Jehová, opa mbaʼe Jára chemondo ha omeʼẽ chéve ijespíritu’ (Isa. 48:16). Kyreʼỹme ñambaʼapovaʼerã Ñandejára espíritu ñanemondo rupi. Jehová katuete ñanembokatupyryvéta, ojapo haguéicha Moisés, Bezalel ha Josué rehe. ‘Jareko Ñandejára Ñeʼẽ ku kyse pukúicha, espíritu sánto omeʼẽva ñandéve’ jaikuaágui ñanemombaretetaha Gedeón, Jefté ha Sansónpe omombarete haguéicha (Efe. 6:17, 18). Ha jahasáramo umi mbaʼe ijetuʼúva jajerurevaʼerã Jehovápe tañanepytyvõ, upéicha ñande jerovia imbaretéta Sansón imbarete haguéicha.
19 Jaikuaa porã Jehová katuete ovendesitaha opavave ipyʼaguasúvape ha odefendéva umi mbaʼe ogueroviáva. Jahejáramo ijespíritu sánto ñanesãmbyhy, ñande jerovia imbaretevéta ára ha ára. Pe artíkulo oúvape ñahesaʼỹijóta ehémplo oĩva Escrituras Griégaspe. Katuete ñanemombaretéta jahechávo mbaʼéichapa pe espíritu sánto oĩ Ñandejára rembiguaikuéra síglo primeropeguándi, Pentecostés áño 33 rire ha upe mboyve avei.
Mbaʼéichapa Ñandejára espíritu oipytyvõ koʼã kuimbaʼépe ha mbaʼépa ñanemboʼe?
• Moisés
• Bezalel
• Josué
• Gedeón
• Jefté
• Sansón
[Porandu ñahesaʼỹijóva]
[Komentário oĩva páhina 22-pe]
Jehová espíritu ikatu omombarete ñande jerovia Sansónpe omombarete haguéicha
[Nóta oĩva taʼanga ndive páhina 21]
Umi mitã katuete osegi ituvakuéra ehémplo
