Pathian Thlarauva Kaihhruai Hmân Lai Mi Rinawmte
Pathian Thlarauva Kaihhruai Hmân Lai Mi Rinawmte
“LALPA Pathian chuan keimah leh a thlarau chu min tîr ta a.”—IS. 48:16.
1, 2. Rinna târ lang tûrin eng nge kan mamawh a, hmân lai mi rinawmte chanchin ngaihtuahna chu engtin nge kan hlâwkpui ang?
ABELA hun lai aṭang tawhin rinna nei an awm tawh chung pawhin, “mi zawng zawng chuan rinna an nei vek . . . lo.” (2 Thes. 3:1, 2) Engvângin nge miin chu mizia chu a neih a, engin nge rinawm taka awmtîr? Rinna chu Pathian Thu hriatna avânga lo awm a ni deuh ber a. (Rom 10:17) Chu chu Pathian thlarau thianghlim rah pêng pakhat a ni. (Gal. 5:22, 23) Chuvângin, rinna nei a, târ lang tûr chuan thlarau thianghlim kan mamawh a ni.
2 Rinna nei ahmei apate chu rinna pianpui ang hrima kan ngaih chuan a dik lo hle ang. Bible-a an chanchin kan hmuh mi entawn tlâk takte chu “keimahni nungchang ang pu mihring bawk” an ni a. (Jak. 5:17) Anni chuan rinhlelhna te, ngaihngam lohna te, leh chak lohnate pawh an nei a; mahse, chûng an harsatna hmachhawn thei tûrin Pathian thlarau hmanga “chak taka siamin an awm” a ni. (Heb. 11:34) Pathian thlarauvin an chunga hna a thawh dân ngaihtuahna chuan kan rinna tichak lo thei thil tam tak awmna tûn lai hunah hian rinawm taka Pathian rawng bâwl zêl tûrin min tichak ang.
Pathian Thlarauvin Mosia A Tichak
3-5. (a) Engtin nge Mosia chuan thlarau thianghlim ṭanpuinain thil a ti tih kan hriat theih? (b) Mosia entîrna chuan Jehova’n a thlarau a pêk dân chungchâng eng nge min zirtîr?
3 Mosia chu B.C.E. 1513-a mi nung dam zawng zawng zîngah “zaidam lâwtlak a ni a.” (Num. 12:3) Chu Pathian chhiahhlawh zaidam tak chu Israel hnamte zîngah mawhphurhna lian tak chelhtîr a ni a. Pathian thlarau chuan Mosia chu thil hrilh lâwk tûr te, rorêl tûr te, lehkha ziak tûr te, hruaitu ni tûr te, leh thil mak ti tûrtein a tichak a ni. (Isaia 63:11-14 chhiar rawh.) Chuti chung pawhin, ṭum khat chu a mawhphurhna rit a tih thu a chhâk chhuak a. (Num. 11:14, 15) Chuvângin, a rit phurh chhâwk zângkhai nân Jehova chuan Mosiaa awm “thlarau” ṭhenkhat chu la chhuakin, mi dang 70 chungah a dah a ni. (Num. 11:16, 17) Mosia phur chu rit hle angin lang mah se, a nihna takah chuan amah maiin a phur lo va, amah puitu tûra thlan mi 70-te pawhin mahni maiin an phur hek lo.
4 Mosia chu a hna atâna a mamawh tâwk thlarau thianghlim pêk a ni a. Lâk ṭhensak a nih hnuah pawh, a mamawh tâwk chu a la nei tho a ni. Mosia chuan a nei tlêm lutuk lo va, upa dang 70-te lahin an nei tam lutuk hek lo. Jehova chuan a thlarau chu kan dinhmun azir leh kan mamawh zât azir zêlin min pe ṭhîn a. “Ani chuan teh kherin thlarau a pe si lo,” ‘a famkimin,’ a nih loh leh ṭhahnem tâwk takin a pe ṭhîn zâwk a ni.—Joh. 1:16; 3:34.
5 Fiahna i tâwk mêk em? I mawhphurhna chu a pungin, chu chuan i hun a la tam tawlh tawlhin i hria em? Thil man to sâwtna emaw, hrisêl lohna emaw hmachhawn reng chunga chhûngte tisa lam leh thlarau lam mamawh pêk tum ṭâng ṭang i ni em? Kohhranah mawhphurhna rit tak i chelh em? Pathian chuan a thlarau hmangin, i dinhmun tawh engpawh hmachhawn thei tûra i mamawh chakna chu a pe thei che tih ring tlat ang che.—Rom 15:13.
Thlarau Thianghlim Chuan Bezalela Chu A Tlintîr
6-8. (a) Pathian thlarau chuan Bezalela leh Oholiaba te chu eng ti tûrin nge a ṭanpui? (b) Engin nge Bezalela leh Oholiaba te chu Pathian thlarauvin a kaihruai tih târ lang? (c) Engvângin nge Bezalela thiltawn chuan a bîk taka min tihchak?
6 Mosia dam rualpui Bezalela thiltawn chuan Pathian thlarau hnathawh dân a târ lang nasa hle a. (Exodus 35:30-35 chhiar rawh.) Bezalela chu a ṭûl ang anga biak bûk cheimawinaa hma hruai tûra tih a ni. He hna lian tak a thawh hma hian kut themthiam tak a lo ni tawh sa em? Ni mai thei; mahse, a hnathawh hnuhnung ber chu Aigupta-ho tâna leirawhchan siam kha a nih hmêl hle. (Ex. 1:13, 14) Chuti a nih chuan, Bezalela chuan engtin nge a hna khirh tak chu a thawh theih ang? Jehova’n ani chu “finna te, hriat thiamna te, hriatna te, kawng tinrênga themthiamna te nei tûrin Pathian thlarauvin a tikhat tawh a, . . . thiltih tûr fing taka suangtuah thiamna te, kawng tinrênga themthiamna te nei tûrin.” Bezalela thiamna lo neih tawhsa engpawh chu thlarau thianghlim chuan a tiphuisui a ni. Oholiaba pawh chutiang bawk chu a ni a. Bezalela leh Oholiaba chuan an hna an thawh mai bâkah, mi dangte pawh an zirtîr bawk avângin an themthiam hle a ni tih a chiang a ni. Ni e, Pathian chuan mite zirtîr tûrin themthiamna a pe a ni.
7 Bezalela leh Oholiaba te Pathian thlarauvin a hruaizia târ lanna dang leh chu an kut chhuak tlozia hi a ni a. An thil siamte chu a hnu kum 500 vêlah pawh hman a la ni reng a ni. (2 Chro. 1:2-6) Tûn laia thil siamtute ang lo takin, Bezalela leh Oholiaba chuan an kut chhuakah chuan an hming târ lan an duh lo. An hna thawh avânga chawimawina zawng zawng chu Jehova hnênah an hlân a ni.—Ex. 36:1, 2.
8 Tûn laiah pawh in sak te, thu leh hla chhut chhuah te, inkhâwmpui huaihawt te, chhiat tâwkte chhawmdâwlna huaihawt te, doctor-te leh damdawi ina thawkte hnêna thisen hman chungchânga Bible ṭanchhan kan dinhmun hrilhfiah te ang chi thiamna engemaw bîk neih ngai hnate chu kan hmachhawn pawh a ni mai thei. A châng chuan hêng hnate thawk tûrin mi thiamte rawih ni mah se, a tam zâwkah chuan chutiang hna thawk ngai lêm lo, mahnia inpete’n an thawk ṭhîn a. An thawhrimna chu Pathian thlarauvin a hlawhtlintîr ṭhîn a ni. Mi dangte chu nang aia tling zâwka i hriat avângin Jehova rawngbâwlnaa chanvo engemaw pawm chu i hreh phah tawh ngai em? Pathian thlarau chuan i hriatna leh thiamna chu a tiphuisui theiin, hnathawh tûr a pêk che engpawh chu hlen chhuak tûrin a ṭanpui thei che tih hre reng ang che.
Josua Chu Pathian Thlarau Ṭanpuinain A Hlawhtling
9. Israel mite’n Aigupta an chhuahsan hnu lawk khân eng dinhmun nge an tawh a, eng zawhna nge lo chhuak?
9 Pathian thlarau chuan Mosia leh Bezalela te dam rualpui dang tuemaw pawh a kaihruai bawk a. Israel mite chu Aigupta an chhuahsan hnu lawkah Amalek-hovin an rawn bei ringawt mai a. Israelte tân chu hlauhawm chu paih bo a ngai ta a. Indo ngai miah lo mah se, an zalên hnua indona hmasa ber tûr chu an neih a ngai ta a ni. (Ex. 13:17; 17:8) Tuemaw ber chuan sipaite chu a kaihhruai a ngai ta. Chu chu tu nge ni ta ang?
10. Engvângin nge Israel mite chuan Josua kaihhruaina hnuaiah hnehna an chan?
10 Josua chu thlan a ni ta a. Mahse, a hnathawh tûr atân tûn hmaa a hna lo thawh tawhte sawi ngai ta se, eng nge a sawi tâk ang? Kut hna thawktu, chhiahhlawh a inti dâwn nge ni a, leirawhchan siamtu zâwk? Nge ni a, Manna lakhâwmtu a inti zâwk dâwn? Josua pu Elisama chu Ephraim hnam puipa niin, ‘chhinchhiahna târte,’ a nih loh leh Israel hnam thum infinkhâwm zînga hnam pakhata mi 1,08,100 lai lo ho tawh ṭhîn a ni ngei mai. (Num. 2:18, 24; 1 Chro. 7:26, 27) Mahse, Jehova chuan hmêlmate hnehtu tûr sipaite kaihruaitu atân Elisama emaw, a fapa Nuna emaw thlang lovin, Mosia kal tlangin Josua chu a thlang zâwk a ni. Indona chuan ni lêng deuhthaw a awh a. Josua’n Pathian thu a âwih tlatna leh Pathian thlarau thianghlim kaihhruaina a ngaihhlutna avângin, Israel mite chuan hnehna an chang ta a ni.—Ex. 17:9-13.
11. Josua ang bawkin engtin nge rawngbâwlna thianghlimah kan hlawhtlin theih?
11 A hnuah chuan ‘finna thlarauva khat’ Josua chuan Mosia chu a thlâk ta a. (Deut. 34:9) Thlarau thianghlim chuan Josua chu Mosia angin hrilh lâwk theihna emaw, thilmak tihtheihna emaw neihtîr lo mah se, Kanaan ram la tûrin Israel sipaite chu a kaihhruaitîr thei thung a ni. Tûn laiah pawh, kan rawngbâwlna thianghlim pêng engemaw ber chu hlen chhuak tûrin thiltawn nei lo emaw, tling lo emaw kan inti mai thei. Mahse, Pathian kaihhruaina kan zawm tlat chuan Josua ang bawkin kan hlawhtling dâwn tih kan chiang a ni.—Jos. 1:7-9.
‘Jehova Thlarau Chu Gideona Chungah A Lo Thleng’
12-14. (a) Mi 300 lekin Midian sipai tam tak an hnehna chuan eng nge a târ lan? (b) Engtin nge Jehova chuan Gideona chu a thlamuan? (c) Tûn laiah Pathian hnên aṭangin eng thlamuanna nge kan dawn?
12 Josua thih hnuah pawh Jehova chuan a thiltihtheihnain a mi rinawmte a tihchak theih dân a târ lang chhunzawm zêl a. Rorêltute bu chu ‘chak lohna ata chak taka siama awmte’ chanchinin a khat a ni. (Heb. 11:34) Pathian chuan thlarau thianghlim hmangin Gideona chu A mite tâna bei tûrin a ti a. (Ro. 6:34) Mahse, Gideona sipaite ai chuan Midian sipaite chu a lêt li laiin an tam zâwk a ni. Chuti chung pawhin Jehova mit hmuhah chuan Israel sipaite chu an la tam ta cheu va. Gideona hnênah Israel sipaite titlêm tûrin ṭum hnih lai thu a pe a, a tâwpah chuan hmêlmate chu a lêt 450 laiin an tam ta zâwk a ni. (Ro. 7:2-8; 8:10) Chutianga Israel sipaite an tlêm zâwk chu Jehova duhzâwng a ni. Israelte’n hnehna ropui tak an chan chuan tumahin mihringte chakna leh finna vâng a ni an ti thei dâwn si lo va.
13 Gideona leh a sipaite chu an inpeih ṭêp tawh a. Chu sipai pâwl tlêm tê zîngah chuan tel ve ta la, in zîngah dâwihzep deuh leh harhvâng lo deuhte an awm tawh lo tih i hriat chuan i thla a muang sawt ang em? Nge ni a, thil rawn inher chhuah dân tûr ngaihtuahin i hlauthâwng deuh zâwk dâwn? Gideona rilru tûr chu kan ngaihruatsak a ngai lo. Pathianin ti tûra a tih ang takin a ti si a! (Rorêltute 7:9-14 chhiar rawh.) Gideona chuan Pathianin amah a awmpui dâwn leh dâwn loh hriat theih nâna chhinchhiahna a dîl avângin Pathian hauhna a tâwk lo. (Ro. 6:36-40) Chutih ahnêkin, Gideona rinna chu a tichak zâwk mah a ni.
14 Jehova’n a mite a humhim theihna chuan tiam chin a nei lo. A mite chu dinhmun khirh engpawh lak aṭangin a chhan chhuak thei a, chu mi atân mi chak lo leh ṭanpuitu nei lo anga langte takngial pawh a hmang thei a ni. A châng chuan min hawtu an tam emaw, dinhmun harsa taka ding emaw angin kan inhre mai thei. Gideona dawn anga mak taka hriattîrna dawn chu kan inbeisei lo ngei mai; mahse, Pathian Thu leh thlarauva a kaihhruai kohhran kal tlangin kawhhmuhna leh thlamuanna tam tak kan dawng thei a ni. (Rom 8:31, 32) Jehova thutiam duhawm tak chuan kan rinna a tichak a, ani chu min Ṭanpuitu a ni tak zet tih min rin nghehtîr a ni.
‘Jehova Thlarau Chu Jephtha Chungah A Lo Thleng’
15, 16. Engvângin nge Jephtha fanu chuan rilru put hmang ṭha tak a neih a, engvângin nge chu chu nu leh pate tân thlamuanthlâk tak a nih?
15 Entîrna dang hi han ngaihtuah bawk teh. Israel mite’n Amona thlahte an beih a ngaih khân, Jehova thlarau chu “Jephtha chungah a lo thleng a.” Jehova chawimawi nâna hnehna chan a duh êm avângin Jephtha chuan a tâna man to tak tûr chhia a chham a ni. Pathianin Amona thlahte a kuta a pêk phawt chuan ina a haw huna a kawngka aṭanga lo chhuak hmasa ber chu Jehova hnêna pêk a tiam a ni. Amona thlahte a hneh hnua ina a haw chuan, a fanu ngei mai chu amah hmuak tûrin a rawn tlân chhuak ta. (Ro. 11:29-31, 34) Chu chu Jephtha chuan mak a ti em? A tih a rinawm loh, ani bâk chu fa dang tumah a nei si lo va. A fanu chu Silo khuaa Jehova biak bûka rawngbâwl tûra pumpêkin, a thutiam chu a hlen a. Jehova betu rinawm a nih angin, Jephtha fanu chuan a pa thutiam chu hlen chhuah ngei tûr a ni tih a hria a. (Rorêltute 11:36 chhiar rawh.) Jehova thlarau chuan an mamawh chakna chu a pe ve ve a ni.
16 Engtin nge Jephtha fanu chuan chutianga mahni inpêk duhna chu a lo neih chhoh? A pa ṭhahnemngaihna leh Pathian ngaihsakna a hmuh aṭangin a rinna chu a chak tial tial tih rinhlelh rual a ni lo. Nu leh pate u, in entawn tûr siam chu in fate’n an hmuh hmaih lo. In thu tlûkna siamte chuan in thusawite in rinzia a târ lang a ni. In fate chuan tih tak zeta in ṭawngṭaina leh zirtîrna te chu thinlung zawng zawnga Jehova rawng bâwl dân târ langtu in entawn tûr siam nêna a inkawp dân an hmu a ni. Chutianga an hmuhna aṭangin, i fate chuan thinlung zawng zawnga Jehova rawng bâwl duhna an rawn nei chho ngei ang. Chu chuan hlimna nasa tak a pe ang che u.
‘Jehova Thlarau Chu Samsona Chungah A Lo Thleng’
17. Samsona’n Pathian thlarau ṭanpuinain eng nge a tih?
17 Entîrna dang hi han ngaihtuah leh teh. Israel mite Philistia kutah an awm lai chuan, anmahni chhan chhuak tûrin Samsona chu “LALPA tharauvin a rawn khawih harh . . . ta a.” (Ro. 13:24, 25) Ani chu thil mak tak a tih theih nân chakna namên lo pêk a ni. Philistia mite’n Somsona man tûra a chipui Israelte an hmin khân, “LALPA thlarau chu a chungah nasa takin a lo thleng a, tichuan a bân phuarna hruizên chu ziza zai kâng chat ang mai a lo ni ta a, a phuarnate chu a kut ata a tla ta tawp mai a.” (Ro. 15:14) Thu tlûkna fing lo tak a siam avânga chakna a hloh tâk hnuah pawh, Samsona chu “rinnain” tihchak a ni tho a ni. (Heb. 11:32-34; Ro. 16:18-21, 28-30) A dinhmun danglam tak avângin Jehova thlarau chuan kawng danglam takin Samsona chungah hna a thawk a. Chûng hmân laia thilthlengte chuan thlamuanna nasa tak min pe a ni. Engtin nge?
18, 19. (a) Samsona thiltawn chuan eng nge min tiam? (b) He thuziaka târ lan mi rinawmte chanchin ngaihtuahna chu engtin nge i hlâwkpui?
18 Keini pawhin Samsona rinchhan thlarau thianghlim tho chu kan rinchhan ve a. Isua’n a hnungzuitute hnêna chanchin ṭha “mi hnêna tlângaupui leh hriattîr” tûra a hrilh chu thawkin kan rinchhan a ni. (Tirh. 10:42) He hna thawk tûr hian kan pianpui ni lêm lo thiamna neih a ngai a. Jehova’n hna chi hrang hrang min pêkte kan thawh theih nâna a thlarau a hman avângin kan va lâwm tak êm! Chutiang chuan, kan rawngbâwlnaah zâwlnei Isaia angin: “LALPA Pathian chuan keimah leh a thlarau chu min tîr,” kan ti ve thei a ni. (Is. 48:16) Jehova chuan Mosia te, Bezalela te, leh Josua te chunga a tih ang bawkin kan theihnate a tiphuisui dâwn tih ring tlat chungin rawng kan bâwl a. Gideona te, Jephtha te, leh Samsona te a tihchak ang bawkin min tichak ve ang tih ring tlatin “thlarau ngûnhnâm (Pathian thu chu)” kan hmang a ni. (Eph. 6:17, 18) Harsatnate hneh thei tûra Jehova ṭanpuina rinchhan chungin, tisa lama Samsona a chak ang khân thlarau lamah kan chak ve thei a ni.
19 Jehova chuan huaisen taka biakna dik ṭantute chu mal a sâwm ṭhîn tih a chiang hle. Pathian thlarau thianghlim hna thawh kan chhân lêt hian kan rinna a zual sawt ṭhîn. Chuvângin, Kristian Grik Pathian Lehkha Thu-a chhinchhiah thilthleng phûrawm tak ṭhenkhat ennawn pawh chu a châkawm hle a. Chu chuan C.E. 33 Pentikost hma leh hnu lama Jehova thlarauvin a chhiahhlawh rinawmte chunga hna a thawh dân a târ lang ang. Chûng chanchinte chu a dawta thuziakah kan ngaihtuah ang. (w11-E 12/15)
Engtin nge Pathian thlarauvin hêng mite chunga hna a thawh dân hriatna chuan a tihchak che?
• Mosia
• Bezalela
• Josua
• Gideona
• Jephtha
• Samsona
[Zirlai Atâna Zawhnate]
[Phêk 27-naa milem]
Nu leh pate u, taima taka in entawn tûr siam chuan in fate tân awmze thui tak a nei
