Aronga Akarongo Mou i Taito​—Aratakiia e te Vaerua o te Atua

‘Kua tono mai te Atu ra ko Iehova iaku, e tona vaerua.’​—ISA. 48:16.

1, 2. Eaa te ka anoanoia ei akaari i te akarongo, e eaa te akamaroiroianga ta tatou ka kite mai na te akamanako anga i te aronga akarongo mou i taito?

NOATU e maata tei akarongo mei te tuatau mai ia Abela, ‘kare ra i ope katoatoa te tangata i te akarongo.’ (2 Tesa. 3:2) Eaa i rauka ai i te tangata teia tu, e eaa tei tauturu iaia kia vai akarongo mou? Tei maata atu, na te kite anga i te Tuatua a te Atua e rauka ai te akarongo. (Roma 10:17) E tuanga te reira no te au ua o te vaerua o te Atua. (Gala. 5:22, 23, NW) No reira, ka anoano tatou i te vaerua tapu kia akaari e kia taangaanga i to tatou akarongo.

² E tarevake i te manako e kua anauia mai te au tangata ma te tu akarongo. Te au tavini akarongo mou tei tatau ana tatou i roto i te Pipiria, e au tangata “mei ia tatou katoa te tu.” (Iako. 5:17) E au manako ekoko, papu kore e te tu paruparu to ratou, inara “kua akamaroiroiia” ratou e te vaerua o te Atua kia aro atu i te au turanga ngata. (Ebe. 11:34) Na te akamanako anga e akapeea te vaerua o Iehova te tauturu anga ia ratou, ka akamaroiroiia tatou kia tavini akarongo mou ua rai, ia tatou e noo nei i roto i teia tuatau e timataia nei to tatou akarongo.

Kua Akamaroiroi te Vaerua o te Atua ia Mose

3-5. (a) Akapeea tatou i kite ei e na te vaerua tapu i tauturu ia Mose kia rave i tana au apainga? (e) Eaa ta te akaraanga o Mose e apii maira ia tatou te tu i oronga mai ei a Iehova i tona vaerua?

³ Ko Mose te tangata “maru maata” rava atu i to te tangata ravarai i ora ana i te mataiti 1513 M.T.N. (Nume. 12:3) Kua orongaia tetai apainga maata tikai ki teia tavini ngakau maru kia akono i te iti tangata o Iseraela. Kua akamaroiroi te vaerua o te Atua ia Mose kia totou, akava, tata, arataki, e kia rave i te au angaanga temeio. (E tatau ia Isaia 63:11-14.) Inara, i tetai atianga kua kopekope a Mose e e maata rava tana au apainga. (Nume. 11:14, 15) No reira kua rave mai a Iehova i tetai tuanga ‘o te vaerua’ mei runga ia Mose e kua tuku ki rungao i te 70 aronga pakari kia maranga te apainga. (Nume. 11:16, 17) Noatu e kua maata rava te apainga a Mose, kare e nana anake ua e te 70 aronga pakari tei ikiia ei tauturu iaia e apai ra i te reira.

⁴ Kua orongaia te vaerua tapu kia Mose kia rave i te angaanga. Muri ake te tauianga, kua vai rai te katoaanga o te vaerua e anoano ra a Mose. Kare i meangiti mai ta Mose apainga e kua maata atu ta te 70 aronga pakari. E oronga maata mai ana a Iehova i tona vaerua e anoano ra tatou kia tau ki to tatou au turanga. ‘Kare oki te Atua i oronga rikiriki mai i tona vaerua’ mari ra kua oronga ‘ki katoa’ mai aia i te reira.​—Ioa. 1:16; 3:34.

⁵ Te akakoromaki ra ainei koe i te au timataanga? Te pou ra ainei toou taime ki te au apainga puapinga? Te tauta ra ainei koe te akono i te au anoano pae vaerua e te pae kopapa o toou pamiri, ma te akakoromaki anga i te oko maata o te au apinga me kore te taitaia ra i te oraanga kopapa maki? E maata ainei taau au apainga i roto i te putuputuanga? Te akapapuia atu nei e ka oronga atu te Atua i te maroiroi kia koe na roto i tona vaerua kia rauka ia koe te akakoromaki i tetai ua atu turanga.​—Roma 15:13.

 Tauturu te Vaerua Tapu ia Bezaleela

6-8. (a) Eaa ta te vaerua o te Atua i rave te tauturu anga ia Bezaleela raua ko Aholiaba? (e) Eaa tei akaari mai e kua arataki te vaerua o te Atua ia Bezaleela raua ko Aholiaba? (ng) Eaa ra i riro ei te akaraanga o Bezaleela ei akamaroiroianga?

⁶ Kua akaari mai tei tupu ki tetai taeake o Mose ko Bezaleela, i te mataara i tauturu ei te vaerua o te Atua iaia. (E tatau ia Exodo 35:30-35.) Kua ikiia a Bezaleela kia rave i te aratakianga no te maani anga i te au apinga ei akamanea i te tapenakara. E kite ainei tona i te maani apinga i mua ake ka rave ei aia i teia angaanga maata? Penei, inara tana angaanga openga i rave ei aia, ko te maani anga piriki na to Aiphiti. (Exo. 1:13, 14) Akapeea e rauka ai ia Bezaleela i te rave i tana angaanga ngata tikai? ‘Kua akaki a Iehova iaia ki te vaerua o te Atua, i te karape, te pakari, e te kite i te angaanga tini ravarai ra; Ei kimi oki i te angaanga pakari ra, e ei rave i te au angaanga manea ravarai nei.’ Kua akameitaki rava atu te vaerua tapu i te tu kite karape o Bezaleela. Mei te reira katoa rai te turanga o Aholiaba. Kua tamou meitaki a Bezaleela raua ko Aholiaba i te apii, e kua rave meitaki raua i ta raua angaanga e te apii katoa atu i tetai ke. Ae, na te Atua i akakeu i to raua ngakau kia apii i tetai ke.

⁷ Tetai akapapuanga e kua arataki te vaerua o te Atua ia Bezaleela raua ko Aholiaba, no ta raua angaanga meitaki tikai. Kua taangaangaia rai ta raua au apinga i maani ana i tetai 500 mataiti i muri mai. (2 Para. 1:2-6) Kare a Bezaleela raua ko Aholiaba i inangaro ana kia akangateiteiia raua no ta raua angaanga i rave, mei ta tetai aronga maani apinga rai e rave ana i teia tuatau. Kua orongaia te akangateitei anga katoa kia Iehova no ta raua i rave.​—Exo. 36:1, 2.

⁸ Teia tuatau, penei ka aro atu tatou i tetai au angaanga ngata te anoanoia ra te tu karape, mei te akatu anga, nenei anga, akanoonooanga i te au uruoaanga, akaaere anga i te tauturu i te au tumatetenga, komunikeiti anga ki te au taote e te aronga angaanga o te are maki no runga i to tatou turanga Tuatua Tapu no te toto. Tetai taime na te aronga kite karape e rave ana i teia au angaanga, maataanga ra o te taime na te aronga tauturu e rave ana i teia, noatu kare o ratou kite no runga i te reira angaanga. Na te vaerua ra o te Atua i tauturu ia ratou kia rave i te reira angaanga. Kua emiemi ana ainei koe i te ariki i tetai angaanga a Iehova, te manako anga e meitaki atu tetai ke ia koe? Akamaara e ka rauka i te vaerua o Iehova i te akamaata atu i toou kite e toou tu karape ei tauturu ia koe kia akatupu meitaki i te angaanga tana i oronga mai kia koe.

Puapingaia a Iosua mei te Tauturu a te Vaerua o te Atua

9. Eaa ta te ngati Iseraela i aro atu i muri ua ake te akaruke anga ia Aiphiti, e eaa te uianga tei tupu mai?

⁹ Kua arataki katoa te vaerua o te Atua i tetai taeake o Mose e Bezaleela. Muri ua ake te akaruke anga te ngati Iseraela ia Aiphiti, kua tamaki mai te ngati Amaleka i te iti tangata o te Atua. Kua tae ki te tuatau no te ngati Iseraela kia tamaki atu. Noatu kare rava ratou i piri ana ki te tamaki, ka tamaki atu te ngati Iseraela no te taime mua ei au tangata akarangatiraia. (Exo. 13:17; 17:8) Te anoanoia ra tetai tangata kia arataki i te tamaki. Koai ra te reira?

10. Eaa te ngati Iseraela i autu ei i te tamaki i raro ake i te aratakianga a Iosua?

¹⁰ Kua iki a Iehova ia Iosua. Inara me ka taiku aia i tona tu karape i mua ana kia tau no taua angaanga ra, eaa tana ka taiku mai? E tangata angaanga tuikaa ainei? E tangata maani piriki ainei? E tangata koi mana ainei? E tika, e rangatira te papa ruaau o Iosua ko Elisama no te kopu o Epheraima, e kua arataki ana e 108,100 tangata no roto mai i tetai o te nga kopu e toru o Iseraela. (Nume. 2:18, 24; 1 Para. 7:26, 27) Inara, kua akakite a Iehova kia Mose e na Iosua e arataki i te nuku vaeau te ka takore atu i te au enemi, kare na Elisama e tana tamaiti ko Nuna. Kua pou rai te katoaanga o te ra i te tamakianga. No to Iosua akarongo e tona ariki ngateitei anga i te aratakianga a te vaerua tapu o te Atua, kua autu te ngati Iseraela i te tamaki.​—Exo. 17:9-13.

11. Akapeea tatou e puapinga ai mei te rave anga i te angaanga a te Atua mei ia Iosua rai?

 ¹¹ Muri mai, kua monoia mai a Mose e Iosua ‘tei ki i te vaerua pakari ra.’ (Deu. 34:9) Kare te vaerua tapu i oronga ana kiaia te kite kia totou me kore kia rave i te angaanga temeio mei ia Mose rai, kua tauturu ra te reira ia Iosua kia arataki i to Iseraela i roto i te tamaki, i rauka mai ei te enua Kanaana ia ratou. Teia tuatau, ka manako tatou e kare tatou e kite me kore e tukatau ana i te rave i tetai angaanga a te Atua. Inara, ka puapingaia tatou mei ia Iosua rai me aru tikai tatou i te ikuikuanga a te Atua.​—Iosu. 1:7-9.

“Kua Uru Maira te Vaerua o Iehova ia Gideona”

12-14. (a) Eaa te akaari maira kia tatou te autu anga te 300 tangata i te au enemi ngati Midiana? (e) Eaa ta Iehova i akapapu kia Gideona? (ng) Eaa te akapapu anga a te Atua no tatou i teia tuatau?

¹² Muri ake to Iosua mate anga, kua akaari ua rai a Iehova e akapeea tona mana te akaketaketa anga i te aronga akarongo mou. Maata te au tangata i roto i te puka o Te Au Akava tei “akamaroiroiia i te paruparu anga.” (Ebe. 11:34) Na roto i te vaerua tapu, kua akakeu te Atua ia Gideona kia tamaki no Tona iti tangata. (Aka. 6:34) Inara e meangiti ua te nuku vaeau o Gideona me akaaiteia atu ki te nuku maata o te ngati Midiana, mei te 4 tangata ka tamaki atu e 1 tangata Iseraela. Inara, te inangaro ra a Iehova e kia akaitiia mai te nuku meangiti o Iseraela. Kua akaue aia e rua taime kia akaiti mai a Gideona i tona nuku vaeau, i te openga, kua topa mai te numero ki te 1 vaeau te ka tamaki atu ki te 450 vaeau o Midiana. (Aka. 7:2-8; 8:10) Kua mareka a Iehova i teia numero. No reira, me autu mai te ngati Iseraela, koai te ka tuatua akaparau e no to ratou maroiroi e te pakari i autu ei ratou?

¹³ Kua papa a Gideona e tona nuku vaeau. Me ko koe tetai o taua nuku meangiti ra, ka manako tinamou ainei koe te kite anga e kua akaokiia te aronga mataku e te aronga kare e matakite ana? Me kore ka mataku ainei koe i te akamanako anga eaa te ka tupu mai? Papu ia tatou e kua irinaki a Gideona ia Iehova. Kua rave aia i tei akaueia kiaia kia rave! (E tatau i Te Au Akava 7:9-14.) Kare a Iehova i riri ana ia Gideona no tei pati i tetai akairo ei akapapu anga e ka turuturu mai te Atua iaia. (Aka. 6:36-40) Mari ra, kua akaketaketa aia i te akarongo o Gideona.

¹⁴ Kare to Iehova mana akaora i kotingaia. Ka rauka iaia i te akaora mai i tona iti tangata mei tetai ua atu turanga kino, na te taangaanga anga i te aronga e akaraanga paruparu to ratou. Tetai taime, ka manako tatou e e maata rava te aronga patoi me kore e kino roa to tatou turanga. Kare tatou e tapapa atu i tetai akapapuanga temeio mei tei orongaia kia Gideona, mari ra e maata te aratakianga e te akapapuanga ka rauka ia tatou mei roto mai i te Tuatua a te Atua e tona putuputuanga tei aratakiia e tona vaerua. (Roma 8:31, 32) Kua akaketaketa mai te au taputou aroa a Iehova i to tatou akarongo e te akapapu mai kia tatou e koia to tatou Tauturu!

“Aere Maira te Vaerua o Iehova ki Runga ia Iepheta”

15, 16. Eaa i rauka ai i te tamaine a Iepheta te tu meitaki, e akapeea teia te akamaroiroi anga i te au metua?

¹⁵ Akamanako ana i tetai akaraanga akaou mai. Te aere anga te ngati Iseraela ka tamaki atu i te ngati Amona ‘kua aere mai te vaerua o Iehova ki runga ia Iepheta.’ No tona inangaro kia autu aia e kia akapaapaa ia Iehova, kua rave a Iepheta i tetai tia puapinga tikai. Kua tia a Iepheta e me oronga mai te Atua i te ngati Amona ki roto i tona rima, te tangata mua ka aere mai mei roto i tona are me oki aia ki te kainga, ka oronga aia iaia na Iehova. Te oki anga a Iepheta mei te autu anga i te ngati Amona, kua oro mai tana tamaine i te aravei iaia. (Aka. 11:29-31, 34) Kua poitirere ainei a Iepheta? Kare, no te mea e tai rai ana tamariki. Kua akatupu aia i tana tia na te oronga anga i tana tamaine kia tavini tinamou i te ngai tapu o Iehova i Silo. No te mea e tamaine akamori tiratiratu aia no Iehova, kua ariki te  tamaine a Iepheta kia akatupuia te tia a tona metua tane. (E tatau i Te Au Akava 11:36.) Kua oronga te vaerua o Iehova i te maroiroi kia raua roa ai.

¹⁶ Akapeea i rauka ai i te tamaine a Iepheta taua tu ngakau akaatinga ra? Papu e kua akaketaketaia tona akarongo te kite anga aia i te maroiroi e te tu akarongo o tona metua tane ki te Atua. E te au metua te kite ua maira ta kotou tamariki i to kotou akaraanga. Ka akaari mai taau au ikianga i taau e irinaki ra. Te kite maira taau tamariki i taau au pure ngakau tae, au apiianga meitaki e taau akaraanga e te aiteanga o te tavini ngakau katoa anga ia Iehova. Ka riro teia ei tauturu ia ratou kia inangaro maata i te tavini ia Iehova. Ka mataora tikai koe i teia.

“Kua Aere Viviki Maira te Vaerua o Iehova ki Runga” ia Samasona

17. Eaa ta te vaerua o te Atua i tauturu ia Samasona kia rave?

¹⁷ Tetai akaraanga, te apainaia anga te ngati Iseraela e to Philiseti ei tuikaa, ‘kua akamata te vaerua o Iehova i te akamaroiroi’ ia Samasona kia akaora ia Iseraela. (Aka. 13:24, 25) Kua akamaroiroiia a Samasona kia rave i te au angaanga umere e te maroiroi tikai. Te akakeu anga to Philiseti i to Samasona au taeake Iseraela kia opu iaia, ‘kua aere viviki maira te vaerua o Iehova ki runga iaia, riro atura nga taura i runga i tona rima mei te orongā i ka i te ai ra, matara akera tona ruru i runga i nga rima nona ra.’ (Aka. 15:14) Noatu e kua rave a Samasona i te ikianga kino tei akaparuparu iaia, kua akamaroiroi akaouia ra tona “akarongo” no te taime openga. (Ebe. 11:32-34; Aka. 16:18-21, 28-30) Kua angaanga te vaerua o Iehova ki rungao ia Samasona na roto i tetai tu takake tikai, no tona turanga. Noatu ra, ka riro teia au tupuanga tuatua enua ei akamaroiroianga no tatou. Akapeea ra?

18, 19. (a) Eaa te tupuanga o Samasona e akapapu maira kia tatou? (e) Akapeea koe te puapinga anga mei te uriurianga i te au akaraanga o te aronga akarongo mou i roto i teia atikara?

¹⁸ Ka irinaki tatou ki taua vaerua ta Samasona i irinaki ana, ia tatou e rave ra i te angaanga ta Iesu i oronga ki tana au pipi, ‘kia tuatua aere e kia akakite ua atu ki te tangata.’ (Anga. 10:42) Ka anoanoia te tu karape no teia angaanga no te mea kare te reira i te tu natura. Te mataora nei  tatou e te taangaanga ra a Iehova i tona vaerua ei tauturu ia tatou kia rave meitaki i te au angaanga tei orongaia mai kia tatou! No reira ia tatou e rave ra i teia angaanga, ka rauka ia tatou i te tuatua mei ta te peroveta ko Isaia e: ‘Kua tono mai te Atu ra ko Iehova iaku, e tona vaerua.’ (Isa. 48:16) Ae, na te vaerua o te Atua i tono ia tatou! Ka rave tatou i te angaanga ma te irinakianga e ka akameitaki mai a Iehova i to tatou au tu karape mei tana rai i rave no Mose, Bezaleela e Iosua. Ka rave mai tatou i ‘te koke a te vaerua, koia te tuatua a te Atua,’ ma te irinaki e ka akamaroiroi mai te Atua ia tatou mei tana rai i rave no Gideona, Iepheta, e Samasona. (Ephe. 6:17, 18) Ka akamaroiroi te vaerua o te Atua ia tatou i te pae vaerua mei ia Samasona rai i te pae kopapa, me irinaki tatou kia Iehova no tana tauturu kia autu atu i te au arairai anga.

¹⁹ Taka ua ra e te akameitaki ra a Iehova i te aronga te turuturu mataku kore ra i te akamorianga mou. Me aru tatou i te vaerua tapu o te Atua, ka maata atu to tatou akarongo. No reira, e mea mataora i te akara akaou i tetai au tupuanga umere tei rekotiia i roto i te au Tuatua Tapu Ereni Kerititiano. Ka akaari mai te reira e akapeea te vaerua o Iehova te angaanga anga i rungao i tona au tavini akarongo mou i te anere mataiti mua, i mua ake e i muri ake i te Penetekote 33 T.N. Ka uriuriia teia au tataanga i roto i te atikara ka aru mai.

Eaa koe i akamaroiroiia ai te kite anga i te vaerua o te Atua te angaanga anga i rungao ia . . .

• Mose?

• Bezaleela?

• Iosua?

• Gideona?

• Iepheta?

• Samasona?

[Au Uianga Apii]

[Tataanga i te kapi 22]

Ka akamaroiroi te vaerua o te Atua ia tatou i te pae vaerua mei ia Samasona rai i te pae kopapa

[Tutu i te kapi 21]

Te au metua, ka puapingaia ta kotou tamariki mei ta kotou akaraanga maroiroi