Eperiam, Emön Mwän mi Lükü

Eperiam a ütä lükün lon eü pwinin. Lupwen a netääi ekkewe füü fän läng mi saramaram a chüng letipan le ekieki än Kot we pwon ngeni pwe mwirimwirin kewe repwe chommong usun chommongun füü. (Keneses 15:5) Me ren Eperiam, ekkewe füü iir minen ächchem ngeni usun än Jiowa we pwon ngeni. Ra pwal minen alükülük ngeni pwe ika a wor än Jiowa manaman le föratä unuselapen läng me fönüfan me masouer meinisin, iwe, ese mwääl epwe pwal wor an manaman le föri än Eperiam me Sara repwe nöünöü. Ina usun än Eperiam lükü.

MET WEWEEN LÜKÜ? Lon ewe Paipel, “lükü” a wewe ngeni ach ächiföüa ekkewe mettoch sise mwo küna. Ena esin lükü a longolong woon ekkewe pisekin ännet mi nüküchar. Emön mi lükü Kot a ännefota an ekiek woon pwönüetään än Jiowa kewe pwon, me a lükülük pwe usun itä ra fen pwönütä.

IFA USUN EPERIAM A PWÄRAATÄ AN LÜKÜ? Eperiam a pwäraatä pwe a lükü än Kot kewe pwon. Ren lükü, Eperiam a likitalo wesetään fönüan pokiten a wesewesen lükülük pwe Jiowa epwe apwönüetä an pwon le emmwenaalong lon pwal eü fönü. Ren lükü, Eperiam a siamüfetäl lon Kanaan, a lükülük pwe lon mwach mwirimwirin kewe repwe fönüeni ena fönü. Pwal ren lükü, Eperiam a älleasochis le eäni asor Aisek pwe a lükülük pun Jiowa a tongeni amanauasefälietä.​—Ipru 11:8, 9, 17-19.

Eperiam a ännefota minne epwe fis lon mwach nge esap minne a fis loom. Inaamwo ika eli Eperiam me Sara ra nonnomöch me pwapwaiti manauer lon Ur lap seni lon Kanaan, nge rese “ekieki ewe fanü ra likitala.” (Ipru 11:15) Ra chök ännefota ar ekiek woon ifa usun Kot epwe efeiöchüür me mwirimwiriir kewe lon mwachkkan.​—Ipru 11:16.

Itä än Eperiam lükü a nüküchar longolongun? Fokkun ewer. Jiowa a apwönüetä meinisin minne a pwonei. Mwirimwirin Eperiam kewe ra chommongolo me wiliti eü mwu mi iteni Israel. Lo, lo, lo, ekkewe chon Israel ra fönüenalo Kanaan, ewe fönü Jiowa a pwonei ngeni Eperiam.​—Josua 11:23.

IKKEFA EKKEWE LESEN FÄN ITACH? Sia tongeni lükülük pwe Jiowa epwe apwönüetä an kewe pwon. Inaamwo ika ekkoch me leir usun itä esap tufich me ren aramas, nge sipwe lükü pwe “mettoch meinisin ra tufich ngeni Kot.”​—Mattu 19:26.

Än Eperiam leenien äppirü a pwal äiti ngenikich ach sipwe ännefota ekkewe mettoch sipwe pwapwaiti lon mwachkkan nge esap minne a fis me loom. Ina met emön mwän itan Jason a käeö le föri. I a riäfföü ren och semwen mi kan  apwangapwangaalo inisin, nge iei a unusen pelo inisin. A apasa: “Fän ekkoch ua kan ekkekieki manauei me loom.” A pwal erä: “A wor ekkoch mettoch ua fokkun pwosiiti, äwewe chök ai turufi pwülüwei we, Amanda.”

Inaamwo ika a ina usun, nge Jason a wesewesen lükü pwe Jiowa epwe apwönüetä an kewe pwon, kapachelong an we pwon pwe ei fönüfan epwele wiliti eü paratis me aramas mi tüppwöl repwe küna manau esemuch lon inis mi unusöch. * (Kölfel 37:10, 11, 29; Aisea 35:5, 6; Pwarata 21:3, 4) Jason a apasa: “Ua chök pwisin ekieki pwe ewe fansoun mi fokkun mürinnö a nom mwei. Ekiselo chök, aürek, lolilen, letipechou, me mengiringir repwe unusen morofocholo.” A ifa me öchün ei leenien äppirü ren lükü, usun chök än Eperiam!