Abraiau Omulume Wekolelo
Abraiau Omulume Wekolelo
Abraiau ukahi pondye kounthiki. Tyina atala ononthungululu peulu kuayela nawa, uhinangela omulao wa Huku wokuti ovana vae mavakala ovanyingi ngononthugululu ombo. (Gênesis 15:5) Ku Abraiau, ononthungululu ankho mbuhinangelesa omulao wa Jeova. Tupu ankho mbumukalesa nonthumbi. Haunene, inkha Jeova una epondolo liokulinga ouye na aviho vikahimo, tupu kamakuatesako Abraiau na Sara okukala nomona? Otyo ankho tyipameka ekolelo lia Abraiau.
EKOLELO OITYI? Ngetyi tyipopia Ombimbiliya, “ekolelo” okutavela nawa-nawa okuti otyipuka otyili namphila uhetyiete, mahi una onthumbi yokuti matyikamoneka. Omunthu wakolela mu Huku utavela okuti omilao via Jeova mavikafuisuapo, una onthumbi yokuti oviotyotyili nokuvitala ngatyina viafuiswapuale.
OÑGENI ABRAIAU ALEKESA EKOLELO? Abraiau walekesa okuti ankho utavela komilao via Huku. Mokonda yekolelo, Abraiau wasapo otyilongo atyitilwa, nonthumbi yokuti Jeova mafuisapo omulao Wae wokumulekesa otyilongo otyikuavo. Mokonda yekolelo, Abraiau walinga oungendi okuenda noko Kanaa, nonthumbi yokuti ovana vae mavakatambula otyilongo otyo. Mokonda yekolelo, Abraiau wetavelele okuava omona wae Isake ngotyilikutila, nonthumbi yokuti inkha tyesukisa, Jeova memututilisa.—Hebreus 11:8, 9, 17-19.
Abraiau katalele konyima, ankho utala vala komutwe. Namphila Abraiau na Sara ankho vena vali omuenyo omuwa ko Ur tyipona ko Kanaa, “kavatuaileko okusoka okukondoka kotyilongo vatunda.” (Hebreus 11:15, Nova Tradução na Linguagem de Hoje) Anthi, ankho vasoka vali oñgeni Huku apondola okuavela ononkhano onongwa ovo muene novana vavo komutwe.—Hebreus 11:16.
Okuti Abraiau ankho una umwe ehunga liokukolela mu Huku? Enga. Jeova wafuisapo omilao viae aviho. Ovana va Abraiau aveliyawisa avakala elongo liiwe okuti o Isilayeli. Konyima, ova Isilayeli veya okukala mo Kanaa, otyilongo Jeova alaele Abraiau.—Josué 11:23.
OTYO TYITULONGESA TYI? Tupondola okukala nonthumbi yokuti Jeova mafuisapo omilao viae. Namphila vimwe vimoneka ngoti komaiho ovanthu katyivilwa, tuna onthumbi yokuti “ku Huku ovipuka aviho vivilwa.”—Mateus 19:26.
Ongeleka ya Abraiau tupu itulongesa okusoka vali kehambu matukavasa komutwe, tyipona okusoka kovipuka tuasapo. Otyo, otyo tyalingile omulume utiwa Jason. Jason wavelele unene akala otyinkhoma. Oe wati: “Ame ndyitavela okuti pamwe ankho nkhele ndyisoka etyi omuenyo wange ankho ukahi kohale.” Ayawisako okuti: “Ovipuka vimwe ankho ndyiivaluka vali, okupondakanapo omukai wange, Amanda.”
Anthi, Jason ankho una ekolelo liokuti Jeova makafuisapo omilao viae, okukutikinyamo omulao wokuti apa katutu oohi ino maikakala omphangu yombembwa iya ovanthu vekolelo mavakakalako apeho nekongoko ewa. a (Salmo 37:10, 11, 29; Isaías 35:5, 6; Revelação 21:3, 4) Jason wati: “Ndyihinangela apeho okuti omuenyo omuwa ukahi komutwe, apa katutu, ononkhumbi, nomasukalalo, novitateka ovikuavo, mavikapuako apeho.” Ongeleka oyo ongwa yekolelo yelifwa no ya Abraiau!
[Onondaka Poutoi]
a Opo ulilongese vali konthele yomphangu yombembwa pano pohi, tala okapitulu ka 3 na 7 na 8, momukanda Oityi Ombimbiliya Tyili Ilongesa? walingua no Nombangi mba Jeova.
