Abraim Laco Ma Obedo Latekcwiny

Abraim obedo mot ka neno jo me ode kacel ki luticce ka gitye ka yubbe me cito i Kanaan. (Acakki 12:1-5) I kare ma Abraim tye ka neno jo magi ma gijenge i kome pi kwogi-ni, en oniang tic madit ma etye kwede me konyogi. En onongo biminigi jami me kom nining ka gitye i lobo mo ma bene pe gingeyo-ni? Miyo jami ma kit meno mono onongo bibedo yot ka gitye i Ur, gang mulony ma tye ki olet malac me kwat, ngom ma ceko cam, ki dong pii muromo-ni? Ka two omako en Abraim ci oto i lobo manyen-ni kono? Nga ma bigwoko jo me ode? Ka Abraim onongo tye ki par ma kit magi, en pe oye ni meno obal cwinye. En omoko tamme me cito, me lubo lok pa Lubanga, ki cwiny ni ka rac ci rac gwok onango ki pii​—lanyut me tekcwiny.

TEKCWINY OBEDO GIN ANGO? Tekcwiny te lokke ni bedo ngat ma tek dok cwinye nwang​—olung tuke pa lewic nyo lworo. Bedo ma cwinywa tek pe te lokke ni dong pe lworo makowa i kine mukene. Ento ngat ma tye ki tekcwiny ma Lubanga omiye timo gin ma mitte kadi bed en lwor.

ABRAIM ONYUTO TEKCWINY NINING? Abraim pe olubo kor lwak. Abraim odongo ka mo ma danone giworo lubange kacel ki cal mapat pat. Ento en pe oye ni lworo tam pa dano ogenge me timo gin ma en onongo ngeyo ni tye atir. Ma ka meno, Abraim okwanyo yo mapat i kwone, oyero me woro Lubanga acel keken​—“Lubanga Mamalo Twal,” Jehovah.​—Acakki 14:21, 22.

Abraim oketo woro Lubanga me ada obedo namba acel ma ka keto pi jami me kom. En onongo tye atera me weko kwo maber ma onongo en tye iye i Ur, kun cito i tim ki gen ni Jehovah bimiye jami ducu ma mitte. Oromo bedo ni ka mwaka woto ki kato, Abraim nen calo obedo ka tamo pi kwo maber ma ebedo iye i Ur. Ento Abraim gire onongo tye ki gen ni kare ducu Jehovah bimiyo jami ma mitte pi jo me ode. Kun moko i kom Jehovah calo Ngat ma pire tek loyo i kwone, Abraim onongo tekcwiny me lubo gin ducu ma Lubanga wacce ni etim.

PWONY ANGO MA WANONGO? Wan bene waromo lubo lanen pa Abraim-mi ka wabedo ki tekcwiny me lubo lok pa Jehovah, kadi bed jo ma ka ngetwa pe gilubo. Me laporre, Baibul pwonyo ni jo ma gicung matek i woro Lubanga Jehovah kibidagogi, dok man romo a ki bot luremgi nyo wadigi. (Jon 15:20) Ka jami ma wapwonyogi madok i kom Jehovah-ni ogudo cwinywa, ci wabicung matek i niyewa kun watimo man ki woro.​—1 Petero 3:15.

 Wabedo bene ki gen ni Lubanga bimiyo jami ma mitte pi jo ma giketo niyegi i kome kit ma en ociko kwede-ni. Gen ma kit meno miniwa tekcwiny me jengo kwowa i kom jami me cwiny ento pe jami me kom. (Matayo 6:33) Nen kong kit ma luot mo acel gutimo meno kwede.

Kadi bed ni onongo gitye ki lutino awobe aryo matino, Ogwal gin ki Akello onongo gimito cito ka tito kwena maber-ri ka ma can lutit kwena tye iye. I nge kwedo lok kacel ki lega, gin gumoko tamgi me medde anyim ki pulangi-ni. Ogwal owaco ni: “Obedo tekcwiny me yubo lutinowa ki dong coko jamiwa me cito, kun pe wangeyo kit ma jamine bibedo kwede kunnu.” En omedde ni: “Ma watye ka moko tamwa, wanyamo lok i kom lanen pa Abraim gin ki Cara. Man okonyowa tutwal pien wabedo ka tamo i kom kit ma gin gugeno kwede Jehovah ki dong kit ma en okonyogi kwede kare ducu.”

Ma lubbe ki kit me kwogi i kabedo mukene, Ogwal owacci: “Wanongo mot i yo me aura.” En otito ni: “Pien wadwoko rwom me kwowa lapiny, watye ki kare me cwalo cawa malac kacel macalo jo me ot​—tito kwena, boko lok kacel, ki dong tuko kacel ki awobewa. Wawinyo agonya ma pe dong item.”

Tye kono ni, pe dano ducu gitye ki kero me timo alokaloka calo pa Ogwalgi-ni. Ento, wan ducu waromo lubo lanen pa Abraim kun waketo worowa bot Lubanga bedo mukwongo ki gen ni en bikonyowa. Ka watimo meno, ci nongo watye ka lubo lok me cuko cwiny ma tye i Baibul ni: “Rwot [Jehovah] en lakony mera, pe abibedo ki lworo; ngo kono ma dano twero timo i koma?”​—Jo Ibru 13:5, 6.

[Bok/​Cal ma tye i pot karatac 7]

Dako ma Lworo Lubanga dok Min Ot Kikome

Cara onyomo laco mo ma niyene tek adada. Ento dako man ma lworo Lubanga-ni oweko lanen maber me aluba. Ki lok ada, Baibul oloko pi nyinge tyen adek kulu calo ngat ma myero mon mukene-ni gulub lanenne me lworo Lubanga. (Icaya 51:1, 2; Jo Ibru 11:11; 1 Petero 3:3-6) Kadi bed Ginacoya pe oloko tutwal i kom dako man ma oywek-ki, ento wangeyo maber ni en onyuto kit mogo mabeco adada.

Me laporre, tam kong kit ma Cara odok kwede i kare ma Abraim otito bote ni Lubanga owacci omyero gia woko ki i paco me Ur. Tika en openyo kwene ma gibicito iye ki dok pingo? Tika en obedo ka paro pi jami me kom? Tika cwinye ocwer pien ebiweko lureme kacel ki lupacone, kun pe engeyo awene ma gwok nyo dok ebinenogi? Labongo akalakala, tam ma kit meno obino i wiye. Ento kadi bed kumeno, en oye me cito, kun geno ni Jehovah bimiye mot pi bedo lawiny.​—Tic pa Lukwena 7:2, 3.

Medo i kom bedo lawiny bot Lubanga, Cara obedo dako ma onyuto kit mabeco adada. Ma ka pyem apyema ki cware me loyo kit ma myero kitim jami i ot, Cara onyuto woro ki cwinye ducu bot cware, kun teno kore ka en doro jo me ode. I yo ma kit man, en obedo dako ma lawiny bot Abraim.​—1 Petero 3:1-6.

Kodi kit magi mono romo konyo mon i kare-ni bene? Dako mo ma nyinge Jill, ma orii inyomme pi mwaki 30 owaco ni: “Lanen pa Cara-ni opwonya me bedo agonya me lok kun atito tam ma tye i cwinya bot cwara.” En omedde ni: “Ki dok bene, calo lawi ot, cwara tye ki twero me moko tam me agikki i kom lok moni. Ka en otimo meno, obedo ticca me nenone-ni aketo i tic labongo pyem.”

Pwony ma pire tek ma bene wanongo ki bot Cara aye ene: Kadi bed ni en onongo leng adada, Cara pe oweko lenge-ni omiyo en obedo ki cwiny me wakke. (Acakki 12:10-13) Ma ka meno, en omine me teno kor Abraim ki mwolo pi kwogi ducu i kare me kuc ki can. Tye lok ada ni Abraim gin ki Cara gubedo jo ma tye ki niye matek, gimwol, dok luot ma onongo gimarre adada​—gin ducu gukelo mot bot ngat acel acel i kwogi.