Abraamu: Sran m’ɔ ti yakpafuɛ’n

Abraamu i awlobofuɛ mun nin i sufuɛ’m be su siesie be wun naan bé kɔ́ Kanaan nvle’n nun lɔ. Ɔ jin lɛ, i ɲin ta be. (Bo Bolɛ 12:1-5) Kɛ ɔ nian sran kpanngban sɔ mɔ sɛ bé dí o, sɛ bé lá o, ɔ fin i’n, ɔ wun kɛ junman o i sa nun. ?Lika m’ɔ siman lɔ laa’n niɔn, sɛ be ju lɔ’n, ɔ́ yó sɛ naan w’a nian sran ko ju wie sɔ’n be lika? ?Sɛ ɔ ti Ir m’ɔ ti aboje klɔ’n, mɔ nnɛn tawlɛ kpa o lɔ’n, mɔ lɔ asiɛ’n yo like ye’n, mɔ kusu be ɲan nzue lɔ’n, i su lɔ yɛ be o’n, nn ɔ flunmanman? ?Yɛ sɛ ɔ tɔ tukpacɛ annzɛ ɔ wu mɛn uflɛ sɔ’n nun lɔ’n nin? ?Wan yɛ ɔ́ níɛn i awlobofuɛ’m be lika ɔ? Sɛ bɔbɔ i sɔ akunndan bali Abraamu klun’n, sanngɛ w’a yacimɛn i wun lɛ naan i sɔ’n w’a bubu i sa sin. Maan be lu i o, be blo i o, i liɛ ng’ɔ si i’n, yɛle ndɛ nga Ɲanmiɛn kannin’n i su falɛ. Nanwlɛ, ɔ yoli yakpafuɛ.

?YAKPA YOLƐ’N, I BO’N YƐLE BENIN? Sran ng’ɔ ti yakpafuɛ’n, ɔ le awlɛn, ɔ sroman sa. Ɔ timan srɛfuɛ. Nán kɛ srɛ kunmɛn i mlɔnmlɔn sa le ɔ. Sanngɛ sran nga Ɲanmiɛn wlɛ i yakpa’n, kannzɛ maan srɛ kun i sɛ, sanngɛ ɔ yo like ng’ɔ fata kɛ ɔ yo’n.

?WAFA SƐ YƐ ABRAAMU KLELI KƐ Ɔ TI YAKPA Ɔ? Abraamu w’a sroman sran ɲinma. Lika nga Abraamu ɲinnin lɔ’n, i nunfuɛ’m be sɔ amuɛn kpanngban kpa. Sanngɛ w’a seman kɛ sran’m be nuan ti’n, ɔ su yoman like ng’ɔ si kɛ ɔ ti kpa’n. Yakpa su, Abraamu fali atin uflɛ su. Ɲanmiɛn kunngba cɛ yɛ ɔ suli i ɔ. Ɔ suli Zoova, “Nyanmiɛn b’ɔ o like’n kwlaa ti su’n.”​—Bo Bolɛ 14:21, 22.

Ɲanmiɛn Kpli i sulɛ’n yoli Abraamu i cinnjin trali aɲanbeun ninnge’m be kunndɛlɛ’n. Kannzɛ ɔ le tranwlɛ klanman Ir lɔ’n, sanngɛ ɔ kplinnin su kɛ ɔ́ yáci i lɛ naan ɔ́ kó trán aawlɛ flɛnnɛn’n nun lɔ. Afin ɔ lafili su kpa kɛ Zoova níɛn i lika. I yo, kɛ afuɛ’m be sin’n, atrɛkpa’n Abraamu i ɲin kpɛnkpɛnnin ninnge kpakpa ng’ɔ ɲannin be Ir lɔ’n be nun wie’m be su. Sanngɛ ɔ lafili su kpa kɛ Zoova níɛn i nin i awlobofuɛ’m be lika titi. Sran ng’ɔ yoli i cinnjin kpa’n, yɛle Zoova. Ɔ maan ɔ fɛli i wun mɛntɛnnin i. I sɔ’n wlɛli i yakpa naan w’a nanti Ɲanmiɛn i mmla’m be su.

?NGUE YƐ I KWLAA SƆ’N KLE E Ɔ? E kwla fa Abraamu i ajalɛ’n su. Yɛle kɛ kannzɛ sran nga e nin be o’n be ɲin yiman Zoova’n, e liɛ’n kwla mian e ɲin e nanti i ndɛ’n su yakpa su. I wie yɛle kɛ Biblu’n kle kɛ be nga be waan bé sú Zoova’n, be janvuɛ annzɛ be osufuɛ wie m’ɔ klo be kpa’n, ɔ kwla kle be yalɛ. (Zan 15:20) Sanngɛ kɛ e lafi su kpa kɛ Zoova i su like nga e suannin’n ti nanwlɛ’n, e jran su kpa yɛ e yiyi nun e kle sran mun amanniɛn su.​—1 Piɛr 3:15, 16.

Asa ekun’n, kasiɛ nga Ɲanmiɛn boli i kɛ ɔ́ nían be nga be lafi i su’n be lika’n, e kwla fa e wla gua  su. Kɛ e lafi su sɔ’n, ɔ wla e yakpa naan Ɲanmiɛn sulɛ’n w’a yo e cinnjin w’a tra ninnge kun nga mun. (Matie 6:33) Maan e nian wafa nga awlobo kun niannin i sɔ’n su yoli’n.

Dugu nin Beki be le ba yasua kanngan nɲɔn. Sanngɛ be waan bé kó trán nvle nga be mian Ɲanmiɛn Ndɛ’n i kanfuɛ’m be wun kpa lɔ’n, i nun. Kɛ be buli i su akunndan kpa mɔ be kunndɛli i wun afɔtuɛ’n, mɔ be srɛli Ɲanmiɛn tankaan’n, be fali ajalɛ kɛ bé kɔ́. Dugu seli kɛ: “E siman sa ng’ɔ́ wá jú e su e ɲrun lɔ’n. Ɔ maan ɔ fatali kɛ e yo yakpafuɛ naan y’a sua ba mun y’a ɔ. Sanngɛ e dun mmua e buli Abraamu nin Sara be aeliɛ’n i su akunndan. Kɛ e wunnin wafa nga be fali be wla’n guali Zoova su’n, mɔ kusu w’a yiman be ase le’n, nanwlɛ, i sɔ liɛ’n ukali e.”

Kɛ Dugu kán wafa nga be fa trannin nvle uflɛ sɔ nun lɔ’n i ndɛ’n, ɔ seli kɛ: “Ɲanmiɛn yrali e su kpa liɛ su.” Ɔ yiyi nun se kɛ: “Kɛ mɔ y’a kunndɛman ninnge kpanngban’n ti’n, kɛ aliɛ kun cɛn sa’n, e nin min yi nin ba mun e yo ninnge sunman likawlɛ. E bo jasin fɛ’n, e koko yalɛ, yɛ e nin ba mun e kan ngowa. Wafa nga e wa ɲannin e ti e yoli ninnge mun likawlɛ mɔ e wun fali e feke’n, i su aklunjuɛ nga e dili’n be kanman.”

I yo, e si kɛ sran ngba kwlá fɛmɛn i sɔ ajalɛ. Sanngɛ e ngba’n e kwla nian like nga Abraamu yoli’n su. Yɛle kɛ e kwla fa Ɲanmiɛn sulɛ’n e sie i like kwlaa yolɛ’n ɲrun, yɛ e lafi su kɛ ɔ́ súan e bo titi. Kɛ e yo sɔ’n, nn ndɛ nga Biblu’n kɛn i yɛ’n, i su yɛ e su fa ɔ. I waan: “E tra e anwlɛn e kan ndɛ nga be klɛli i kɛ: ‘E Min Nyanmiɛn’n yɛ ɔ ti n ukafuɛ-ɔ, srɛ kun-man min.’”​—Ebre Mun 13:5, 6.

[Kuku/Foto, bue 7]

Awlo bla kpa kun m’ɔ klo Ɲanmiɛn’n

Bian nga Sara jɛli i’n i Ɲanmiɛn sulafilɛ’n leman wunsu. Sanngɛ kusu bla sɔ m’ɔ klo Ɲanmiɛn’n i bɔbɔ i ajalɛ’n ti kpa wie. Biblu’n kɛn i ndɛ kpɛ nsan fa kle kɛ ɔ ti sran mɔ bla nga be sro Ɲanmiɛn’n be kwla niɛn i ajalɛ’n su ɔ. (Ezai 51:1, 2; Ebre Mun 11:11; 1 Piɛr 3:3-6) Kannzɛ Biblu’n kanman bla kpa sɔ’n i su ndɛ kpanngban’n, sanngɛ e kwla wun i kɛ i aeliɛ’n ti kpa.

?Kɛ Abraamu seli Sara kɛ Ɲanmiɛn waan be tu Ir klɔ’n su’n, ngue yɛ ɔ yoli ɔ? Ɔ buli kan be su kɔ lɔ’n, ɔ nin like nga ti yɛ be su kɔ’n, i akunndan. Yɛ ninnge kɛ lawlɛ nin tralɛ nin ndidiɛ sa’n, ɔ buli i kwlaa sɔ’n i akunndan. Kɛ ɔ wunnin kɛ ɔ́ wá yáci i janvuɛ nin i osufuɛ mun kɔ́’n, i wun fɔli kan, afin ɔ siman sɛ ɔ́ wún be ekun annzɛ ɔ su wunman be kun o. Ɔ nin i sɔ ngba’n, kɔlɛ’n w’a yoman tankantankan i sa nun. Ɔ lafili su kɛ i ɲin m’ɔ yili Zoova ti’n, ɔ́ yrɛ́ i su.​—Sa Nga Be Yoli’n 7:2, 3.

Sara i ɲin yi Ɲanmiɛn sɔ, sanngɛ ɔ ti awlo bla kpa ekun. W’a kunndɛman kɛ ɔ nin i wun bé kplí awlo’n i sielɛ’n. Sanngɛ i ɲin yili i wun kpa yɛ ajalɛ kwlaa ng’ɔ fɛ i awlo’n nun’n, ɔ suɛnnin i bo klolɛ su. I sɔ m’ɔ yoli’n ti’n, be wunnin i klanman’n i nzuɛn’n nun.​—1 Piɛr 3:1-6.

?Bla’m be kwla nian Sara i nzuɛn sɔ’n su andɛ? Bla kun m’ɔ suan Jili’n, ɔ nin i wun be jali w’a di afuɛ 30 tra su. Be di aklunjuɛ be aja’n nun. Bla’n sɔ’n seli kɛ: “Sara i aeliɛ’n kleli min kɛ n kwla kan ndɛ ng’ɔ o n klun’n n kle min wun. Sanngɛ kɛ mɔ min wun yɛ ɔ ti awlobo kpɛn’n, sɛ e waan é fá ajalɛ wie’n, i sa nun yɛ ndɛ kasiɛn’n wo ɔ. Kɛ ɔ ko fa ajalɛ sɔ’n, min liɛ ng’ɔ ka’n yɛle kɛ m mian min ɲin naan like sɔ’n yo ye.”

Sara i aeliɛ’n kle e ninnge kpanngban. Atrɛkpa’n ng’ɔ wluwlu e wun kpa’n yɛle kɛ kannzɛ ɔ ti bla klanman kpa’n, sanngɛ w’a fɛmɛn i sɔ’n w’a tumɛn i wun. (Bo Bolɛ 12:10-13) Sanngɛ, maan lika’n yo kpa o, annzɛ maan ɔ yo kekle o, ɔ suɛnnin i wun bo. Nanwlɛ, Abraamu nin Sara be trannin klanman kɛ ng’ɔ fata kɛ sran kun nin i yi be tran’n sa. Be yoli wun ase kanfuɛ yɛ be kloli be wun. Be nɲɔn’n be aeliɛ kpa’n ɔ ukali be wiengu.