Ebraham—Wan Man We i No Fraet

Ebraham i stap lukluk famle blong hem mo ol man we oli wok blong hem. Oli stap mekemrere ol samting blong olgeta blong go long Kenan. (Jenesis 12:1-5) Hem i lukluk olgeta se oli plante we plante, mo hem nao i mas lukaot long olgeta evriwan. Hem i harem se hemia wan bigfala wok. Bambae oli go stap long wan kantri we hem i no save se i stap wea. ?Bambae hem i mekem olsem wanem blong lukaot long olgeta taem oli stap long kantri ya? Ating i moa isi long hem blong lukaot long olgeta sipos oli stap long taon ya Uru, from we long taon ya i gat plante samting. I gat gudfala gras blong ol anamol, i gat gudfala graon, mo i gat wota saplae. ?Olsem wanem sipos hem i sik no hem i ded long niufala kantri ya? ?Hu bambae i lukaot long famle blong hem? Maet Ebraham i fraet from ol samting ya. Be hem i no wantem save. Tingting blong hem i strong blong mekem samting we God i talem, nomata wanem bambae i hapen long olgeta. !Tru, hem i soemaot se hem i no fraet!

?MAN WE I NO FRAET I OLSEM WANEM? Man we i no fraet, tingting blong hem i strong, hem i tok stret mo hem i gat paoa. Hem i defren long man we i sem. Be hemia i no min se neva hem i fraet. Taem God i givhan long wan man blong i no fraet, man ya i mekem samting we God i wantem nating se samtaem hem i fraet.

?EBRAHAM I MEKEM WANEM BLONG SOEMAOT WE HEM I NO FRAET? Ebraham i no folem fasin we bighaf blong ol man raonabaot oli mekem. Long ples we Ebraham i gruap long hem, ol man oli mekem wosip long plante god mo long plante aedol. Maet Ebraham i fraet long tingting blong olgeta, be hem i no letem fraet i blokem hem blong mekem samting we hem i save se i stret blong mekem. Tingting blong Ebraham i strong. Hem i jusum wan laef we i defren. Hem i jusum blong wosipim wan God nomo, hemia Jehova, “God we i hae we i hae.”—Jenesis 14:21, 22.

Ebraham i putum wosip we hem i mekem long tru God i stap fastaem long ol samting we hem i save kasem blong harem gud long laef. Hem i glad blong lego gudfala laef blong hem long Uru, mo go wokbaot long draeples. Hem i trastem se Jehova bambae i givim ol samting we hem i nidim. Maet taem ol yia oli pas, Ebraham i tingtingbak long ol gudfala samting we hem i harem gud long olgeta long Uru. Be Ebraham i save se oltaem Jehova bambae i lukaot long hem mo famle blong hem. Ebraham i putum tingting blong hem i stap long Jehova se hem i Man ya we i moa impoten long ol narafala man long laef blong hem. Nao Ebraham i no fraet blong obei long ol tok blong God.

?YUMI LANEM WANEM? Yumi save folem fasin blong Ebraham sipos yumi no fraet blong obei long Jehova, nating se ol narafala man raonabaot long yumi oli no obei long Jehova. Baebol i tijim yumi se olgeta we oli strong blong mekem wosip long Jehova bambae oli kasem fasin agens. Maet ol gudfala fren mo famle blong olgeta i agensem olgeta. (Jon 15:20) Taem yumi save se ol samting we yumi lanem long saed blong Jehova oli tru, yumi toktok long ol narafala man blong eksplenem ol tijing blong Baebol, mo yumi toktok long fasin we i soemaot respek long olgeta.—1 Pita 3:15, 16.

 Olsem Ebraham, yumi save trastem promes blong God se bambae hem i givim ol samting we yumi nidim sipos yumi bilif long hem. Taem yumi trastem God, yumi no fraet blong putum wosip we yumi mekem long God fastaem long ol narafala samting we yumi nidim long laef. (Matiu 6:33) Bambae yumi tokbaot wan famle we i mekem olsem.

Nating se Doug mo Becky tufala i gat tu pikinini boe, tufala i wantem muv i go stap long wan narafala kantri we i nidim moa man blong talemaot gud nius blong Baebol. Tufala i traem save moa long kantri ya mo tufala i prea plante long Jehova. Biaen tufala i mekem desisen blong folem plan blong tufala. Doug i talem se: “Mi mi fraet taem mitufala i stap rere olting blong mifala mo mitufala i rere blong tekem tufala pikinini i go long narafala kantri. Mifala i no save se taem mifala i kasem longwe bambae i olsem wanem. Mifala i mekem tingting blong mifala i strong. Taem mifala i jes stat blong tokbaot se bambae mifala i muv no nogat, mifala i tokbaot stori blong Ebraham mo Sera. Mifala i tingbaot fasin blong tufala blong trastem Jehova, mo Jehova i no lego tufala. Hemia i givhan bigwan long mifala.”

Doug i tokbaot laef blong hem mo famle blong hem taem oli stap long narafala kantri, i se: “Jehova i blesem mifala bigwan.” Hem i eksplenem se: “Laef blong mitufala i no fasfas, mekem se bighaf long dei, mitufala i stap wetem tufala pikinini. Mifala i go prij, mifala i storian, mo mitufala i pleplei wetem tufala. Mifala i harem se mifala i fri we mifala i fri. I no gat toktok blong eksplenem. I gud we i gud tumas.”

I tru, yumi evriwan i no save mekem wan bigfala jenis olsem. Be yumi save folem fasin blong Ebraham. Yumi save putum wosip we yumi mekem long God long fasples long laef blong yumi, mo yumi save trastem God se hem bambae i stap wetem yumi blong givhan long yumi. Olsem nao, yumi folem advaes blong Baebol blong “mekem tingting blong yumi i strong blong talem se, ‘Hae God i stap givhan long mi, nao bambae mi mi no save fraet.’”—Hibrus 13:5, 6.

[Bokis/Foto blong pija long pej 7]

Wan Gudfala Woman We i Mekem God i Glad

Sera i mared long wan gudfala man we i bilif strong long God. Sera tu i mekem God i glad mo hem i soemaot sam gudfala fasin. Tri taem Baebol i talem nem blong Sera taem i tokbaot ol fasin we ol woman oli mas folem blong mekem God i glad. (Aesea 51:1, 2; Hibrus 11:11; 1 Pita 3:3-6) Baebol i no tokbaot tumas gudfala woman ya, be yumi save luk we hem i gat sam nambawan fasin.

Yu traem tingbaot fasin blong Sera taem Ebraham i talem long hem se God i wantem we tufala i aot long Uru. ?Olsem wanem? ?Sera i wantem save se ples ya we tufala i mas go long hem i stap wea, mo from wanem tufala i mas go long ples ya? ?Sera i wari se bambae tufala i gat ol samting we oli nidim? ?Hem i harem nogud blong lego ol fren mo famle blong hem? Hem i no save wetaem bambae hem i luk olgeta bakegen, mo sipos bambae hem i luk olgeta bakegen no nogat. Ating hem i tingbaot ol samting ya. Be nating, hem i glad blong aot long Uru. Sera i trastem Jehova se bambae i blesem hem sipos hem i obei.—Ol Wok 7:2, 3.

Wan narafala gudfala fasin blong Sera, hemia se hem i mekem gud wok blong hem long famle. Sera i no traem winim man blong hem, blong hem i bos long famle. Hem i ona long Ebraham long hat blong hem. Hem i soemaot we hem i lavem Ebraham from we hem i folem gud ol desisen we Ebraham i mekem. Ol gudfala fasin ya blong Sera oli mekem hem i naes we i naes.—1 Pita 3:1-6.

?Olsem wanem tede? ?Ol fasin ya oli save givhan long ol woman we oli mared? Wan woman we nem blong hem Jill, i mared 30 yia finis mo hem i glad long mared blong hem. Hem i talem se: “Fasin blong Sera i tijim mi se mi no mas fraet blong toktok mo talemaot tingting blong mi long man blong mi. Be tu mi save se man blong mi i hed blong famle mo hem nao i mas mekem desisen. Taem hem i mekem desisen finis, mi mi mas mekem evri samting we mi mi save mekem blong desisen ya i karem gudfala frut.”

Maet fasin blong Sera we i mekem yumi tingting moa long hem, hemia se: Nating se Sera i naes we i naes, be hem i no flas from. (Jenesis 12:10-13) Sera i mekem tingting blong hem i stap daon mo hem i givhan long Ebraham long ol gudfala taem mo long ol hadtaem tu. Ebraham mo Sera tufala i obei oltaem long God, tufala i mekem tingting blong tufala i stap daon, mo tufala i lavem ol man. Yes, tufala i givgivhan gud long tufala mekem se tufala i kasem plante blesing.