Si Abraham—Tawong May Kaisog

Si Abraham nagsud-ong sa iyang pamilya ug mga sulugoon samtang nangandam sila sa pagpaingon sa Canaan. (Genesis 12:1-5) Samtang nagtan-aw niining dakong grupo sa mga tawo nga nagsalig kaniya sa ilang panginabuhian, gibati ni Abraham ang iyang responsabilidad kanila. Unsaon man niya pagtagana sa ilang materyal nga panginahanglan diha sa dapit nga wala pa nila maadtoi? Dili ba mas sayon kining himoon sa Ur, usa ka mauswagong dapit nga halapad ug sibsibanan, tabunok ang yuta, ug abunda sa tubig? Unsa na lang kon siya masakit o mamatay sa laing yuta? Kinsa na man lay moatiman sa iyang pamilya? Kon nabalaka man niana si Abraham, wala niya tugoting madaog siya sa kahadlok. Determinado siyang motuman sa sugo sa Diyos bisag unsay mahitabo—usa ka timailhan sa tinuod nga kaisog.

 UNSA ANG KAISOG? Kini nagtumong sa kalig-on ug kawalay-kahadlok—ang kaatbang sa kahadlok o katalaw. Ang pagkamaisogon wala magpasabot nga dili na gyod ta mahadlok. Hinunoa, ang tawong may hinatag-sa-Diyos nga kaisog molihok bisan pa sa iyang kahadlok.

GIUNSA PAGPAKITA NI ABRAHAM ANG KAISOG? Si Abraham wala mahadlok nga malahi sa uban. Si Abraham nagdako sa dapit nga ang mga tawo nagsimbag daghang diyosdiyos. Bisan pa niana, wala niya tugoti ang kahadlok sa tawo nga mopugong niya sa pagbuhat ug matarong. Hinunoa, siya maisogong mipili sa pagkinabuhi nga lahi sa uban, nga nagsimba sa usa lamang ka Diyos—ang “Labing Hataas nga Diyos,” si Jehova.—Genesis 14:21, 22.

Giuna ni Abraham ang pagsimba sa matuod nga Diyos inay ang materyal nga mga butang. Andam siyang mobiya sa iyang haruhay nga kinabuhi sa Ur ug moadto sa kamingawan, nga nagasalig gayod nga itagana ni Jehova ang iyang materyal nga panginahanglan. Siyempre, sa paglabay sa katuigan, mahinumdoman tingali ni Abraham ang iyang kaharuhay sa Ur. Apan masaligon siya nga si Jehova kanunayng magtagana kaniya ug sa iyang pamilya. Kay giisip niya si Jehova ingong labing hinungdanong Persona sa iyang kinabuhi, si Abraham nakabatog kaisog sa pagsunod sa mga sugo sa Diyos.

UNSAY MGA LEKSIYON NIINI KANATO? Atong masundog si Abraham pinaagi sa pag-ugmad sa kaisog nga mosunod kang Jehova, bisag ang uban wala magbuhat niana. Pananglitan, ang Bibliya nagtudlo nga kadtong mobarog sa ilang pagtuo kang Jehova mahimong lutoson, tingali sa ilang mga higala ug paryente nga walay daotang motibo. (Juan 15:20) Apan kon kombinsido kita sa atong nakat-onan bahin kang Jehova, kita mobarog dapig sa atong pagtuo sa matinahorong paagi.—1 Pedro 3:15.

Makasalig usab kita sa saad sa Diyos nga iyang tagan-an kadtong may pagtuo kaniya. Kana nga pagsalig maghatag kanatog kaisog sa pag-una sa espirituwal nga mga butang inay sa materyal. (Mateo 6:33) Tagda kon giunsa kana paghimo sa usa ka pamilya.

Bisag gagmay pa ang ilang duha ka anak nga lalaki, buot ni Doug ug Becky nga mobalhin sa nasod nga mas dako ang panginahanglan sa mga magwawali sa maayong balita sa Bibliya. Human sa pagpakisusi ug kinasingkasing nga pag-ampo, sila nakadesidir nga buhaton ang ilang mga plano. “Nagkinahanglag kaisog ang pagbalhin ilabina nga gagmay pa ang mga bata, kay wala mi masayod kon unsay among dangatan,” miingon si Doug. “Apan sa pagsugod pa lang namog plano niini, among gihisgotan ang panig-ingnan ni Abraham ug Sara. Ang paghunahuna kon giunsa nila pagsalig kang Jehova—ug kon giunsa niya sila pag-atiman—nakatabang gayod kanamo.”

Maylabot sa ilang pagkinabuhi sa laing nasod, si Doug miingon: “Gipanalanginan gyod mi.” Siya mipatin-aw: “Kay simple na kaayo ang among kinabuhi, halos tibuok adlaw na ming magkauban ingong pamilya—sa pagsangyaw, pag-estoryahanay, ug pagpakigdula uban sa among mga anak. Usa kini ka kagawasan nga dili mahubit sa mga pulong.”

Siyempre, dili tanan ang makahimo niining dakong kausaban. Apan kitang tanan makasundog sa panig-ingnan ni Abraham pinaagi sa pag-una sa atong pagsimba sa Diyos, nga masaligong siya andam motabang nato. Kon himoon nato kana, atong gisunod ang tambag sa Bibliya nga ‘magmaisogon ug moingon: “Si Jehova ang akong magtatabang; dili ako mahadlok.”’—Hebreohanon 13:5, 6.

[Blurb sa panid 7]

Ang tawong may hinatag-sa-Diyos nga kaisog molihok bisan pa sa iyang kahadlok

 [Kahon/Hulagway sa panid 8]

Diyosnong Babaye ug Bililhong Asawa

Si Sara naminyo sa usa ka talagsaong lalaki sa pagtuo. Apan kining diyosnon nga babaye maoy maayong panig-ingnan usab. Gani, ang Bibliya katulo maghisgot sa iyang ngalan ingong usa nga angayng sundogon sa diyosnong mga babaye. (Isaias 51:1, 2; Hebreohanon 11:11; 1 Pedro 3:3-6) Bisag gamay ra ang gibutyag sa Kasulatan bahin niining talagsaong babaye, atong makita nga siya may maayong mga hiyas.

Pananglitan, hunahunaa ang reaksiyon ni Sara sa dihang gisultian siya ni Abraham sa sugo sa Diyos nga mobiya sa Ur. Naghunahuna ba siya kon asa sila paingon ug ngano? Nabalaka ba siya sa ilang materyal nga panginahanglan? Naguol ba siyang biyaan ang iyang mga higala ug pamilya, nga wala masayod kon kanus-a sila magkita pag-usab—kon ugaling magkita man? Sa walay duhaduha, misantop kana sa iyang hunahuna. Bisan pa niana, andam siyang mobiya, nga masaligong panalanginan siya ni Jehova tungod sa iyang pagkamasinugtanon.—Buhat 7:2, 3.

Gawas nga siya masinugtanong alagad sa Diyos, si Sara usa ka buotang asawa. Inay makigkompetensiya sa iyang bana sa pagdumala sa pamilya, giugmad ni Sara ang lalom nga pagtahod sa iyang bana, nga mahigugmaong nagpaluyo kaniya sa paggiya niini sa pamilya. Sa pagbuhat niana, iyang gidayandayanan o gipatahom ang iyang kaugalingon pinaagi sa maayong mga hiyas.—1 Pedro 3:1-6.

Makabenepisyo ba niana ang mga asawa karon? “Ang panig-ingnan ni Sara nagtudlo kanako nga angay kong mopahayag sa akong opinyon ngadto sa akong bana,” miingon ang usa ka babayeng ginganlag Jill, kinsa kapin sa 30 ka tuig nang malipayon sa iyang kaminyoon. “Sa samang higayon,” siya mipadayon, “ingong ulo sa pamilya, ang akong bana maoy modesisyon. Sa dihang makadesisyon na siya, himoon nako ang tanan aron molampos kana.”

Tingali ang labing makapatandog nga leksiyon nga atong makat-onan kang Sara mao kini: Bisag siya matahom kaayo, siya dili mapahitas-on. (Genesis 12:10-13) Hinunoa, mapainubsanon niyang gipaluyohan si Abraham sa tibuok niyang kinabuhi, may problema man o wala. Sa walay duhaduha, si Abraham ug Sara maoy matinumanon, mapainubsanon, ug mahigugmaong magtiayon, kinsa maoy tinuod nga panalangin sa usag usa.