Eparama​—Na Turaga Yaloqaqa

E vakaraici ratou na nona vuvale kei na nona dauveiqaravi o Eparama nira vakasosolo mera gole i Kenani. (Vakatekivu 12:1-5) Ni raica ira na ilala levu qori e kila vinaka o Eparama ni dua na itavi levu e vakacolati vua ena vukudra nira vakatautaka vua na nodra bula. Ena vakarautaka vakacava na ka mera bula kina ena vanua era sega ni kila? De dua ena rawarawa toka qori mai Uri ni vanua vutuniyau, levu na vanua mera kana kina na manumanu, bulabula na qele qai sega ni leqa na wai. Vakacava ke tauvimate se mate ena nona itikotiko vou? O cei ena qarava na nona vuvale? Ke leqataka mada ga qori o Eparama, e sega ni vakalaiva me vakayalolailaitaki koya. Se mani cava e yaco, e vakadeitaka ga me lako, me talairawarawa ina ivakaro ni Kalou—qori e ivakaraitaki dina ni yaloqaqa.

NA CAVA NA YALOQAQA? O koya e vakaraitaka na itovo qo e kaukaua, doudou, e qaqa tale ga—qori e veibasai ni madua se rerere. O koya e yaloqaqa e dau rere tale ga. Ia ni vakayaloqaqataki keda na Kalou, eda na doudou ni cakava na ka.

A VAKARAITAKA VAKACAVA O EPARAMA NA YALOQAQA? A sega ni rawai ena nodra veivakamuai eso tale. A susugi o Eparama ena vanua e qaravi kina e levu na kalou kei na matakau. Ia e sega ni rerevaka na nodra rai eso tale me kua ni cakava kina na ka e kila ni dodonu. A doudou o Eparama me duidui vei ira na kena vo ni vakatulewataka me qarava e dua ga na Kalou—na “Kalou Cecere Sara” o Jiova.​—Vakatekivu 14:21, 22.

A vakaliuca o Eparama na nona qarava na Kalou, sega ni veika vakayago. A yalorawarawa me biuta na bula totoka mai Uri me gole ina vanualiwa, a nuitaka vakaoti ni na vakarautaka o Jiova na veika vakayago me bula kina. E macala ga ni toso na gauna ena rairai vakasamataka o Eparama na veika totoka a marautaka tu mai Uri. Ia a nuidei ni o Jiova ena karoni koya tu ga kei na nona vuvale. Ni bibi duadua ena nona bula o Jiova, a yaloqaqa o Eparama me muria na nona ivakaro.

NA CAVA EDA VULICA KINA? Eda rawa ni vakatotomuri Eparama nida yaloqaqa meda talairawarawa vei Jiova ke ra sega mada ga ni cakava qori o ira eda tiko veitikivi. Kena ivakaraitaki, e kaya na iVolatabu nira na tusaqati o ira era dei ena nodra vakabauta na Kalou o Jiova ra qai rawa ni veitusaqati na itokani se wekadra ena nodra kauai. (Joni 15:20) Ia nida kila ni dina na veika eda vulica me baleti Jiova, eda na vakamacalataka ena veidokai na ka eda vakabauta.​—1 Pita 3:15.

Eda nuidei tale ga ni na vakarautaka dina na Kalou na veika mera bula kina o ira era vakabauti koya. Ni dei va qori na noda vakanuinui eda na vakaliuca na veika vakayalo, sega ni veika vakayago. (Maciu 6:33) Raica mada se ratou cakava vakacava qori e dua na vuvale.

Erau se gone na luvedrau tagane o Doug kei Becky, ia erau via toki ina dua na vanua e gadrevi vakalevu kina na veivuke me vunautaki na itukutuku vinaka. Erau vakadidike vinaka rau qai masu vagumatua, oti rau qai vakatulewataka me ratou toki. E kaya o Doug: “E gadrevi dina na yaloqaqa me keitou toki, keitou sega ni kila na cava ena yaco. Ia ni keirau se qai vakasamataka tiko me keitou toki, keirau veivosakitaka na nodrau ivakaraitaki o Eparama kei Sera. E vukei keirau sara ga na neirau vakasamataka nodrau nuitaki Jiova kei na nona vakayacora kece na nona yalayala vei rau.”

E kaya o Doug me baleta na nodratou toki: “Keitou vakalougatataki vakalevu.” E tomana: “Ni rawarawa ga neitou bula, keitou rawa ni cakava kina vakavuvale e levu na ka—⁠vunau, keitou dau veivosaki, keitou qito vata tale ga. Keitou marautaka vakavuvale na yaga ni veiveisau keitou cakava.”

E macala ga nida sega ni rawa ni cakava kece na veiveisau levu va qori. Ia eda rawa ni vakatotomuria kece na ivakaraitaki i Eparama nida vakaliuca na noda qarava na Kalou da qai nuitaka ni na tokoni keda. Nida cakava qori, eda sa muria tiko na ivakasala ena iVolatabu “meda yaloqaqa da qai kaya: ‘E noqu ivukevuke o Jiova; au na sega ni rere.’”​—Iperiu 13:5, 6.

 Tikina bibi ena tabana e 7]

Ni vakayaloqaqataki keda na Kalou, eda na doudou ni cakava na ka

 [Kato/​iYaloyalo ena tabana e 8]

Yalewa Dau Qaravi Kalou Radinivale Vinaka

A vakawatitaka o Sera e dua e vakasakiti dina na nona vakabauta. Ia e totoka tale ga na nona ivakaraitaki na yalewa dau qaravi Kalou qo. E cavuti sara ga vakatolu ena iVolatabu na yacana me ivakaraitaki vei ira na yalewa dau qarava na Kalou. (Aisea 51:1, 2; Iperiu 11:11; 1 Pita 3:3-6) E lailai sara na ka e vakamacalataka na iVolatabu me baleta na marama vakasakiti qo, ia eda kila rawa kina na nona itovo talei.

Kena ivakaraitaki, vakasamataka mada na ka e cakava o Sera ni tukuna vua o Eparama na veidusimaki ni Kalou me rau biuti Uri. A bau vakataroga erau na lako i vei se na vuna me rau lako kina? A leqataka na veika vakayago me rau bula kina? A rarawataka beka na nona biuti ira na nona itokani kei na wekana, e sega ni kila ena sotavi ira tale se sega? E macala ga ni vakasamataka na veika qori. Ia a yalorawarawa me biubiu qai nuitaki Jiova me vakalougatataki koya ni talairawarawa.​—Cakacaka 7:2, 3.

A sega wale ga ni dau talairawarawa o Sera vua na Kalou, a radinivale vinaka tale ga. A sega ni suguta na itutu nei watina me lewa na veika ni vuvale, ia dua na ka na nona dokai watina vakalevu o Sera qai tokona na nona veidusimaki ena vuvale. Ni cakava qori, a dua kina na marama totoka ni sauni koya ena itovo e kilai tani kina.​—1 Pita 3:1-6.

Ena yaga beka na itovo qori vei ira na radinivale nikua? E kaya o Jill sa sivia na 30 na yabaki na nona marautaka nona bula vakawati: “Au vulica ena ivakaraitaki i Sera meu kua ni tu suka na tukuna na lomaqu se vakaraitaka na noqu rai vei watiqu.” E tomana: “Me vaka ni iliuliu ni vale o watiqu, e nona na iotioti ni vakatulewa. E noqu itavi gona meu raica me vakayacori na lewa e tauca.”

Na ka yaga duadua eda rawa ni vulica vei Sera qo: E marama rairai totoka dina, ia a sega ni vakalaiva qori me lai dokadoka kina. (Vakatekivu 12:10-13) A yalomalumalumu ni tokoni Eparama ena gauna vinaka kei na gauna ca ni nodrau bula vakawati. Erau veiwatini yalodina, yalomalumalumu qai dauloloma o Eparama kei Sera​—erau vu ni veivakalougatataki ena veika erau cakava.