Abraham—Tawo nga Maisog

Ginatan-aw ni Abraham ang iya pamilya kag mga alagad samtang nagahanda sila pakadto sa Canaan. (Genesis 12:1-5) Samtang ginatan-aw niya sila, nabatyagan ni Abraham nga may daku sia nga responsibilidad sa ila. Paano niya mahatag ang ila kinahanglanon sa lugar nga wala niya mahibaluan? Indi kuntani ini mabudlay kon ara lang sila sa Ur, isa ka manggaranon nga lugar nga may malapad nga halalban, mabungahon nga duta, kag bugana nga suplay sang tubig. Paano kon magmasakit sia ukon mapatay sa lugar nga sayluhan nila? Sin-o ang maatipan sa iya pamilya? Kon nahunahuna gid man ini ni Abraham, wala niya ini gintugutan nga magpaluya sa iya. Determinado sia nga tumanon ang Dios, ano man ang matabo—nga tanda sang matuod nga kaisog.

 ANO ANG KAISOG? Ang kaisog isa ka kinaiya sang kabakod kag kabaliskaran sang pagkamahuluy-on ukon pagkatalawan. Pero indi buot silingon nga ang isa nga maisog wala na nahadlok. Sa baylo, ang tawo nga ginhatagan sang Dios sing kaisog nagaatubang sa mga kabudlayan bisan pa may kahadlok sia.

PAANO SI ABRAHAM NAGPAKITA SING KAISOG? Si Abraham wala nagpaimpluwensia sa iban. Nagdaku sia sa lugar nga ang mga tawo nagasimba sa lainlain nga dios kag mga idolo. Pero wala niya gintugutan ang kahadlok sa tawo nga magpauntat sa iya sa paghimo sing husto. Ginsimba niya ang isa lamang ka Dios—ang “Labing Mataas,” si Jehova.—Genesis 14:21, 22.

Gin-una ni Abraham ang pagsimba sa matuod nga Dios sangsa materyal nga mga butang. Handa sia nga biyaan ang iya masulhay nga kabuhi sa Ur kag nagkadto sa kamingawan, nga nagasalig nga ihatag ni Jehova ang iya mga kinahanglanon. Samtang nagaligad ang mga tinuig, mahimo nahunahuna ni Abraham ang kabuhi niya sadto sa Ur. Pero kumbinsido sia nga indi sila pagpabay-an ni Jehova. Bangod nagasalig sia kay Jehova, ang pinakaimportante nga Persona sa iya kabuhi, nakatigayon sia sing kaisog sa pagtuman sa mga sugo sang Dios.

ANO ANG MATUN-AN NATON? Mailog naton si Abraham kon mangin maisog kita nga tumanon si Jehova, bisan pa ang iban wala nagatuman. Halimbawa, nagasiling ang Biblia nga ang mga nagatuman kay Jehova nga Dios mahimo hingabuton sang ila mga abyan ukon mga paryente. (Juan 15:20) Pero kon kumbinsido kita sa aton natun-an parte kay Jehova, pangapinan naton ang aton mga pagpati sa matinahuron nga paagi.—1 Pedro 3:15.

Makasalig man kita sa promisa sang Dios nga indi niya pagpabay-an ang mga nagatuo sa iya. Bangod sini, may kaisog kita nga unahon ang pagsimba sa Dios sa baylo sang materyal nga mga butang. (Mateo 6:33) Binagbinaga kon paano ini nahimo sang isa ka pamilya.

Sanday Doug kag Becky may duha ka bata, pero gusto nila magsaylo sa isa ka pungsod nga diutay lang ang manugwali sang maayong balita sang Biblia. Sa tapos sila makabinagbinag sing maayo kag makapangamuyo, gindayon nila ang ila plano. “Kinahanglan determinado kami nga maghimos upod sa amon kabataan kag magsaylo, bisan indi kami sigurado sa amon madangatan,” siling ni Doug. “Pero antes kami nagdesisyon, gin-istoryahan namon ang halimbawa nanday Abraham kag Sara. Nakabulig gid sa amon ang pagbinagbinag kon paano sila nagsalig kay Jehova, kag kon paano niya sila ginbuligan.”

Parte sa ila kabuhi sa iban nga pungsod, si Doug nagsiling: “Ginpakamaayo gid kami.” Nagsiling pa sia: “Bangod mas simple ang amon kabuhi, daku ang amon panahon sa pagwali, pag-istoryahanay, kag paghampang upod sa kabataan. Daw indi namon mapaathag ang amon kalipay.”

Siempre, indi tanan makahimo sini nga pagbag-o sa ila kabuhi. Pero mailog naton ang halimbawa ni Abraham kon unahon naton ang pagsimba sa Dios, nga nagasalig nga indi niya kita pagpabay-an. Kon himuon naton ini, ginasunod naton ang laygay sang Biblia nga ‘mangin maisog kag magsiling: “Si Jehova ang akon manugbulig; indi ako magkahadlok.”’—Hebreo 13:5, 6.

[Blurb sa pahina 7]

Ang tawo nga ginhatagan sang Dios sing kaisog nagaatubang sa mga kabudlayan bisan pa may kahadlok sia

 [Kahon/Retrato sa pahina 8]

Diosnon nga Babayi kag Maayo nga Asawa

Si Sara nakapamana sang lalaki nga matutom sa Dios. Pero ining diosnon nga babayi maayo gid nga halimbawa. Ang matuod, tatlo ka beses nga ginsambit sa Biblia ang iya halimbawa nga dapat ilugon sang diosnon nga mga babayi. (Isaias 51:1, 2; Hebreo 11:11; 1 Pedro 3:3-6) Bisan diutay lang ang ginasugid sang Biblia parte sa iya, masiling naton nga may maayo sia nga mga kinaiya.

Halimbawa, binagbinaga ang reaksion ni Sara sang ginsugiran sia ni Abraham sang sugo sang Dios nga mahalin sila sa Ur. Nagpalibog bala sia kon ngaa kag kon diin sila makadto? Nabalaka bala sia kon diin sila makuha sang ila mga kinahanglanon? Nasubuan bala sia nga biyaan ang iya mga abyan kag pamilya, kay basi indi na niya sila makita liwat? Sigurado nga ginpamensar ini ni Sara. Pero handa sia nga maghalin, nga nagasalig nga pakamaayuhon ni Jehova ang iya pagkamatinumanon.—Binuhatan 7:2, 3.

Luwas nga matinumanon si Sara sa Dios, maayo man sia nga asawa. Sa baylo nga agawan sing papel ang iya bana sa pagdumala sang ila pamilya, ginarespeto niya sia kag ginasuportahan sa pag-atipan sa ila pamilya. Gani, nangin matahom si Sara bangod sa iya maayo nga mga kinaiya.—1 Pedro 3:1-6.

Ang iya bala halimbawa makabulig sa mga asawa subong? “Ang halimbawa ni Sara nagtudlo sa akon nga dapat ko ipabutyag ang akon opinyon sa akon bana,” siling ni Jill, nga sobra 30 ka tuig na nga may bana. “Pero,” siling niya, “bangod ulo sang pamilya ang akon bana, responsibilidad niya nga maghimo sing desisyon. Dayon, ginahimo ko ang akon masarangan para suportahan ang iya desisyon.”

Ano ang pinakamaayo nga matun-an naton kay Sara? Bisan matahom sia katama, indi sia bugalon. (Genesis 12:10-13) Sa baylo, ginsuportahan niya si Abraham, maayo man ukon mabudlay ang ila kahimtangan. Sanday Abraham kag Sara matutom, mapainubuson, kag mapinalanggaon nga mag-asawa. Gani nangin pagpakamaayo sila sa isa kag isa.