Iburahimu Mũthuri Warĩ na Ũũmĩrĩru

Iburahimu arabaara famĩlĩ yake na ndungata ciake makĩĩhaarĩria kuumagara mathiĩ Kanaani. (Kĩambĩrĩria 12:1-5) Abaara gĩkundi kĩu kĩnene kĩa andũ arĩa mamũroraga igũrũ amahingĩrie mabataro mao ma kĩĩmwĩrĩ, akona wega wĩra ũrĩa ũrĩ mbere yake. Arĩhotaga atĩa kũmahingĩria mabataro mao ma kĩĩmwĩrĩ arĩ bũrũri-inĩ mũgeni? Na githĩ ũndũ ũcio ndũngĩakĩrĩ mũhũthũ bũrũri-inĩ wa Uru kũrĩa kwarĩ na ũtonga mũingĩ, irio nyingĩ cia mahiũ, tĩri mũnoru, na maĩ maingĩ? Ĩ angĩrwarĩra kana akuĩre bũrũri-inĩ ũcio mũgeni? Nũ ũrĩramataga famĩlĩ yake? O na angĩkorũo Iburahimu arĩ na mĩtangĩko ta ĩyo-rĩ, ndaretĩkĩria maũndũ macio matũme orũo nĩ hinya. O ũrĩa wothe kũrĩthiĩ, atuĩte itua rĩa gwathĩkĩra watho wa Ngai—kuonania ũũmĩrĩru wa ma.

ŨŨMĨRĨRU NĨ KĨĨ? Nĩ ngumo ya gũkorũo na hinya, ũcamba na ũrũme—mũgarũ wa gwĩtigĩra kana gũkorũo na guoya. Ti atĩ gũkorũo na ũũmĩrĩru nĩ kuuga atĩ gũtirĩ hingo tũngĩĩtigĩra. Ngũrani na ũguo, mũndũ ũheetwo ũũmĩrĩru nĩ Ngai nĩ oyaga ikinya o na angĩkorũo harĩ na maũndũ maratũma etigĩre.

IBURAHIMU ONANIRIE ŨŨMĨRĨRU NA NJĨRA IRĨKŨ? Iburahimu ndaarũmagĩrĩra mũingĩ. Iburahimu aarereirũo kũndũ andũ maathathayagia ngai nyingĩ cia mĩhianano. O na kũrĩ ũguo, ndetĩkĩririe gwĩtigĩra andũ gũtũme aage gwĩka ũrĩa oĩ nĩguo kwagĩrĩire. Ithenya rĩa ũguo, arĩ na ũũmĩrĩru, Iburahimu aarũmĩrĩire mũthiĩre ngũrani, agĩthuura gũthathaiya Jehova, Ngai “Ũrĩa-wĩ-Igũrũ-Mũno.”—Kĩambĩrĩria 14:21, 22.

Iburahimu aaigaga ũthathaiya wake harĩ Ngai ũrĩa wa ma mbere ya maũndũ ma kĩĩmwĩrĩ. Nĩ eeharĩirie gũtiga mũtũũrĩre mwega kũu Uru, athiĩ werũ-inĩ, arĩ na mwĩhoko biũ atĩ Jehova nĩ angĩamũhingĩirie mabataro make ma kĩĩmwĩrĩ. Ma nĩ atĩ, o ũrĩa mĩaka yahĩtũkaga, no kũhoteke Iburahimu nĩ eeciragia ũhoro wa maũndũ mamwe mega marĩa aakenagĩra arĩ Uru. Ĩndĩ Iburahimu aarĩ na ma atĩ hingo ciothe Jehova nĩ angĩamũhingĩirie mabataro make na ma famĩlĩ yake. Nĩ ũndũ wa Iburahimu kwĩhoka Jehova biũ arĩ we Ũrĩa wa bata makĩria ũtũũro-inĩ wake-rĩ, nĩ aagĩire na ũũmĩrĩru wa gwathĩkĩra watho wa Ngai.

TŨRERUTA ATĨA? No twĩgerekanie na Iburahimu na njĩra ya gũkũria ũũmĩrĩru wa gwathĩkĩra Jehova, o na angĩkorũo arĩa matũthiũrũrũkĩirie matireka ũguo. Kwa ngerekano-rĩ, Bibilia ĩrutanaga atĩ arĩa magĩa na wĩtĩkio harĩ Jehova Ngai, rĩngĩ na rĩngĩ no makarario nĩ arata kana andũ a famĩlĩ. (Johana 15:20) O na kũrĩ ũguo, twagĩa na ũũma biũ  wĩgiĩ maũndũ marĩa tũreruta megiĩ Jehova-rĩ, tũrĩtetagĩra wĩtĩkio witũ tũrĩ na gĩtĩo.—1 Petero 3:15.

Ningĩ nĩ tũrĩĩhokaga kĩĩranĩro kĩa Ngai atĩ nĩ arĩhingagĩria arĩa mamwĩtĩkĩtie mabataro mao. Mwĩhoko ta ũcio nĩ ũrĩtũteithagia gũkorũo na ũũmĩrĩru wa gũthingataga maũndũ ma kĩĩroho handũ ha gũkoragwo na mĩtangĩko ya maũndũ ma kĩĩmwĩrĩ ũtũũro-inĩ witũ. (Mathayo 6:33) Reke tuone ũrĩa famĩlĩ ĩmwe ĩkĩte ũguo.

Doug na Becky maarĩ na wendi wa gũthamĩra bũrũri-inĩ warĩ na bata mũnene wa ahunjia a ũhoro mwega wa Bibilia, o na gũtuĩka maarĩ na twana twĩrĩ tũnini. Thutha wa gwĩka ũthuthuria na kũhoya na kĩyo, nĩ maatuire itua rĩa gũthiĩ na mbere na mĩbango ĩyo. Doug oigire ũũ: “Ũũmĩrĩru nĩ wabataranagia nĩguo tuohe mĩrigo na tuumagare, tũtekũmenya wega ũrĩa maũndũ mangĩaikarire. Ĩndĩ, o kĩambĩrĩria-inĩ kĩa mĩbango iitũ, nĩ twarĩrĩirie kĩonereria kĩa Iburahimu na Sara. Gwĩcũrania ũrĩa meehokire Jehova na ũrĩa aathire na mbere na kũmateithia nĩ gwatwĩkĩrire hinya mũno.”

Ũhoro-inĩ wĩgiĩ ũtũũro wao thĩinĩ wa bũrũri mũgeni Doug oigire ũũ: “Tũrĩ arathime na njĩra nene.” Aatarĩirie ũũ: “Tondũ rĩu mũtũũrĩre witũ ndũkoragwo na maũndũ maingĩ-rĩ, tũhũthagĩra mahinda maingĩ hamwe twĩ famĩlĩ—wĩra-inĩ wa kũhunjia, kwaranĩria, na gũthaka na ciana citũ. Tũkoragwo na gĩkeno kĩnene nĩ ũndũ wa gũkorũo na mahinda maingĩ tũrĩ hamwe.”

Ma nĩ atĩ, ti andũ othe mangĩhota gwĩka ũgarũrũku mũnene ta ũcio. O na kũrĩ ũguo, ithuothe no twĩgerekanie na kĩonereria kĩa Iburahimu kũiga ũthathaiya witũ harĩ Ngai mbere, tũrĩ na mwĩhoko atĩ nĩ arĩtũteithagia. Tweka ũguo-rĩ, tũrũmagĩrĩra ũrĩa Bibilia yugaga tũkoragwo na ‘ũũmĩrĩru na tũkoigaga, Jehova nĩwe mũtũteithia; tũtingĩĩtigĩra.’—Ahibirania 13:5, 6.

[Mbica karatathi ka 7]

Mũtumia Mwende na Mwĩtigĩri Ngai

Sara aarĩ mũtumia wa mũthuri woĩkaine mũno nĩ ũndũ wa wĩtĩkio wake. Ĩndĩ, mũtumia ũcio mwĩtigĩri Ngai o nake nĩ aigĩte kĩonereria kĩega. Hatarĩ nganja, Bibilia nĩ ĩgwetete rĩĩtwa rĩake maita matatũ arĩ kĩonereria atumia arĩa etigĩri Ngai magĩrĩirũo nĩ kwĩgerekania nakĩo. (Isaia 51:1, 2; Ahibirania 11:11; 1 Petero 3:3-6) O na gũtuĩka Bibilia ndĩarĩtie maũndũ maingĩ megiĩ mũtumia ũcio ngatha-rĩ, nĩ tũhotaga kuona ngumo ciake njega.

Kwa ngerekano ta wĩcirie ũrĩa Sara aaiyũkirie ũhoro, rĩrĩa Iburahimu aamwĩrire atĩ Ngai oigĩte moime Uru. Hihi nĩ eekĩrĩire nganja kũrĩa meerĩtwo mathiĩ na gĩtũmi kĩa watho ũcio? Hihi nĩ aatangĩkagĩra mũno indo ciao cia kĩĩmwĩrĩ? Hihi nĩ aaiguire kĩeha nĩ ũndũ wa gũtiga arata ake na andũ a famĩlĩ yao, atekũmenya kana kũrĩ hingo akamona rĩngĩ? Hatarĩ nganja no mũhaka akorũo nĩ aathumbũragwo nĩ maũndũ macio. O na kũrĩ ũguo, oimagarire na mwĩyendero arĩ na mwĩhoko atĩ Jehova nĩ angĩamũrathimire nĩ ũndũ wa wathĩki wake.—Atũmwo 7:2, 3.

Makĩria ma gũkorũo arĩ ndungata njathĩki ya Ngai, Sara aarĩ mũtumia mwega mũno. Handũ ha gũcindana na mũthuri wake ũtongoria-inĩ wa maũndũ ma famĩlĩ, Sara aakũrĩtie wathĩki wa kuuma ngoro kwerekera mũthuri wake, akamũnyitaga mbaru arĩ na wendo agĩtongoria famĩlĩ yao. Nĩ ũndũ wa gwĩka ũguo, akĩĩgemia—agĩkorũo arĩ mũthaka nĩ ũndũ wa ngumo ciake njega cia ngoro thĩinĩ.—1 Petero 3:1-6.

Hihi ngumo ta icio no iteithie atumia ũmũthĩ? Jill, mũtumia ũikarĩte thĩinĩ wa kĩhiko kĩrĩ na gĩkeno makĩria ma mĩaka 30 oigire ũũ: “Kĩonereria gĩa Sara kĩndutĩte atĩ nĩ wega kwĩra mũthuri wakwa mawoni makwa itarĩ na guoya. O na kũrĩ ũguo, arĩ mũtwe wa famĩlĩ, mũthuri wakwa nĩwe wagĩrĩirũo gũtua itua rĩa mũico. Arĩkia gũtua itua rĩna, njagĩrĩirũo nĩ gwĩka o ũrĩa wothe ingĩhota ndigĩrĩre atĩ itua rĩu nĩ rĩagaacĩra.”

No kũhoteke ũndũ ũrĩa mũnene mũno tũngĩĩruta kuuma kũrĩ Sara nĩ atĩ: O na gũtuĩka aarĩ mũtumia kĩrorerwa-rĩ, Sara ndaigana kũreka ũthaka wake ũtũme agĩe na mwĩtĩo. (Kĩambĩrĩria 12:10-13) Handũ ha ũguo, nĩ ũndũ wa wĩnyihia aanyitaga Iburahimu mbaru hĩndĩ ya gĩkeno na ya moritũ ũtũũro-inĩ wao wothe. Hatarĩ nganja, marĩ mũthuri na mũtumia, Iburahimu na Sara nĩ meehokanĩte, maarĩ enyihia, na nĩ meendanĩte—o mũndũ nĩ aatũmaga ũrĩa ũngĩ agĩe na irathimo.