Aaperaat — angut sapiitsoq

Aaperaap ilaquttani kiffanilu Kana’animut aallarnissaminnut piareersartut isiginnaarpai. (1 Mosesi 12:1-5) Inuppassuarnut pilersugassaminut taakkununnga akisussaassusermik misigisimanera sakkortuvoq. ‘Nunami takornakkanniitilluta nunap piisigut qanoq pilersussavakka? Maani Urimi — pigissaarfiusumi, nunami naggorissumi, imeqarluartumi ivigartorfigissaarfiusumilu — tamanna ajornannginnerussanngila? Taavami nunagiligassatsinni napparsimaleruma toqugumaluunniit? Ilaquttakka kiap pilersussavai?’ Aaperaat tamakkuninnga isumakuluuteqarsimagaluaruni tamanna unissutiginngilaa. Qanorluunniit pisoqaraluarpat Guutip peqqussutaasa naalannissaat aalajangiusimavaa — tassa sapiissusivik.

SAPIISSUSEQ SUUA? Inuk sapiitsoq sapiutiasuunngilaq aamma sanngiitsuunngilaq qunutuujunanilu. Inuk sapiitsuugaluarluni annilaangasinnaavoq. Guutimeersumilli sapiissuseqartoq annilaangagaluarluni iliuuseqartarpoq.

SAPIISSUTSINI QANOQ ERSERSIPPAA? Aaperaap amerlanerussuteqartunit allaanerunissani merserinngilaa. Innuttaaqatigiinni guutinik guutillu assinginik assigiinngitsorpassuarnik pallorfiginniffiusumi peroriartorpoq. Inuit allat qunugiinnarlugit eqqortuusutut ilisimasani iliuuserinngitsoorneq ajorpai. Sapiilluni allatut inooriaaseqarnikkut Guuti ataasiinnaq — ‘Guuti Qutsinnerussaartoq’ — kiffartorfiginiarlugu aalajangerpoq. — 1 Mosesi 14:21, 22.

Aaperaap Guutimik ilumoortumik pallorfiginninneq nunap piisigut soqutigisaninngarnit pingaartinneruaa. Urimi inuuneq ilorrisimaarnartoq kajumilluni qimappaa inoqajuitsumukarlunilu, qularutiginagu Jehovap nunap piisigut pisariaqartitaminik isumagiumaaraani. Imaassinnaavoq ukiut ingerlaneranni Aaperaap Urimi ilorrisimaarutigisartakkami ilai eqqarsaatigisarai. Upperilluinnarpaali Jehovap ilaquttanilu pilersortuarumaaraatik. Jehovamut qanittumik attaveqarnikkut inuunerminilu taassuminnga pingaarnerpaatitsinikkut peqqussutaanut naalannissaminut sapiissuseqalertarpoq.

SUNIK ILINNIARFIGISINNAAVARPUT? Aaperaat ilaarsinnaavarput Jehovamut naalannissamut sapiissuseqalerneruniarnikkut avatangiisivut inuit allat taassumunnga naalanngikkaluartut. Biibilimi paasitinneqarpugut Jehovamut Guutimut uppernerminnik aalajangiusimannittut akerlilersorneqassasut, immaqa ikinngutinit ilaquttanillu ajunngitsumik isumalinnik. (Johannesi 15:20) Jehovali  pillugu ilikkakkatta eqqortuuneri upperilluinnaratsigit uppernerput illersortarparput — soorunami ataqqinnittumik. — 1 Petrusi 3:15, 16.

Aamma Guutip imminik tunaarinnittunik isumassuiumalluni neriorsuutaa upperisinnaavarput. Taamatut tatiginninnikkut nunap piininngarnit anersaakkut ittunik pingaarnerpaatitsinissatsinnut sapiissuseqalertarpugut. (Matthæusi 6:33) Ilaqutariit ataatsit qanoq iliorsimanersut malugiuk.

Doug Beckylu nukangasunik marlunnik erneqaraluarlutik nunamut nutaarsiassaq nuannersoq Biibilimeersoq pillugu oqaluussisartunik amerlanerusunik pisariaqartitsiffiusumut nuukkusupput. Misissueqqissaareerlutik Guutimullu qamannga pisumik qinoreeramik aalajangerput pilersaarutitik piviusunngortinniarlugit. “Nalullugu qanorpiaq ingerlassanerluta qitornavut nunamut allamut nooqatigigatsigit sapiiserpugut,” Doug oqarpoq. “Nuussanerlutali aalajangertinnata Aaperaap Sarallu maligassiaat eqqartortarparput. Jehovamik qanoq tatiginnissimanerannik — taassumanngalu sumiginnarneqanngisaannarnerannik — eqqarsaatiginninneq iluaqutigilluarparput.”

Nunami takornakkaminni inuuneq pillugu Doug ima oqarpoq: “Pilluaqqusaangaarpugut! Inooriaaserput siornatigornit pisariinnerummat ullup ilarujussua ilaqutariittut atorsinnaavarput — oqaluusseqatigiittarpugut, oqaloqatigiittarpugut nukappiaqqallu pinnguaqatigisarlugit. Kiffaanngissuseqarnermik misigineruvoq oqaasertaleruminaatsoq.”

Soorunami kikkut tamarmik taama allannguitigisinnaanngillat. Tamattali Aaperaat ilaarsinnaavarput Guutimik pallorfiginninnermik pingaartitsinitsigut tatigalugu isumassorumaaraatigut. Taamaalioraangatta Biibilimi kajumissaarut malillugu “nakimanata oqarsinnaavugut: [Jehova] ikiortigaara, sioorassanngilanga”. — Hebræerit 13:5, 6.

[Qupp. 7-mi Ungalusaq/​assiliartaq]

Guutimik mianerinnittoq nuliaasorlu asasaq

Sara ueqarpoq nalissaqanngitsumik uppertuusumik. Namminerlu arnaavoq Guutimik mianerinnittoq maligassaalluartoq. Allaammi Biibilimi pingasoriarluni arnanut Guutimik mianerinnittunut maligassaalluartutut eqqaaneqarpoq. (Esaja 51:1, 2; Hebræerit 11:11; 1 Petrusi 3:3-6) Arnaq maluginiarnartoq taanna pillugu paasissutissat Biibilimiittut amerlagisassaanngikkaluartut paasivarput arnaasoq pissuserilluartoq.

Assersuutigalugu eqqarsaatigiuk Sara qanoq qisuariaqqaarsimassanersoq Aaperaap oqaluttuummani Guuti peqqusisimasoq Uri qimassagaat. Sooq aallassanerlutik sumunnassanerlutillu eqqarsaatigaa? Nunap piinut tunngasut isumakuluutigai? Ilaquttat ikinngutillu takoqqissanerlugit nalugamiuk aliasuppa? Ilumut taamaattarsimassaaq. Aallarnissaminulli piumassuseqarpoq naalannini pillugu Jehovap pilluaqqujumaaraani tatigigamiuk. — Apustilit Suliaat 7:2, 3.

Sara tassaaginnanngilaq Guutimut kiffaasoq naalattoq aammali nuliatsialaavoq. Ilaqutariinni kina aalajangiisuussanersoq pillugu uini unammillernagu uummammik pisumik ataqqivaa aalajangiigaangallu asannilluni tapersersortarlugu. Taama pissuserinnermigut imminut ‘pinnersartarpoq’. — 1 Petrusi 3:1-6.

Ullumikkut nuliaasut taamatut pissuserinneq iluaqutigisinnaavaat? “Sarap maligassiaanit ilikkarpara isumaga annillugu uiga ammasumik oqaloqatigisinnaallugu,” arnaq Jillimik atilik, ukiuni 30-ni pilluarluni aappaqareersimasoq, oqarpoq. Imalu nangippoq: “Uigali ilaqutariinni ittuugami inaarutaasumik aalajangiinissaq akisussaaffigaa. Aalajangeereeraangat aalajangiineratut pisoqaqqullugu uanga sapinngisara tamaat iliuuseqarniartussaavunga.”

Saramik oqaluttuamit ilinniutigisinnaasarput maluginiarnartoq suli alla unaavoq: Arnaagaluarluni pinningaartoq isikkuni makitasuunnguutiginngisaannarpaa. (1 Mosesi 12:10-13) Maniguulluni tamatigorluinnaq Aaperaat tapersersortarpaa. Aaperaat Saralu aappariiupput aalajaallutillu maniguullutillu asannittut. Ilumut imminnut pilluaatissittarput.