Abalahama Muntu wa Bukankamane

Abalahama watale kisaka ne bengidi bandi pobelongolola mwanda wa kwenda ku Kenani. (Ngalwilo 12:1-5) Pa kulela kino kibumbo kikatampe kya bantu badi mu lupusa lwandi, Abalahama wamone amba udi bine na kiselwa kikatampe. Lelo ukavuija namani bisakibwa byabo bya ku ngitu mu ntanda yakayukile? Uno mwingilo wādi ubwanya kumupēlela mu Ulu, ntanda ya bupeta mudi madyo mavule, bumeni bwa nshi ne mema mavule. Lelo bikekala namani shi wabela nansha kufwa mu ino ntanda ya bweni? I ani ukalela kyandi kisaka? Nansha shi Abalahama wāikele na malangalanga pa bino, ino kādipo wa kuleka moyo wandi umutyumune mu bidyoma. Nansha shi byāikele namani, wāsumininwe kulonga’po kintu, kukōkela misoñanya ya Leza—kino kyo kiyukeno kya bukankamane bwa binebine.

 BUKANKAMANE I BIKA? I ngikadilo ya kwikala mukomo, wampikwa moyo, kadi nkanka—kinyuma kya bumvu nansha nzuzu. Kwikala mukankamane kekushintululapo amba ketubwanyapo kwikala na moyo nansha dimo. Inoko, muntu udi na bukankamane bupāna Leza uloñanga kintu nansha ke mu kitatyi kyadi na moyo.

LELO ABAHAMA WĀLOMBWELE BUKANKAMANE NAMANI? Abalahama kādipo usaka kulonda kibumbo. Wātamine mu kifuko mwādi bantu batōta baleza bavule ne bankishi. Nansha nankyo, kālekelepo moyo wa kutyina byādi bya kulanga bakwabo umukankaje kulonga byobya byaādi uyukile bu byoloke. Inoko, Abalahama kwampikwa moyo kalondelepo kibumbo mu būmi bwandi, wātongele kutōta Leza umo kete—Yehova, “Leza Mwine Mukatakata Mwine.”—Ngalwilo 14:21, 22.

Abalahama wādi utūdile butōtyi bwandi bwa kutōta Leza wa bine kumeso kwa tumweno twa ku ngitu. Wāitabije kushiya būmi bulumbuluke bwaādi nabo mu Ulu, waenda mu ntanda mutuputupu, ukulupile bininge amba Yehova ukavuija bisakibwa byandi bya ku ngitu. Na bubine, myaka pa kupita’po, Abalahama wādi ukokeja kuvuluka bintu biyampe byaādi nabyo mu Ulu. Ino Abalahama wādi ukulupile amba Yehova ukamukwatakanya nyeke, aye ne kyandi kisaka. Abalahama pa kulamata kudi Yehova bu ye Muntu wa mvubu mpata mu būmi bwandi, wāmwene bukankamane bwa kukōkela misoñanya ya Leza.

LE I ÑENI’KA YOTUBOILA’KO? Tubwanya kwiula Abalahama na kutamija bukankamane bwa kukōkela Yehova, nansha shi bantu betujokolokele kebamukōkelepo. Kimfwa, Bible ufundija amba boba bemanije mu kukulupila kwabo mudi Yehova Leza bakalwibwa, padi na balunda nabo ba binebine nansha na babutule. (Yoano 15:20) Kitatyi kyotwitabija amba byobya byotwefundile padi Yehova i bya bine, twimanijanga pototo mu nkulupilo yetu, ne tukeibingija na bulēme.—1 Petelo 3:15.

Kadi tubwanya kukulupila mulao wa Leza wa amba ukakwatakanya boba betabije mwadi. Lukulupilo lwa uno muswelo lwitupanga bukankamane bwa kwimika būmi bwetu pa bintu bya ku mushipiditu pa kyaba kya pa bintu bya ku ngitu. (Mateo 6:33) Tala mwalongele kisaka kimo uno muswelo.

Nansha byobadi na bana babidi bankasampe, Doug ne Becky basakile kuvilukila ku ntanda kwadi kusakilwa basapudi bavule ba myanda miyampe ya mu Bible. Pa kupwa kulonga bukimbi na katentekeji ne kulombela na kininga, bakwete butyibi bwa kufikidija mpango yabo. Doug unena’mba, “byadi bilomba bukankamane pa kuviluka na bana batyetye, kwampikwa kuyuka motukekadila. Ino dibajinji potwadi tukwata buno butyibi, twesambile pa kimfwa kya ba Abalahama ne Sala. Twalangulukila pa muswelo obākulupile mudi Yehova—ne pa muswelo wādi wibakwasha Yehova—bine byetukweshe bya binebine.”

Doug unena pa mwanda utala būmi bwabo mu ntanda ya bweni amba “Twaeselwe mu muswelo utulumukwa.” Ushintulula amba: “Tubwanya kupityija bitatyi bivule pamo na kisaka mwanda būmi bwetu i bupēle bininge—kusapula, kwisamba batwe bene na bene, ne kukaya na betu bana. Bine kino kyetupele bwana-pabo kebuneneka.”

Na bubine, ke muntu yensepo ubwanya kujadika bintu uno muswelo. Kadi, batwe bonso tukokeja kwiula kimfwa kya Abalahama na kutangidija kumeso butōtyi botutōta Leza, koku tukulupile amba uketukwatakanya. Shi tulonge namino, nabya twibevwanije kidyumu kya mu Bible kya amba, “e po twisambila ne bukankamane ponka’mba: Yehova i mukwashi wami; nkikakwatwapo moyo, mhm.”—Bahebelu 13:5, 6.

 [Kapango/​Kifwatulo pa paje 8]

Mwana-Mukaji Wakaminwe Leza Kadi Mukaji Mulēme

Sala wādi usongelwe na mwana-mulume wa lwitabijo lwa kutendelwa. Ino uno mwana-mukaji wakaminwe Leza wāshile kimfwa kifwaninwe kulondwa. Na bubine, Bible umutelele misunsa isatu pa dijina bu mwana-mukaji uletele kimfwa kiyampe kya kwiula. (Isaya 51:1, 2; Bahebelu 11:11; 1 Petelo 3:3-6) Nansha Bisonekwa byobisokwele’tu myanda mityetye itala uno mwana-mukaji wakutendelwa, ino tubwanya kuyuka ngikadilo yandi miyampe.

Langa’po bidi byālongele’po dibajinji Sala, kitatyi kyāmusapwidile Abalahama buludiki bwa kuviluka mu Ulu. Le wēipangwile kwine kobādi bakwenda ne mwanda waka? Lelo wādi utele mutyima bininge ku bisakibwa byabo bya ku ngitu? Le wāivwene bulanda pa mulangwe wa kushiya balunda nandi ne kisaka, pampikwa kuyuka shi bakemonanga nabo dikwabo? Ne kutatana kwine mpika, ino milangwe yāmwiile mu ñeni. Nansha nankyo, wāitabije kufunduka, ukulupile amba Yehova ukamwesela pangala pa kikōkeji kyandi.—Bilongwa 7:2, 3.

Kadi Sala kādipo’tu enka bu mwingidi wa Leza wa kikōkeji, ino wādi mukaji muyampe. Pa kyaba kya kufwila na wandi mulume kupwija myanda mu kisaka, Sala wātamije bulēme kudi wandi mulume, wāmukwatakanya na buswe paādi wendeja kyabo kisaka. Pa kulonga namino, Sala wēlumbulwile aye mwine—kwilombola bu muyampe—kupityila ku ngikadilo yandi miyampe ya mutyima.—1 Petelo 3:1-6.

Lelo bakaji babwanya kumwena mu ino ngikadilo dyalelo? Mwana-mukaji umo witwa bu Jill, walongele myaka 30 ne kupita mu busongi bwa nsangaji, unena’mba, “kimfwa kya Sala i nkimfundije amba, mfwaninwe kwikala na bwanapabo bwa kwisamba na wami mulume ne kumulombola milangwe yami.” Ubweja’ko amba, “Kyaba kimo kyonka, wami mulume byadi mutwe wa kisaka i aye udi na kiselwa kya kukwata butyibi bwa mfulo. Shi webukwata, ami nami mfwaninwe kulonga bukomo bonso bwa kwibulonda.”

Padi bufundiji bukatampe botwifundila kudi Sala i buno: Nansha byaādi mupopoke, Sala kālekelepo buya bwandi bwa mpala bumulengeje etatule. (Ngalwilo 12:10-13) Ino, wākwatakenye Abalahama na kwityepeja mu bitatyi biyampe nansha bibi bine mu būmi bwabo bonso. Ne kutatana kwine mpika, ba Abalahama ne Sala bādi ba mulume ne mukaji ba lwitabijo, ba kwityepeja ne ba buswe—kisaka kyāletele bine madyese mu busongi bwabo.