Abrahama Mi Huaisen Chu

Kanaan rama pêm tûra a chhûngkua leh a chhiahhlawhte an inbuatsaih lai chu Abrahama chuan a lo thlîr reng a. (Genesis 12:1-5) A châwm ngai chûng mi tam takte a han en chuan, Abrahama chuan an chunga mawhphurhna a neihzia chu a hre chhuak a ni. Hriat loh rama an awm laiin, engtin nge an tisa lam mamawhte chu a pêk ang? Ran tlatna tûr hnim hring zau tak, lei ṭha, leh tui hnianghnârna hmun hausa tak, Ur khawpuiah khân an tisa mamawh pêk chu a âwlsam zâwk ang em? Chu ram tharah chuan dam lo emaw, thi emaw ta se engtin nge ni ang? Tuin nge a chhûngkua chu enkawl ta ang? Abrahama’n chutiang lungkhamna a nei a nih chuan, chu chuan engmah ti thei lovin a siam lo. Eng pawh lo thleng dâwn se, Pathian thupêk zâwma thiltih chu a tum tlat a ni—huaisenna dik tak a va ni êm!

HUAISENA CHU ENG NGE NI? Chu chu chakna, hlauh nei lohna, leh dawl mai ngai lohna a ni a—tîm emaw, dâwihzep emaw kalh chiah mizia a ni. Mi huaisen nih chu kan hlau ngai lo tihna erawh a ni kher lo. Chu ai mah chuan, Pathian pêk huaisenna nei mi chuan hlau chung pawhin thil ti tûrin hma a la zâwk ṭhîn.

ENGTIN NGE ABRAHAMA’N HUAISENNA A TAR LAN? Abrahama chu mipui kalh a inhuam. Abrahama chu mite’n pathiante leh milem tam takte an biakna hmunah a seilian a. Mahse, mi dangte ngaih dân tûr a hlauhna chu thil dik nia a hriatte tih loh phah nân a hmang lo. Abrahama chuan huaisen takin nun kawng danglam tak chu a zawh zâwk a, Pathian awmchhun—“Pathian Chungnungbera,” Jehova biak chu a thlang a ni.—Genesis 14:21-23.

Abrahama chuan Pathian dik a biakna chu hausakna aiin a dah pawimawh zâwk. Jehova chuan a tisa lam mamawhte a pe dâwn tih ring tlat chungin Ur khawpuia a hausakna kalsana thlalêr lam pan chu a inhuam a ni. Kumte a lo râl zêl chuan, Abrahama chuan Ur khawpuia nuamsa taka a awm lai nîte chu a ngaihtuah lêt ngei ang. Mahse, Jehova’n amah leh a chhûngte chu a enkawl reng dâwn tih a hre chiang a. A nuna Mi pawimawh ber anga Jehova chu vuan tlatin, Abrahama chuan Pathian thupêkte zâwm tûrin huaisenna a nei a ni.

ENG NGE KAN ZIR TUR CHU? Kan bula mite’n Jehova thu an zâwm lo a ni pawhin, zâwm tûra huaisenna neiin Abrahama kan entawn thei a ni. Entîr nân, Bible chuan Pathian Jehova lama ṭangtute chu an hma ngaitu ṭhiante emaw, chhûngte emawin an dodâl mai thei tih a zirtîr a. (Johana  15:20) Mahse, Jehova chungchâng kan zirte a dik tih kan rin tlat hian, mi dangte zahthiam takin kan rinna atân kan ding nghet a ni.—1 Petera 3:15.

Amah ringtute chu a enkawl dâwn tih Pathian thutiam pawh kan ring thei a. Chutiang rinna chuan khawvêl sum leh pai aiin thlarau lam thil ngai pawimawh zâwk tûrin huaisenna min pe ang. (Matthaia 6:33) Chhûngkaw pakhatin chutiang an tih dân i lo en ang u.

Fapa naupang pahnih an nei chung pawhin, Doug-a leh Becky-i chuan Bible chanchin ṭha hriltu mamawh zualna rama insawn chu an duh a. Chîk taka an zir a, ngun taka an ṭawngṭai hnu chuan, an ruahmanna kal tlangpui chu an rêl thlu ta a. Doug-a chuan: “Kan awm dân tûr chiah hre lo va, naupang hruai a, pêm chhuak tûr chuan huaisen a ngai. Mahse, pêm kan rilrûk ṭan aṭang khân, Abrahama leh Sari te entawn tûr siam chu kan sawiho va. Jehova an rinchhan dân—leh anmahni a ṭanpui dân—ngaihtuahna chuan min ṭanpui tak zet a ni,” a ti.

Ram danga an nun dân chungchâng sawiin Doug-a chuan: “Malsâwmna nasa tak kan dawng,” a ti a. “Hetah hian kan nun chu a tluangtlam lehzual a, chhûngkua angin nî tin hun tam tak kan hmang thei a—thu kan hrilh a, kan titi tlâng bawk a, naupangte nên pawh kan inkhêl ṭhîn bawk. Hetiang hun ṭha kan neih avângin nuam kan ti hle,” tiin a hrilhfiah a ni.

Mi tin chuan chutiang insiam remna nasa tak chu an nei thei lo ngei mai. Mahse, Pathianin min ṭanpui ang tih ring tlat chungin, amah kan biakna dah pawimawh berin Abrahama chu kan entawn ṭheuh thei a ni. Chutianga kan tih chuan: ‘Huai taka “Lalpa chu mi ṭanpuitu a ni, ka hlau lo vang,” ti’ tûra Bible fuihna chu kan zâwm a ni ang. —Hebrai 13:5, 6. (w12-E 01/01)

[Phêk 7-naa bâwm]

Pathian Ngaihsak Tak leh Nupui Hlu Tak

Sari chuan rinna kawnga mi challang tak chu pasalah a nei a. Mahse, Pathian ngaihsaktu he hmeichhia pawh hian entawn tûr chhinchhiah tlâk tak a siam a ni. Dik takin, Bible chuan Pathian ngaihsak hmeichhiate tâna entawn tûr anga sawiin a hming vawi thum lai a târ lang a. (Isaia 51:1, 2; Hebrai 11:11; 1 Petera 3:3-6) Bible chuan a chanchin sawi tam lo mah se, he hmeichhe chhinchhiah tlâk tak hian mize ṭhate a nei tih erawh kan hre thei a ni.

Entîr nân, Ur khawpui chhuahsan tûra Pathian kaihhruaina chungchâng Abrahama’n a hriattîr laia Sari chhân lêt dân tûr chu han ngaihtuah teh. An kalna tûr leh an kal chhan chu a zâwt em? An thil mamawhte chungchâng a lungkham em? A ṭhiante leh a chhûngkhatte chu a hmu leh ngai dâwn lo pawh a ni thei a, hmu leh dâwn pawh ni tehrêng se, a hmuh leh hun tûr a hriat loh avângin a lungchhia em? Chûng thilte chu a ngaihtuah ang tih rinhlelh rual a ni lo. Chuti chung pawh chuan, a thuâwihna avângin Jehova’n mal a sâwm dâwn tih ring tlat chungin, inhuam takin a kal chhuak a ni.—Tirhkohte 7:2, 3.

Pathian chhiahhlawh thuâwih tak a nih bâkah, Sari chu nupui ṭha tak pawh a ni bawk a. Chhûngkaw thila a pasal thuneihna chuh ai chuan, Sari chuan pasal zahna thûk tak neiin, Abrahama’n chhûngkua a kaihhruaina chu ṭha takin a thlâwp a ni. Chutianga tiin, chhûngril lama mize ṭhain a inthuam mawi a ni.—1 Petera 3:1-6.

Tûn laia nupuite chuan chûng miziate chu an hlâwkpui thei em? Kum 30 chuang hlim taka pasal nei tawh, Jill-i chuan heti hian a sawi: “Sari entawn tûr siam chuan ka pasal hnêna ka ngaih dân zalên taka hrilh tûr ka ni tih min zirtîr a. Chutih rual chuan, chhûngkaw lû a nih angin, ka pasal chuan thu tlûkna siam tûrin mawhphurhna a nei a. Chutianga thu tlûkna a siam tawh chuan, chu mi tihlawhtling tûra theih tâwp chhuah chu ka hna a ni,” tiin.

Sari hnên aṭanga zir tûr ṭha ber chu hei hi a ni thei: Sari chu hmêl ṭha hle mah se, a hmêl thatna chu chapo phah nân a hmang lo, tih hi. (Genesis 12:10-13) Hun nuam leh hrehawmah pawh Abrahama chu inngaitlâwm takin a thlâwp zâwk a ni. Abrahama leh Sari chu mi rinawm, inngaitlâwm, leh nupa duhawm tak, kawppuite tâna malsâwmna ni ve ve an ni tih chu rinhlelh rual a ni lo.