Abrahán tˈixy ko jyiiky myëguˈuk etsë tyuumbëtëjk nyayjëjpˈijxëndë parë nyëjkxäˈändë Canaán (Génesis 12:1-5). Nimayë jäˈäy pyatsoonäˈänëdë ets waˈan tjawë ko mëk ja tuunk tyukäˈäjäˈänyëty. Pes ¿wiˈix tmoˈoyëdë fyamilyë tijaty tëgoyˈäjtxëp mä tuˈugë lugäär diˈib kyaj tˈixyˈaty? ¿Këdii mas oyxyëp tkuentˈaty jam Ur mä yˈoyëty ja naxwinyëdë, jyamëtyë nëë etsë jëyujk jeˈxy? ¿Ti tun jatëdëp ko pyäˈämbatët o yˈoogët mä ja lugäär mä nyijkxy? ¿Pën ja fyamilyë kuentˈatëdëp? Waˈanë Abrahán ojts tmëmay tmëdäjy, per kyaj tnaˈijxy ets yajtuˈuwëˈëmëdët. Të netyë wyinmäˈäny tpëjtaˈaky parë tmëmëdowäˈänyë Dios, oy ti tyun jyatëdët. ¡Mëjwiin kajaa dyaˈijxë jotmëkˈäjtën!

¿TI YˈANDIJPY JOTMËKˈÄJTËN? Yëˈë ko tuˈugë jäˈäy kyaj ti tjëjptsëˈëgë ets mbäät twinguwäˈägë mëkpë jotmay. Kyaj ti yˈatsëˈëgëty o yaˈëxtëkëwaˈagyëty. Per kyaj tˈandijy ko ninäˈä kyatuktëkëtyë tsëˈëgë, pes yëˈë Dios jotmëkmooyëp parë ttunët tijaty, oy jyatsëˈëgë.

¿WIˈIXË ABRAHÁN DYAˈIJXË JOTMËKˈÄJTËN? Ko kyaj ojts jyukyˈaty extëm ja jäˈäyëty diˈib mä tadë tiempë. Abrahán jam yeˈky pyejty mä jäˈäy tˈawdattë mayë dios etsë awinax. Per xëmë ttuuny diˈib oy, kyaj ttsëˈkë wiˈix ja jäˈäy wyinmayët. Yaˈijxë jotmëkˈäjtën ko jyukyˈajty tëgatsy ets yëˈëyë yˈawdäjt tuˈugë Dios: Jyobaa, diˈib ijtp “jantsy këjxm” (Génesis 14:21, 22).

Abrahán yëˈë jëjpˈam pyëjtak tijatyë Dios jyaˈäjtypy ets kyaj tijaty myëdäjt jyaygyajp. Ojts tsyoony Ur mä nety jantsy oyë xyëë tiempë dyajnaxy ets ojts nyijkxy mä ja lugäärë äänëˈëk tëtsëˈëkpë. Seguurë yˈijty ko Dios kyaj myastuˈudäˈänyëty. Waˈan ko ja tiempë nyajxy tjamyejtsy tijatyë nety të tnikeˈeky Ur. Per xëmë yˈijty seguurë ko Jyobaa moˈoyanëp tijaty yajtëgoyˈajtypy mëdë fyamilyë. Yëˈë jëjpˈam pyëjtakë Jyobaa, pääty jyotmëktaky tmëmëdowët tijaty tukˈanaˈamë.

¿TI XYTYUKNIˈˈIJXËM? Tim jawyiin, tsojkëp nˈijtëm jotmëk ets nmëmëdoˈojëmë Dios oyë jäˈäy duˈun tkatundët. Biiblyë jyënaˈany ko pënaty pyuwäˈkëdëbë Jyobaa yaˈˈaxëkˈixandëp, mbäädë myëtnaymyaayëbë o jyiiky myëguˈuk (Fwank 15:20). Per kom ijtëm seguurë ko jantsy tëyˈäjtën diˈib të nnijäˈäjëm mä Dios, ta kyaj ntsëˈkëm nimaytyakëm wintsëˈkën myëët ja nmëbëjkënˈäjtëm (1 Peedrʉ 3:15).

 Pën nmëbëjkëmë Dios, ta xymyoˈoyäˈänëm tijaty xytyëgoyˈäjtxëm. Ets pën ijtëm seguurë ko tyunaampy duˈun, ta nyaˈijxëm ja jotmëkˈäjtën ets nbëjtakëm aduˈuk ja winmäˈäny mä Diosë tyuunk ets kyaj nmëmäˈäy nmëdäjëm ja jukyˈäjt madakën (Matewʉ 6:33). Min nˈokˈijxëm wiˈix tuˈugë familyë të ttuny mä tyäˈädë tiempë.

Doug mëdë Becky, diˈib majtskë yˈuˈunk mutskatynyëm, tsyojkënyëˈäjttëbë nety nyëjkxäˈändë mä tuˈugë paˈis mä tyëgoyˈaty pënaty kyäjpxwäˈkxëbë oybyë ayuk. Ta ko yajxon tniwinmäˈäyëdë ets tmënuˈkxtaktë Dios, ta ttuknibëjtakëdë nyëjkxäˈändë. Doug jyënaˈany: “Tsojkëbë netyë jotmëkˈäjtën parëts nmëtsoonëdë nˈënäˈkuˈunk, pes kyajtsë nety nnijawë wiˈixëts jam nˈitäˈändë. Pääty, kojëts niwinmäˈäyëdë ntsoonäˈändë, tajëts ojts nˈëxpëktë mä yajmaytyaˈagyë Abrahán mëdë Sara. Kajaajëts ojts xyajwinmaytyë wiˈix ttukˈijxpajttë Jyobaa ets ko ninäˈä kyanaˈijxëdë”.

¿Wiˈix wyimbëtseemy ko Doug mëdë Becky ojts nyëjkxtë wiink paˈis? Doug jyënaˈany: “Mëjwiin kajaajëts të nyajkunuˈkxtë. Kom tyam adëyëtsë njukyˈäjtënë nyajnaxtë, nmëdäjttëbëts niˈigyë tiempë parëts tuˈugyë nˈittët, extëm kojëts ngäjpxwäˈkxtë, ngäjpx nmaytyäˈäktëts ets nˈëyëˈëk nguyattëts mëdëtsë nˈënäˈkuˈunk. Kyajëts mbäät nimaytyaˈaky wiˈixëts jantsy jotkujk nnayjawëty”.

Kyaj mbäät niˈamukë jäˈäy dyajtëgatsy duˈunë jyukyˈäjtën. Per mbäät niˈamukë nbanëjkxëmë yˈijxpajtënë Abrahán ko jëjpˈam nbëjtakëmë Diosë tyuunk ets nmëbëjkëm ko xymyoˈoyäˈänëm tijaty xytyëgoyˈäjtxëm. Duˈuntsoo mbäät “amumduˈukjot njënäˈänëm: Yëˈë Nintsënˈäjtëm Dios yëˈëts xypyudëjkëp. Kyajts ntsëˈëgët” (Ebreeʉsʉty 13:5, 6).

[Rekuäädrë mëdë dibujë diˈib miimp mä pajina 7]

Tuˈugë toxytyëjk diˈibë Dios myëmëdoo ets jantsy oy yˈijty mëdë nyaˈay

Sara yëˈë nety nyaˈayˈajtypy tuˈugë yetyëjk diˈib mëk myëbejkypyë Dios, per yëˈë nan yäjkë oybyë ijxpajtën, pes mä Biiblyë tëgëkˈok yajmaytyaˈaky extëmë ijxpajtën parë toxytyëjkëty tpanëjkxtët (Isaías 51:1, 2; Hebreos 11:11; 1 Peedrʉ 3:3-6). Oy kyaj nëgoo yajnimaytyaˈaky mä Biiblyë, mbäät nbawinmäˈäyëm wiˈix jyaˈayˈajty.

Extëm nˈokpëjtakëm, ¿wiˈixëdaa Sara jyënany ko Dios tˈanmääyë Abrahán parë tsyoonët Ur? ¿Ojtsëdaa dyajtëy mä nyëjkxäˈändë ets tiko? ¿Ojtsëdaa tmëjotmaybyaaty mä tsyëënëyäˈändë? ¿Ojtsëdaa jyotmaytyuktëkë ko kyaj tnijawë pën naybyäädanëdëp jatëgok mët ja jyiiky myëguˈuk etsë myëtnaymyaayëbë diˈib nyikaˈagaampy? Waˈan ojts tmëmay tmëdäjy. Per ojts tsyoony mët ko myëbëjk ko Jyobaa kunuˈkxanëp ko tmëmëdowët (Apostʉlʉty 7:2, 3).

Perë Sara kyaj jeˈeyë tmëmëdooyë Dios, nan oy yˈijty mëdë nyaˈay. Pes ninäˈä ojts tkawinwäˈknaxäˈäny mä wiˈix tijaty yajtunët. Xëmë twintsëˈkë nyaˈay mëjwiin kajaa ets tpudëjkë xondaˈakyˈää xondaˈakyjyot mä tijaty tyuknibëjtakë. Ja jyaˈayˈäjtën yëˈë diˈib yaˈoygyëxëˈkë ets yajtsujtëjkë (1 Peedrʉ 3:1-6).

¿Mbäät tyamë toxytyëjk kasäädë pyudëkëdë duˈumbë jäˈäyˈäjtën? Jill, tuˈugë toxytyëjk diˈib 30 jëmëjt kujk kyasäädëˈaty agujk jotkujk, jyënaˈany: “Yˈijxpajtënë Sara yëˈëjëts xytyukniˈˈijxëp ko kyaj yˈaxëëgëty kojëtsë nyaˈay nˈanëëmët wiˈixëts nwinmay. Per xëmëts nyaˈity nwinmäˈänyoty ko yëˈë ijtp këbäjk ets diˈib nyigajpxypy wiˈix tijaty yajtunët. Ets ko ttuknibëjtakënë wiˈix ti yajtunäˈäny, tajëts xypyaaty etsëts nbudëkët”.

Ja tuk peky diˈibë Sara yˈijxpajtënë mëjwiin kajaa xytyukniˈˈijxëm, yëˈë ko ninäˈä ojts kyanayajnaxyëty mëj këjxm mët ko tsyujëty (Génesis 12:10-13). Xëmë yˈijty yujy tudaˈaky ets tpudëjkë ja Abrahán oy jyotkujkˈäjttë ets oy tpattë amay jotmay. Duˈunë duˈun, Abrahán mëdë Sara kyaj nyaymyastutëdë, ijttë yujy tudaˈaky, naytsyojkëdë ets nimajtsk ttukˈoyˈäjttë.